“10–16 Mē. Tokāteline mo e Ngaahi Fuakava 49–50: ‘Ko e Meʻa Ko ia ʻOku Mei he ʻOtuá, ko e Māmá Ia,’” Haʻu, ʻo Muimui ʻIate Au—Maʻá e Palaimelí: Tokāteline mo e Ngaahi Fuakava 2021 (2020)
“10–16 Mē. Tokāteline mo e Ngaahi Fuakava 49–50,” Haʻu, ʻo Muimui ʻIate Au—Maʻá e Palaimelí: 2021
10–16 Mē
Tokāteline mo e Ngaahi Fuakava 49–50
“Ko e Meʻa Ko ia ʻOku Mei he ʻOtuá, ko e Māmá Ia”
ʻI hoʻo lau ʻa e Tokāteline mo e Ngaahi Fuakava 49–50, kumi ki ha ngaahi pōpoaki, pe ngaahi tefitoʻi moʻoni ʻokú ke ongoʻi ʻe tautefito ʻene mahuʻingamālié ki he fānau ʻokú ke akoʻí. ʻOku ʻoatu hano niʻihi ʻi he fokotuʻutuʻu fakalēsoni ko ʻení.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaʻaliʻali ʻa e fakatātā mei he fokotuʻutuʻu fakalēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea tokoni ki he fānaú ke nau talanoa ʻo kau ki he founga ʻoku hangē ai ʻa Sīsū ko ha tauhisipi leleí.
Akoʻi e Tokāteliné: Fānau Iiki Angé
Tokāteline mo e Ngaahi Fuakava 49:12–14
Te u lava ʻo muimui ʻia Sīsū Kalaisi.
Tokoni ke mahino ki he fānaú te nau lava ʻo muimui kia Sīsū Kalaisi ʻaki ʻenau tui kiate Iá, fakatomalá, papitaisó mo hono maʻu e Laumālie Māʻoniʻoní.
Ngaahi ʻEkitivitī ʻe Ala Fakahokó
-
Fakaʻaliʻali ha ngaahi laʻivaʻe pepa ʻe fā mo ha ngaahi fakatātā ʻe fā ʻokú ne fakafofongaʻi e tui kia Sīsū Kalaisí, fakatomalá, papitaisó, mo hono maʻu [e meʻafoaki] ʻo e Laumālie Maʻoniʻoní. Lau ʻa e Tokāteline mo e Ngaahi Fuakava 49:12–14, pea kole ki he fānaú ke nau tuhu ki he fakatātā totonú ʻi he taimi ʻoku lau ai e veesi ko ʻení. Tuku ke tokoni atu e fānaú ke fokotuʻutuʻu e ngaahi laʻivaʻé ʻi he falikí fakataha mo e fakatātā ʻi honau tafaʻakí pea fakaafeʻi ʻa e fānaú ke nau taufetongi ʻo lue ʻi he ngaahi laʻivaʻé. Fai hoʻo fakamoʻoni ko e taimi ko ia ʻoku tau fai ai e ngaahi meʻa ʻi he fakatātaá, ʻoku tau muimui ʻia Sīsū Kalaisi.
-
Fakaʻaongaʻi e peesi ʻekitivitī ʻo e uike ní ke ngaohi ʻaki ha fanga kiʻi tamapua louhiʻinima ʻe lava ke tokoni ki he fānaú ke ʻilo ʻa e founga te nau lava ai ʻo muimui kia Sīsū Kalaisi ʻaki ʻenau tuí, fakatomalá, papitaió mo hono maʻu ʻa e meʻafoaki ʻo e Laumālie Māʻoniʻoní.
Tokāteline mo e Ngaahi Fuakava 50:23–25
ʻE lava ke ulo lahi mo tupulaki ange ʻeku maama fakalaumālié.
ʻE ala faingataʻa ke mahino ki he fānau īkí ʻa e ngaahi fakakaukau ko ia ʻoku ʻikai lava ke mamata ki aí, hangē ko e moʻoní mo e laumālié, ka ʻe lava ke tokoni ʻa hono fakafehoanaki kinautolu ki he māmá ʻo hangē ko hono fai ʻe he ʻEikí ʻi he Tokāteline mo e Ngaahi Fuakava 50: 23–25.
Ngaahi ʻEkitivitī ʻe Ala Fakahokó
-
Fakaʻaongaʻi ha ʻekitivitī ʻokú ne fakatātaaʻi ʻa e founga ʻe lava ke ulo mo tupulaki lahi ange ai ʻetau maama fakalaumālié. ʻE lava ke ke fakaʻaliʻali ha ngaahi fakatātā ʻo ha ngaahi meʻa ʻoku nau tuku atu ha maama (ʻo hangē ko ha foʻi teʻelango, foʻi ʻuhila pea mo e laʻaá) pea tuku ke fokotuʻutuʻu fakahokohoko kinautolu ʻe he fānaú ʻo fakatatau ki he maama ange ʻenau uló. Pe fakaafeʻi ʻa e fānaú ke pehē pē ko ha ngaahi maama kinautolu ʻoku fakaʻau ke ulo lahi ange ʻaki ʻenau punou ki lalo pea tuʻu māmālie ki ʻolunga pea fakamafola hake ki ʻolunga honau ongo nimá. Tokoni ke nau fakakaukau ki ha ngaahi meʻa lelei te nau lava ʻo fai ke ulo lahi ange ai ʻenau maama fakalaumālié.
-
Hivaʻi fakataha mo e fānaú ha foʻi hiva fekauʻaki mo ʻenau maama fakalaumālié, hangē ko e “Ulo Atu” (Tohi Hiva ʻa e Fānaú, 96). Fakamoʻoni fekauʻaki mo e founga kuo tokoniʻi ai ʻe he Tamai Hēvaní hoʻo māmá ke ulo lahi angé. Fakamatala ange ki he fānaú ʻa e maama ʻokú ke fakatokangaʻi ʻoku hā meiate kinautolú.
Tokāteline mo e Ngaahi Fuakava 50:41–44
‘Oku ‘ofeina au ʻe Sīsū Kalaisi.
Ko Sīsū Kalaisi ʻa e Tauhisipi Leleí. Ko ʻEne fanga sipi kitautolu pea ʻokú Ne ʻofa ʻiate kitautolu takitaha. Ko e hā ʻe tokoni ki he fānau ʻokú ke akoʻí, ke nau ongoʻi ʻa ʻEne ʻofa kiate kinautolú?
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo Sīsū Kalaisi mo ha fānau (vakai, Tohi Fakatātā ʻo e Ongoongoleleí, fika 47, 84 pe 116), pea ʻeke ki he fānaú pe ʻoku nau ʻilo fēfē ʻoku ʻofa ʻa Sīsū ʻi he fānaú. Vahevahe ʻa e founga ʻokú ke ʻiloʻi ai ʻoku ʻofa ʻa Sīsū ʻiate koe mo e fānau kotoa ʻi he kalasí.
-
Ngaohi ha fanga sipi mei he pepá pea tohi ai e ngaahi hingoa ʻo e fānau ʻi he kalasí, pea fufuuʻi takai kinautolu ʻi he lokí. Fakaʻaliʻali ha tā ʻo e Fakamoʻuí pea lau ʻa e Tokāteline mo e Ngaahi Fuakava 50: 41–42. Tokoni ke mahino ki he fānaú ʻa e meʻa ʻoku akoʻi ʻe he ngaahi veesi ko ʻení fekauʻaki mo e ongo ʻoku maʻu ʻe Sīsū Kalaisi kiate kinautolú. Tuku ke nau kumi e fanga sipi ʻoku tuku takai ʻi he lokí pea ke fokotuʻu kinautolu ʻi he palakipoé ʻo ofi ki he fakatātā ʻo Sīsuú ke ʻoua “naʻa mole ha taha ʻo kinautolu …” (veesi 42).
Akoʻi e Tokāteliné: Fānau Lalahi Angé
Tokāteline mo e Ngaahi Fuakava 49:12–14
Te u lava ʻo muimui ʻia Sīsū Kalaisi.
ʻOku finangalo ʻa e ʻEikí kiate kitautolu kotoa ke tau akoʻi e niʻihi kehé, ke nau lava ʻo omi kiate Ia ʻi he tui, fakatomala, papitaiso, mo hono maʻu e meʻafoaki ʻo e Laumālie Māʻoniʻoní.
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau fakafehoanaki ʻa e Tokāteline mo e Ngaahi Fuakava 49: 12–14 mo e meʻa naʻe akoʻi ʻe Pita ʻi he Ngāue 2:38 pea mo e tefito ʻo e tui hono faá. Ko e hā ha ngaahi meʻa faitatau ʻoku nau maʻu? Ko e hā ʻoku mahuʻinga ai e ngaahi moʻoni ko ʻení?
-
Fakaafeʻi e fānaú ke nau ngāue tautau toko ua pea ʻai ke pehē ʻoku fie maʻu ʻe ha taha ʻo kinaua ke ʻilo ʻa e founga ke muimui ai ʻia Sīsū Kalaisí. ʻE lava leva ʻe he tokotaha ʻe taha ʻi he hoá ʻo akoʻi ʻa e kiʻi tamasiʻi pe taʻahine ʻe tahá ʻo fakaʻaongaʻi ʻa e Tokāteline mo e Ngaahi Fuakava 49:12–14.
Tokāteline mo e Ngaahi Fuakava 49:15–17
ʻOku mahuʻinga ʻa e nofo-mali ʻa e tangatá mo e fefiné ki he palani ʻa e ʻOtuá.
ʻE ala fehangahangai ʻa e fānau ʻokú ke akoʻí mo ha ngaahi pōpoaki fakatupu puputuʻu fekauʻaki mo e nofo-malí. ʻE lava ke tokoni ʻa e Tokāteline mo e Ngaahi Fuakava 49: 15–17 ke mahino kiate kinautolu ʻa e finangalo ʻo e ʻEikí ʻo kau ki he nofo-malí.
Ngaahi ʻEkitivitī ʻe Ala Fakahokó
-
Fakamatalaʻi ange, ko e kau Sieká ko ha kulupu naʻa nau tui ʻoku ʻikai totonu ke mali ʻa e kakaí (vakai ki he ʻuluʻi fakamatala ki he Tokāteline mo e Ngaahi Fuakava 49). Fakaafeʻi e fānaú ke kumi ha ngaahi meʻa ne akoʻi ʻe he ʻEikí fekauʻaki mo e nofo-malí ʻi he Tokāteline mo e Ngaahi Fuakava 49:15–17.
-
Tokoni ke mahino ki he fānaú ʻa e ʻuhinga ʻo e kupuʻi lea “kuo tuʻutuʻuni ʻe he ʻOtuá ʻa e nofo-malí.” Fakaafeʻi kinautolu ke nau ngāue tautau toko ua ke fakafehoanaki ʻa e Tokāteline mo e Ngaahi Fuakava 49:15–17 mo e ʻuluaki palakalafi ʻe tolu ʻo e “Ko e Fāmilí: Ko ha Fanongonongo ki Māmani.” Ko e hā ʻoku matuʻaki mahuʻinga ai ʻa e nofo-malí ki he Tamai Hēvaní?
-
Hivaʻi fakataha ʻa e veesi hono ua ʻo e “Ko e Fāmilí Ke Taʻengata” (Tohi Hiva ʻa e Fānaú,98) pe ko ha hiva ʻe taha fekauʻaki mo e fāmilí. Tokoni ki he fānaú ke nau fakakaukau ki ha ngaahi founga te nau lava ai ʻo teuteu ke mali ʻi he temipalé ʻi ha ʻaho pea maʻu ha fāmili taʻengata.
ʻĪmisiko ha hoa-mali ʻi tuʻa ʻi he temipaléKo e nofo-mali ʻi he vahaʻa ʻo ha tangata mo ha fefine, ko e tuʻutuʻuni ia ʻa e ʻOtuá.
Tokāteline mo e Ngaahi Fuakava 50:40-46
Ko Sīsū Kalaisi ʻa e Tauhisipi Leleí.
ʻOku ʻi he Tokāteline mo e Ngaahi Fuakava 50:40–46 ha ngaahi fakatātā ʻe ala tokoni ki he fānau ʻokú ke akoʻí, ke mahino ʻa e ongo ʻoku maʻu ʻe he Fakamoʻuí fekauʻaki mo kinautolú.
Ngaahi ʻEkitivitī ʻe Ala Fakahokó
-
ʻAi ha vaʻinga fakatauhoa ʻo fakaʻaongaʻi e ngaahi kupuʻi lea mei he Tokāteline mo e Ngaahi Fuakava 50: 40–46. Hangē ko ʻení, ʻe lava ke ke tohi “ʻOua ʻe manavahē, ʻe fānau iiki” ʻi ha kaati ʻe hoa mo ha kaati ʻe taha ʻoku pehē ai “he ʻoku ʻaʻaku ʻa kimoutolu” (veesi 41). Lau fakataha ʻa e Tokāteline mo e Ngaahi Fuakava 50:40–46 . Tuifio leva e ngaahi kātí ʻi he falikí, pe tēpilé, pe ko e palakipoé, pea kole ki he fānaú ke nau fakatauhoa e ngaahi kupuʻi leá. Ko e hā e ngaahi meʻa ʻoku akoʻi mai ʻe he ngaahi kupuʻi lea ko ʻení ʻo kau kia Sīsū Kalaisí?
-
Ke tokoni ke mahino ki he fānaú ʻa e founga ʻoku hangē ai e Fakamoʻuí ha tauhisipi leleí, kole ange ke nau lau fakataha ʻa e Tokāteline mo e Ngaahi Fuakava 50:40–46. Hili ia pea fakaʻaliʻali ʻa e foʻi vitiō “Jesus Declares the Parable of the Lost Sheep” (ChurchofJesusChrist.org), pea kole ange ke nau kumi ha meʻa ʻi he vitioó ʻokú ne fakamanatu ange kiate kinautolu ʻa e meʻa naʻa nau laú. ʻOku fakahaofi fēfeeʻi kitautolu ʻe Sīsū? Te tau lava fēfē ʻo hoko ko ha kau tauhisipi lelei ki he niʻihi kehé?
Poupouʻi e Ako ʻi ʻApí
Teuteu ha kiʻi fakamatala ʻoku hiki ai e ngaahi lea ko ʻení maʻá e fānau takitaha: ʻʻFehuʻi mai kiate au fekauʻaki mo e . Tuku ke fakafonu ʻe he fānaú ʻa e konga ʻoku ʻataá ʻaki ha meʻa ne nau ako ʻi he kalasí (tokoniʻi kinautolu ʻo ka fie maʻu) pea pineʻi ʻa e kiʻi tohí ki honau valá ke kamataʻi ha fealēleaʻaki ʻi ʻapi.
Fakatupulaki ʻEtau Founga Akoʻí
Liliu ʻa e ngaahi ʻekitivitií ke feʻunga mo e taʻu motuʻa ʻo e fānau ʻokú ke akoʻí. ʻI he tupulaki ko ia ʻa e fānaú, ʻe lahi ange ʻa e meʻa te nau lava ʻo tokoni ai ki he kalasí. Kuo lahi ange e ngaahi meʻa kuo nau aʻusiá pea mahalo ʻe lelei ange ʻenau vahevahe ʻenau ngaahi fakakaukaú. ʻI hoʻo akoʻi e fānau iiki angé, mahalo ʻe fie maʻu ke lahi ange hoʻo fakamatalá, ʻi hoʻo fakamatala ki he fānau lalahi angé. ʻOange maʻu pē ha faingamālie ki he fānaú ke nau kau atu ʻiate kinautolu pē, pea toki tokoniʻi kinautolu ʻo ka fie maʻu.