Ko e Fakataha e Nofo Kemí, tā ʻe Worthington Whittredge

3–9 Mē

Tokāteline mo e Ngaahi Fuakava 46–48

“Kumi Fakamātoato ʻi he Ngaahi Meʻa-foaki Lelei Tahá”

ʻI hoʻo lau e Tokāteline mo e Ngaahi Fuakava 46–48, hiki hifo ha ngaahi ueʻi ʻokú ke maʻu. Te ke fie fehuʻi leva, ʻo hangē ko ia ne fokotuʻu mai ʻe ʻEletā Lisiate G. Sikotí, “ʻOku toe ʻi ai nai ha meʻa ke u ʻilo ki ai?” (“Ke Maʻu Ha Tataki Fakalaumālie” Ensignpe Liahona, Nōvema 2009, 8).

Lekooti e Ngaahi Ongo ʻOkú ke Maʻú

ʻI he mavahe ʻa Paʻale P. Pālati, ʻŌliva Kautele, Saipa Pitasoni, mo Pita Uitemā mei Ketilani pea hiki ki he ngaahi feituʻu kehe ke ngāue aí, naʻa nau tuku ai ha kau papi ului ʻe toko teau tupu ne nau vēkeveke lahi ʻaupito kae siʻisiʻi ʻenau taukeí pe fakahinohinó. Naʻe ʻikai ke ʻi ai ha tohi tuʻutuʻuni, fakataha ako fakatakimuʻa, ʻikai ha fakamafola ʻo e konifelenisi lahí—ko hono moʻoní, naʻe ʻikai ke lahi e ngaahi tatau ʻo e Tohi ʻa Molomoná ke ʻave holo. Ko e tokolahi ʻo e kakai tui foʻou ko ʻení naʻe tohoakiʻi kinautolu ki he ongoongolelei kuo fakafoki maí ʻi he talaʻofa ʻo e ngaahi fakahā fakaofo ʻo e Laumālié, tautautefito kiate kinautolu ne nau ʻilo ki ai mei hono ako e Fuakava Foʻoú (hangē ko ʻení, vakai ki he 1 Kolinitō 12:1–11). Ne ʻikai fuoloa mei ai, kuo fakafeʻiloaki mai ki heʻenau ngaahi fakatahaʻanga ʻi he Siasí ha ngaahi fōtunga ngalikehe ʻo e moihuú—kau ai e tō ki he kelekelé pe fute hangē ha ngatá. Naʻe faingataʻa ia ki he tokolahi ke nau fakafaikehekeheʻi e ngaahi fakahā naʻe mei he Laumālié mo ia ne ʻikaí. ʻI he vakai ʻa Siosefa Sāmita ki he puputuʻú, naʻá ne lotua ha tokoni. ‘Oku mahuʻinga tatau e tali ʻa e ʻEikí ʻi he kuongá ni, ʻi he taimi ʻoku faʻa fakasītuʻaʻi ai pe tukunoaʻi ʻe he kakaí ʻa e ngaahi meʻa ʻo e Laumālié. Naʻe fakahā ʻe he ʻEikí ʻoku moʻoni ʻa e ngaahi fakahā fakalaumālié peá Ne fakamahinoʻi mai ko e—ngaahi meʻafoaki ia mei ha Tamai Hēvani ʻofa, ʻo “foaki mai iá ke ʻaonga kiate kinautolu ʻoku ʻofa kiate [Ia] mo tauhi [ʻEne] ngaahi fekau kotoa pē” (Tokāteline mo e Ngaahi Fuakava 46:9).

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 46:1–6

ʻOku talitali lelei e kau fekumi fakamātoato kotoa pē ke moihū ʻi he Siasi ʻo e ʻEikí.

‘Oku totonu ke kau e ngaahi fakataha ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he ngaahi fakatahaʻanga talitali lelei mo ueʻi fakalaumālie lahi taha ʻi he māmaní. Ko e hā e founga ʻoku faleʻi kitautolu ʻe he ʻEikí ʻi he Tokāteline mo e Ngaahi Fuakava 46:1–6 ke tau tali ai ʻa kinautolu ʻoku kau mai ki heʻetau ngaahi fakatahá? ʻOku ongoʻi nai ʻe hoʻo ngaahi kaungāmeʻá mo e kakai ʻi homou kaungāʻapí ʻoku talitali lelei kinautolu ʻi he lotu homou uōtí? Ko e hā ʻokú ke fai ke ngaohi ai homou ngaahi fakatahaʻanga ʻi he Siasí ko ha ngaahi feituʻu ʻe fie foki mai ki ai e kakaí? Fakalaulauloto ki he founga ʻe kaunga ai ki hoʻo aʻusiá ʻa hoʻo ngaahi feinga ke muimui ki he Laumālie Māʻoniʻoní ʻi he ngaahi fakatahaʻanga ʻa e Siasí.

Vakai foki, 3 Nīfai 18:22–23; Molonai 6:5–9

Tokāteline mo e Ngaahi Fuakava 46:7–33

Kuo foaki mai ʻe he ʻOtuá ha ngaahi meʻafoaki fakalaumālie ke tāpuekina ʻEne fānaú.

Naʻe tui e fuofua Kāingalotú ki he ngaahi meʻafoaki fakalaumālié ka naʻa nau fie maʻu ha faʻahinga fakahinohino kau ki honau taumuʻá. ʻI hoʻomou ako kau ki he ngaahi meʻafoaki ʻo e Laumālié ʻo fakaʻaongaʻi e Tokāteline mo e Ngaahi Fuakava 46:7–33, fakalaulauloto ki he ʻuhinga ʻoku mahuʻinga ai ke ke “manatuʻi maʻu ai pē hono ʻuhinga ʻoku foaki mai ai iá” (veesi 8). Fakakaukau ki he founga ʻoku kaunga ai e ngaahi vēsí ni ki he fakamatala ko ʻeni meia ʻEletā Lōpeti D. Heilí: “ʻOku foaki e ngaahi meʻafoaki ko ʻení kiate kinautolu ʻoku faivelenga kia Kalaisí. Te nau tokoniʻi kitautolu ke tau ʻiloʻi mo akoʻi e ngaahi moʻoni ʻo e ongoongoleleí. Te nau tokoniʻi kitautolu ke tāpuekina e niʻihi kehé. Te nau tataki kitautolu ke foki ki heʻetau Tamai Hēvaní” (“Gifts of the Spirit,” Ensign, Feb. 2002, 16). Ko e hā ʻokú ke ako mei he ngaahi veesi ko ʻení fekauʻaki mo e ngaahi fakahā fakalaumālié? ʻE lava fēfē ʻa e ngaahi moʻoni ko ʻení ʻo tokoni ke “ʻoua naʻa kākaaʻi” koe? (veesi 8).

Fakalaulauloto pe ko e hā ho ngaahi meʻafoaki fakalaumālié—mo e founga te ke lava ʻo fakaʻaongaʻi ai kinautolu “ke ʻaonga ki he fānau ʻa e ʻOtuá” (veesi 26). Kapau ʻoku ʻi ai haʻo tāpuaki fakapēteliake, ʻe ngalingali ke ne fakahā atu e ngaahi meʻafoaki kuo foaki atu kiate koé.

Vakai foki, Fakahinohino ki he Ngaahi Folofolá, “Ngaahi Meʻafoaki ʻo e Laumālié,” scriptures.ChurchofJesusChrist.org.

Tokāteline mo e Ngaahi Fuakava 47

ʻOku finangalo e ʻEikí ke tauhi ʻe Hono Siasí ha hisitōlia.

Naʻe hoko atu ʻe he uiuiʻi ʻa Sione Uitemā ke tauhi ha hisitōlia ʻo e Siasí ha tukufakaholo lōloa ʻo e kau tauhi lekooti ʻi he kakai ʻo e ʻOtuá (vakai, 2 Nīfai 29:11–12; Mōsese 6:5; ʻĒpalahame 1:28, 31). Ko hono moʻoní, ʻoku kei ʻi ai he ʻahó ni ʻa e fatongia ʻo e Faihisitōlia mo e Tauhi Lekooti ʻa e Siasí. ‘Okú ke pehē ko e hā ʻoku mahuʻinga fau ai ki he ʻEikí hono tauhi ha hisitōliá? Fakalaulauloto ki heni ʻi hoʻo lau ʻEne ngaahi fakahinohino kia Sione Uitemā kau ki he fatongiá ni ʻi he vahe 47. Fakakaukau foki ki he ngaahi aʻusia fakataautaha ʻoku fie maʻu ke ke lekōtí. Hangē ko ʻení, ko e hā kuo akoʻi atu ʻe he ʻEikí kiate koe ʻokú ke loto ke fakatolongá?

‘I hoʻo fakalaulauloto ki he ngaahi fehuʻi ko ʻení, fakakaukau ki he fakakaukau ko ʻeni meia ʻEletā Mālini K. Sieniseni ʻo e Kau Fitungofulú, ʻa ia naʻe hoko ko ha Faihisitōlia mo e Tauhi Lekooti ʻa e Siasí mei he 2005 ki he 2012:

“ʻOku tau tauhi e ngaahi lekōtí ke tokoni ke tau manatuʻi. … ʻOku tau loto ke tokoni ki he kāingalotu ʻo e Siasí ke nau manatuʻi e ngaahi meʻa māʻongoʻonga kuo fai ʻe he ʻOtuá maʻa ʻEne fānaú. … ʻOku tokoni e ngaahi lēsoni mei he kuohilí ke tau fehangahangai mo e lolotongá pea ʻomi ha ʻamanaki lelei ki hotau kahaʻú” (“There Shall Be a Record Kept among You,” Ensign, Dec. 2007, 28, 33).

Ke ako lahi ange kau ki he ngāue ne lolotonga fakahoko ʻi he malumalu ʻo e fakahinohino ʻa e Faihisitōlia ʻa e Siasí, vakai ki he history.ChurchofJesusChrist.org.

Naʻe ui ʻa Sione Uitemā ke ne tauhi ha hisitōlia ʻo e Siasí.

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 46:2–6.Ko e hā te tau lava ʻo fai fakafāmili ke fakapapauʻi ʻoku ongoʻi ʻe he niʻihi kehé ʻoku talitali lelei kinautolu ʻi heʻetau ngaahi fakataha ʻa e Siasí? (vakai foki, 3 Nīfai 18:22–23). ʻE lava ke tānaki atu ki he fealeaʻaki ko ʻení ʻa e tā ʻoku ʻoatu fakataha mo e fokotuʻutuʻu ko ʻení.

Tokāteline mo e Ngaahi Fuakavá 46:7–26.Ko e hā ha ngaahi meʻafoaki fakalaumālie ʻoku tau vakai ki ai ʻi he niʻihi kehé? ʻE tāpuekina fēfē ʻe he ngaahi meʻafoaki ko iá hotau fāmilí?

Tokāteline mo e Ngaahi Fuakava 47.Te ke poupouʻi fēfē ho fāmilí ke nau lekooti ʻenau ngaahi hisitōlia fakatāutahá ʻi he kotoa e uiké? Te ke lava ʻo vahevahe ha ngaahi fakamatala mei hoʻo tohinoa fakatāutahá pe vahevahe ha talanoa kau ki ha kui (vakai, FamilySearch.org). ʻOku tuku ʻe he ngaahi fāmili ʻe niʻihi ha ngaahi miniti siʻi he uike takitaha ke hiki ʻe he taha kotoa ʻenau tohinoá. Te ke lava ʻo ʻoange ha ngaahi taumuʻa ʻe niʻihi ki he tohinoá hangē ko e “Ko e hā naʻe hoko he uiké ni te ke loto ke ʻilo ki ai ho makapuná?” pe “Ko e hā e founga naʻá ke vakai ai ki he toʻukupu ʻo e ʻEikí ʻi hoʻo moʻuí he uiké ni?” ʻE lava ʻe he fānau īkí ʻo tā ha ngaahi fakatātā ʻo ʻenau ngaahi aʻusiá, pe te ke lava ʻo lekooti kinautolu ʻi heʻenau fai ʻenau talanoá. Ko e hā ha ngaahi tāpuaki ʻoku maʻu mei hono tauhi “ha hisitōliá”? (veesi 1).

Tokāteline mo e Ngaahi Fuakava 48.Naʻe fekauʻi e Kāingalotu ʻi ʻOhaioó ke vahevahe ʻenau kelekelé mo kinautolu ne hiki ki ʻOhaiō mei he tafaʻaki fakahahake ʻo e ʻIunaiteti Siteití. Ko e hā te tau lava ʻo vahevahe ke feau ai e ngaahi fiemaʻu ʻa e niʻihi kehé?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Kuó u Fai ha Lelei?” (Ngaahi Himí, fika 129).

Fakatupulaki ʻo ʻEtau Founga Akoʻí

Fakaʻaongaʻi ha ngaahi talanoa mo ha ngaahi sīpinga. ʻOku faʻa fakaʻaongaʻi ʻe he Fakamoʻuí ha ngaahi talanoa mo e ngaahi talanoa fakatātā ke akoʻi ʻaki e ngaahi tefitoʻi moʻoni ʻo e ongoongoleleí. Fakakaukau ki ha ngaahi fakatātā mo ha talanoa mei hoʻo moʻuí te ke ala fakaʻaongaʻi ke moʻui ʻaki ha tefitoʻi moʻoni ʻo e ongoongoleleí ʻi ho fāmilí (vakai, Ko e Faiako ʻi he Founga ʻa e Fakamoʻuí, 22).

‘Oku foaki ʻe he Tamai Hēvaní ki Heʻene fānaú ha ngaahi meʻafoaki fakalaumālie ke tāpuekina e moʻui ʻa e niʻihi kehé.