“10–16 Mē. Tokāteline mo e Ngaahi Fuakava 49–50: ‘Ko e Meʻa Ko ia ʻOku mei he ʻOtuá ko e Māmá Ia,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tokāteline mo e Ngaahi Fuakava 2021 (2020)
“10–16 Mē. Tokāteline mo e Ngaahi Fuakava 49–50,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2021
10–16 Mē
Tokāteline mo e Ngaahi Fuakava 49–50
“Ko e Meʻa ko ia ʻOku mei he ʻOtuá, ko e Māmá Ia”
“Ko ia ia ʻokú ne maʻu ʻa e māmá, pea fai atu ai pē ʻi he ʻOtuá, te ne maʻu ʻa e maama lahi ange; pea ʻe tupulaki ʻa e maama ko iá ʻo ngingila ange kae ʻoua ke aʻu ki he ʻaho haohaoá” (Tokāteline mo e Ngaahi Fuakava 50:24). Fakalaulauloto ki he founga ʻokú ke maʻu ai ʻa e māmá ʻi hoʻo hokohoko atu ʻi he ʻOtuá.
Lekooti e Ngaahi Ongo ʻOkú ke Maʻú
Ko e Fakamoʻuí ʻa hotau “tauhi-sipi leleí” (Tokāteline mo e Ngaahi Fuakava 50:44). ‘Okú Ne ʻafioʻi ʻoku faʻa hē ʻa e fanga sipí pea ʻoku lahi e ngaahi faingataʻa ʻi he feituʻu maomaonganoá. Ko ia ʻokú Ne tataki kitautolu ʻi he ʻofa ki he malu ʻo Hono tokāteliné, ʻo mamaʻo mei he ngaahi fakatuʻutāmaki hangē ko e “ngaahi laumālie kākā, ʻa ia kuo nau ʻalu atu ʻi he māmaní ʻo kākaaʻi ʻa e māmaní” (Tokāteline mo e Ngaahi Fuakava 50:2). ‘Oku ʻuhinga e muimui kiate Iá ke tukuange e ngaahi fakakaukau pe talatukufakaholo halá. Naʻe moʻoni ʻeni kia Līmani Kopelī mo e niʻihi kehe ʻi ʻOhaiō ne nau tali e ongoongolelei kuo fakafoki maí ka nau kei pīkitai ki ha niʻihi ʻo e ngaahi tui ne ʻikai ke tonú. Naʻe fakahā ʻe he ʻEikí ʻi he Tokāteline mo e Ngaahi Fuakava 49, ʻa e ngaahi moʻoni naʻá ne fakatonutonu e ngaahi tui kimuʻa ʻa Līmani fekauʻaki mo e ngaahi kaveinga hangē ko e nofo-malí mo e Hāʻele ʻAnga Ua Mai ʻa e Fakamoʻuí. Pea ʻi he hanga ʻe he kau ului ʻOhaioó ʻo “maʻu … [e] ngaahi laumālie ʻa ia naʻe ʻikai mahino kiate [kinautolú],” naʻe akoʻi kinautolu ʻe he ʻEikí ʻi he founga ke ʻiloʻi ai e ngaahi fakahā moʻoni ʻo e Laumālié (Tokāteline mo e Ngaahi Fuakava 50:15). Naʻe faʻa kātaki e Tauhisipi Leleí; naʻá Ne ʻafioʻi ko e fuofua Kāingalotu ko ʻení ne—hangē ko kitautolu kotoa—“fānau iiki” “kuo pau ke … tupulaki ʻi he angaʻofa pea ʻi he ʻiloʻi ʻo e moʻoní” (Tokāteline mo e Ngaahi Fuakava 50:40).
Ngaahi Fakakaukau ki Hono Ako Fakataautaha ʻo e Folofolá
Tokāteline mo e Ngaahi Fuakava 49:5–23
‘E lava ʻa e ngaahi moʻoni ʻo e ongoongoleleí ʻo tokoniʻi au ke u ʻiloʻi e ngaahi akonaki halá.
Kimuʻa pea kau ʻa Līmani Kopelī ki he Siasí, naʻá ne kau ki ha kulupu fakalotu ne ʻiloa ko e Sōsaieti Fakatahataha ʻo e Kakai Tui ki he Hā mai ʻa Kalaisi ʻi Heʻene Hāʻele ʻAnga Ua Maí, ʻoku ʻiloa foki ko e kau Sieká. Hili e fepōtalanoaʻaki mo Līmaní, naʻe fekumi ʻa Siosefa Sāmita ki ha fakamahino mei he ʻEikí kau ki ha ngaahi akonaki ʻe niʻihi ʻa e kau Sieká, pea naʻe tali mai ʻe he ʻEikí ʻaki e fakahā ʻi he vahe 49.
Te ke lava ʻo maʻu ha niʻihi ʻo e ngaahi tui ʻa e kau Sieká ne fakamatala ki ai ʻi he ʻuluʻi vahe ʻo e vahe 49. Fakakaukau ke fakaʻilongaʻi pe fakatokangaʻi e ngaahi moʻoni ʻi he veesi 5–23 ʻokú ne fakatonutonu e ngaahi tui ko iá. Fakakaukau ki he ngaahi akonaki pe ngaahi tukufakaholo kehe ʻoku hala ʻi he māmaní he kuonga ní. Ko e hā ha ngaahi moʻoni ʻo e ongoongoleleí ʻe lava ʻo tokoni ke maluʻi koe mei aí?
Tokāteline mo e Ngaahi Fuakava 49:15–17
ʻOku mahuʻinga ʻa e mali ʻa e tangatá mo e fefiné ki he palani taʻengata ʻa e ʻOtuá.
Ko e hā e ngaahi moʻoni fekauʻaki mo e nofo-malí ʻokú ke ako mei he Tokāteline mo e Ngaahi Fuakava 49:15–17? ʻOkú ke ongoʻi ko e hā ʻoku mahuʻinga ai e mali ʻi he vahaʻa ʻo ha tangata mo ha fefiné ki he palani ʻa e Tamai Hēvaní? Naʻe ʻomi ʻe ʻEletā Tēvita A. Petinā ha ʻuhinga ʻe ua: “ʻUhinga 1: Ko e natula ʻo e laumālie ʻo e tangatá mo e fefiné ke na fefakakakatoʻaki mo fefakahaohaoaʻiʻaki, ko ia naʻe fakataumuʻa ai ʻa e tangatá mo e fefiné ke na fakalakalaka fakataha atu ki he hakeakiʻí. … ʻUhinga 2: ʻI he palani faka-ʻOtuá, ʻoku fakatou fie maʻu ʻa e tangatá mo e fefiné ke ʻomai ha fānau ki he māmaní pea ke na ʻoange ʻa e ʻātakai lelei tahá ki hono ohi mo tauhi ʻo e fānaú” (“Marriage Is Essential to His Eternal Plan,” Ensign, June 2006, 83–84).
Vakai foki, Sēnesi 2:20–24; 1 Kolinitō 11:11; “Ko e Fāmilí: Ko ha Fanongonongo ki Māmani,” Ensign pe Liahona, Mē 2017, 145.
Ko e mali ʻi he vahaʻa ʻo ha tangata mo ha fefiné ko e tuʻutuʻuni ia ʻa e ʻOtuá.
Tokāteline mo e Ngaahi Fuakava 50
‘E lava ʻe he ngaahi akonaki ʻa e ʻEikí ʻo maluʻi au mei he ngaahi kākā ʻa Sētané.
Naʻe vēkeveke e kau ului foʻou ʻi ʻOhaioó ke nau maʻu e ngaahi fakahā fakalaumālie naʻe talaʻofa mai ʻi he ngaahi folofolá, ka naʻe vēkeveke foki ʻa Sētane ke kākaaʻi kinautolu. Naʻa nau fifili ʻo pehē, ʻI he taimi ʻoku kaila pe pongia ai ha taha, ko e ivi tākiekina nai ia ʻo e Laumālié?
Fakakaukauloto naʻe kole atu ke ke tokoni ke mahino ki he kau papi ului foʻou ko ʻení e founga ke nau ʻiloʻi e ngaahi fakahā moʻoni ʻa e Laumālie Māʻoniʻoní mo fakaʻehiʻehi mo hono kākaaʻi ʻi he ngaahi faʻifaʻitaki ʻa Sētané. Ko e hā ha ngaahi tefitoʻi moʻoni ʻokú ke maʻu ʻi he Tokāteline mo e Ngaahi Fuakava 50 te ke lava ʻo vahevahe? (vakai tautautefito ki he veesi 22–25, 29–34, 40–46).
Vakai foki, 2 Tīmote 3:13–17.
Tokāteline mo e Ngaahi Fuakava 50:13–24
‘Oku fakamāmaʻi fakataha ʻa e kau faiakó mo e kau akó ʻe he Laumālié.
Ko e founga ʻe taha te ke lava ʻo ako ai e Tokāteline mo e Ngaahi Fuakava 50:13–24 ko e tā ha fakatātā ʻo ha faiako mo ha tokotaha ako pea hiki ʻi he tafaʻaki takitaha ha lisi ʻo e ngaahi lea mo e kupuʻi lea mei he ngaahi veesi ko ʻení ʻokú ne akoʻi atu ha meʻa fekauʻaki mo hono ako mo akoʻi e ongoongoleleí. Ko e fē ha taimi kuó ke aʻusia ai ha ngaahi meʻa naʻá ne akoʻi atu e mahuʻinga ʻo e Laumālié ʻi he akoʻí mo e akó? Fakakaukau ki he meʻa te ke lava ʻo fai ke fakalakalaka ai hoʻo ngaahi feinga ko ha tokotaha ako mo e faiako ʻo e ongoongoleleí.
Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí
-
Tokāteline mo e Ngaahi Fuakava 49:2.ʻOku ʻuhinga ki he hā ke “fie ʻilo ʻa e moʻoní ʻo fakakonga pē, kae ʻikai ko hono kakató”? Mahalo te ke lava ʻo fakaʻaliʻali ha tā ʻoku fakapuliki fakakonga pea tuku ke mateʻi ʻe he kau mēmipa ʻo e fāmilí pe ko e hā. Ko e hā ʻoku hoko ʻi he taimi ʻoku tau tali konga pē ai e moʻoní? (vakai, 2 Nīfai 28:29). ‘Oku hoko fēfē e kakato ʻo e ongoongoleleí ko ha tāpuaki kiate kitautolu?
-
Tokāteline mo e Ngaahi Fuakava 49:26–28.‘Oku tāpuekina fēfē kitautolu ʻe he talaʻofa ʻa e ʻEikí “Te u muʻomuʻa ʻiate kimoutolu, pea hoko foki ko homou muiaki; pea te u ʻi homou lotolotongá”? ʻE lava ke vahevahe ʻe he kau mēmipa ʻo e fāmilí ha ngaahi aʻusia ʻi he taimi ne nau ongoʻi ai e “muʻomuʻa ʻiate [kinautolu]” ʻa e ʻEikí pe ongoʻi naʻá Ne “ʻi [honau] lotolotongá.”
-
Tokāteline mo e Ngaahi Fuakavá 50:23–25.Te mou lava ʻo fakataha ʻi ha loki fakapoʻuli ke lau e Tokāteline mo e Ngaahi Fuakava 50:23–25 pea fakaulo māmālie ha maama ʻaki hono tutu ha teʻelango pe fakaulo tahataha e māmá. Te mou lava foki ʻo lau e ngaahi veesi ko ʻení lolotonga homou mamata ʻi he hopo ʻa e laʻaá he pongipongí. Ko e hā te tau lava ʻo fai ke hokohoko atu e tupulaki ʻetau maama ʻi he ongoongoleleí? ‘I he taimi ʻoku ako ai ʻe he kau mēmipa ʻo e fāmilí ha meʻa foʻou kau ki he ongoongoleleí lolotonga e uiké, poupouʻi kinautolu ke vahevahe ia mo e fāmilí ʻaki hono hiki ha fakamatala pea fakapipiki ia ki ha kiʻi maama pe maama kehe ʻi he falé.
-
Tokāteline mo e Ngaahi Fuakavá 50:40–46.Hili hono lau e Tokāteline mo e Ngaahi Fuakava 50:40–46, te ke lava ʻo fakaʻaliʻali ha tā ʻo e Fakamoʻuí ʻoku ʻoatu fakataha mo e fokotuʻutuʻu ko ʻení pea fai ha ngaahi fehuʻi peheni: Te ke lava fēfē ʻo tala ʻoku ʻofa ʻa e Fakamoʻuí ʻi he fanga sipí? Ko e hā e founga ʻoku hangē ai e Fakamoʻuí ha tauhisipi kiate kitautolú? Ko e hā ha ngaahi kupuʻi lea mei he folofolá ʻokú ne fakatātaaʻi e fakakaukau ko ia ko e Fakamoʻuí ko ha tauhisipi pea ko ʻEne fanga sipi kitautolu?
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.
Hiva ʻoku fokotuʻu atú: “Ulo Atu,” Tohi Hiva ʻa e Fānaú, 96.
Fakatupulaki ʻo ʻEtau Founga Akoʻí
Anga fakafaingofua. Ko e ngaahi momeniti akoʻi lelei tahá, tautautefito ʻi he ʻapí, ʻoku faʻa hoko noa mo taʻeʻamanekina: ʻe lava ha maʻu meʻatokoni fakafāmili ʻo ueʻi ha fealeaʻaki fekauʻaki mo e keinanga ʻi he folofola ʻo e ʻOtuá, pea ʻe lava ʻo hoko ha afā ʻuha ko ha faingamālie ke fakamoʻoni ai ki he vai moʻuí. Kapau ʻokú ke mateuteu fakalaumālie, ʻe lava ʻe he ʻEiki ʻo ʻoatu “ʻi he mōmēniti ko iá, ʻa e meʻa ke mo leaʻakí” (Tokāteline mo e Ngaahi Fuakava 100:6).
Tauhisipi Angamalū, tā ʻe Kim Yongsung