ngaahi fetuʻu ʻi he vavaá

Hufangaʻanga, tā ʻa Shaelynn Abel

5–11 Siulai

Tokāteline mo e Ngaahi Fuakava 76

“ʻE Lahi ʻa ʻEnau Totongí pea Taʻengata ʻa Honau Nāunaú”

ʻOku tatau ʻa e vīsone ʻi he vahe 76 mo e ngaahi vīsone lahi kuo lekooti ʻi he folofolá, naʻe maʻu ia ʻe Siosefa Sāmita mo Sitenei Likitoni ʻi heʻena “fakalaulauloto” ki he ngaahi folofolá (veesi 19). Te ke lava foki mo koe ke ke maʻu ha fakahā—kau ai mo ha fakahinohino fekauʻaki mo e founga ki he akoʻí—ʻi hoʻo fakakaukauloto ki he Tokāteline mo e Ngaahi Fuakava 76.

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Ke tokoni ki he kau mēmipa ʻo e kalasí ʻi hono fakamatalaʻi e meʻa ne nau lau ʻi he Tokāteline mo e Ngaahi Fuakava 76, te ke lava ʻo fakaafeʻi kinautolu ke nau fakakaukauloto ʻoku ʻeke ange ʻe hanau kaungāmeʻa ʻoku siasi kehe pe ko e hā ʻoku tau tui ki ai fekauʻaki mo e moʻui hili ʻa e maté. Ko e hā ha ngaahi veesi mei he vahe 76 te nau fie vahevahe mo honau kaungāmeʻá? ʻE lava foki ke vahevahe ʻe he kau mēmipa ʻo e kalasí ha faʻahinga meʻa mei he “[Ngaahi Leʻo ʻo Hono Toe Fakafoki Mai ʻo e Ongoongoleleí: Ngaahi Fakamoʻoni ʻo e ‘Mata Meʻa-Hā-Maí’]” ʻa ia naʻe mahuʻinga kiate kinautolú.

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 76

ʻOku maʻu ʻa e fakamoʻuí ʻia Sīsū Kalaisi, ko e ʻAlo ʻo e ʻOtuá.

• ʻOku ʻi ai ha kakai tokolahi, ko e taimi ʻoku nau fakakaukau ai ki he vahe 76, ʻoku nau fakakaukau ki he palani ʻo e fakamoʻuí pea mo e ngaahi nāunau ʻe tolú. Te ke tokoniʻi fēfē ʻa e kau mēmipa ʻo e kalasí ke nau ʻiloʻi ko e tokotaha mahuʻinga taha ʻi he fakahaá ni ko e Fakamoʻui ko Sīsū Kalaisí? Te ke lava ʻo kole ki he kau mēmipa ʻo e kalasí ke nau vahevahe ha veesi mei he vahe 76 ʻokú ne fakamālohia ʻenau tui kia Sīsū Kalaisí. Kapau ʻoku nau fie maʻu tokoni, te ke lava ʻo fakahinohino kinautolu ki ha ngaahi veesi hangē ko e 1–5, 20–24, 39–43, 69, 107–8.

• Ke tokoni ki he kau mēmipa ʻo e kalasí ke nau vakaiʻi ʻa e faikehekehe ʻo e ngaahi nāunau ʻe tolú, hiki ʻi he palakipoé ʻa e Silesitiale, veesi 50–70, 92–96; Telesitiale, veesi 71–79, 97; mo e Tilesitiale, veesi 81–90, 98–106, 109–12. ʻE lava ke fili ʻe he kau mēmipa ʻo e kalasí ha taha ʻo e ngaahi seti ʻe tolu ʻo e ngaahi veesi ko ʻení pea kumi ʻa e ngaahi kupuʻi lea ʻoku nau fakamatalaʻi ʻa e fekauʻaki ʻa Sīsū Kalaisi mo e kakai ʻoku nau maʻu ʻa e puleʻanga ko iá. Ko e hā ʻoku akoʻi mai ʻe he ngaahi kupuʻi leá ni fekauʻaki mo e hoko ko e kau ākonga ʻa Sīsū Kalaisí? Te tau fakamālohia fēfē hotau vā fetuʻutaki mo Iá pea mo e Tamaí? ʻOku founga fēfē ʻEna tokoni mai kiate kitautolú? ʻOku ʻuhinga ki he hā ke “toʻa ʻi he fakamoʻoni ʻo Sīsuú”? (veesi 79).

  ko ha loki ʻi ha fale he senituli hongofulu-mā-hivá

  Naʻe mamata ʻa Siosefa Sāmita ʻi ha meʻa-hā-mai ki he ngaahi nāunau ʻe tolú ʻi ha loki hangē ko ʻení.

Tokāteline mo e Ngaahi Fuakava 76:5–10, 113–18

Ko e ngaahi meʻa fakamisiteli ʻa e ʻOtuá ʻoku toki lava pē ʻo “mahino ʻi he mālohi ʻo e Laumālie Māʻoniʻoní.”

• Mahalo naʻa mahuʻinga ke ʻiloʻi ʻe he kau mēmipa hoʻo kalasí ʻoku ʻikai faingofua ki he kāingalotu kotoa ʻo e Siasí ke nau tali ʻa e fakahā ʻi he vahe 76. Hangē ko ʻení, naʻe pehē ʻe Pilikihami ʻIongi: “Naʻe pehē ʻeku ngaahi talatupuʻá, ko e taimi naʻe fuofua hoko mai ai e Meʻa-hā-maí kiate aú, naʻe fehangahangai tonu ia mo e meʻa ne u ako kimuʻá. Naʻá ku pehē, Tatali angé. Naʻe ʻikai ke u fakafisingaʻi ia; ka naʻe ʻikai lava ke mahino ia kiate au.” Naʻá ne fakamatalaʻi naʻe pau ke ne “fakakaukau mo lotu, ke laukonga mo fakakaukau, kae ʻoua kuó u ʻiloʻi mo mahino kakato kiate au” (ʻi he “The Vision,” Revelations in Context, 150). Ko e hā ʻoku tau ako mei he meʻa naʻá ne aʻusiá ʻe ala tokoni ʻi he taimi ʻoku fakahā ai ʻe he ʻOtuá ha ngaahi meʻa ʻoku kehe mei he mahino ʻoku tau lolotonga maʻú? Ko e hā ʻoku akoʻi mai ʻe he Tokāteline mo e Ngaahi Fuakava 76:5–10, 113–18 fekauʻaki mo e founga ʻe lava ke tau maʻu ai ʻa e “ngaahi meʻa lilo” ʻo e finangalo ʻo e ʻOtuá? (veesi 10).

Tokāteline mo e Ngaahi Fuakava 76:50–70, 92–95

ʻOku finangalo ʻa e ʻOtuá ke fiefia fakataha ʻEne fānaú mo Ia ʻi he nāunau fakasilesitialé.

• Ki ha niʻihi, ʻe lava pē ke fakalotosiʻi pe mafatukituki ʻa e fakakaukau ko ia ki he meʻa kotoa ʻoku fie maʻu meiate kitautolu ke tau taau ai mo e puleʻanga fakasilesitialé. Fakakaukau ki he founga te ke lava ai ʻo tokoniʻi e kau mēmipa ʻo e kalasí ke nau maʻu ha ʻamanaki lelei “ʻia Sīsū ko e fakalaloá” (veesi 69). Hangē ko ʻení, te ke lava ʻo fakaafeʻi kinautolu ke nau lau ʻa e veesi 50–70 mo e 92–95. Fakaafeʻi ke nau vahevahe ʻa e founga te nau tali ʻaki ki ha taha ʻokú ne pehē, “ʻOku fuʻu faingataʻa ke moʻui ʻaki e ongoongoleleí he kuongá ni; ʻOku ʻikai ke u fakapapauʻi pe ʻoku ʻi ai hano ʻaonga” pe “ʻOku ʻikai ke u feʻunga mo e puleʻanga fakasilesitialé.” Ko e hā te tau lava ʻo lea ʻaki ke ueʻi fakalaumālie pe fakalotolahiʻi ʻa e tokotahá ni?

Fakatupulaki ʻEtau Founga Akoʻí

Nofo taha ʻi he Fakamoʻuí mo ʻEne tokāteliné. “Toutou fehuʻi loto pē, ‘Ko e hā ha founga ʻe tokoni ai ki he kalasí e meʻa ʻoku ou akoʻí ke langaki ʻenau tui kia Kalaisí, ke nau fakatomala pea fakahoko mo tauhi ʻenau ngaahi fuakava mo e ʻOtuá pea maʻu mo e Laumālie Māʻoniʻoní?’“ (Ko e Faiako ʻi he Founga ʻa e Fakamoʻuí, 20).