Fakataha ʻa e Kemí, tā ʻa Worthington Whittredge

3–9 Mē

Tokāteline mo e Ngaahi Fuakava 46–48

“Mou Kumi Fakamātoato ki he Ngaahi Meʻa-foaki Lelei Tahá”

ʻI hoʻomou lau e Tokāteline mo e Ngaahi Fuakava 46–48, ʻe lava ke fakamoʻoniʻi atu ʻe he Laumālie Māʻoniʻoní ʻa e ngaahi moʻoni ʻi he ngaahi vahe ko ʻení. ʻE ala tokoni ʻa hono lekooti mo fakamanatu e ngaahi ongó ke ke ʻilo ai ha ngaahi founga ke tokoniʻi e kau mēmipa ʻo e kalasí ke nau ʻilo ʻa e ngaahi moʻoni tatau ko ʻení.

Lekooti Hoʻo Ngaahi Ongó

Fakaafeʻi e Feʻinasiʻakí

ʻE ala tokoni ki he kau mēmipa ʻo e kalasí ke nau vahevahe mei he taimi ki he taimi, ʻa e tuʻunga ʻoku ʻi ai ʻenau ako folofola fakafoʻituituí mo fakafāmilí. Hangē ko ʻení, ko e taimi ʻoku vahevahe ai ʻe he kau mēmipa ʻo e kalasí ha ʻilo fekauʻaki mo ha meʻa ne nau ʻiloʻi pe ʻiloʻi ʻe ha mēmipa ʻo e fāmilí he uiké ni, te ke lava ʻo fehuʻi ange pe ko e hā ʻa e meʻa ne nau fai lolotonga ʻenau akó ne fakatupunga ai ʻa e ngaahi ʻilo ko iá.

Akoʻi ʻa e Tokāteliné

Tokāteline mo e Ngaahi Fuakava 46:1–7

ʻOku totonu ke tau talitali lelei ʻa e taha kotoa ki he Siasi ʻo Sīsū Kalaisí.

• Ki ha niʻihi tokolahi, ʻe lava ke hoko ʻa e founga mo e meʻa ʻoku nau ongoʻi ʻi he ngaahi houalotu ʻa e Siasí ke ne tākiekina ʻenau mālohi ʻi he Siasí. ʻE ala tokoni ʻa e fakahinohino ʻa e ʻEikí ʻi he Tokāteline mo e Ngaahi Fuakava 46:1–7 ki he kau mēmipa ʻi hoʻo uōtí ke nau fakatupu ha talitali lelei ange mo e ngaahi aʻusia mahuʻinga ange ʻi he moihū ʻa e tokotaha kotoa pea mo e kau ʻaʻahí. ʻE lava ke fekumi e kau mēmipa ʻo e kalasí ʻi he ngaahi vēsí ni, pea fakasio e ngaahi tefitoʻi moʻoni ʻoku fekauʻaki mo e ngaahi houalotu ʻa e Siasí pea lisi ʻi he palakipoé ʻa e meʻa ʻoku nau maʻú. ʻI he meʻa takitaha he lisí, ʻe lava ke aleaʻi ʻe he kalasí pe ʻoku fēfē ʻa hono fakahoko ʻo e tefitoʻi moʻoni ko iá.

• ʻE tokoni fēfē ʻa e ngaahi fakahinohino ʻa e ʻEikí ʻi he Tokāteline mo e Ngaahi Fuakava 46 ki he kau mēmipa ʻo e kalasí ke nau lau e ngaahi houalotu ʻo e Siasí ko ha faingamālie ke ongoʻi ai e Laumālie Māʻoniʻoní? Te ke lava ʻo fakaafeʻi e kau mēmipa ʻo e kalasí ke nau fekumi ʻi he Tokāteline mo e Ngaahi Fuakava 46:2 pea aleaʻi ha taimi ne nau mamata ai ki he kau takí mo e kau faiakó ʻoku nau tataki e ngaahi fakatahá ʻaki e Laumālie Māʻoniʻoní. Ko e hā e fatongia ʻo kinautolu ʻoku ʻi he fakatahaʻangá? Fakakaukau ke ke fakaafeʻi ʻa e kau mēmipa ʻo e kalasí ke nau fakamatalaʻi ha ngaahi taimi ne nau ongoʻi ai naʻe tataki mo fakahinohino ha fakatahaʻanga ʻe he Laumālie Māʻoniʻoní.

• Mahalo naʻa lava ke ke fakaafeʻi ha kau mēmipa tokosiʻi ʻo e kalasí ke nau fakamatalaʻi haʻanau ngaahi aʻusia ʻi he taimi ne nau fuofua ʻalu ai ki ha fakataha ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e hā e meʻa naʻá ne tokoniʻi ke nau ongoʻi ʻoku talitali lelei kinautolú? Ko e hā ha faleʻi te nau ʻoange ki he kau mēmipa kehé ke tokoni ke fakalata ange ʻetau ngaahi fakataha ʻi he Siasí? Te tau fakaʻaongaʻi fēfē ʻa e faleʻi ʻa e ʻEikí ʻi he Tokāteline mo e Ngaahi Fuakava 46:1–7? Tuku ke akoako ʻe he kau mēmipa ʻo e kalasí ʻa e meʻa te nau lea ʻaki kapau te nau sio ki ha sola ʻoku hū ki he falelotú ko honau fuofua taimí ia.

Tokāteline mo e Ngaahi Fuakava 46:7–33

ʻOku foaki ʻe he Tamai Hēvaní ha ngaahi meʻafoaki fakalaumālie ke ʻaonga ki Heʻene fānaú.

• Naʻe tui ʻa e kau fuofua Kāingalotú ki he ngaahi fakahā ʻa e Laumālie Māʻoniʻoní. Te ke tokoniʻi fēfē e kau mēmipa hoʻo kalasí ke langaki ʻenau tui ʻe lava ke fakahaaʻi ʻa e ngaahi meʻafoaki ko ʻení ʻi heʻetau moʻuí he ʻahó ni? Te ke lava ʻo kamata ʻaki hano fakaafeʻi e kau mēmipa ʻo e kalasí ke nau lau tautau toko ua pe ʻi ha fanga kiʻi kulupu iiki e Tokāteline mo e Ngaahi Fuakava 46:7–33. Kole ange ke nau kumi ha ngaahi meʻafoaki fakalaumālie ʻe nima pe lahi ange pea aleaʻi e ngaahi founga kuo nau mamata ai ki hono fakahaaʻi ʻo e ngaahi meʻafoaki ko iá ʻi heʻenau moʻuí pe ʻi ha moʻui ʻo ha taha ʻoku nau ʻiloʻi—kau ai e kakai ʻi he kalasí. Ko e hā ha meʻa ne nau maʻu ʻe lava ke nau vahevahe mo e kalasí ke langaki ʻenau tui ki he ngaahi meʻafoaki ko ʻení?

• Naʻe fakahā ʻe he ʻEikí ʻoku ʻaonga e ngaahi meʻafoaki ʻo e Laumālié kiate kinautolu ʻoku faivelenga mo “ʻikai [kumi ki] ha fakaʻilongá” (veesi 9). Mahalo naʻa lava ke aleaʻi ʻe he kau mēmipa ʻo e kalasí ʻa e founga ʻoku ʻaonga ai e ngaahi meʻafoaki fakalaumālié ki he niʻihi ʻoku faivelengá. ʻE lava fēfē ke tokoni e ngaahi meʻafoaki ko ʻení kiate kinautolu ʻoku fie tupulaki pe fie fakaivia ʻenau fakamoʻoni ki he ongoongoleleí?

• ʻOku ʻi ai ha kakai ʻe niʻihi ʻoku nau ʻofa ki he ʻOtuá pea ʻoku nau feinga ke tauhi ʻEne ngaahi fekaú ka ʻoku ʻikai ke nau ongoʻi kuo nau foua ha faʻahinga meʻafoaki ʻo e Laumālié. ʻE tokoni fēfē ʻa e faleʻi ʻi he Tokāteline mo e Ngaahi Fuakava 46:7–33?

Tokāteline mo e Ngaahi Fuakava 47

ʻE lava ke tataki kitautolu ʻe he Laumālie Māʻoniʻoní ʻi heʻetau fakahoko hotau ngaahi uiuiʻí.

• ʻE lava ke mahino ki ha kakai tokolahi ʻa e meʻa naʻe ongoʻi ʻe Sione Uitemā ʻi he taimi naʻá ne fie maʻu ai ha fakamahino naʻe ʻomi hono uiuiʻí mei he ʻOtuá. Mahalo naʻa lava ke vahevahe ʻe he kau mēmipa ʻo e kalasí ha ngaahi aʻusia tatau ne nau maʻu. Ko e hā ʻoku tau maʻu ʻi he Tokāteline mo e Ngaahi Fuakava 47 ne mei ʻoange kia Sione Uitemā ha loto-falala ki heʻene ngāué?

Fakatupulaki ʻEtau Founga Akoʻí

Ko ho fatongia ko ha faiakó. ʻOku mahulu hake ʻa e faiakó ʻi he ʻoange pē ha fakamatala kuó ke teuteú. Ko ha konga ʻe taha ʻo e faiakó ko hono fokotuʻu ha ʻātakai ʻe lava ai ʻe he kau mēmipa ʻo e kalasí ke ako mo ʻilo ha ngaahi moʻoni ʻiate kinautolu pē pea vahevahe ʻa e meʻa kuo nau akó mo e niʻihi kehé. Hangē ko ʻení, ʻi he lēsoní kotoa, fehuʻi ki he kau mēmipa ʻo e kalasí fekauʻaki mo ʻenau ngaahi aʻusia ʻi hono ako ʻo e folofolá ʻi ʻapí.