Nofo kemi ʻi Mīsuli, tā ʻe Bryan Mark Taylor

31 Mē–6 Sune

Tokāteline mo e Ngaahi Fuakava 60–62

“ʻOku ʻi Hoku Nimá ʻa e Kakano Kotoa Pē”

Naʻe akoʻi ʻe Palesiteni ʻĒsela Tafu Penisoni ko e taimi ʻoku tau ako ai e folofola, “ʻe tupulaki ʻa e ngaahi fakamoʻoní. ʻE fakamālohia e ngaahi tukupaá. ʻE fakamālohia e ngaahi fāmilí. ʻE maʻu e ngaahi fakahā fakatāutahá” (“The Power of the Word,” Ensign, May 1986, 81).

Lekooti e Ngaahi Ongo ʻOkú ke Maʻú

ʻI Sune 1831, naʻe fakahoko ʻe Siosefa Sāmita ha konifelenisi mo e kaumātuʻa ʻo e Siasí ʻi Ketilani. Naʻe fokotuʻutuʻu ai ʻe he ʻEikí ha kaumātuʻa ʻe niʻihi ki ha ngaahi hoa pea fekauʻi kinautolu ki he Vahefonua Siakisoní, Mīsuli, mo e fekau ko ʻení: “Malanga ʻi he veʻehalá” (Tokāteline mo e Ngaahi Fuakava 52:10). Ko e tokolahi ʻo e kaumātuʻá ne nau fakahoko faivelenga ia, ka ko e niʻihi naʻe ʻikai pehē. Ko ia ʻi he hokosia e taimi ke fononga foki ai ki Ketilaní, naʻe folofola ʻa e ʻEikí ʻo pehē, “ʻOku ʻi ai ha [kaumātuʻa ʻe] niʻihi ʻoku ʻikai te u loko leleiʻia ai, he ʻoku ʻikai te nau fie fakaava honau ngutú, ka ʻoku nau fufuuʻi ʻa e talēniti ʻa ia kuó u foaki kiate kinautolú koeʻuhi ko e ilifia ki he tangatá” (Tokāteline mo e Ngaahi Fuakava 60:2). Ko e tokolahi ʻo kitautolu te tau ongoʻi fakaʻofaʻia ʻi he kaumātuʻá ni—mahalo te tau momou foki ke fakaava hotau ngutú pea vahevahe ʻa e ongoongoleleí. Mahalo ʻoku taʻofi mo kitautolu ʻe he “ilifia ki he tangatá.” Mahalo ʻoku tau fehuʻia hotau tuʻunga tāú pe meʻa ʻoku tau malavá. Ko e hā pē ʻetau ngaahi ʻuhingá, ʻoku “ʻiloʻi [ʻe he ʻEikí] ʻa e vaivai ʻo e tangatá pea mo e founga ke tokoniʻi ai ʻa [kitautolú]” (Tokāteline mo e Ngaahi Fuakava 62:1). ʻOku lahi ʻi he ngaahi fakahā ko ʻeni ki he kau faifekau ʻi muʻá ha ngaahi fakapapau ʻe lava ʻo tokoni ke tau ikunaʻi ʻetau ngaahi manavasiʻi fekauʻaki mo hono vahevahe ʻo e ongoongoleleí—pe ngaahi manavasiʻi kehe ʻoku tau fehangahangai mo ia: “Ko au, ko e ʻEikí, ʻoku ou pule ʻi he ngaahi langí ʻi ʻolunga.” “ʻOku ou mafai ke ngaohi ʻa kimoutolu ke māʻoniʻoni.” “ʻOku ʻi hoku nimá ʻa e kakano kotoa pē.” Pea “mou fiefia, ʻe fānau iiki; he ʻoku ou ʻi homou lotolotongá.” (Tokāteline mo e Ngaahi Fuakava 60:4, 7; 61:6, 36.)

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 60; 62

‘Oku hōifua ʻa e ʻEikí ʻi heʻeku fakaava hoku ngutú ke vahevahe ʻa e ongoongoleleí.

Kuo tau maʻu kotoa ha ngaahi aʻusia ʻi heʻetau lava ʻo vahevahe e ongoongoleleí mo ha taha, ka ʻi ha faʻahinga ʻuhinga naʻe ʻikai ke tau fai ia. ʻI hoʻo lau e ngaahi lea ʻa e ʻEikí ki he kau faifekau ʻi muʻa ne ʻikai ke nau “fakaava honau ngutú,” fakakaukau ki hoʻo ngaahi faingamālie ke vahevahe ʻa e ongoongoleleí. Ko e hā e founga ʻoku hangē ai hoʻo fakamoʻoni ki he ongoongoleleí ha “talēniti,” pe ko ha koloa mei he ʻOtuá? Ko e hā ha founga ʻoku tau faʻa “fufuuʻi [ai hotau] talēnití”? (Tokāteline mo e Ngaahi Fuakava 60:2; vakai foki, Mātiu 25:14–30).

Naʻe fakatonutonu ʻe he ʻEikí e kau faifekau ko ʻeni kimuʻá, ka naʻá Ne feinga foki ke ueʻi fakalaumālie kinautolu. Ko e hā ha ngaahi pōpoaki fakalotolahi meiate Ia ʻokú ke maʻu ʻi he vahe 60 mo e 62? ‘Oku langaki fēfē ʻe he ngaahi pōpoakí ni hoʻo loto-falala ʻi hono vahevahe e ongoongoleleí? ‘I he ngaahi ʻaho ka hoko maí, kumi ha ngaahi faingamālie ke fakaava ai ho ngutú pea vahevahe e meʻa kuo fakafalala atu ʻe he ʻOtuá kiate koé.

Vakai foki, Tokāteline mo e Ngaahi Fuakava 33:8–10; 103:9–10; Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Ensign pe Liahona, Mē 2019, 15–18.

ʻOku finangalo e ʻOtuá ke u vahevahe e ongoongoleleí mo e niʻihi kehé.

Tokāteline mo e Ngaahi Fuakava 61:5–6, 14–18

‘Oku fakamalaʻiaʻi nai ʻe he ʻEikí e vai kotoa pē?

Ko e fakatokanga ʻa e ʻEikí ʻi he Tokāteline mo e Ngaahi Fuakava 61 ko ha konga ia ʻo ha fakatokanga kau ki he ngaahi fakatuʻutāmaki ʻe lava ke fepaki mo Hono kakaí lolotonga ʻenau fononga ki Saione ʻi he Vaitafe Mīsulí, ʻa ia naʻe ʻiloa he taimi ko iá ʻi heʻene fakatuʻutāmakí. ‘Oku ʻikai totonu ke fakaʻuhingaʻi e fakatokanga ko ʻení ke ʻuhinga ʻoku totonu ke tau fakaʻehiʻehi mei he folau tahí. ʻOku maʻu ʻe he ʻEikí “ʻa e mālohi kotoa pē,” kau ai e mālohi ki he ngaahi vaí (veesi 1).

Tokāteline mo e Ngaahi Fuakava 61–62

‘Oku māfimafi ʻa e ʻEikí pea te ne lava ʻo fakahaofi au.

ʻI he fononga foki ʻa Siosefa Sāmita mo e kau taki kehe ʻo e Siasí ki Ketilaní, ne nau aʻusia ha meʻa fakatuʻutāmaki ʻi he Vaitafe Mīsulí (vakai, Kau Māʻoniʻoní, 1:133–34). Naʻe fakaʻaongaʻi ʻe he ʻEikí e faingamālié ni ke fakatokanga mo fakahinohinoʻi ʻEne kau tamaioʻeikí. Ko e hā naʻá ke maʻu ʻi he Tokāteline mo e Ngaahi Fuakava 61 ʻokú ne fakalotolahiʻi koe ke tuku ho falalá ki he ʻEikí ʻi hoʻo fehangahangai mo hoʻo ngaahi faingataʻá? Hangē ko ʻení, ko e hā ʻoku mahuʻinga ai ke ʻiloʻi ko e ʻOtuá ʻoku “mei he taʻengatá ki he taʻengatá”? (veesi 1).

ʻOku ʻi ai ha ngaahi fakakaukau tatau ʻi he vahe 62. Ko e hā ʻoku akoʻi atu ʻe he ʻEikí fekauʻaki mo Ia pea mo Hono mālohí ʻi he fakahā ko ʻení?

Fakalaulauloto ki ha ngaahi aʻusia langaki e tuí naʻá ke maʻu ʻi he taimi naʻe tokoniʻi ai koe ʻe he ʻEikí ke ke ikunaʻi e faingataʻa fakalaumālié pe fakatuʻasinó.

Tokāteline mo e Ngaahi Fuakava 62

‘Oku finangalo ʻa e ʻEikí ke u fai ha ngaahi fili “ʻo fakatatau ki he meʻa ʻe hā ngali lelei kiate [aú].”

‘Oku ʻomi ʻe he ʻEikí ʻi he taimi ʻe niʻihi ha fakahinohino pau, pea ʻokú Ne tuku ʻa e ngaahi meʻa kehe ke tau fakakaukauʻi. ʻOkú ke vakai ʻoku fakatātaaʻi fēfē ʻa e tefitoʻi moʻoni ko ʻení ʻi he Tokāteline mo e Ngaahi Fuakava 62? (vakai foki, Tokāteline mo e Ngaahi Fuakava 60:5; 61:22). Kuo founga fēfē haʻo fakatokangaʻi e tefitoʻi moʻoni ko ʻení ʻi hoʻo moʻuí? Ko e hā ʻoku lelei ai ke tau fakahoko ha ngaahi fili ʻe niʻihi taʻekau ai ha fakahinohino pau mei he ʻOtuá?

Vakai foki, ʻEta 2:18–25; Tokāteline mo e Ngaahi Fuakava 58:27–28.

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 60:2–3.Ko e hā naʻe momou ai ha niʻihi ʻo e kau fuofua faifekaú ke vahevahe ʻa e ongoongoleleí? Ko e hā ʻoku tau faʻa momou ai he taimi ʻe niʻihi? Fakakaukau ke fakafaivaʻi e founga ʻe lava ai ʻe he kau mēmipa ʻo e fāmilí ʻo vahevahe e ongoongoleleí ʻi ha ngaahi tūkunga kehekehe.

Tokāteline mo e Ngaahi Fuakava 61:36–39.Ko e hā ha ngaahi ʻuhinga ʻoku tau vakai ki ai ʻi he ngaahi vēsí ni ke “fiefia” ai? (vakai foki, Sione 16:33). Mahalo ʻe lava ʻe hoʻo fāmilí ʻo tohi pe tā ha fakatātā ʻo ha ngaahi meʻa ʻokú ne ʻomi kiate kinautolu ʻa e fiefiá pea tānaki kinautolu ʻi ha foʻi hina “fiefia.” (Fakapapauʻi ke fakakau ai ha ʻū tā ʻo e Fakamoʻuí mo e ngaahi fakamanatu ʻo ʻEne ʻofa kiate kitautolú.) ʻI he taimi ʻe fie maʻu ai ʻe he kau mēmipa ʻo e fāmilí ha fakamanatu ʻi he lolotonga e uiké ki he ngaahi ʻuhinga ke fiefia aí, te nau lava ʻo fili ha meʻa mei he foʻi hiná.

Tokāteline mo e Ngaahi Fuakava 61:36.Te ke lava fēfē ʻo tokoni ke manatuʻi ʻe hoʻo fāmilí ʻoku ʻafio ʻa e Fakamoʻuí “ʻi [hotau] lotolotongá”? Te mou lava ʻo fili fakataha e feituʻu ke fakaʻaliʻali mahino ai Hano tā ʻi homou ʻapí. Te tau lava fēfē ʻo fakaafeʻi mai e Fakamoʻuí ki heʻetau moʻui fakaʻahó?

Tokāteline mo e Ngaahi Fuakava 62:3.Mahalo te mou lava ʻo fai ha houa fakamoʻoni fakafāmili hili hono lau e veesi ko ʻení. Ke fakamatalaʻi pe ko e hā ʻa e fakamoʻoní, te ke lava ʻo vahevahe ha ngaahi konga ʻo e pōpoaki ʻa Palesiteni M.Lāsolo Pālati ko e “Pure Testimony” (Ensign pe Liahona, Nov. 2004, 40–43). Ko e hā ʻoku lelei ai ke lekooti ʻetau ngaahi fakamoʻoní?

Tokāteline mo e Ngaahi Fuakava 62:5, 8.Ko e hā ʻoku ʻikai ʻomi ai ʻe he ʻEikí ha ngaahi fekau ki he tafaʻaki kotoa pē ʻetau moʻuí? Fakatatau ki he veesi 8, ko e hā e founga ʻoku totonu ke tau fakahoko ʻaki e ngaahi filí?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Ko e Fakamoʻoní,” Ngaahi Himí, fika 69.

Fakatupulaki e Ako Fakatāutahá

Tuku ke tataki ʻe he Laumālié hoʻo akó. Tuku ke tataki koe ʻe he Laumālie Māʻoniʻoní. Ongoʻi ngofua ʻEne ngaahi fanafaná ʻi Heʻene tataki koe ki he ngaahi meʻa ʻoku fie maʻu ke ke ako ʻi he ʻaho takitaha, neongo kapau ʻoku fokotuʻu atu ʻe Heʻene ngaahi fanafaná ke ke lau pe ako ha kaveinga kehe mei he meʻa te ke fakahoko angamahení pe ʻi ha founga kehe.

Tauhisipi Leleí, tā ʻe Del Parson.