Ko e Fakataha ʻa e ʻApitangá, tā ʻe Worthington Whittredge

3–9 Mē

Tokāteline mo e Ngaahi Fuakava 46–48

“Fekumi Fakamaatoato ki he Ngaahi Meʻa-foaki Lelei Tahá”

ʻI hoʻo lau ʻa e Tokāteline mo e Ngaahi Fuakava 46–48 fakakaukau ki he fānau ʻokú ke akoʻí. Vakai ki he “Feau e Ngaahi Fiemaʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení ke maʻu ha toe ngaahi fakakaukau.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Fakaafeʻi e fānaú ke tā ha fakatātā ʻo ha meʻa ne nau ako ʻi he lēsoní pe ʻi ʻapi ʻi he uike kuo ʻosí. Fakamanatu ange kiate kinautolu ʻo ka fie maʻu. Pea tuku leva ke nau fakamatala fekauʻaki mo ʻenau fakatātaá.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 46:2–6

ʻE lava ke u tokoniʻi ʻa e niʻihi kehé ke nau ongoʻi ʻoku talitali lelei kinautolu ʻi he lotú.

ʻOku tau loto kotoa, kau ai e fānaú, ke tau ongoʻi ʻoku talitali lelei pea tau lata. Te ke fakaʻaongaʻi fēfē e ngaahi veesi ko ʻení ke tokoni ki he fānaú ke nau ʻai e niʻihi kehé ke nau ongoʻi ʻoku talitali lelei kinautolu ʻi he lotú?

Ngaahi ʻEkitivitī ʻe Ala Fakahokó

• Lau leʻolahi ʻa e Tokāteline mo e Ngaahi Fuakava 46:5, pea talaange ki he fānaú ʻi hoʻo lea pē ʻaʻau, ʻa e ʻuhinga ʻo e veesi ko ʻení. Fakaʻaliʻali ha fakatātā ʻo ha kakai mei he funga ʻo e māmaní. ʻEke ki he fānaú pe ko e fē ʻi he kakai ko ʻení ʻe finangalo e Tamai Hēvaní ke tau fakaafeʻi ki he ngaahi fakatahaʻanga hotau Siasí. Tokoniʻi e fānaú ke nau akoako fakaafeʻi koe pe fefakaafeʻaki ke nau haʻu ki ha fakataha pe ʻekitivitī ʻa e Siasí.

• Fakaafeʻi ʻa e fānaú ke nau fakakaukauloto ko e fuofua taimi ʻeni ke haʻu ai hanau kaungāmeʻa ki he lotú. Tokoni ke nau fakakaukau ki ha ngaahi founga te nau lava ai ʻo tokoniʻi honau kaungāmeʻá ke ne ongoʻi ʻoku talitali lelei ia. Tuku ke nau ʻahiʻahi fakahoko e meʻa te nau lea ʻaki pe faí, kapau te nau sio atu ko e fuofua taimi ʻeni ke hū mai hanau kaungāmeʻa ki he falelotú pe loki akó.

Tokāteline mo e Ngaahi Fuakava 46:13–26

Kuo faitāpuekina au ʻe he Tamai Hēvaní ʻaki ʻEne ngaahi meʻafoakí.

Ko e fānau kotoa ʻokú ke akoʻí ko e foha pe ʻofefine ʻo e Tamai Hēvaní, pea kuó Ne tāpuekina kinautolu ʻaki ha ngaahi meʻafoaki fakalaumālie.

Ngaahi ʻEkitivitī ʻe Ala Fakahokó

• Ngāue ʻaki ʻa e Tokāteline mo e Ngaahi Fuakava 46: 13–26 pe “Vahe 20: Ngaahi Meʻafoaki ʻo e Laumālié” (Tokāteline mo e Ngaahi Fuakava 77–80) ke fakamatalaʻi ki he fānaú ha niʻihi ʻo e ngaahi meʻafoaki kuo ʻomi ʻe he Tamai Hēvaní kiate kitautolu ʻo fakafou mai ʻi Hono Laumālié, pea mo e ʻuhinga ʻokú Ne foaki ai kinautolú. Kapau ʻe lava, fakaʻaliʻali ha meʻa pe ngaahi fakatātā ʻoku nau fakafofongaʻi ʻa e meʻafoaki taki taha. Kiʻi taʻofi he taimi ʻe niʻihi ke ʻeke ki he fānaú pe ʻe lava fēfē ke faitāpuekina ʻe he ngaahi meʻafoakí ni ʻa e niʻihi kehé.

• ʻOange ki he fānau taki taha ha meʻa ʻe lava ke vahevahe, hangē ko ha konga mā pe meʻavaʻinga ʻe ua. Kole ki he fānaú ke nau vahevahe ʻa e meʻa kuó ke ʻoangé mo ha taha kehe ʻi he kalasí. Fakamatalaʻi ange ʻoku foaki mai ʻe he Tamai Hēvaní ʻa e ngaahi meʻafoakí kiate kitautolu, pea ʻokú Ne finangalo ke fakaʻaongaʻi kinautolu ke tokoniʻi e niʻihi kehé. Talaange ki he fānaú fekauʻaki mo ha taimi naʻe tāpuakiʻi ai koe koeʻuhi naʻe vahevahe ʻe ha taha ʻa ʻene ngaahi meʻafoaki fakalāumalié.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 46:8–26

ʻOku ʻomi ʻe he Tamai Hēvaní kiate au ʻa e ngaahi meʻafoaki fakalaumālié ke faitāpuekina e niʻihi kehé.

Ko e ngaahi meʻafoaki ʻoku fakamatalaʻi ʻi he Tokāteline mo e Ngaahi Fuakava 46—mo ha ngaahi meʻafoaki fakalaumālie lahi ange—ʻoku maʻu ia mei he ʻOtuá ʻo fakafou mai ʻi he Laumālie Māʻoniʻoní. ʻE lava ke ke tokoniʻi e fānaú ke nau ʻiloʻi e ngaahi meʻafoaki kuo foaki kiate kinautolú—mo e ngaahi meʻafoaki kehe ʻe lava ke nau fekumi ki aí—ʻi hoʻomou ako fakataha ʻa e Tokāteline mo e Ngaahi Fuakava 46.

Ngaahi ʻEkitivitī ʻe Ala Fakahokó

• Hiki ʻi ha ngaahi laʻipepa ha niʻihi ʻo e ngaahi meʻafoaki fakalaumālie ʻoku ʻi he Tokāteline mo e Ngaahi Fuakava 46:13–26 mo e Ngaahi Tefito ʻo e Tuí 1:7, pea fūfuuʻi takai kinautolu ʻi he lokí. Fakaafeʻi ʻa e fānaú takitaha ke nau kumi ha taha ʻo e ngaahi laʻipepá pea fekumi ʻi he ngaahi vēsí ke ʻilo e meʻafoaki ʻoku ʻi he folofolá. Hili iá pea lau fakataha ʻa e Tokāteline mo e Ngaahi Fuakava 46:8–9, 12. Ko e hā ʻoku foaki mai ai ʻe he Tamai Hēvaní ha ngaahi meʻafoaki fakalaumālié?

• Tokoniʻi e fānaú ke nau hiki ʻi he palakipoé ʻa e ngaahi meʻafoaki ʻo e Laumālié ʻa ia ʻoku ʻi he Tokāteline mo e Ngaahi Fuakava 46. ʻI hono hiki e meʻafoaki takitaha, talanoa fekauʻaki mo e founga ʻe lava ke fakaʻaongaʻi ai e meʻafoaki ko iá ke faitāpuekina ʻaki e niʻihi kehé. ʻE lava ke tokoni atu e ngaahi fakamatala ʻi he “Vahe 20: Ngaahi Meʻafoaki ʻo e Laumālié” (Ngaahi Talanoa ʻo e Tokāteline mo e Ngaahi Fuakavá 77–80). Talaange ki he fānaú ʻoku nau takitaha maʻu ha ngaahi meʻafoaki fakalaumālie. Poupouʻi kinautolu ke nau kole ki he Tamai Hevaní ke tokoni ke nau ʻiloʻi ʻenau ngaahi meʻafoakí mo e founga te nau lava ai ʻo fakaʻaongaʻi kinautolu ke tokoniʻi e niʻihi kehé.

Tokāteline mo e Ngaahi Fuakava 47:1, 3

Te u lava ʻo lekooti hoku hisitōliá.

Naʻe uiuiʻi ʻe he ʻEikí ʻa Sione Uitemā ke ne tauhi ha hisitōlia ʻo e Siasí ʻOku faitāpuekina kitautolu he ʻahó ni koeʻuhi ko e ngaahi hisitōlia ʻo e Siasí kuo tauhi ʻi he ngaahi taʻu kuo hilí.

Ngaahi ʻEkitivitī ʻe Ala Fakahokó

• Lau fakataha ʻa e Tokāteline mo e Ngaahi Fuakava 47:1, 3, pea kole ki he fānaú ke nau kumi e meʻa ne finangalo ʻa e ʻEikí ke fai ʻe Sione Uitemaá. ʻOku ʻuhinga ki he hā ʻa e foʻi lea “maʻu ai pē” ʻi he veesi 3? ʻOku tāpuekina fēfē kitautolu ʻe he ʻilo ki he hisitōlia ʻo e Siasí?

• Kapau ʻoku tauhi ʻe he fānau ʻokú ke akoʻí ha tohinoa, kole ange ke nau fakamatala ki he ngaahi meʻa ʻoku nau tohi ʻi heʻenau tohinoá. Mahalo ʻe saiʻia e fānaú ke fanongo ki ha talanoa mei hoʻo tohinoá ʻi he taimi hoʻo tupu haké, pe ko ha tohinoa ki haʻo kui.

• Fakaʻaliʻali ki he fānaú ha ngaahi sīpinga ʻo ha founga te nau lava ʻo tauhi ai ha hisitōlia ʻo ʻenau moʻuí. Hangē ko ʻení, te nau lava ʻo tohi ʻi ha tohi, tānaki ʻa e ngaahi fakatātaá ʻi ha tohi manatu, taipeʻi ʻi ha komipiuta, pe hiki e ngaahi ongó pe vitioó. Tokoniʻi e fānaú ke nau hiki ha lisi ʻo ha ngaahi meʻa ʻe lelei ke fakakau ʻi honau hisitōlia fakatāutahá, ʻo hangē ko ʻenau fakamoʻoni kia Sīsū Kalaisí. Fakaafeʻi ʻa e fānaú ke nau ʻai ha fakaʻilonga pe pousitā ʻoku ʻi ai ha niʻihi ʻo e ngaahi fakakaukau ko ʻení ke ʻave ki ʻapi ke fakamanatu kiate kinautolu ke hiki ʻenau ngaahi hisitōlia fakatāutahá.

  

  Ko e ngaahi tohinoá ko ha founga ia ʻe taha te tau lava ai ʻo tauhi ha hisitōlia.

Tokāteline mo e Ngaahi Fuakava 48:1–4

ʻE lava ke u tokoniʻi e niʻihi kehé ʻaki hono vahevahe ʻa e meʻa kuo foaki maí.

Naʻe poupouʻi ʻe he ʻEikí ʻa e Kāingalotu ʻi ʻOhaioó ke nau tokoni ki he Kāingalotu kehé ʻaki hono vahevahe honau kelekelé mo e paʻangá. ʻE lava fēfē ke ke fakaʻaongaʻi e ngaahi veesi ko ʻení ke tokoni ki he fānaú ke ʻilo ha ngaahi founga ke vahevahe ai mo e niʻihi kehé ʻa e meʻa kuo foaki ange ʻe he ʻOtuá kiate kinautolú?

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha mape ʻo Niu ʻIoke mo ʻOhaiō (vakai ki he fokotuʻutuʻu ʻo e lēsoni ki he 12–18 ʻEpelelí ʻi he Haʻu, ʻo Muimui ‘Iate Au— Maʻá e Fakafoʻituituí mo e Ngaahi Fāmilí). Fakamatalaʻi ange naʻe fekauʻi ʻe he ʻEikí ʻa e Kāingalotu ʻi Niu ʻIoké mo ha ngaahi feituʻu kehe ke nau tānaki fakataha ki ʻOhaiō, ka naʻe ʻi ai honau niʻihi tokolahi ne ʻikai ha paʻanga feʻunga ke langa ha fale ʻi heʻenau tūʻutá. Tokoni ki he fānaú ke nau fekumi ʻi he Tokāteline mo e Ngaahi Fuakava 48: 1–4 ʻa e meʻa ne kole ʻe he ʻEikí ke fai ʻe he Kāingalotu ʻi ʻOhaioó ke tokoní. Fehuʻi ki he fānaú pe ko e hā te nau fie fai ke tokoni ʻo kapau ne nau nofo ʻi ʻOhaiō he taimi ko ʻení. Ko e hā kuo foaki mai kiate kitautolu he ʻahó ni, te tau lava ʻo fakaʻaongaʻi ke tokoniʻi e niʻihi kehé? Hangē ko ʻení, mamataʻi e “The Coat” (video, ChurchofJesusChrist.org).

• Lau fakataha ʻa e Tokāteline mo e Ngaahi Fuakava 48:4, pea fakaafeʻi ʻa e fānaú ke nau kumi ki ha meʻa ne kole ange ʻe he ʻEikí ke fai ʻe he Kāingalotú ke tokoni ki Heʻene ngāué. Fakamatalaʻi ange ʻe tokoni hono fakahaofi ha paʻanga, ke fakatau ha kelekele pea langa ha temipale ʻi ha ʻaho. Ko e hā ha meʻa te tau fakahaofi ki ai ha paʻanga kae lava ke tau tokoni ke fakahoko e ngāue ʻa e ʻEikí? Huluʻi e foʻi vitiō “First Things First” (ChurchofJesusChrist.org), pea aleaʻi ʻa e founga ne fakahoko ʻaki ʻe he fānau ʻi he vitioó ʻa e fekau ko ia ʻa e ʻEikí ke fakahaofi ha paʻangá.

Poupouʻi e Ako ʻi ʻApí

Poupouʻi e fānaú ke nau fehuʻi ki ha mēmipa ʻo e fāmilí ʻi ʻapi ʻo kau ki ha meʻafoaki fakalaumālie ʻoku nau ongoʻi kuo foaki ange kiate kinautolu. Poupouʻi foki ʻa e fānaú ke nau lotu pea fekumi ki ha meʻafoaki ʻo e Laumālié te nau loto ke fakatupulaki.

Fakatupulaki ʻo ʻEtau Founga Akoʻí

Tokoniʻi e fānaú ke nau ako mei he folofolá. Mahalo he ʻikai lava ʻe he fānau īkí ʻo laukonga fēfē, ka te ke kei lava pē ʻo tokoniʻi kinautolu ke nau ako mei he folofolá. Hangē ko ʻení, te ke lava ʻo lau ha potufolofola pea fakaafeʻi kinautolu ke nau tuʻu ki ʻolunga pe hiki honau nimá ʻi he taimi te nau fanongo ai ki ha foʻi lea pe kupuʻi lea pau.