Ko Sīsū ʻoku tuʻu ʻi he ʻao ʻo ha kakai ʻoku nau tūʻulutui

ʻE Peluki ʻa e Tui Kotoa Pē, tā ʻe J. Kirk Richards

22–28 Māʻasí

Tokāteline mo e Ngaahi Fuakava 29

ʻE Tānaki ʻe Sīsū Kalaisi Hono Kakaí

Ko e taha ‘o e ngaahi taumuʻa hono ako ʻo e folofolá ke ako ʻa e tokāteline, pe ngaahi moʻoni ʻo e ongoongoleleí ʻoku mahuʻinga ki hotau fakamoʻuí. ʻI hoʻo ako e Tokāteline mo e Ngaahi Fuakava 29 ʻi he uike ní, kumi ki ha ngaahi ʻilo fakaetokāteline ʻoku mahuʻinga kiate koe.

Lekooti e Ngaahi Ongo ʻOkú ke Maʻú

Neongo ne ʻosi fokotuʻu e Siasi ʻo Sīsū Kalaisí ʻi he 1830, ka ne lahi ha ngaahi moʻoni ʻo e ongoongoleleí ne teʻeki ke fakahā mai, pea ne ʻi ai ha ngaahi fehuʻi ʻa ha niʻihi ʻa e kau fuofua kāingalotu ʻo e Siasí. Ne nau ʻosi lau e ngaahi kikite ʻi he Tohi ʻa Molomoná kau ki he tānaki ʻo ʻIsilelí mo hono langa hake ʻo Saioné (vakai, 3 Nīfai 21). Ka ʻe hoko fēfē ia? Naʻe fakamatala e ngaahi fakahā naʻe pehē ʻe Hailame Peisi naʻá ne maʻú ki he meʻa ko iá, ka naʻá ne fakalahi ai e fieʻilo ʻa e kāingalotú (vakai, Tokāteline mo e Ngaahi Fuakava 28). Naʻe fifili ha niʻihi ʻo e kakaí ki he Hinga ʻa ʻĀtama mo ʻIví mo e mate fakalaumālié. Ne tali lelei ʻe he ʻEikí ʻa e ngaahi fehuʻí ni ʻi he 1830: Naʻá Ne folofola ki he Kāingalotú, “Ko e meʻa kotoa pē te mou kole ʻi he tuí, pea loto-taha ʻi he lotu ʻo fakatatau ki heʻeku fekaú, te mou maʻu ia” (Tokāteline mo e Ngaahi Fuakava 29:6). Pea ʻokú Ne talitali lelei ʻetau ngaahi fehuʻí he ʻahó ni; ʻokú Ne tatali pē ke tau kole kiate Ia ʻi he lotu. Ko hono moʻoní, ʻoku fakahaaʻi ʻe he fakahā mohu fakatokāteline ʻi he Tokāteline mo e Ngaahi Fuakava 29, ʻokú Ne faʻa tali he taimi ʻe niʻihi ʻaki hano ʻomi ha moʻoni mo ha ʻilo ʻoku mahulu hake ia ʻi he ngaahi fehuʻi ne tau faí.

fakaʻilonga ʻo e ako fakatāutahá

Ngaahi Fakakaukau ki Hono Ako Fakatāutaha ʻo e Folofolá

Tokāteline mo e Ngaahi Fuakava 29

Naʻe teuteuʻi ʻe he Tamai Hēvaní ʻa e palani haohaoa ki hotau hakeakiʻí.

ʻOku akoʻi ʻe he Tokāteline mo e Ngaahi Fuakava 29 ha ngaahi moʻoni lahi fekauʻaki mo e palani ʻa e ʻOtuá ki Heʻene fānaú. Lolotonga hoʻo laukongá, kumi e ngaahi moʻoni kuó ke ʻilo fekauʻaki mo e ngaahi konga takitaha ko ʻeni ʻo e palaní:

• Moʻui ʻi he maama fakalaumālié (vakai, veesi 36–37)

• Fakatupú (vakai, veesi 31–33)

• Ko e Hinga ʻa ʻĀtama mo ʻIví (vakai, veesi 40–41)

• Moʻui Fakamatelié (vakai, veesi 39, 42–45)

• Ko e Fakalelei ʻa Sīsū Kalaisí (vakai, veesi 1, 42–43, 46–50)

• Ko e Toetuʻú (vakai, veesi 13, 26)

• Ko e Fakamaau Fakaʻosí (vakai, veesi 12–13, 27–30)

Ko e hā ha ngaahi ʻilo foʻou naʻá ke maʻu? Naʻe mei kehe fēfē nai hoʻo moʻuí kapau naʻe ʻikai ke ke ʻilo ki he ngaahi moʻoni ko ʻení?

Te ke lava ʻo ako lahi ange ki he palani ʻa e Tamai Hēvaní ʻi he “Ko e Palani ʻo e Fakamoʻuí” (Malangaʻaki ʻEku Ongoongoleleí: Ko Ha Fakahinohino ki he Ngāue Fakafaifekaú, rev. ed. [2018], ChurchofJesusChrist.org/manual/missionary).

Tokāteline mo e Ngaahi Fuakava 29:1–8

ʻE tānaki ʻe Sīsū Kalaisi Hono kakaí kimuʻa ʻi Heʻene Hāʻele ʻAnga Ua Maí.

ʻOku folofola ʻa Sīsū Kalaisi kau ki he tānaki ʻo Hono kakaí “ʻo hangē ko hono tānaki ʻe he motuʻa moá ʻa hono fanga ʻuhikí ki hono lalo kapakaú” (Tokāteline mo e Ngaahi Fuakava 29:2). Ko e hā ʻoku akoʻi mai ʻe he fakatātā ko ʻení fekauʻaki mo e vēkeveke ʻa e Fakamoʻuí ke tānaki kimoutolú? ʻI hoʻo lau e Tokāteline mo e Ngaahi Fuakava 29:1–8, kumi ha ngaahi ʻilo ki he ʻuhinga ʻoku tānaki ai kitautolú, ko hai te ne tānakí, pe te tau lava fēfē ke tokoni ʻi he tānaki ʻo e “kakai kuo filí” (veesi 7).

ʻOku ʻuhinga e tānaki ki Saioné ʻi hotau kuongá ni ke tau fakataha ʻi he ngaahi siteiki ʻo Saione he funga ʻo māmaní. ʻOku tokoni fēfē ʻa e tānaki ʻo e Kāingalotú ke tau “mateuteu [ai] ʻi he ngaahi meʻa kotoa pē” ki he ngaahi faingataʻa ʻe hoko kimuʻa ʻi he Hāʻele ʻAnga Ua Mai ʻa e Fakamoʻuí? (veesi 8; vakai foki, veesi 14–28).

Vakai foki, Tefito ʻo e Tuí 1:10; Russell M. Nelson mo Wendy W. Nelson, “ ʻAmanakiʻanga ʻo ʻIsilelí” (fakataha lotu fakamāmani lahi maʻá e toʻu tupú, Sune 3, 2018, ChurchofJesusChrist.org).

motuʻa moa mo e ʻuhiki

Kuo Tuʻo Fiha, tā ʻe Liz Lemon Swindle

Tokāteline mo e Ngaahi Fuakava 29:31–35

“ʻOku fakalaumālie kiate au ʻa e ngaahi meʻa kotoa pē.”

Ko e hā ha founga ʻoku fakalaumālie ai e fekaú kotoa? Ko e hā ʻoku akoʻi atu ʻe hono ʻiloʻi ʻoku fakalaumālie e ngaahi fekau kotoá fekauʻaki mo e taumuʻa ʻo e ngaahi fekaú? Te ke ala lisi ha ngaahi fekau ʻe niʻihi mo fakalaulauloto ki he ngaahi tefitoʻi moʻoni fakalaumālie fekauʻaki mo kinautolu takitaha.

Ko e hā ha meʻa ʻe ala liliu kapau naʻá ke kumi ki he ngaahi ʻuhinga mo e taumuʻa fakalaumālié ʻi hoʻo ngāue fakaʻahó, naʻa mo kinautolu ʻoku ngali fakatuʻasino mo angamahení?

Vakai foki, Loma 8:6; 1 Nīfai 15:30–32.

Tokāteline mo e Ngaahi Fuakava 29:36–50

ʻOku huhuʻi kitautolu ʻe Sīsū Kalaisi mei he Hingá.

ʻOku kamata ʻaki e fakahā ko ʻení hano fakafeʻiloaki ʻe he ʻEikí Ia ko hotau Huhuʻi, ʻa ia kuó Ne “fakalelei ʻa [ʻetau] ngaahi angahalá” (veesi 1). ʻOku hoko atu ʻa e fakahaá ke fakamatalaʻi ha niʻihi ʻo e ngaahi ʻuhinga ʻoku tau fie maʻu ai ha Huhuʻí. Fakakaukau ki ha founga te ke lava ai ʻo fakaʻaongaʻi e veesi 36–50 ke fakamatalaʻi ʻa e ʻuhinga ʻoku tau fie maʻu ai e huhuʻí ʻo fakafou ʻi he Fakamoʻui ko Sīsū Kalaisí. ‘I ha ngaahi tui fakalotu lahi, ʻoku nau lau e Hingá ko ha meʻa fakamamahi; ko e hā ʻokú ke maʻu ʻi he ngaahi veesi ko ʻení ʻoku nau akoʻi e ngaahi ola lelei ʻo e Hingá? (Vakai foki, 1 Kolinitō 15:22; 2 Nīfai 2:6–8, 15–29; Mosaia 3:1–19; Mōsese 5:9–12.)

fakaʻilonga ʻo e ako fakafāmilí

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngahai Fuakava 29.Te mou lava ʻo fakaʻaongaʻi e ngaahi fakatātā ʻi he fakaʻosinga ʻo e lēsoni ko ʻení fakataha mo e Tokāteline mo e Ngahai Fuakava 29 ke akoʻi homou fāmilí fekauʻaki mo e palani ʻo e fakamoʻuí. Hangē ko ʻení, ʻe lava ke ako e kau mēmipa ʻo e fāmilí kau ki he ngaahi konga kehekehe ʻo e palaní ʻaki haʻanau laukonga mo aleaʻi e ngaahi veesi ʻoku fokotuʻu atú. Te nau lava foki ʻo maʻu ha ngaahi moʻoni lahi ange ʻi he Ngaahi Tefito ʻo e Ongoongoleleí (topics.ChurchofJesusChrist.org) pe Fakahinohino ki he Ngaahi Folofolá (scriptures.ChurchofJesusChrist.org). Hiki ʻa e meʻa ʻokú ke akó. Ko e hā ʻoku tau houngaʻia ai ʻi heʻetau ʻilo ki he palani ʻo e fakamoʻuí? ʻOku takiekina fēfē ʻe hono ʻiloʻi iá ʻetau moʻui fakaʻahó?

Tokāteline mo e Ngahai Fuakava 29:2, 7–8.Ko e ʻuhinga ki he hā ʻa e pehē ke tānaki fakataha ʻe he Fakamoʻuí? ʻE founga fēfē haʻatau tokoni kiate Ia ke tānaki e kakai kuo filí?

Tokāteline mo e Ngahai Fuakava 29:3–5.Ko e hā ʻoku tau ako kau ki he Fakamoʻuí ʻi he ngaahi vēsí ni, ʻoku tokoni ke “hiki hake [hotau] lotó pea fiefiá”? (veesi 5). ʻE lava e foʻi vitiō “We Can Find Happiness” (ChurchofJesusChrist.org) ʻo tokoni ke mou aleaʻi e founga ke ʻilo ai ki he founga hono ʻomi ʻe he palani ʻo e fakamoʻuí ki homou fāmilí e fiefiá.

Tokāteline mo e Ngaahi Fuakava 29:34–35.ʻE lava ke ʻoatu ʻe hano lau ʻo e ngaahi veesi ko ʻení ha faingamālie ke talanoa ai homou fāmilí ki he ngaahi ʻuhinga fakalaumālie ki ha niʻihi ʻo e ngaahi fekau pe akonaki fakaepalōfita ʻoku mou feinga ke muimui ki aí. Hangē ko ʻení, ko e hā ʻoku finangalo ai e ʻEikí ke tau lau fakafāmili e folofolá? Ko e hā ha ngaahi lelei fakalaumālie kuo tau mamata ki ai ʻi hono tauhi e ngaahi fekaú?

Ke maʻu ha ngaahi fakakaukau lahi ange ki hono akoʻi ‘o e fānaú, vakai, lēsoni ʻo e uike ko ‘ení ʻi he Haʻu, ‘o Muimui ʻIate Au—Maʻá e Palaimelí.

Hiva ʻoku fokotuʻu atú: “ ʻIsileli, ʻIsileli, ʻOku Ui ʻa e ʻOtuá,” Ngaahi Himi, fika 6.

Ko Hono Fakatupulaki ʻEtau Founga Akoʻí

Fekumi kia Sīsū Kalaisi. ʻOku akoʻi kitautolu ʻe he folofolá ʻoku fakamoʻoni e ngaahi fakatupu kotoa ʻa e ʻOtuá kia Sīsū Kalaisi (vakai, Mōsese 6:62–63), ko ia ai, fekumi kiate Ia ʻi hoʻo lau e folofolá. Fakakaukau ke fakaʻilongaʻi e ngaahi veesi ʻoku nau fakamatala fekauʻaki mo Iá.

palani ʻo e fakamoʻuí