9–15 ʻAokosi

Tokāteline mo e Ngaahi Fuakava 88

“Fokotuʻu … ha Fale ʻo e ʻOtuá”

ʻI hoʻo hoko ko e faiako ʻo e ongoongoleleí, ʻoku ʻi ai ho fatongia ke tokoniʻi hoʻo kalasí ke nau “feakoʻiʻaki ʻiate [kinautolu] ʻa e tokāteline ʻo e puleʻangá” mo e “ngaahi lea ʻo e potó” (Tokāteline mo e Ngaahi Fuakava 88:77, 118). Makehe mei hono vahevahe ʻo e ngaahi meʻa kuo ueʻi koe ke ke akoʻi mei he Tokāteline mo e Ngaahi Fuakava 88, poupouʻi ʻa e kau mēmipa ʻo e kalasí ke nau feakoʻiʻaki e meʻa kuo nau akó.

Lekooti Hoʻo Ngaahi Ongó

Fakaafeʻi e Feʻinasiʻakí

Ko e taimi ʻe niʻihi ʻe lava ke ueʻi ʻe ha fakatātā ʻa e fevahevaheʻakí. Te ke lava ʻo fakaʻaliʻali ha fakatātā ʻo ha vaʻa ʻōlive (pe tā ha vaʻa ʻōlive ʻi he palakipoé) pea fakaafeʻi ʻa e kau mēmipa ʻo e kalasí ke nau vahevahe ha ngaahi veesi mei he Tokāteline mo e Ngaahi Fuakava 88 ʻoku tokoni ke mahino kiate kinautolu ʻa e ʻuhinga naʻe ui ai ʻe Siosefa Sāmita e fakahaá ni ko e “’lou ʻōlivé’ … , ko e pōpoaki ʻo e melino ʻa e ʻEikí kiate kitautolu” ( ʻuluʻi fakamatala ʻo e vahé).

Akoʻi ʻa e Tokāteliné

Tokāteline mo e Ngaahi Fuakava 88:6–50

ʻOku maʻu ʻa e māmá mo e fonó meia Sīsū Kalaisi.

• Ke tokoni ke mahino ki hoʻo kalasí ʻa e Tokāteline mo e Ngaahi Fuakava 88:6–50, te ke lava ʻo hiki ʻa e maama mo e fono ʻi he palakipoé pea vahe ua ʻa e kalasí ki ha kulupu ʻe ua. ʻE lava ke vakaiʻi ʻe ha kulupu ʻe taha ʻa e Tokāteline mo e Ngaahi Fuakava 88:6–13, 40–50, ʻo kumi e ngaahi meʻa ʻoku nau ako fekauʻaki mo Sīsū Kalaisi mei he ngaahi lave ki he māmá ʻi he ngaahi veesi ko ʻení. ʻE lava ke fakatotolo ʻa e kulupu ʻe tahá ʻi he veesi 13–26, 34–42, ʻo kumi e meʻa ʻoku nau ako fekauʻaki mo hono mahuʻinga ʻo e muimui ki Heʻene fonó. Ko e hā ʻoku akoʻi mai ʻe he ngaahi moʻoni fekauʻaki mo e māmá mo e fonó ʻi he vahe 88 fekauʻaki mo e Fakamoʻuí? ʻOku nau ueʻi fakalaumālie fēfē kitautolu ke tau hoko ʻo tatau ange mo Iá?

Tokāteline mo e Ngaahi Fuakava 88:62–76, 119–26

Te tau lava ʻo maʻa tuʻunga ʻi he Fakalelei ʻa Sīsū Kalaisí.

• ʻOku hā tuʻo ua e fekau ʻa e ʻEikí ke “fakamāʻoniʻoniʻi ʻa kimoutolu” ʻi he vahe 88 (veesi 68, 74). Kapau ‘oku mou ongoʻi ʻoku ueʻi kimoutolu ke mou aleaʻi e ʻuhinga ʻo e meʻa ko iá, te mou ala kamata ʻaki haʻamou vakaiʻi fakataha ʻa e ngaahi ʻuhinga ke fakamāʻoniʻoniʻi pe toe vakaiʻi ha niʻihi ʻo e ngaahi fakamatala ʻoku hiki ʻi he “Fakamāʻoniʻoniʻí” ʻi he Fakahinohino ki he Ngaahi Folofolá (scriptures.ChurchofJesusChrist.org). Te ke lava foki ʻo fakaafeʻi e kau mēmipa ʻo e kalasí ke nau lau ʻa e Tokāteline mo e Ngaahi Fuakava 88:62–76, 119–26 pea aleaʻi e ngaahi fehuʻi hangē ko ʻení mo haʻo hoa: ʻOku founga fēfē hano fakamāʻoniʻoniʻi kitautolu? Ko e hā ha ngaahi talaʻofa mei he ʻEikí ʻoku tau maʻu ʻi he ngaahi veesi ko ʻení? Ko e hā ʻoku finangalo ai ʻa e ʻEikí ke tau maʻá? ʻE lava foki ke nau maʻu ha tali ki he ngaahi fehuʻi ko ʻení ʻi he pōpoaki ʻa Palesiteni Tāleni H. ʻOakesi “Maʻa he Fakatomalá” (Ensign pe Liahona, Mē 2019, 91–94; vakai foki, “Ngaahi Maʻuʻanga Tokoni Kehé”).

Tokāteline mo e Ngaahi Fuakava 88:77–78, 118–26

ʻOku finangalo ʻa e ʻEikí ke tau fekumi ki he potó ʻi he ako pea ʻi he tui.

• ʻE ala tokoni ʻa e faleʻi naʻe fai ʻe he ʻEikí ke tokoni ke fokotuʻu ʻa e “akoʻanga ʻo e kau palōfitá” ʻi Ketilaní (veesi 137) ki hoʻo kalasí ʻi hoʻomou feinga ke “feakoʻiʻaki ʻa e tokāteline ʻo e puleʻangá” (veesi 77). Mahalo te mou lava ʻo vakaiʻi ʻa e veesi 77–78 mo e 118–26 pea aleaʻi ha founga ke ngaohi ai hoʻomou kalasí ko ha “fale ʻo e ako” (veesi 119). ʻE lava ke hiki ʻe he kau mēmipa ʻo e kalasí ha ngaahi “tuʻutuʻuni fakakalasi” pe ngaahi tefitoʻi moʻoni ʻo fakatefito ʻi he ngaahi veesi ko ʻení, ke ne tataki hoʻomou ako ʻi he kalasí. Te ke lava foki ʻo kole ki he kau mēmipa ʻo e kalasí ke nau fakamatalaʻi ʻa e founga ʻoku nau feinga ai ke fakaʻaongaʻi ʻa e ngaahi tefitoʻi moʻoni ko ʻení ʻi heʻenau “fekumi ki he ʻiló” (veesi 118).

  

  ʻE lava ke hoko hotau ngaahi ʻapí ko ha feituʻu ʻo e ako fakalaumālie.

Tokāteline mo e Ngaahi Fuakava 88:119

Ko e temipalé ko e fale ia ʻo e ʻOtuá.

• Kapau ʻe lava, fakaʻaliʻali ha tā ʻo e temipale ofi tahá ʻi he palakipoé, pea fakaafeʻi ʻa e kalasí ke nau hiki ʻi he tafaʻakí ʻa e ngaahi foʻi lea mei he veesi 119 naʻe fakaʻaongaʻi ke fakamatalaʻi ʻaki e fale ʻo e ʻEikí. Fakaafeʻi ke nau vahevahe ha ngaahi aʻusia ʻoku fakahaaʻi ai e founga ʻoku tatau ai e temipalé mo e fakamatala takitaha. Te mou lava foki ke aleaʻi ʻa e founga ʻe lava ai ʻe he veesi ko ʻení ʻo tataki ʻetau moʻuí.

Ngaahi Maʻuʻanga Tokoni Kehé

Maʻa he fakatomalá.

Naʻe akoʻi ʻe Palesiteni Tāleni H. ʻOakesi:

“ʻOku kamata e fakatomalá mei hotau Fakamoʻuí, ʻoku maʻu ai e fiefiá, ʻo ʻikai ke fakamafasia. …

“Ke maʻa ʻi he fakatomalá, kuo pau ke tau vete ʻetau angahalá ki he ʻEikí pea siʻaki ia pea ki Heʻene tokotaha fakamaau ʻi he māmaní ʻo ka fie maʻu (vakai, Tokāteline mo e Ngaahi Fuakava 58:43). Ne akoʻi foki ʻe ʻAlamā kuo pau ke tau ‘fai ʻa e ngaahi ngāue ʻo e māʻoniʻoní’ ( ʻAlamā 5:35). Ko e kotoa ʻo e ngaahi meʻá ni ko e konga ia ʻo e fakaafe fakafolofola maʻu pē ke haʻu kia Kalaisí.

“ʻOku fie maʻu ke tau maʻu e sākalamēnití he ʻaho Sāpate kotoa pē. ʻOku tau fai ʻi he ouau ko iá ha ngaahi fuakava mo maʻu e ngaahi tāpuaki ʻe tokoni ke tau ikunaʻi e ngaahi ngāue mo e ngaahi holi kotoa pē ʻoku nau taʻofi kitautolu mei he moʻui haohaoa ʻoku fakaafeʻi mai ʻe hotau Fakamoʻuí ke tau maʻú (vakai, Mātiu 5:48; 3 Nīfai 12:48). ʻI heʻetau ’fakafisi ʻa [kitautolu] mei he anga taʻe-māʻoniʻoni kotoa pē, pea ʻofa ki he ʻOtuá ʻaki [hotau] iví, ʻatamaí, mo e mālohí kotoa pē,’ ʻe toki malava ke tau ‘haohaoa ʻia Kalaisi’ pea ‘fakamāʻoniʻoniʻi’ ʻi he lilingi Hono taʻataʻá ke ‘hoko ʻo māʻoniʻoni, taʻe-ha-ʻila’ (Molonai 10:32–33). Ko ha talaʻofa nāunauʻia moʻoni! Ko ha mana fakaofo ia! He toki tāpuaki moʻoni ʻeni!” (“Maʻa he Fakatomalá,” Ensign pe Liahona, Mē 2019, 92).

Fakatupulaki ʻEtau Founga Akoʻí

Kumi ha ngaahi maʻuʻanga tokoni ke ne poupouʻi e ngaahi tefitoʻi moʻoní. Makehe mei he ngaahi fokotuʻu ʻi he fakamatala ko ʻení, te ke lava ʻo fekumi ki ha ngaahi vitiō, hiva, pe ʻaati fakatātā ʻa e Siasí ke akoʻi e ngaahi tefitoʻi moʻoni ʻi he Tokāteline mo e Ngaahi Fuakava 88. (Vakai, Ko e Faiako ʻi he Founga ʻa e Fakamoʻuí, 17–18.)