29 Māʻasī–4 ʻEpelelí

Toetuʻú

“Ko Au Ia ʻa ia ʻOku Moʻuí, ko Au Ia ʻa ia Naʻe Fakapōngí”

ʻI hoʻomou teuteu ke fakamanatua e Toetuʻu ʻa e Fakamoʻuí ʻi he Sāpate Toetuʻú, fakakaukauloto ki he founga kuo fakaloloto ai ʻe he fakahā ʻo onopōní hoʻo tui ko Sīsū Kalaisi ʻa e ʻAlo Pē Taha ʻo e ʻOtuá naʻe Fakatupú pea mo e Huhuʻi ʻo māmaní.

Lekooti e Ngaahi Ongo ʻOkú ke Maʻú

Ko e ʻaho 3 ʻo ʻEpeleli 1836, ko ha Sāpate Toetuʻu ia. Hili e tokoni ʻa Siosefa Sāmita mo ʻŌliva Kautele ki he tufa ʻo e sākalamēnití ki he Kāingalotu ne ualolo ʻi he Temipale Ketilani ne toki fakatapuí, ne na maʻu ha potu lōngonoa ʻi mui ʻi ha veili ʻi he temipalé peá na punou ai ʻo lotu loto pē. Pea ʻi he ʻaho toputapu ko ʻení, ʻi hono fakamanatua ʻe he kakai Kalisitiane he feituʻu kotoa ʻa e Toetuʻu ʻa Sīsū Kalaisí, naʻe hā ʻa Sīsū Kalaisi, ko e Fakamoʻui kuo toetuʻú ʻi Hono temipalé, ʻo Ne folofola, “Ko au ia ʻa ia ʻoku moʻuí, ko au ia ʻa ia naʻe fakapōngí” (Tokāteline mo e Ngaahi Fuakava 110:4).

Ko e ʻuhinga ki he hā ʻa e pehē ko Sīsū Kalaisi “ʻa ia ʻoku moʻuí”? ʻOku ʻikai ʻuhinga pē ia ki Heʻene toe tuʻu mei he fonualotó ʻi he ʻaho hono tolú mo hā ki Heʻene kau ākonga ʻi Kālelí. Ko hono ʻuhingá, ʻokú Ne moʻui he ʻahó ni. ʻOkú Ne folofola mai he ʻahó ni ʻo fakafou ʻi he kau palōfitá. ʻOkú Ne tataki Hono Siasí he ʻahó ni. ʻOkú Ne fakamoʻui he ʻahó ni ʻa e ngaahi laumālie kuo kafo mo loto mafesifesí. Te tau lava ʻo toe fakaongo atu e ngaahi lea ʻo e fakamoʻoni mālohi ʻa Siosefa Sāmitá: “Hili ʻa e ngaahi fakamoʻoni lahi kuo fai ʻo kau kiate iá, ko e fakamoʻoni ʻeni … ʻokú ma fai kiate iá: ʻOkú ne moʻui!” (Tokāteline mo e Ngaahi Fuakava 76:22). Te tau lava ʻo ongona Hono leʻó ʻi he ngaahi fakahā ko ʻení. Te tau lava ʻo fakamoʻoniʻi Hono toʻukupú ʻi heʻetau moʻuí. Pea te tau takitaha lava ʻo ongoʻi ʻa e “fiefia ʻoku ʻomi ʻe he kupuʻi lea ko ʻení: ‘ʻOku ou ʻilo ʻoku moʻui hoku Huhuʻí!’” (Ngaahi Himi, fika 68).

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 29:5; 38:7; 62:1; 76:11–14, 20–24; 110:1–10

ʻOku moʻui ʻa Sīsū Kalaisi.

Naʻe tuʻo lahi e mamata ʻa e Palōfita ko Siosefa Sāmitá ki he Fakamoʻui kuo toetuʻú, pea ʻoku lekooti ʻi he Tokāteline mo e Ngaahi Fuakavá ha aʻusia ai ʻe ua. ʻI hoʻo lau ʻa e vahe 76:11–14, 20–24; 110:1–10, ko e hā ʻoku mahuʻinga kiate koe fekauʻaki mo e fakamoʻoni ʻa Siosefa Sāmitá? Ko e hā ʻoku mahuʻinga ai ʻene fakamoʻoní kiate koé?

ʻI he kotoa ʻo e Tokāteline mo e Ngaahi Fuakavá, naʻe fakamoʻoniʻi ai ʻe he Fakamoʻuí Hono misioná mo ʻEne faka-ʻOtuá. Ko e hā ʻokú ke ako fekauʻaki mo e Kalaisi moʻuí mei Heʻene folofola ʻi he Tokāteline mo e Ngaahi Fuakava 29:5; 38:7; 62:1? ʻE lava ke mou lekooti e ngaahi fakamatala peheni ʻoku mou maʻú ʻi hoʻomou ako e Tokāteline mo e Ngaahi Fuakavá.

Vakai foki, Siosefa Sāmita—Hisitōlia 1:17.

Tokāteline mo e Ngaahi Fuakava 29:26–27; 42:45–46; 63:49; 88:14–17, 27–31; 93:33–34

Te u lava ʻo toetuʻu tuʻunga ʻia Sīsū Kalaisi.

Naʻe ʻiloʻi ʻe Siosefa Sāmita ʻa e ongo ʻo e tengihiá siʻa mālōlō ʻa ha kakai ʻokú te ʻofa aí. Naʻe mālōlō hono ongo tokoua ko ʻAlavini mo Toni Kālosí ʻi heʻena kei talavoú. Naʻe tanu ʻe Siosefa mo ʻEma haʻana fānau ʻe toko ono, ne nau kei siʻi kotoa ʻi he taʻu uá. Kae mei he ngaahi fakahā naʻe maʻu ʻe Siosefá, naʻá ne maʻu ai ha fakakaukau taʻengata ki he maté mo e palani taʻengata ʻa e ʻOtuá. Fakakaukau ki he ngaahi moʻoni naʻe fakahaaʻi ʻi he Tokāteline mo e Ngaahi Fuakava 29:26–27; 42:45–46; 63:49; 88:14–17, 27–31; 93:33–34. ʻOku liliu fēfē ʻe he ngaahi fakahā ko ʻení e anga hoʻo vakai ki he maté? ʻE anga fēfē haʻanau liliu e anga hoʻo moʻuí?

Vakai foki, 1 Kolinitō 15; M. Lāsolo Pālati, “Ko e Vīsone ʻo e Huhuʻi ʻo e Kau Pekiá,” Ensign pe Liahona, Nōvema 2018, 71–74; Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 199–202.

Tokāteline mo e Ngaahi Fuakava 18:10–13; 19:16–19; 45:3–5; 76:69–70

Naʻe fakahoko ʻe Sīsū Kalaisi ha “fakalelei haohaoa.”

Ko e founga ʻe taha ke ke tokanga taha ai ki he fakamoʻuí ʻi he taimi ʻo e Toetuʻú ko haʻo ako e ngaahi fakahā ʻi he Tokāteline mo e Ngaahi Fuakavá ʻokú ne akoʻi ʻa ʻEne feilaulau fakaleleí. ʻE lava ke maʻu hanau niʻihi ʻi he Tokāteline mo e Ngaahi Fuakava 18:10–13; 19:16–19; 45:3–5; 76:69–70. Mahalo naʻa lava ke ke ʻai ha lisi ʻo ha ngaahi moʻoni fekauʻaki mo e Fakalelei ʻa e Fakamoʻuí ʻokú ke maʻu ʻi he ngaahi veesi ko ʻení. Te ke lava ʻo tānaki ki hoʻo lisí ʻaki haʻo fekumi ʻi he ngaahi potu folofola ʻi he lisi he “Fakalelei, Fakaleleiʻí” (Fakahinohino ki he Ngaahi Folofolá, scriptures.ChurchofJesusChrist.org) ke fakaloloto ange hoʻo akó.

Ko ha ngaahi fehuʻi ʻeni te ne ala tataki hoʻo akó:

• Ko e hā naʻe fili ai ʻa Sīsū Kalaisi ke mamahí?

• Ko e hā kuo pau ke u fai ke u maʻu e ngaahi tāpuaki ʻo ʻEne feilaulaú?

• Te u lava fēfē ke tala pe ʻoku tokoni ʻEne Fakaleleí ki heʻeku moʻuí?

ʻEiki ʻo e Lotu, tā ʻe Yongsung Kim

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Konifelenisi lahi.Koeʻuhí ʻoku taimi taha ʻa e konifelenisi lahí mo e Sāpate Toetuʻú ʻi he taʻú ni, te ke lava ʻo fakakaukau ki he founga ʻe lava ke fakaloloto ai ʻe he ngaahi pōpoaki ʻo e konifelenisí (kau ai e mūsiká) e fakamoʻoni ho fāmilí kia Sīsū Kalaisí. Hangē ko ʻení, ʻe lava ke tā ʻe he fānau īkí ha fakatātā ʻo e Fakamoʻuí, pe puke hake Hano fakatātā, ʻi heʻenau fanongo ki ha pōpoaki pe foʻi hiva fekauʻaki mo Sīsū Kalaisi. ʻE lava ke hiki ʻe he kau mēmipa kehe ʻo e fāmilí ha lisi ʻo e ngaahi moʻoni ʻoku nau fanongo ki ai fekauʻaki mo e Fakamoʻuí. Hili ia, ʻe lava ke vahevahe ʻe he kau mēmipa ʻo e fāmilí ʻenau ngaahi fakatātaá pe lisí pea mo ʻenau ngaahi fakamoʻoni kau kia Sīsū Kalaisí.

Tokāteline mo e Ngaahi Fuakava 88:14–17; 138:17, 50.ʻE ala fiefia homou fāmilí ke fakakaukau ki ha talanoa fakatātā pe lēsoni fakataumuʻa ke fakamatalaʻi hono ʻuhinga ʻo e mate pea toetuʻú—ko ha meʻa ʻokú ne fakamahino e fakamavaheʻi ʻo e sinó mei he laumalié, ʻo hangē ha nima pea mo ha kofunimá. ʻOku fakaloloto fēfē ʻe he ngaahi vēsí ni ʻetau fakahoungaʻi e meʻa naʻe fai ʻe he Fakamoʻuí maʻatautolú?

“Ko e Kalaisi Moʻuí: Ko e Fakamoʻoni ʻa e Kau ʻAposetoló.”Ke poupouʻi hono aleaʻi ʻo e ngaahi fakamoʻoni ʻa e kau palōfita ʻo onopōní ki he Fakamoʻuí, te ke lava ʻo vahe ki he mēmipa takitaha ʻo e fāmilí ke nau lau ha konga ʻo e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (Ensign pe Liahona, Mē 2017, tafaʻaki ki loto ʻo e takafi muʻá) pea vahevahe ʻa e meʻa ne nau ako fekauʻaki mo Sīsū Kalaisí. Te ke lava foki ʻo huluʻi ʻa e foʻi vitiō “Apostle Testimony Montage” (ChurchofJesusChrist.org). Ko e hā ha ngaahi moʻoni ʻoku tau maʻu ʻoku nau ueʻi fakalaumālie kitautolu?

“ʻOku ou ʻIlo ʻOku Moʻui Hoku Huhuʻí.”Ke tokoni ke fakakaukau ho fāmilí ki he ngaahi founga lahi ʻoku tāpuekina ai kitautolu ʻe he Fakamoʻui kuo toetuʻú he kuongá ni, te mou lava ʻo hivaʻi fakataha ʻa e “ ʻOku Moʻui Hoku Huhuʻí” (Ngaahi Himi, fika 68) pea fakafehokotaki e ngaahi moʻoni ʻoku akoʻi ʻi he foʻi hiva ko ʻení mo e ngaahi moʻoni ʻi he ngaahi potufolofola ko ʻení: Tokāteline mo e Ngaahi Fuakava 6:34; 45:3–5; 84:77; 98:18; 138:23. Mahalo naʻa fiefia foki homou fāmilí ke faʻu ha ngaahi veesi ki he himí ʻoku fakahaaʻi ai e founga ʻo ʻenau ʻilo ʻoku moʻui honau Huhuʻí.

Ke maʻu ha vitiō ki he Toetuʻú mo ha ngaahi maʻuʻanga tokoni kehe, vakai, Easter.ComeUntoChrist.org.

Ke maʻu ha ngaahi fakakaukau lahi ange ki hono akoʻi ʻo e fānaú, vakai, lēsoni ʻo e uike ní ʻi he Haʻu, ‘o Muimui ʻIate Aú—Maʻá e Palaimelí.

Hiva ʻoku fokotuʻu atú: “Kuo Toetuʻu ʻa Sīsū,” Tohi Hiva ʻa e Fānaú, 44.

Ko Hono Fakaleleiʻi ʻo ʻEtau Founga Akoʻí

Kumi ha ngaah lēsoni ʻi he ngaahi meʻa ʻoku hoko fakaʻahó. Fakakaukau ki he founga ʻe lava ke iku ai e ngaahi aʻusia fakaʻaho ʻa e kau mēmipa ho fāmilí ki ha ngaahi pōtalanoa mahuʻinga fekauʻaki mo ha foʻi moʻoni ʻo e ongoongoleleí (vakai, Ko e Faiako ʻi he Founga ʻa e Fakamoʻuí, 4). Hangē ko ʻení, ʻe lava ke hoko ha ʻuha lōvai ko ha faingamālie ke talanoa ai ki he founga hono lilingi ‘e he ‘Otuá ʻa e ngaahi tāpuakí ki Heʻene fānaú.

Ko e Hā ʻa Sīsū Kalaisi ki he Palōfita ko Siosefa Sāmitá mo ʻŌliva Kautele, tā ʻe Walter Rane