15–21 Māʻasí

Tokāteline mo e Ngaahi Fuakava 27–28

“Kuo Pau ke Fai ʻa e Ngaahi Meʻa Kotoa Pē ʻo Maau”

Naʻe pehē ʻe ʻEletā D. Toti Kulisitofasoni ko e taimi ʻokú ke ako ai e folofolá mo lekooti e ngaahi ongo ʻokú ke maʻú, “te ke fakaʻatā ai ha feituʻu ʻi ho lotó ki he folofola ʻa e ʻOtuá, pea te Ne folofola atu kiate koe” (“When Thou Art Converted,” Ensign pe Liahona, May 2004, 11).

Lekooti e Ngaahi Ongo ʻOkú ke Maʻú

Naʻe kei hoko e folofolá ko ha fakakaukau foʻou ki he Kāingalotú ʻi he hoko atu hono Fakafoki Mai ʻo e Ongoongoleleí. Naʻe ʻilo ʻe he kau fuofua mēmipa ʻo e Siasí ʻe lava ke maʻu ʻe he Palōfita ko Siosefa Sāmitá ha fakahā maʻá e Siasí, ka ʻe pehē nai mo e niʻihi kehé? Naʻe hoko ʻa e ngaahi fehuʻi peheé ʻo mahuʻinga ʻi he taimi naʻe tui ai ʻa Hailame Peisi, ko e taha ʻo e Kau Fakamoʻoni ʻe Toko Valu ki he ngaahi peleti koulá, kuó ne maʻu ha ngaahi fakahā maʻá e Siasí. Naʻe tui ha Kāingalotu faivelenga tokolahi ko e ngaahi fakahā ʻeni mei he ʻOtuá. Naʻe tali ʻeni ʻe he ʻEikí ʻaki ʻEne akoʻi “kuo pau ke fai ʻa e ngaahi meʻa kotoa pē ʻo maau” ʻi Hono Siasí” (Tokāteline mo e Ngaahi Fuakava 28:13), ʻa ia ko hono ʻuhingá ko e toko taha pē ʻoku “fili … ke ne maʻu ʻa e ngaahi fekau mo e ngaahi fakahā” maʻá e Siasí hono kotoa (Tokāteline mo e Ngaahi Fuakava 28:2). Ka neongo ia, ʻe lava ke maʻu ʻe ha niʻihi kehe ha fakahā fakafoʻituitui maʻanautolu ʻi he ngāue ʻa e ʻEikí. Ko hono moʻoní, ʻoku hoko e ngaahi lea ʻa e ʻEikí kia ʻŌliva Kautelé ko ha fakamanatu kiate kitautolu kotoa: “ʻE fakahā kiate koe … ʻa e meʻa kuo pau ke ke faí” (Tokāteline mo e Ngaahi Fuakava 28:15).

Vakai foki, “All Things Must Be Done in Order,” Revelations in Context, 50–53.

Ngaahi Fakakaukau ki Hono Ako Fakataautaha e Folofolá

Tokāteline mo e Ngaahi Fuakava 27:1–4

ʻOku totonu ke u maʻu ʻa e sākalamēnití ʻi ha mata ʻoku tāfataha pē ki hono fakalangilangiʻi ʻo e ʻOtuá.

Naʻe papitaiso ʻa Seli Naiti mo ʻEma Sāmita ʻi Sune ʻo e 1830, ka naʻe uesia hona hilifakinimá ʻe ha kau fakatanga. Hili ha māhina ʻe ua mei ai, naʻe haʻu ʻa Seli mo hono husepāniti ko Niuelí ke ʻaʻahi kia ʻEma mo Siosefa, pea naʻe fakapapauʻi ai ʻoku totonu ke fakahoko ʻa e hilifakinimá he taimi ko iá pea ke nau maʻu fakataha ʻa e sākalamēnití. Lolotonga e fononga ʻa Siosefa ke ʻomi ha uaine ki he sākalamēnití, naʻe taʻofi ia ʻe ha ʻāngelo. Ko e hā naʻe akoʻi ange ʻe he ʻāngeló fekauʻaki mo e sākalamēnití? (vakai, Tokāteline mo e Ngaahi Fuakava 27:1–4).

Ko e hā ʻoku akoʻi atu ʻe he ngaahi veesi ko ʻení fekauʻaki mo e founga ʻoku finangalo ʻa e Fakamoʻuí ke mou maʻu ai ʻa e sākalamēnití? Ko e hā ʻoku ueʻi koe ke ke fai tuʻunga ʻi he meʻa ʻokú ke akó?

ʻOku fakamanatu mai ʻe he sākalamēnití e feilaulau ʻa e Fakamoʻuí.

Tokāteline mo e Ngaahi Fuakava 27:15–18

ʻE tokoni e teunga tau ʻo e ʻOtuá ke u matuʻuaki e koví.

Naʻe pehē ʻe Palesiteni M. Lāsolo Pālati: “ʻOku ʻikai ha meʻa maʻongoʻonga mo lahi te tau lava ʻo fai ke fakamahafu fakalaumālie ʻaki kitautolu. ʻOku maʻu ʻa e mālohi fakalaumālie moʻoní ʻi he ngaahi ngāue iiki kehekehe kuo huluni fakataha ʻi ha tupenu kuo fakamālohia fakalaumālie, ʻokú ne maluʻi mo ʻaofi mei he kovi kotoa pē” (“Be Strong in the Lord,” Ensign, July 2004, 8).

ʻI hoʻo lau ʻa e Tokāteline mo e Ngaahi Fuakava 27:15–18, te ke lava pē ke faʻu ha saati hangē ko e saati ʻi laló. Ko e hā ʻokú ke fai ke tui ai e ngaahi konga takitaha e teunga tau ʻo e ʻOtuá?

Konga ʻo e teunga taú	Konga ʻo e sinó ʻoku maluʻí	Meʻa ʻe ala fakafofongaʻi ʻe he konga ko ia ʻo e sinó
Sifa-fatafata ʻo e māʻoniʻoní	Mafú	Ko ʻetau ngaahi holí mo e manakó
Tatā ʻo e fakamoʻuí	ʻUlú pe fakakaukaú

Vakai foki, ʻEfesō 6:11–18; 2 Nīfai 1:23.

Tokāteline mo e Ngaahi Fuakava 28

Ko e palōfita moʻuí ʻa e tokotaha lea ʻa e ʻOtuá ki Hono Siasí.

Fakakaukauloto pe naʻe mei fēfē kapau naʻe lava ke maʻu ʻe ha faʻahinga taha pē ha ngaahi fekau mo ha fakahā maʻá e Siasí hono kotoa. ʻI he taimi naʻe pehē ai ʻe Hailame Peisi naʻá ne maʻu ha fakahā peheé, naʻe tupu ha puputuʻu ʻi he kāingalotu ʻo e Siasí. ʻI he Tokāteline mo e Ngaahi Fuakava 28, naʻe fakahā ai ʻe he ʻEikí ha founga ki he fakahā ʻi Hono Siasí. Ko e hā ʻokú ke ako mei he vahé ni kau ki he fatongia pau ʻo e Palesiteni ʻo e Siasí? Ko e hā ʻokú ke ako mei he folofola ʻa e ʻEikí kia ʻŌliva Kautele ʻi he veesi 3? Ko e hā ʻokú ke ako mei he vahé ni fekauʻaki mo e founga ʻe lava ke tataki ai koe ʻe he ʻOtuá?

Vakai foki, Tāleni H. ʻOakesi, “Ongo Founga ʻo e Fetuʻutakí,” Ensign pe Liahona, Nōvema 2010, 83–86.

Tokāteline mo e Ngaahi Fuakava 28:8–9

Ko e hā naʻe mahuʻinga ai e ngāue fakafaifekau ʻa ʻŌliva Kautele ki he kakai Leimaná?

Ko e taumuʻa ʻe taha ʻo e Tohi ʻa Molomoná “ke maʻu ʻe he kau Leimaná ʻa e ʻilo ki heʻenau ngaahi tamaí, pea koeʻuhí ke nau ʻiloʻi ʻa e ngaahi talaʻofa ʻa e ʻEikí” (Tokāteline mo e Ngaahi Fuakava 3:20). Naʻe tatau ʻeni mo e ngaahi talaʻofa naʻe fakahoko ʻe he ʻEikí ki ha kau palōfita tokolahi ʻi he Tohi ʻa Molomoná (vakai, hangē ko ʻení, 1 Nīfai 13:34–41; ʻĪnosi 1:11–18; Hilamani 15:12–13). Naʻe pehē ʻe he kau fuofua mēmipa ʻo e Siasí, ko e kau ʻInitia ʻAmeliká ko ha hako ia ʻo e kakai ʻi he Tohi ʻa Molomoná. (Ko e fakamatala totonu ʻa e Siasí ʻi he ʻaho ní, ʻoku pehē ai ko e kau Leimaná ʻoku nau kau ʻi he “ngaahi kui ʻa e kau ʻInitia ʻAmeliká” [talateu ki he Tohi ʻa Molomoná].)

Ke ke laukonga lahi ange fekauʻaki mo e ngāue fakafaifekau ʻa ʻŌliva ki he ngaahi matakali ofi ʻo e kau ʻInitia ʻAmeliká, (vakai, “A Mission to the Lamanites” (Revelations in Context, 45–49). Ko e hā nai ʻoku akoʻi atu ʻe he ngāue fakafaifekau ko ʻení fekauʻaki mo e ʻEikí mo ʻEne ngāué?

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

Tokāteline mo e Ngaahi Fuakava 27:1–2.Ko e hā ha founga ke toe lelei ange ai ʻetau manatuʻi e feilaulau ʻa e Fakamoʻuí maʻatautolú, ʻi heʻetau maʻu ʻa e sākalamēnití?

Tokāteline mo e Ngaahi Fuakava 27:5–14.Ko e hā ʻoku tau ʻilo fekauʻaki mo e kau palōfitá ʻi he ngaahi veesi ko ʻení? Te ke lava ʻo kumi ha fakamatala fekauʻaki mo kinautolu ʻi he Fakahinohino ki he Ngaahi Folofolá (scriptures.ChurchofJesusChrist.org). Ko e hā ha ngaahi tāpuaki kuo ʻosi fakaava mai kiate kitautolu ʻi he ngaahi kī ʻoku nau maʻú? Ke maʻu ha fakamatala lahi ange fekauʻaki mo ha niʻihi ʻo e ngaahi kī ko ʻení, vakai, Mātiu 16:16–19; Tokāteline mo e Ngaahi Fuakava 110:11–16.

Tokāteline mo e Ngaahi Fuakava 27:15–18.Mahalo ʻe fiefia ho fāmilí ke fakatātaaʻi ha fetauʻaki loi pea tui mo ha vala ke fakafofongaʻi e teunga tau ʻo e ʻOtuá, hangē ko ha ʻū tatā, uasi kote, ʻēpani, pe ʻū sū. ʻOku tokoni fēfē ʻa e teunga taú ke maluʻi kitautolu ʻi he taú? Aleaʻi ha niʻihi ʻo e ngaahi takiekina kovi ʻoku fehangahangai mo ho fāmilí pea mo e ngaahi meʻa te ke lava ʻo fai ke ke tui ai ha teunga tau fakalaumālie. Fakakaukau ke huluʻi ʻe foʻi vitiō “Put on the Whole Armor of God” (Doctrine and Covenants 28:2–7).

Tokāteline mo e Ngaahi Fuakava 28:2–7.Ko e hā ʻoku tau ako mei he ngaahi veesi ko ʻení fekauʻaki mo e uiuiʻi ʻo ha palōfita? ʻE lava ke toe vakaiʻi ʻe he kau mēmipa ʻo e fāmilí ha ngaahi pōpoaki he kuo hilí mei hotau palōfita moʻuí pea vahevahe e founga ʻoku tokoniʻi ai kitautolu ʻe heʻene faleʻí ke tau muimui ʻia Sīsū Kalaisí.

Tokāteline mo e Ngaahi Fuakava 28:11.Ko e taimi ʻoku tau fie fakatonutonu ai ha taha, ko e hā ʻoku mahuʻinga ai ke fakahoko ia “ʻo ka mo ka toko ua peé”?

Ke maʻu ha ngaahi fakakaukau lahi ange ki hono akoʻi ‘o e fānaú, vakai, lēsoni ʻo e uike ní ʻi he Haʻu, ‘o Muimui ʻIate Au—Maʻá e Palaimelí.

Hiva ʻoku fokotuʻu atú: “Mou Omi ʻo Fanongoa,” Ngaahi Himí, fika 12.

Fakatupulaki e Ako Fakatāutahá

Ako e ngaahi lea ʻa e kau palōfita mo e kau ʻaposetolo ʻo e ngaahi ʻaho kimui ní. Lau ʻa e meʻa kuo akoʻi ʻe he kau palōfita mo e kau ʻaposetolo ʻo e ngaahi ʻaho kimui ní kau ki he ngaahi tefitoʻi moʻoni ʻokú ke maʻu ʻi he folofolá. ʻE lava ke ke toe vakaiʻi e fakahokohoko fakamotuʻalea ʻo e ngaahi tefito ʻi he konifelenisi lahí ʻi he conference.ChurchofJesusChrist.org pe ʻi he Gospel Library app.