2–8 ʻAokosi

Tokāteline mo e Ngaahi Fuakava 85–87

“Mou Tuʻu ʻi he Ngaahi Potu Toputapú”

ʻOua naʻá ke hohaʻa ke akoʻi ʻa e veesi kotoa pē—pe ko e ngaahi vahé kotoa—ʻo e Tokāteline mo e Ngaahi Fuakavá ʻi he Lautohi Faka-Sāpaté. Tuku ke tataki koe ʻe he Laumālié, peá ke ongoʻingofua e meʻa ʻoku pehē ʻe he kau mēmipa ʻo e kalasí ʻoku fekauʻaki mo ʻenau moʻuí.

Lekooti Hoʻo Ngaahi Ongó

Fakaafeʻi e Feʻinasiʻakí

ʻE lava ke vakaiʻi vave ʻe he kau mēmipa ʻo e kalasí ʻa e Tokāteline mo e Ngaahi Fuakava 85–87 ke maʻu ha foʻi lea pe kupuʻi lea ʻe ngali mahuʻinga kiate kinautolu (mahalo ne nau ʻosi fakaʻilongaʻi ha taha ʻi heʻenau folofolá). Kole ange ke nau hiki ʻenau ngaahi foʻi leá pe kupuʻi leá ʻi he palakipoé, pea fili ha meʻa ʻe niʻihi ke aleaʻi.

Akoʻi ʻa e Tokāteliné

Tokāteline mo e Ngaahi Fuakava 85:6

ʻOku lea ʻa e Laumālié ʻaki ha “kihiʻi leʻo siʻi.”

• Naʻe fakaʻaongaʻi ʻe he Palōfita ko Siosefa Sāmitá ʻi he Tokāteline mo e Ngaahi Fuakava 85:6, ha faʻahinga lea ʻokú ne fakamatalaʻi e founga ne folofola ai ʻa e Laumālié kiate iá. Ko e hā ʻoku tau ako fekauʻaki mo e Laumālie Māʻoniʻoní mei he fakamatalá ni? Te ke lava ʻo kole ki he kau mēmipa ʻo e kalasí ke nau fakakaukau ki ha taimi naʻe folofola ange ai e Laumālié kiate kinautolu—te nau fakamatalaʻi fēfē ʻenau aʻusiá? Te nau lava ʻo maʻu ha ngaahi fakamatala kehe ʻi he ngaahi potufolofola ko ʻení ʻi he: Luke 24:32; Mōsaia 5:2; ʻAlamā 32:28; Hilamani 5:30; Tokāteline mo e Ngaahi Fuakava 6:22–23; 11:12–13.

• Te ke lava nai ʻo fakakaukau ki ha lēsoni fakatātā pe meʻa te ne lava ʻo fakatātaaʻi e fanafana leʻo siʻi ʻa e Laumālié? Mahalo naʻa lava ke ke tā leʻo siʻi ha fasi ʻi he hū mai ʻa e kau mēmipa ʻo e kalasí ki he lokí. ʻE lava ke fakamatala ʻa e kau mēmipa ʻo e kalasí ki he anga ʻo ʻenau ongo ki he fasí pea mo e founga ne mei faingataʻa ange ai ke nau ongoʻi ʻa e fasi ko iá kapau naʻe ʻi ai ha longoaʻa ke fakahohaʻasi kinautolu. ʻE lava ke fakaiku ʻeni ki ha fealēleaʻaki fekauʻaki mo e ngaahi meʻa fakahohaʻa ʻi heʻetau moʻuí ʻokú ne taʻofi ke ʻoua naʻa tau ongoʻi ʻa e kihiʻi leʻo siʻí. ʻE lava ke fakamatalaʻi ʻe he kau mēmipa ʻo e kalasí ʻa e meʻa ʻoku nau fai ke fakatupulaki ai ʻenau ongoʻingofua e Laumālié—ʻe lava ke maʻu ha faleʻi ʻe niʻihi ʻi he “Ngaahi Maʻuʻanga Tokoni Kehé.”

Tokāteline mo e Ngaahi Fuakava 86:1–7

ʻOku tānaki fakataha ʻa e kau angatonú ʻi he ngaahi ʻaho fakaʻosí.

• ʻE lava ke tokoni ʻa e ʻekitivitī ko ʻení ke mahino ki he kau mēmipa ʻo e kalasí ʻa e fakataipe ʻi he talanoa fakatātā ʻo e uité mo e teá: Te ke lava ʻo hiki ha ngaahi kupuʻi lea fakataipe mei he talanoa fakatātaá (hangē ko e “tangata tūtūʻí,” “fakakāsiaʻi ʻe he teá ʻa e uité,” “tupu hake ʻa e muká,” mo e “tānaki ʻa e uité” [veesi 2–4, 7]) pea mo e ngaahi fakaʻuhinga ʻe ala fakahokó (hangē ko e “Kau ʻAposetoló,” “Hē mei he Moʻoní,” “Toe Fakafoki Mai ʻo e Ongoongoleleí,” mo e “ngāue fakafaifekaú”) ʻi ha ʻū laʻipepa kehe pea fakapipiki kinautolu ʻi he palakipoé. ʻE lava leva ke ngāue fakataha ʻa e kau mēmipa ʻo e kalasí ke fakatauhoa ʻa e ngaahi fakataipé mo honau ʻuhingá, ʻo ngāue ʻaki e meʻa ne nau ako mei he Tokāteline mo e Ngaahi Fuakava 86:1–7 (ʻe lava foki ke nau lau ʻa e Mātiu 13:37–43). Ko e hā ʻoku mahuʻinga ai ke fakapatonu ʻe he ʻEikí ʻa e fakahaá ni “kiate kimoutolu ko ʻeku kau tamaioʻeikí”? (veesi 1). Ko e hā ha ngaahi pōpoaki ʻoku tau maʻu ʻoku fekauʻaki mo ʻetau ngāue ki he ʻEikí? (vakai foki, veesi 11).

Tokāteline mo e Ngaahi Fuakava 87:2, 6, 8

ʻOku maʻu ʻa e melinó ʻi he “ngaahi potu toputapú.”

Ko e temipalé ko ha potu toputapu ia ʻoku tau lava ʻo ongoʻi ai e ʻofa ʻa e ʻOtuá.

• Ke tokoni ke mahino ki he kau mēmipa ʻo e kalasí ʻa e fiemaʻu ke “tuʻu ʻi he ngaahi potu toputapú,” ʻe lava ke ke kamata ʻaki hano fakaafeʻi kinautolu ke nau lisi ha ngaahi faingataʻa ʻoku tau fepaki mo ia ʻi he ngaahi ʻaho kimui ní. Te nau lava ke maʻu ha ngaahi sīpinga ʻi he Tokāteline mo e Ngaahi Fuakava 87:2, 6. Hili iá te mou lava leva ke aleaʻi ʻa e founga ʻe lava ai e fakaafe ʻa e ʻEikí ʻi he veesi 8 ke tokoni ʻi he ngaahi faingataʻa ko ʻení. ʻE lava ke tokoni ha ngaahi fehuʻi hangē ko ʻení:

  Ko e hā hono mahuʻinga ʻo e foʻi lea ko e “tuʻú” ʻi he veesi ko ʻení?

  Ko e hā ha meʻa ʻokú ne ʻai ha feituʻu ke toputapú?

  Ko e hā ha meʻa te ne hiki ha taha mei ha potu toputapu?

  ʻE lava fēfē ke tau fakapapauʻi ʻoku ʻikai ke hiki kitautolú?

• Mahalo naʻa loto lelei e kau mēmipa ʻo e kalasí ke nau fevahevaheʻaki ha ngaahi sīpinga ʻo ha ngaahi “potu toputapu” pea mo e meʻa ʻokú ne ʻai ke nau toputapú (ʻe lava ke ke fakamahinoʻi ange ko e potu toputapú ʻe lava pē ke mahulu hake ʻi ha feituʻu fakatuʻasino).   Ko e taimi te nau fevahevaheʻaki aí, poupouʻi ke nau fakamatala ki he ʻuhinga ʻoku toputapu ai e ngaahi potu ko iá kiate kinautolú. ʻOku tokoni fēfē nai ʻa e ngaahi potu toputapu ko iá ke tau maʻu ha nonga ʻi he lotolotonga ʻo e ngaahi fakatuʻutāmaki ʻo e ngaahi ʻaho kimui ní?

Ngaahi Maʻuʻanga Tokoni Kehé

Maʻu ha “taimi fakalongolongo mo lōngonoa ʻi he ʻaho kotoa.”

Naʻe fai ʻe Sisitā Viki F. Matusumoli, ko ha tokoni mālōlō ʻi he Kau Palesitenisī Lahi ʻo e Palaimelí, ʻa e faleʻi ko ʻení: “Koeʻuhí ʻoku faʻa fakamatalaʻi ʻa e laumālié ko ha kihiʻi leʻo siʻi, ʻoku mahuʻinga foki ke ʻi ai ha taimi lōngonoa ʻi heʻetau moʻuí. Kuo faleʻi kitautolu ʻe he ʻEikí ke tau ʻlongo pē pea ʻilo ko au ko e ʻOtua’ [Same 46:10]. Kapau ʻe ʻi ai ha taimi fakalongolongo mo lōngonoa he ʻaho kotoa ʻo ʻikai ke ʻohofia kitautolu ʻe he televīsoné, komipiutá, mo e keimi vitioó pe ngaahi meʻa fakaʻilekitulōniká, ʻoku tau ʻoange ai ha faingamālie ki he kihiʻi leʻo siʻi ko iá ke ʻomi ha fakahā fakatāutaha pea ke ne ʻomi ha tataki, fakapapau mo ha fakafiemālie kiate kitautolu” (“Tokoniʻi e Niʻihi Kehé ke Nau Ongoʻi e Fanafana ʻa e Laumālié,” Ensign pe Liahona, Nōv. 2009, 11).

Fakatupulaki ʻEtau Founga Akoʻí

Teuteu mo manatuʻi e kakaí. “Tuku ke tākiekina hoʻo [teuteú] ʻe he mahino ʻokú ke maʻu ki he kakai ʻokú ke akoʻí. … ʻOku ʻikai pikimaʻu pē kau faiako anga faka-Kalaisí ʻi ha faʻahinga ākenga pe founga; ʻoku nau tukupā ke tokoni ʻi hono fakatupulaki e tui ʻa e kakaí kia Sīsū Kalaisí” (Ko e Faiako ʻi he Founga ʻa e Fakamoʻuí, 7).