ʻUluaki ʻOtú, tā ʻe James Taylor Harwood

17–23 Mē

Tokāteline mo e Ngaahi Fuakava 51–57

“Ko [ha] Tauhi Faivelenga, mo Angatonu, mo Anga-fakapotopoto”

Makehe mei he ngaahi fakakaukau ʻoku fokotuʻu atu hení, ʻe lava ke ueʻi koe ʻe he Laumālié ke ke tokanga taha ki ha meʻa kehe mei he Tokāteline mo e Ngaahi Fuakava 51– 57 ʻa ia ʻe ala mahuʻinga ki he fānau ʻokú ke akoʻí.

Lekooti Hoʻo Ngaahi Ongó

Fakaafeʻi e Feʻinasiʻakí

Tuku ke toho ʻe he fānau ʻoku nau loto ke vahevahe e meʻa ʻoku nau akó ha ngaahi mataʻifika mei ha hina ke fakapapauʻi ʻa e fakahokohoko te nau vahevahe aí.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 51:9

Te u lava ʻo faitotonu.

ʻOku kei ako pē ha fānau iiki tokolahi ki he ʻuhinga ʻo e tala ʻa e moʻoní. Fakakaukau ki he founga te ke lava ai ʻo fakamamafaʻi ʻa e mahuʻinga ʻo e lea mo e ngāue totonú.

Ngaahi ʻEkitivitī ʻe Ala Fakahokó

• Lau ki he fānaú mei he Tokāteline mo e Ngaahi Fuakava 51:9: “Tuku ke faitotonu ʻa e tangata kotoa pē” (vakai foki, Ngaahi Tefito ʻo e Tui 1:13,). ʻEke ki he fānaú pe ʻoku nau ʻiloʻi ʻa e ʻuhinga ʻo e faitotonú. ʻOange kiate kinautolu ha ngaahi sīpinga ʻo ha ngaahi ngāue ʻoku totonu, ke tokoni ke mahino lelei ange kiate kinautolu.

• Vahevahe ha ngaahi talanoa faingofua ʻo ha fānau ʻoku nau fehangahangai mo ha ngaahi fili fekauʻaki mo e faitotonú, ʻo hangē ko e fili ke nau fakahaaʻi e taimi ʻoku nau fai ai ha meʻa ʻoku halá. Fakaʻaongaʻi ha ngaahi fakatātā, tamapua sitōkeni pe fanga kiʻi tamapua pepa ke ʻai ke fakamānako ange e talanoá. ʻEke ki he fānaú pe ʻoku faitotonu pe taʻe faitotonu e kakai ko ʻení.

• Hivaʻi ha foʻi hiva fekauʻaki mo e faitotonú, ʻo hangē ko e “Tuʻu ʻi he TotonúTohi Hiva ʻa e Fānaú, 81). Fai hoʻo fakamoʻoni fekauʻaki mo e ʻuhinga ʻoku mahuʻinga ai ke faitotonú.

Tokāteline mo e Ngaahi Fuakava 52:10; 53:3; 55:1

ʻOku maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nimá.

ʻOku toutou fakamatala ʻa e Tokāteline mo e Ngaahi Fuakava 51–57 ki hono maʻu e Laumālie Māʻoniʻoní ʻi he hilifaki ʻo e nimá. Mahalo ʻe hoko ʻeni ko ha faingamālie lelei ke akoʻi e fānaú kau ki he ouau ko ʻení.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha kiʻi tamasiʻi pe taʻahine ʻoku hilifakinima (vakai, Tohi Fakatātā ʻo e Ongoongoleleí, fika 105). Fakaafeʻi ʻa e fānaú ke fakamatalaʻi ʻa e meʻa ʻoku hoko ʻi he fakatātaá. Kole kiate kinautolu ke nau pasipasi ʻi heʻenau fanongo ki he “hilifaki ‘o e nimá” lolotonga hoʻo lau ha taha ʻo e ngaahi veesi ko ʻení pe lahi ange: Tokāteline mo e Ngaahi Fuakava 52:10; 53:3; 55: 1.

• Fakamatala ki he fānaú fekauʻaki mo e taimi naʻá ke maʻu ai e meʻafoaki ʻo e Laumālie Māʻoniʻoní ʻi he hilifaki ʻo e nimá hili hono papitaiso koé. Tokoniʻi e fānaú ke nau loto-vēkeveke ke nau maʻu e meʻafoaki ko ʻení. Aleaʻi mo kinautolu ʻa e ngaahi founga te tau lava ai ʻo fakaafeʻi e Laumālié ki heʻetau moʻuí.

• Hivaʻi ʻa e “Ko e Laumālie Māʻoniʻoní” (Tohi Hiva ʻa e Fānaú, 56) pe ko ha foʻi hiva tatau mo ia. Fakamahinoʻi ange ʻa e ngaahi foʻi lea mo e ngaahi kupuʻi lea ʻoku nau akoʻi fekauʻaki mo e meʻafoaki ʻo e Laumālie Māʻoniʻoní.

  

  Ta fakatātaaʻi ʻe Dan Burr ha kiʻi tamasiʻi ʻoku hilifakinima

Tokāteline mo e Ngaahi Fuakava 54:4–6

ʻOku totonu ke u tauhi maʻu pē ʻeku ngaahi palōmesí.

Naʻe fuakava ʻa Līmani Kōpeli ke tukuange ke nofo e Kāingalotu mei Kolesivili, Niu ʻIoké, ʻi hono kelekele ʻi ʻOhaioó. Ka ʻi he hili ʻenau aʻu atú, naʻá ne maumauʻi ʻene fuakavá pea fekau ke nau mavahe.

Ngaahi ʻEkitivitī ʻe Ala Fakahokó

• Vahevahe mo e fānaú ʻa e meʻa ne hoko ki he Kāingalotu ne omi ke nofo ʻi he kelekele ʻo Līmani Kōpelí (vakai ki he ʻuluʻi fakamatala ʻo e Tokāteline mo e Ngaahi Fuakava 54; vakai foki, “Vahe 21: Ko e ʻAlu ʻa e Palōfitá ki Mīsuli,” Ngaahi Talanoa ʻo e Tokāteline mo e Ngaahi Fuakavá 81–83). Tokoniʻi kinautolu ke nau fakakaukau ki he meʻa ne mei ongoʻi ʻe he Kāingalotú ʻi hono maumauʻi ʻe Līmani ʻa ʻene palōmesí.

• Kosiʻi vaeua ha foʻi haati pepa pea ʻoange ke taki taha ha fānau kehekehe ʻe toko ua. Kole ange ke na hiki hake pea fakatahaʻi ʻena ongo kongá ke faʻu ha foʻi haati kakato. ʻAi ke taufetongi e fānau kehé ʻi hono puke hake e konga ʻo e foʻi hātí. Tokoniʻi e fānaú ke fakafehoanaki ʻeni ki he ngaahi palōmesi pe fuakava ʻoku tau fai mo e ʻOtuá. ʻE fakahoko maʻu pē ʻe he ʻOtuá ʻa ʻEne tafaʻaki ʻo e fuakavá ʻo kapau te tau fakahoko ʻa ʻetau tafaʻakí.

• Fakamanatu ki he fānaú ko e taimi ʻoku papitaiso ai kinautolú, te nau fuakava pe palōmesi ke talangofua ki he ngaahi fekau ʻa e ʻOtuá. Lau kiate kinautolu mei he Tokāteline mo e Ngaahi Fuakava 54:6 kau ki he founga ʻoku tāpuakiʻi ai ʻe he ʻEikí e niʻihi ʻoku nau tauhi ʻenau ngaahi fuakavá.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 51:19; 55

Te u lava ʻo fakaʻaongaʻi ʻa e ngaahi tāpuaki kuo foaki mai ʻe he ʻOtuá ke faitāpuekina e niʻihi kehé.

Kuo fakafalala mai ʻe he ʻEikí kiate kitautolu takitaha ha ngaahi meʻafoaki mo ha ngaahi tāpuaki ʻe lava ke tau fakaʻaongaʻi ke langa ʻa Hono puleʻangá.

Ngaahi ʻEkitivitī ʻe Ala Fakahokó

• Fufuuʻi takatakai ʻa e ngaahi foʻi lea ko e “faivelenga,” “angatonu,” mo e “anga-fakapotopotó” ʻi he lokí. Fakaafeʻi ʻa e fānaú ke nau fakasio e ngaahi foʻi leá ʻi he lokí pea fekumi leva kiate kinautolu ʻi he Tokāteline mo e Ngaahi Fuakava 51:19. Lau fakataha ʻa e vēsí, pea talanoa ki he ʻuhinga ko ia ke hoko ko ha tauhí. Kapau ʻe ʻaonga, lau fakataha ʻa e palakalafi ʻuluaki ʻo e “Tauhí ” ʻi he Fakahinohino ki he Ngaahi Folofolá (scriptures.ChurchofJesusChrist.org).

• Talanoa ki he fānaú fekauʻaki mo Uiliami W Felipisi, ʻa ia ko ha tokotaha faipulusi nusipepa kimuʻa peá ne fanongo ki he ongoongoleleí pea hiki ki Ketilaní. Kole ki he fānaú ke nau lau ʻa e Tokāteline mo e Ngaahi Fuakava 55:1–4 pea hiki ʻa e meʻa naʻe finangalo ʻa e ʻOtuá ke fai ʻe Uiliamí. Ko e fē ʻi he ngaahi meʻá ni ʻe lava ke ʻaonga kiate kitautolu kotoa, pea ko e hā e ngaahi meʻa pau ʻoku kaunga tonu kia Uiliami koeʻuhí ko hono ngaahi talēnití? Kole ki he fānaú ke nau talaatu ʻa e ngaahi talēniti naʻa nau fakatokangaʻi ʻiate kinautolú, pea aleaʻi ʻa e founga te nau lava ʻo fakaʻaongaʻi ai e ngaahi talēniti ko iá ke ngāue maʻá e ʻOtuá mo ʻEne fānaú.

Tokāteline mo e Ngaahi Fuakava 52:14–19

ʻOku ʻi ai ha sīpinga ʻa e ʻOtuá ke tokoni ke ʻoua naʻa kākaaʻi au.

ʻOku ʻomi ʻe he ʻEikí ʻi he ngaahi veesi ko ʻení ha sīpinga “koeʻuhí ke ʻoua naʻa kākaaʻi [kitautolu] (Tokāteline mo e Ngaahi Fuakava 52:14) ʻaki ha ngaahi akonaki mo ha ngaahi pōpoaki hala.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha sīpinga (hangē ko ha sīpinga ki hono tuitui ha vala pe ko hono ngaohi ha meʻa), pea talanoa ki he ʻuhinga ʻoku ʻaonga ai e ngaahi sīpingá. Ke tokoni ke ako e fānaú fekauʻaki mo ha sīpinga mei he ʻEikí, hiki ʻi he palakipoé ha ngaahi kupuʻi lea hangē ko e Ko ia ia ʻoku ,‘oku tatau , Ko ia ʻoku ʻe , pea Ko ia ia ʻoku ‘oku ‘ikai . Fakaafeʻi ʻa e fānaú ke nau lau ʻa e Tokāteline mo e Ngaahi Fuakava 52: 15–18 pea fakafonu ʻa e ngaahi konga ʻoku ʻataá. Ko e hā ʻoku ʻaonga ai e sīpinga ko ʻení kiate kitautolú? (vakai, veesi 14, 19).

• Tā fakatātaaʻi ha meʻa faingofua, pea fakaafeʻi e fānaú ke nau muimui ki hoʻo sīpingá ke nau tā ʻa e fakatātā tatau pē. Hili iá, pea fekumi mo kinautolu ki he sīpinga ʻa e ʻEikí ʻoku lekooti ʻi he Tokāteline mo e Ngaahi Fuakava 52:14–19.

Tokāteline mo e Ngaahi Fuakava 54

ʻOku totonu ke u tauhi maʻu pē ʻeku ngaahi fuakavá.

Neongo ʻoku fakataataha ʻetau ngaahi fuakavá, ʻe lava ke tokoni ki he moʻui ʻa e niʻihi kehé ʻa ʻetau faivelenga ʻi hono tauhi kinautolú. ʻOku fakatātaaʻi ʻe he talanoa ʻo Līmani Kōpeli mo e Kāingalotu mei Kolesivili ʻi Niu ʻIoké, ʻa e moʻoni ko ʻení.

Ngaahi ʻEkitivitī ʻe Ala Fakahokó

• Vahevahe mo e fānaú ʻa e meʻa naʻe hoko ʻi he taimi naʻe nofoʻi ai ʻe he Kāingalotu mei Kolesivili, Niu ʻIoké, ʻa e kelekele ʻo Līmani Kōpelí (vakai ki he ʻuluʻi fakamatala ʻo e Tokāteline mo e Ngaahi Fuakava 54; vakai foki, “Vahe 21: Ko e ʻAlu ʻa e Palōfitá ki Mīsulí,” Ngaahi Talanoa ʻo e Tokāteline mo e Ngaahi Fuakavá, 81–82). Te ke ongoʻi fēfē nai kapau naʻá ke hoko ko e taha ʻo e Kāingalotu ko iá pea ʻilo kuo maumauʻi ʻe Līmani ʻa ʻene fuakava ke vahevahe hono kelekelé? Ko e hā ʻoku akoʻi mai kiate kitautolu ʻe he talanoá ni ʻo fekauʻaki mo hono tauhi ʻetau ngaahi fuakavá? Lau fakataha ʻa e Tokāteline mo e Ngaahi Fuakava 54:6 ke ʻilo ki ha tāpuaki ʻoku foaki ʻe he ʻEikí kiate kinautolu ʻoku nau tauhi ʻenau ngaahi fuakavá.

• Fakamanatu ki he fānaú ʻa e ngaahi fuakava ne nau fai ʻi he taimi ne nau papitaiso aí (vakai, Mōsaia 18:8–10). Tokoniʻi kinautolu ke nau fakakaukau ki ha ngaahi founga ʻoku nau tauhi ai e ngaahi fuakava ko ʻení, pea tokoni ke nau vakai ki he founga ʻe tokoni ai ʻeni ke teuteuʻi kinautolu ke fai mo ha toe ngaahi fuakava ʻi he kahaʻú.

Poupouʻi e Ako ʻi ʻApí

Kapau ʻoku hangē naʻe fakafiefia ki he fānaú ha taha ʻo e ngaahi ʻekitivitī ʻo e ʻaho ní, fokotuʻu ange ke nau toe fakahoko e ʻekitivitī ko iá ʻi ʻapi mo honau ngaahi fāmilí.

Fakatupulaki ʻEtau Founga Akoʻí

Moʻui ʻaki ʻa e meʻa ʻokú ke akoʻí. ʻE toe mālohi ange hoʻo faiakó ʻo kapau te ke lava ʻo fakamoʻoni mei ha aʻusia fakataautaha fekauʻaki mo e ngaahi tāpuaki ʻo hono moʻui ʻaki e ongoongoleleí. ʻI hoʻo fili ha ngaahi tefitoʻi moʻoni ke akoʻi ki he fānaú, fakalaulauloto ki he founga te ke lava ʻo moʻui kakato ange ʻaki e ngaahi tefitoʻi moʻoni ko iá. (Vakai foki, Faiako ʻi he Founga ʻa e Fakamoʻuí, 13–14.)