toʻu tupu ʻi tuʻa ʻi he temipalé

26 ʻEpeleli–2 Mē.

Tokāteline mo e Ngaahi Fuakava 45

“ʻE Fakahoko ʻa e Ngaahi Talaʻofá”

Naʻe akonaki ʻa Palesiteni Lāsolo M. Nalesoni ʻo pehē: “Tohi e ngaahi fakakaukau ʻoku haʻu ki ho ʻatamaí. Hiki e ngaahi meʻa ʻokú ke ongoʻí pea fakahoko ʻa e meʻa naʻe ueʻi koe ke ke faí” (“Fakahā maʻá e Siasí, Fakahā ki Heʻetau Moʻuí,” Ensign pe Liahona, Mē 2018, 95).

Lekooti e Ngaahi Ongo ʻOkú ke Maʻú

‘Oku tau moʻui ʻi ha kuonga fakatuʻutāmaki, pea ʻe lava ke faingataʻa. Naʻa mo e kau ākonga ʻa Sīsuú, ʻi he taimi ne nau fanongo ai ki Heʻene kikiteʻi e ngaahi fakatamaki ʻe hoko ʻi hotau kuongá, “naʻa nau puputuʻu” (Tokāteline mo e Ngaahi Fuakava 45:34). Naʻe hohaʻa foki e fuofua Kāingalotu ʻi Ketilani, ʻOhaioó ʻi he ngaahi taimi fakatuʻutāmaki ne nau moʻui aí. Makehe mei he ngaahi meʻa kehe, “kuo lahi ha ngaahi fakamatala loi … mo e ngaahi talanoa laulaunoa” naʻá ne fakavaivaiʻi e pōpoaki ʻo e ongoongoleleí (Tokāteline mo e Ngaahi Fuakava 45, ʻuluʻi vahe). Ka ko e tali ʻa e ʻEikí ʻi he taimi ko iá pea ʻi he taimí ni ke “ʻoua ʻe puputuʻu” (veesi 35). ‘Io, ʻoku ʻi ai e faiangahala, ka ʻoku ʻi ai foki ha fakamoʻoni ʻoku fakavaveʻi ʻe he ʻOtuá ʻEne ngāué. ‘Io, ʻoku ʻi ai ha ngaahi fakatuʻutāmaki ne kikiteʻi ʻe hoko kimuʻa ʻi he Hāʻele ʻAnga Ua Maí, pea ʻoku totonu ke tau ʻilo ki ai. Ka ʻoku ʻikai ko ha ngaahi fakatokanga pē ʻeni ki he fakatuʻutāmakí; ko ha ngaahi fakaʻilonga foki ia ʻoku ʻamanaki ke fakahoko e ngaahi talaʻofa ʻa e ʻOtuá. Mahalo ko e ʻuhinga ʻeni naʻe maʻu ai e Tokāteline mo e Ngaahi Fuakava 45—ko ha fakahā ʻokú ne fakamatalaʻi fakaikiiki e lahi taha ʻo e ngaahi fakaʻilonga ko ʻení—“ke fiefia ʻa e Kāingalotú” ( ʻuluʻi vahe).

fakaʻilonga ʻo e ako fakatāutahá

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 45:1–5

Ko Sīsū Kalaisi ʻa hotau Taukapo ki he Tamaí.

Kuó ke ongoʻi taʻefeʻunga pe taʻetaau nai ʻi he ʻao ʻo e ʻOtuá? Te ke lava ʻo maʻu ha fakafiemālie ʻi he Tokāteline mo e Ngaahi Fuakava 45:1–5. Ko e hā ʻoku fokotuʻu atu ʻe he ngaahi lea hangē ko e “taukapo” mo e “taukapoʻí”? ʻOku taukapoʻi fēfē koe ʻe he Fakamoʻuí? ʻOku ʻuhinga ki he hā ke ke ʻiloʻi ko Kalaisi ho Taukapó?

ʻE lava ke tokoni e ngaahi lea ko ʻeni meia Palesiteni Siosefa Filitingi Sāmitá ke ke fakalaulauloto ki he ngaahi veesi ko ʻení: “Ko Sīsū ʻa hotau taukapó, ʻi hono taukapoʻi kitautolu ko hotau fakalaloá ʻo fakafou heʻene ngāue ke fakalelei maʻatautolu pea ʻomi kitautolu ke felotoi mo e ʻOtuá” (ʻi he Conference Report, Oct. 1953, 58).

Vakai foki, 2 Nīfai 2:8–9; Mōsaia 15:7–9; Molonai 7:27–28; Tokāteline mo e Ngaahi Fuakava 29:5; 62:1.

Tokāteline mo e Ngaahi Fuakava 45:9–10

Ko e ongoongoleleí ko ha fuka ia ki he ngaahi puleʻangá.

ʻI he kuonga muʻá, naʻe hoko ha fuka ko ha fakaʻilonga pe fuka ne ʻave ki he taú. Naʻá ne fakatahatahaʻi mo tānaki fakataha e kau sōtiá mo tokoni ke nau ʻiloʻi e feituʻu ke tānaki ki aí mo e meʻa ke faí. Ko e fuká ko ha sīpinga foki ia pe lao ʻe lava ke fuatautau ki ai e meʻa kotoa pē. ʻI hoʻo lau e Tokāteline mo e Ngaahi Fuakava 45:9–10, fakalaulauloto ki he founga kuo hoko ai e ngaahi fuakava ʻo e ongoongoleleí ko ha fuka kiate koé. Naʻe mei kehe fēfē nai hoʻo moʻuí kapau naʻe ʻikai ke ke maʻu e ngaahi fuakava ko ʻení?

Vakai foki, ʻĪsaia 5:26; 11:10–12; Tokāteline mo e Ngaahi Fuakava 115:5–6.

Tokāteline mo e Ngaahi Fuakava 45:11–75

ʻE fakahoko e ngaahi talaʻofa ʻa e ʻEikí.

ʻE hoko ʻa e tau, faiangahala, pea lala ʻa e fonuá kimuʻa ʻi he Hāʻele ʻAnga Ua Mai ʻa e Fakamoʻuí. Ka naʻe folofola ʻa e ʻEikí, “ʻoua ʻe puputuʻu, koeʻuhí, he ʻo ka hokosia ʻa e ngaahi meʻá ni kotoa pē, te mou lava ʻo ʻilo ai ʻe fakahoko ʻa e ngaahi talaʻofa kuo fai kiate kimoutolú” (Tokāteline mo e Ngaahi Fuakava 45:35).

ʻI hoʻo ako e Tokāteline mo e Ngaahi Fuakava 45:11–75, fakakaukau ke ʻoua ʻe nofotaha pē ʻi he ngaahi faingataʻa ʻoku kikiteʻi ʻe hokó kae tokanga foki ki he ngaahi tāpuaki ʻoku talaʻofa ʻe he ʻEikí (hangē ko ʻení, ko e ngaahi talaʻofa ʻi he veesi 54–59 fekauʻaki mo e pule ʻa e Fakamoʻuí ʻi he nofotuʻí). Te ke lava ʻo fai ʻeni ʻaki hono faʻu ha lisi pe tohi pe fakaʻilongaʻi e ngaahi vēsí. Ko e hā ʻokú ke maʻu ʻokú ne tokoniʻi koe ke “ʻoua ʻe puputuʻu” fekauʻaki mo e ngaahi ʻaho fakaʻosí?

Tokāteline mo e Ngaahi Fuakava 45:31–32, 56–57

“Tuʻu … ʻi he ngaahi potu toputapú,” pea ʻoua naʻa ueʻia.

Ko e ʻuhinga ʻe taha ʻoku akoʻi mai ʻe he Fakamoʻuí mo ʻEne kau palōfitá kau ki he ngaahi fakaʻilonga ʻo e Hāʻele ʻAnga Uá, ke tokoniʻi kitautolu ke tau teuteu. Ko e hā ʻokú mo ako ʻi he Tokāteline mo e Ngaahi Fuakava 45:31–32, 56–57 fekauʻaki mo e teuteu ki he Hāʻele ʻAnga Ua Mai ʻa e ʻEikí? Mahalo ʻe tokoni ke toe vakaiʻi e talanoa fakatātā ʻo e kau taaupoʻou ʻe toko hongofulú, ʻoku maʻu ʻi he Mātiu 25:1–13. Naʻe fakafehoanaki ʻe he Fakamoʻuí ʻa e lolo ʻi he talanoa fakatātā ko ʻení ki he moʻoní pea ki he Laumālie Māʻoniʻoní (vakai, Tokāteline mo e Ngaahi Fuakava 45:57). Ko e hā ha ngaahi fakakaukau ʻokú ke maʻu ʻi hoʻo lau e talanoa fakatātaá ʻi he founga ko ʻení?

ko e kau tāupoʻou ʻe toko hongofulú

Talanoa Fakatātā ʻo e Kau Tāupoʻou ʻe Toko Hongofulú, fai ʻe Dan Burr

Tokāteline mo e Ngaahi Fuakava 45:11–15; 66–71

Ko Saione ko ha feituʻu malu ia maʻá e Kāingalotu ʻo e ʻOtuá.

Naʻe vēkeveke e Kāingalotu ʻi he kuonga ʻo Siosefa Sāmitá ke langa ʻa Saione, ko e Selusalema Foʻoú, ʻi hono fakamatalaʻi ʻi he Tohi ʻa Molomoná (vakai, ʻEta 13:2–9) pea ʻi he liliu fakalaumālie ʻa Siosefa Sāmita ʻo e Tohi Tapú (vakai, Mōsese 7:62–64). Ko e hā ʻokú ke ako fekauʻaki mo Saione—ʻa e kolo fakakuongamuʻa he kuonga ʻo ʻĪnoké mo e kolo ʻi he ʻaho kimui ní fakatouʻosi—mei he Tokāteline mo e Ngaahi Fuakava 45:11–15, 66–71?

Ko e ʻahó ni ʻoku ʻuhinga e fekau ke fokotuʻu ʻa Saioné ki hono fokotuʻu e puleʻanga ʻo e ʻOtuá ʻi he feituʻu pē ʻoku tau nofo aí—ʻi he feituʻu pē ʻoku tānaki ki ai e fānau ʻo e ʻOtuá ki he malu ʻo Hono “fuakava taʻengatá” (veesi 9). Ko e hā te ke lava ʻo fai ke tokoni ke langa ʻa Saione ʻi he feituʻu ʻokú ke ʻi aí?

Vakai foki, Fakahinohino ki he Ngaahi Folofolá, “Saione,” scriptures.ChurchofJesusChrist.org.

fakaʻilonga ʻo e ako fakafāmilí

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 45:3–5.Ko e hā ʻoku fai ʻe ha taukapo maʻatautolú? Talanoa ki he ʻuhinga ʻoku ui ai e Fakamoʻuí ko hotau Taukapó.

Tokāteline mo e Ngaahi Fuakavá 45:9–10.Kapau ʻoku ʻi ai ha “fuka,” homou fāmilí ke fakafofongaʻi homou tukupā ki he ongoongoleleí, ʻe fōtunga fēfē ia? ‘E lava pē ke fakafiefia hano ngaohi fakataha ha fuka fakafāmili pea aleaʻi e founga te ke lava ai ʻo tokoni ki he niʻihi kehé ke nau muimui ki he ngaahi tuʻunga ʻulungaanga māʻolunga ʻo e ongoongoleleí.

Tokāteline mo e Ngaahi Fuakava 45:32.Ko e hā ʻa hotau “ngaahi potu toputapú”? ʻOku ʻuhinga ki he hā ke “ʻikai ueʻi”? Te tau ngaohi fēfē hotau ʻapí ko ha feituʻu māʻoniʻoní?

Tokāteline mo e Ngaahi Fuakava 45:39–44.Te ke tokoni fēfē ke mahino ki he kau mēmipa ʻo e fāmilí ʻa ʻene ʻuhinga ke tokanga ki he Hāʻele ʻAnga Ua Mai ʻa e Fakamoʻuí? Mahalo te ke lava ʻo fakakaukau ki ha meʻa ʻe hoko ʻokú ke nofo ʻamanaki ki ai pea vahevahe e ngaahi founga ʻokú ke “hanganaki” ai ki he meʻa ko iá. Pe te mou lava ʻo taʻo meʻa fakataha pea fakasio e ngaahi fakaʻilonga ʻoku mateuteu ki hono kaí. Ko e hā ʻoku tau fai ke nofo ʻamanaki ai ki he Hāʻele ʻAnga Ua Mai ʻa e Fakamoʻuí?

Tokāteline mo e Ngaahi Fuakava 45:55.ʻE lava ke tokoni hono lau e 1 Nīfai 22:26 mo e Fakahā 20:1–3 ke mahino ki ho fāmilí e founga “ʻe haʻi” ai ʻa Sētane lolotonga e Nofo Tuʻí. Te tau lava fēfē ʻo haʻi ʻa Sētane ʻi heʻetau moʻuí?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “ ʻO Ka Ne Ka Toe Haʻu,” Tohi Hiva ʻa e Fānaú, 46–47; vakai foki, “Ngaahi Fakakaukau ki hono Fakatupulaki Homou Ako Folofola Fakafāmilí.”

Fakatupulaki e Ako Fakataautahá

Fakaʻaongaʻi ʻo e ngaahi tokoni ki he akó. Fakaʻaongaʻi e Fakahinohino ki he Ngaahi Folofolá ke maʻu ha ngaahi fakakaukau ki he ngaahi folofolá.

hāʻele hifo ʻa Kalaisí

Ko e Hāʻele Mai ʻa Kalaisí, tā ʻe Jubal Aviles Saenz