“14–20 Sune. Tokāteline mo e Ngaahi Fuakava 64–66: ‘ʻOku Fie Maʻu ʻe he ʻEikí ʻa e Loto mo e ʻAtamai Fie Faí,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tokāteline mo e Ngaahi Fuakava 2021 (2020)

“14–20 Sune. Tokāteline mo e Ngaahi Fuakava 64–66,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2021

ʻĪmisi

ko ha ngoue ʻi he hopo ʻa e laʻaá

Vahefonua Teivisi, Mīsulí

14–20 Sune

Tokāteline mo e Ngaahi Fuakava 64–66

“ʻOku Fie Maʻu ʻe he ʻEikí ʻa e Loto mo e ʻAtamai Fie Faí”

Naʻe pehē ʻe Palesiteni Henelī B. ʻAealingi: “ʻOku ou faʻa vakai ki he folofolá mo e ngaahi fehuʻi ʻKo e hā ʻe finangalo e ʻOtuá ke u faí?’ pe ʻKo e hā te Ne finangalo ke u ongoʻí?’ ʻOku ou maʻu he taimi kotoa pē ha ngaahi fakakaukau foʻou kuo teʻeki ke u maʻu kimuʻa” (“How God Speaks to Me through the Scriptures,” Feb. 6, 2019, blog.ChurchofJesusChrist.org).

Lekooti e Ngaahi Ongo ʻOkú ke Maʻú

‘I he ʻea vevela ʻo ʻAokosi 1831, naʻe fononga ʻo foki ha kaumātuʻa ʻe niʻihi ki Ketilani hili hono saveaʻi e kelekele ʻo Saioné ʻi Mīsuli ʻo fakatatau ki he fakahinohino ʻa e ʻEikí. Naʻe ʻikai ko ha fononga fakafiefia ia. Naʻe velahia mo ongosia e kau fonongá—ʻa Siosefa Sāmita, ʻŌliva Kautele, Sitenei Likitoni, ʻEselā Puuti, mo e niʻihi kehe—pea ne ʻikai fuoloa kuo iku e ongosiá ki he fakakikihi. Ne hangē ʻe taimi lōloa hono langa ʻo Saioné, ko ha kolo ʻo e ʻofá, faaitahá, mo e melinó.

Ko e meʻa mālié, ko hono langa ʻo Saione—ʻi Mīsuli ʻi he 1831 pe ʻi hotau lotó mo e uōtí ʻi he ʻaho ní—ʻoku ʻikai fie maʻu ia ke tau haohaoa. Ka naʻe folofola ʻa e ʻEikí, “ʻoku ʻekeʻi meiate kimoutolu ʻa hoʻomou fakamolemoleʻí,” (Tokāteline mo e Ngaahi Fuakava 64:10). ʻOkú Ne fie maʻu “ʻa e loto mo e ʻatamai fie faí” (veesi 34). Pea ʻokú Ne fie maʻu ʻa e faʻa kātakí mo e faivelengá, he ʻoku langa ʻa Saione ʻi he fakavaʻe ʻo e “ngaahi meʻa īkí,” ʻo fakahoko ʻe kinautolu ʻoku ʻikai ke nau “fiu ʻi he faileleí” (veesi 33).

Vakai foki, Kau Māʻoniʻoní, 1:133–34, 136–37.

ʻĪmisi

fakaʻilonga ʻo e ako fakatāutahá

Ngaahi Fakakaukau ki Hono Ako Fakatāutaha ʻo e Folofolá

Tokāteline mo e Ngaahi Fuakava 64:1–11

ʻOku fie maʻu ke u fakamolemoleʻi e tokotaha kotoa pē.

ʻI hoʻo lau e Tokāteline mo e Ngaahi Fuakava 64:1–11, fakakaukau ki ha taimi naʻe fakamolemoleʻi ai koe ʻe he ʻEikí. Mahalo foki te ke fakakaukau ki ha taha ʻoku fie maʻu ke ke fakamolemoleʻi. ʻOku kaunga fēfē e manavaʻofa ʻa e Fakamoʻuí ki hoʻo ngaahi ongo fekauʻaki mo koe pea mo e niʻihi kehé? ʻOkú ke pehē ko e hā ʻoku fekauʻi ai ʻe he ʻEikí kitautolu ke “fakamolemoleʻi ʻa e kakai kotoa pē”? (veesi 10). Kapau ʻokú ke fāinga ke fakamolemole, fakakaukau ki he meʻa ʻoku akoʻi ʻe he ngaahi maʻuʻanga tokoni ko ʻení fekauʻaki mo e founga ʻe lava ai e Fakamoʻuí ʻo tokoní: Jeffrey R. Holland, “Ko e Ngāue ʻo e Fakaleleí,” Ensign pe Liahona, Nōvema 2018, 77–79; Fakahinohino ki he Ngaahi Folofolá, “Fakamolemolé,” scriptures.ChurchofJesusChrist.org.

Tokāteline mo e Ngaahi Fuakava 64:31–34

ʻOku fie maʻu ʻe he ʻEikí ha loto mo ha ʻatamai fie fai.

Kuó ke ongoʻi nai kuó ke “fiu” ʻi he “failelei” ʻokú ke feinga ke fakahokó? Kumi e pōpoaki ʻa e ʻEikí kiate koe ʻi he Tokāteline mo e Ngaahi Fuakava 64:31–34. ʻOku ʻuhinga ki he hā ke foaki ho “loto mo e ʻatamai fie faí” ki he ʻOtuá? (veesi 34).

Tokāteline mo e Ngaahi Fuakava 64:41–43

‘E hoko ʻa Saione “ko ha fuka ki he kakaí.”

Ko e fuká “ko ha fuka pe fakaʻilonga ʻa ia ʻoku fakatahataha mai ki ai ʻa e kakaí ʻi he taumuʻa tatau pea mo e meʻa ʻoku ʻiloa ai ʻa kinautolu” (Fakahinohino ki he Ngaahi Folofolá, “Fuká,” scriptures.ChurchofJesusChrist.org). Kuo hoko fēfē ʻa Saione—pe ko e Siasi ʻo e ʻEikí—ʻo hangē ha fuka kiate koé? Fakakaukau ki he ngaahi sīpinga kehe ko ʻeni ʻo e ngaahi meʻa ʻoku puke hake, hangē ha fuká, ke tāpuekina e kakaí: Nōmipa 21:6–9; Mātiu 5:14–16; ʻAlamā 46:11–20. Ko e hā ʻoku akoʻi atu ʻe he ngaahi vēsí ni fekauʻaki mo e founga te ke lava ʻo tokoni ai ke hoko ʻa e Siasí ko ha fuka ʻi he feituʻu ʻokú ke nofo aí? Kumi ha ngaahi founga kehe ʻoku fakamatalaʻi ʻaki ʻe he ʻEikí ʻa Saione ʻi he Tokāteline mo e Ngaahi Fuakava 64:41–43.

*Ko e ʻEikitau ko Molonaí ʻokú ne Puke e Fuka ʻo e Melinó,* tā ʻe Gary E. Smith

Tokāteline mo e Ngaahi Fuakava 65

“Mou teuteu ʻa e hāʻeleʻanga ʻo e ʻEikí.”

Naʻe fakamatalaʻi ʻe Mātiu ʻa Sione Papitaiso ko e tokotaha naʻá ne kalanga ʻaki e, “Mou teuteu ʻa e hala ʻo e ʻEikí” (Mātiu 3:3; vakai foki, ʻĪsaia 40:3). ʻOku fakaʻaongaʻi ʻe he ʻEikí ʻa e lea tatau ʻi he Tokāteline mo e Ngaahi Fuakava 65, ke fakamatalaʻi ʻaki ʻEne ngāue ʻi he ʻaho kimui ní. Ko e hā ha ngaahi faitatau ʻokú ke vakai ki ai ʻi he meʻa naʻe fai ʻe Sione Papitaisó (vakai, Mātiu 3:1–12) mo e meʻa ʻoku finangalo e ʻEikí ke tau fai he kuonga ní? Ko e hā ʻokú ke maʻu ʻi he fakahā ko ʻení ʻokú ne ueʻi koe ke ke tokoni ke fakahoko e ngaahi kikite ʻoku ʻi aí? Fakalaulauloto ki he ngaahi founga te ke lava ʻo “fakahā [e] ngaahi ngāue fakaofo [ʻa e ʻOtuá] ʻi he lotolotonga ʻo e kakaí” (veesi 4).

Tokāteline mo e Ngaahi Fuakava 66

ʻOku ʻafioʻi ʻe he ʻEikí e ngaahi fakakaukau ʻa hoku lotó.

Hili pē ha taimi nounou mei he kau ʻa Viliami E. Makalelini ki he Siasí, naʻá ne kole kia Siosefa Sāmita ke ne fakahā ange e finangalo ʻo e ʻOtuá kiate iá. Naʻe ʻikai ke ʻiloʻi ia ʻe Siosefa, ka naʻe maʻu ʻe Viliami ha fehuʻi fakatāutaha ʻe nima naʻá ne fakaʻamu ʻe tali mai ʻe he ʻEikí ʻo fakafou Heʻene Palōfitá. ʻOku ʻikai ke tau ʻilo pe ko e hā e ngaahi fehuʻi ʻa Viliamí, ka ʻoku tau ʻilo naʻe fakataumuʻa e fakahaá kiate ia, naʻe tali ʻe he Tokāteline mo e Ngaahi Fuakava 66, ʻa e fehuʻi takitaha ʻo aʻu ki he “fiemālie kakato” ʻa Viliamí (“William McLellin’s Five Questions,” Revelations in Context, 138).

ʻI hoʻo lau e vahe 66, fakakaukau ki he meʻa ʻoku ʻafioʻi ʻe he ʻEikí fekauʻaki mo Viliami Makaleliní pea mo e ngaahi hohaʻa mo e taumuʻa ʻo hono lotó. Kuo fakahā fēfē ʻe he ʻEikí ʻokú Ne ʻafioʻi koe? Kapau ʻoku ʻi ai hao tāpuaki fakapēteliake, fakakaukau ke ako ia. ‘I hoʻo fai iá, ko e hā ʻoku tokoniʻi ʻe he Laumālie Māʻoniʻoní ke mahino kiate koe fekauʻaki mo e finangalo ʻo e ʻOtuá kiate koé?

Vakai foki, Kau Māʻoniʻoní, 1:138–40; Gospel Topics, “Patriarchal Blessings,” topics.ChurchofJesusChrist.org.

ʻĪmisi

fakaʻilonga ʻo e ako fakafāmilí

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 64:8–10.ʻOku ʻomi ʻe he ngaahi vā fetuʻutaki fakafāmilí ha ngaahi faingamālie lahi ke ako ai ke fakamolemole. Mahalo ʻe lava ke talanoa e kau mēmipa ʻo e fāmilí fekauʻaki mo e founga kuo tāpuekina ai homou fāmilí ʻi hoʻomou fefakamolemoleʻakí. Kuo tokoniʻi fēfē kitautolu ʻe he Fakamoʻuí ke tau fefakamolemoleʻakí? ʻOku “fakamamahiʻi” (veesi 8) fēfē kitautolu ʻi he taimi ʻoku ʻikai ke tau fakamolemoleʻi ai e niʻihi kehé?

Tokāteline mo e Ngaahi Fuakava 64:33.Ko e hā ʻoku finangalo e Tamai Hēvaní ke fakahoko ʻe homou fāmilí ke fakahoko ai ʻEne “ngāue lahí”? Mahalo ko e ʻalu ki he temipalé, ko hono vahevahe e ongoongoleleí mo ha kaungāʻapi, pe ko hono ikunaʻi e fakakikihí. Mahalo ʻe lava ʻe he mēmipa takitaha ʻo e fāmilí ʻo tānaki ha kiʻi meʻa hangē ko e fanga kiʻi foʻi maka pe fakamaʻu pe fanga kiʻi konga pāsolo, pea fakaʻaongaʻi ia ke fakafofongaʻi e “ngaahi meʻa īkí” ʻoku tau lava ʻo fai ʻi he ʻaho kotoa pē ke “[fakatoka] e fakavaʻe” ki he ngāue māʻongoʻonga ʻa e ʻOtuá. Mou fili fakafāmili ha kiʻi meʻa ʻe taha ke ngāue ai ʻi he uiké ni.

Tokāteline mo e Ngaahi Fuakava 66:3.Te ke akoʻi fēfē e mahuʻinga ʻo e fakatomalá? Te ke lava ʻo ʻave ha meʻakai ʻi ha peleti ʻoku maʻa pē hono konga pea lau e ngaahi lea ʻa e ʻEikí kia Viliami Makaleliní: “ʻOkú ke maʻa, kae ʻikai kotoa.” Te ke lava leva ʻo fufulu e peletí mo vahevahe e meʻakaí lolotonga hono aleaʻi e founga ʻoku fakaʻatā ai ʻe Sīsū Kalaisi ke tau maʻa fakalaumālié.

Tokāteline mo e Ngaahi Fuakava 66:10.‘E lava fēfē homou fāmilí ʻo muimui ki he akonaki ʻa e ʻEikí ke “ʻoua ʻe feinga ke haʻisia ki ha meʻa,” pe mafasia ʻi he ngaahi meʻa lahi ke faí? Te ke lava ʻo talanoa kau ki he talanoa ʻo Mele mo Māʻatá (vakai, Luke 10:38–42), pea aleaʻi e founga ʻe lava ai homou fāmilí ʻo fakaʻehiʻehi mei he haʻisia ki he ngaahi meʻa ʻoku ʻikai hano mahuʻinga taʻengatá.

Ke maʻu ha ngaahi fakakaukau kehe ki hono akoʻi ʻo e fānaú, vakai ki he lēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Tokoniʻi Au Tamai,” Tohi Hiva ʻa e Fānaú, 52.

Fakatupulaki ʻEtau Founga Akoʻí

Fakafaingamālieʻi mo anga fakafaingofua. ʻOku kamata ha niʻihi ʻo e ngaahi momeniti akoʻi lelei tahá ʻi he ngaahi fehuʻi pe loto-hohaʻa ʻa e kau mēmipa ʻo e fāmilí. Tuku ke ʻiloʻi ʻe he kau mēmipa ʻo e fāmilí ʻi hoʻo leá mo e tōʻongá ʻokú ke vēkeveke ke fanongo kiate kinautolu. (Vakai, Ko e Faiako ʻi he Founga ʻa e Fakamoʻuí, 16.)