Independence, Missouri, tā ʻe Al Rounds

24–30 Mē

Tokāteline mo e Ngaahi Fuakava 58–59

“Femoʻuekina … ʻi ha Ngāue Lelei”

Naʻe akonaki ʻa Palesiteni Tāleni H. ʻOakesi ʻo pehē, “ʻE tokoni ʻa e ngaahi folofolá ke fakaleleiʻi ʻetau ngaahi fehuʻi fakatāutahá he ko hono lau kinautolú ʻoku tau fakaafeʻi ai mo fakafeʻungaʻi kitautolu ki he ngaahi ueʻi ʻa e Laumālie Māʻoniʻoní, ʻa ia te ne tataki kitautolu ki he moʻoni kotoa pē” (ʻi he David A. Edwards, “Are My Answers in There?” New Era, May 2016, 42).

Lekooti e Ngaahi Ongo ʻOkú ke Maʻú

‘I he taimi naʻe fuofua mamata ai e kaumātuʻa ʻo e Siasí ki he tuʻuʻanga ʻo e kolo ʻo Saioné—Tauʻatāina, Mīsuli—naʻe taʻeʻamanekina ia. Naʻe fakakaukau ha niʻihi te nau maʻu ha komiunitī fakalakalaka mo tuʻumālie mo ha Kāingalotu mālohi. Ka naʻa nau maʻu ha feituʻu ne toko siʻi e kakai aí, ʻo siʻi e anga fakasivilaise ne nau anga ki aí pea naʻe nofoʻi ia ʻe he kau hikifonua angamālohi kae ʻikai ko e Kāingalotú. Naʻe toki mahino ai ne ʻikai kole ange ʻe he ʻEikí ke nau omi pē ki Saione—naʻá Ne fie maʻu ke nau langa ia.

ʻI he taimi ʻoku ʻikai tatau ai e meʻa ʻoku tau ʻamanaki ki aí mo e meʻa moʻoni ʻoku hokó, te tau lava ʻo manatuʻi e meʻa naʻe fakahā ʻe he ʻEikí ki he Kāingalotú ʻi he 1831: “ʻOku ʻikai te mou lava ʻo mamata ʻaki homou mata fakanatulá, ʻi he taimí ni, ki he finangalo ʻo homou ʻOtuá … pea mo e nāunau ʻe hoko mai hili ʻa e faingataʻa lahí” (Tokāteline mo e Ngaahi Fuakava 58:3). ʻIo, ʻoku fonu ʻa e moʻuí ʻi he faingataʻá, naʻa mo e faiangahalá, ka te tau lava ʻo “fakahoko ʻa e māʻoniʻoni lahi; he ʻoku ʻiate [kitautolu] ʻa e mālohi” (veesi 27–28).

Vakai foki, Kau Māʻoniʻoní, 1:127–33.

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 58:1–5, 26–33, 44; 59:23

‘Oku maʻu e ngaahi tāpuakí ʻo fakatatau ki he taimi ʻa e ʻOtuá pea mo ʻetau faivelengá.

Naʻe fakatoka ʻe he Kāingalotú ʻa e fakavaʻe ʻo Saioné ʻi he Vahefonua Siakisoní, ʻi Mīsuli, ʻa ia ne nau kātekina ai ha ngaahi faingataʻa lahi. Ne nau ʻamanaki moʻoni lolotonga honau taimí ʻe fakalakalaka e feituʻú ni ki ha feituʻu ʻe lava e Kāingalotu kotoa pē ʻo tānaki ki ai. Ka neongo ia, naʻe tuli e Kāingalotú mei he Vahefonua Siakisoní ʻi ha ngaahi taʻu siʻi, pea naʻe fakahā ʻe he ʻEikí ko Hono kakaí ʻe fie maʻu ke nau “tatali … ʻo fuofuoloa siʻi ki hano huhuʻi ʻo Saione” (Tokāteline mo e Ngaahi Fuakava 105:9).

‘I hoʻo ako e ngaahi potufolofola ko ʻení, kumi e ngaahi ʻuhinga ʻe lava ke fakatatali ai ha ngaahi tāpuaki ʻi ha vahaʻataimi. ‘E lava e ngaahi fehuʻi ʻoku ʻoatu ʻi laló ʻo tokoni ke ke fakalaulauloto ki ai.

Tokāteline mo e Ngaahi Fuakava 58:1–5; 59:23. Ko e hā ha ngaahi pōpoaki ʻi he ngaahi veesi ko ʻení ʻokú ne fakamālohia hoʻo malava ke kātekina faʻa kātaki ange e faingataʻá? Ko e hā ha ngaahi tāpuaki kuó ke maʻu hili e faingataʻá? ‘Okú ke pehē ko e hā ʻoku hoko mai pē ai ha ngaahi tāpuaki ʻe niʻihi hili e faingataʻá?

Tokāteline mo e Ngaahi Fuakavá 58:26–33. Ko e hā e fatongia ʻo e “femoʻuekina … ʻi ha ngāue leleí” ʻi hono fakahoko e ngaahi talaʻofa ʻa e ʻOtuá? Ko e hā e fatongia ʻoku fakahoko ʻe hoʻo talangofuá?

Tokāteline mo e Ngaahi Fuakava 58:44. Ko e hā e fekauʻaki ʻa e “lotu ʻi he tuí” pea mo e finangalo ʻo e ʻEikí maʻatautolú?

Tokāteline mo e Ngaahi Fuakava 59, ʻuluʻi vahe

Ko hai ʻa Poli Naiti?

Naʻe kau ʻa Poli Naiti mo hono husepāniti ko Siosefa Naiti ko e Lahí., ʻi he niʻihi ʻo e kau fuofua tui ki he uiuiʻi fakapalōfita ʻa Siosefa Sāmitá. Naʻe fai ʻe Poli mo Siosefa ha tokoni mahuʻinga ki he Palōfitá ʻi he ngāue ʻo hono liliu e Tohi ʻa Molomoná. Naʻe mavahe e fāmili Naití mei Kolesivili Niu ʻIoke ke fakataha mo e Kāingalotu ʻi ʻOhaioó pea naʻe fekauʻi kimui ange ke nau hiki ki he Vahefonua Siakisoní, ʻi Mīsulí. Naʻe kamata ke hōloa e moʻui lelei ʻa Polí ʻi heʻenau fonongá, ka naʻá ne loto-fakapapau ke ne mamata ʻi Saione kimuʻa peá ne pekiá. Naʻá ne ʻi Mīsuli ʻi ha ngaahi ʻaho siʻi pē ʻi he taimi naʻá ne pekia aí (vakai, Kau Māʻoniʻoní, 1:127–28, 132–33). Naʻe maʻu e Tokāteline mo e Ngaahi Fuakava 59 ʻi he ʻaho naʻá ne pekia aí, pea ʻoku hangē ʻoku lea tautautefito e veesi 1 mo e 2 kiate ia.

Tokāteline mo e Ngaahi Fuakava 59:9–19

‘Oku ʻomi ha ngaahi tāpuaki fakatuʻasino mo fakalaumālie ʻi hono tauhi ʻa e ʻaho Sāpaté ke māʻoniʻoní.

Hili hono talaʻofa ke tāpuekina ʻa e Kāingalotu ʻi Saioné “mo ha ngaahi fekau ʻoku ʻikai ke siʻi,” naʻe fai ʻe he ʻEikí ha fakamamafa makehe ki ha fekau ʻe taha: ko e fekau ko ia ke fakaʻapaʻapaʻi Hono “ʻaho tapú” (Tokāteline mo e Ngaahi Fuakava 59:4, 9). ʻI hoʻo ako e Tokāteline mo e Ngaahi Fuakava 59:9–19, fakalaulauloto ki he ʻuhinga naʻe mahuʻinga fau ai hono tauhi e ʻaho Sāpaté ki he Kāingalotú ni ʻi heʻenau feinga ke langa ʻa Saioné.

Te nau lava foki ʻo fakalaulauloto ki he ngaahi fehuʻi hangē ko ʻení: ʻOku ou ngāue ʻaki nai e ʻaho Sāpaté ʻi he founga naʻe fakataumuʻa ki ai ʻe he ʻEikí? ʻOku tokoni fēfē hono tauhi e ʻaho Sāpaté ke māʻoniʻoní ke u “maʻa ange mei māmani”? (veesi 9). Ko e hā te u lava ʻo fai ke “fai [ʻeku] ngaahi huú ki he Fungani Māʻolungá”? (veesi 10).

Hili hono lau e ngaahi veesi ko ʻení, ko e hā ʻoku ueʻi koe ke ke fai ke tauhi kakato ange ai e ʻaho Sāpaté ke māʻoniʻoní? Sēnesi 2:2–3; ʻEkesōtosi 20:8–11; 31:13, 16; Teutalōnome 5:12–15; ʻĪsaia 58:13–14; Maʻake 2:27; Sione 20:1–19; Ngāue 20:7.

ʻE lava ke ʻaonga foki kiate koe ha taha ʻo e ngaahi vitiō lahi pe ngaahi maʻuʻanga tokoni kehe fekauʻaki mo e ʻaho Sāpaté ʻoku maʻu ʻi he sabbath.ChurchofJesusChrist.org.

Vakai foki, Russell M. Nelson, “ ʻOku Fakafiefia ʻa e ʻAho Sāpaté,” Ensign pe Liahona, Mē 2015, 129–32; Fakahinohino ki he Ngaahi Folofolá, “ ʻAho Sāpaté.”

ʻOku kau hono maʻu e sākalamēnití ʻi hono tauhi e ʻaho Sāpaté ke māʻoniʻoní.

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 58:26–29.Mahalo ʻe lava ʻe he kau mēmipa ʻo e fāmilí ʻo ʻai ha lisi ʻo ha ngaahi meʻa ʻe niʻihi ʻoku nau “femoʻuekina” aí. Ko ha “[ngaahi] ngāue lelei” kotoa nai ia? Ko e hā ʻoku finangalo ai e ʻEikí ke tau fai e “ngaahi meʻa lahi ko [ʻetau] fili tauʻatāina [ʻatautolu] pē”? Kole ki he mēmipa takitaha ʻo e fāmilí ke fakakaukau ki he meʻa te nau lava ʻo fai he uiké ni ke “fakahoko ʻa e māʻoniʻoni lahi.” Te nau lava ʻo lipooti mai ʻamui ange ʻi he meʻa naʻa nau faí.

Tokāteline mo e Ngaahi Fuakava 58:42–43.Ko e hā ʻoku ongoʻi ʻe he kau mēmipa ʻo e fāmilí ʻi heʻenau lau e ngaahi veesi ko ʻení? ‘E tokoni fēfē ʻa e ngaahi veesi ko ʻení ki ha taha ʻoku fie maʻu ke fakatomala?

Tokāteline mo e Ngaahi Fuakava 59:3–19.ʻOku ʻuhinga nai ki he hā ke “fakatatā ʻaki ʻa e … ngaahi fekaú”? (veesi 4). ʻI hoʻo lau e ngaahi fekau ʻi he veesi 5–19, aleaʻi e ngaahi tāpuaki kuó ke maʻu ʻi he talangofua ki he ngaahi fekau takitaha ko ʻení.

Te ke lava foki ʻo fakatokangaʻi e founga ʻoku fakaʻaongaʻi ai e ngaahi lea hangē ko e “fiefia,” ke fakamatalaʻi e fekau ko ia ke tauhi e ʻaho Sāpaté ke māʻoniʻoní. Te ke lava fēfē ʻo ʻai ke toe fakafiefia ange ho ʻaho Sāpaté? Mahalo ʻe lava homou fāmilí ʻo fai ha vaʻinga fakatauhoa ʻaki ha ngaahi kaati ʻokú ne fakahaaʻi e meʻa te ke lava ʻo fai ke tauhi ai e ʻaho Sāpaté ke māʻoniʻoní.

Tokāteline mo e Ngaahi Fuakava 59:18–21.Ko e hā te tau lava ʻo fai ke “fakamoʻoniʻi ʻa e kau mai … [ʻa e] toʻukupu [ʻo e ʻOtuá] ʻi he meʻa kotoa pē”? (veesi 21). Fakakaukau ke mou lue ʻeveʻeva pe sio ʻi ha ʻū tā, ʻo fakatokangaʻi e ngaahi meʻa ʻoku “fakamānako ki he matá pea fakafiefia … ki he lotó” (veesi 18). Te ke lava ʻo faitaaʻi pe tā ha ngaahi fakatātā ʻo e meʻa te ke maʻú pea talanoa leva kau i he founga te ke lava ʻo fakahaaʻi ai hoʻo houngaʻia ʻi he ngaahi meʻá ni. Kuo tau vakai fēfē ki he toʻukupu ʻo e ʻOtuá ʻi heʻetau moʻuí?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Fili ʻa e Moʻoní,” Ngaahi Himí, fika 146.

Fakatupulaki ʻo ʻEtau Founga Akoʻí

Vahevahe e ngaahi folofolá. ‘Oange ha taimi ki he kau mēmipa ʻo e fāmilí ke nau vahevahe ha ngaahi potufolofola ʻoku nau maʻu ʻi heʻenau ako fakatāutahá ʻoku mahuʻingamālie kiate kinautolu.

Tā fakatātaaʻi ʻe Marti Major