15–21 Māʻasi

Tokāteline mo e Ngaahi Fuakava 27–28

“Kuo Pau ke Fai ʻa e Meʻa Kotoa Pē ʻi he Maau”

ʻE lava ke fakamālohia ʻe he ngaahi moʻoni ʻoku akoʻi ʻi he Tokāteline mo e Ngaahi Fuakava 27–28 ʻa e fakamoʻoni ʻa e fānau ʻokú ke akoʻí. ʻI hoʻo fakakaukau ki he ngaahi fiemaʻu ʻa e fānaú, ko e fē ʻa e ngaahi moʻoni ʻokú ke ongoʻi ke ke tokanga taha ki ai ʻi he kalasí?

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali ha tā ʻo e Palōfita ko Siosefa Sāmitá mo ha tā ʻo e palōfita lolotongá. Fakaafeʻi ʻa e fānaú ke nau fakahingoa ʻa e kakai ʻi he laʻitaá pea vahevahe ha ngaahi meʻa ʻoku fai ʻe he kau palōfitá.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 27:1–2

ʻOku tokoniʻi au ʻe he sākalamēnití ke u manatu kia Sīsū Kalaisi.

ʻE lava ke ako ʻe he fānau īkí ʻa e mahuʻinga ʻo e sākalamēnití pea fekumi ki ha ngaahi founga ke nau manatu ai ki he Fakamoʻuí lolotonga ʻa e ouau toputapu ko ʻení.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha tā ʻo Sīsū ʻokú Ne ʻoatu ʻa e sākalamēnití ki Heʻene kau ʻAposetoló (vakai, Tohi Fakatātā ʻo e Ongoongoleleí, fika 54). Ne mei fēfē nai ke maʻu fakataha ʻa e sākalamēnití mo e Fakamoʻuí? (vakai, Tokāteline mo e Ngaahi Fuakava 27:5). Lau ʻa e Tokāteline mo e Ngaahi Fuakava 27:2, ʻo kamata ʻi he “ʻo manatuʻi ʻa hoku sinó ki he Tamaí,” pea kole ki he fānaú ke nau fakafanongo ki he meʻa ʻoku finangalo ʻa e Fakamoʻuí ke tau manatuʻi ʻi he taimi ʻoku tau maʻu ai ʻa e sākalamēnití.

• Fakaʻaliʻali ki he fānaú ha meʻi mā mo ha vai pea mo ha fakatātā ʻo e Fakamoʻuí. Tuku ke pukepuke ʻe he fānaú ʻa e fakatātaá lolotonga hoʻo akoʻi kiate kinautolu ʻoku tokoni ʻa e sākalamēnití ke tau manatu ai kia Sīsū Kalaisi.

• Tokoni ki he fānaú ke nau fakakaukau ki ha ngaahi meʻa ʻe lava ke nau fai ke manatu ai kia Sīsū lolotonga e sākalamēnití. Ko e hā ʻoku fai ʻe honau ngaahi fāmilí ke nau fetokoniʻaki ai ke nau loto-ʻapasiá? Fakaafeʻi ʻa e fānaú ke nau tā ha fakatātā ʻe lava ke nau sio ki ai lolotonga ʻa e sākalamēnití ke tokoni ke nau manatu ki he Fakamoʻuí.

Tokāteline mo e Ngaahi Fuakava 27:15–18

ʻOku maluʻi au ʻe he teunga tau ʻo e ʻOtuá.

Fakakaukau ki ha ngaahi founga ʻe lava ke ke tokoni ai ki he fānau ʻokú ke akoʻí ke nau vakai ki he founga ʻoku faitatau ai ʻa hono tauhi ʻo e ngaahi fekaú mo hono tui ʻo e teunga tau ʻo e ʻOtuá.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha fakatātā ʻo e teunga taú (vakai, fokotuʻutuʻu fakanounou ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). ʻI hoʻo lau ʻa e Tokāteline mo e Ngaahi Fuakava 27:15–18, tokoni ki he fānaú ke nau fekumi ki he ngaahi kongokonga ʻo e teunga taú ʻi he fakatātaá. Fakamatala ki he fānaú ʻa e founga kuo tokoniʻi ai koe ʻe he teunga tau ʻo e ʻOtuá ke ke “kātakiʻi ʻa e ʻaho ʻo e koví” (veesi 15).

• ʻOku hā ʻi he fokotuʻutuʻu fakanounou ki he tohi ʻEfesoó ʻi he Haʻu, ʻo Muimui ʻIate Au—Maʻá e Palaimelí: Fuakava Foʻou 2019 ha peesi ʻekitivitī fekauʻaki mo e teunga tau ʻo e ʻOtuá. Kosi ʻo toʻo ʻa e ʻū kongokonga ʻo e teunga taú, pea tuku ki he fānaú ke nau fakapipiki ia ki he fakatātaá lolotonga hoʻo lau ʻa e Tokāteline mo e Ngaahi Fuakava 27:15–18. Tokoni ke mahino ki he fānaú ʻa e ngaahi meʻa ʻe lava ke nau fai ke tui ai e teunga tau ʻo e ʻOtuá, hangē ko e lotú, fili ki he totonú, tokoni ki he niʻihi kehé, mo e alā meʻa peheé.

  

  Te u lava ʻo tui ʻa e teunga tau ʻo e ʻOtuá.

Tokāteline mo e Ngaahi Fuakava 28:2, 6–7

ʻOku tataki ʻe he palōfitá ʻa e Siasí.

ʻOku ʻiloʻi nai ʻe he fānau ʻokú ke akoʻí ʻa e ʻuhinga ʻoku tau maʻu ai ha kau palōfitá? Fakaʻaongaʻi ʻa e Tokāteline mo e Ngaahi Fuakava 28 ke tokoni ke nau ʻiloʻi ko e palōfitá pē taha ʻokú ne lava ke tataki ʻa e Siasí.

Ngaahi ʻEkitivitī ʻe Ala Fakahokó

• Lau pe talanoa ʻi hoʻo ngaahi lea pē ʻaʻau ʻa e talanoa kia Hailame Pēsí (vakai, “Vahe 14: Ko e Palōfitá mo e Ngaahi Fakahā maʻá e Siasí,” Ngaahi Talanoa ʻo e Tokāteline mo e Ngaahi Fuakavá, 56–57). Vahevahe hoʻo fakamoʻoni ne fili ʻe he Tamai Hēvaní mo Sīsū Kalaisi ʻa Siosefa Sāmita ke ne tataki ʻa e Siasí ʻi hono kuongá (vakai, Tokāteline mo e Ngaahi Fuakava 28:2). Vahevahe hoʻo fakamoʻoni ko e palōfita lolotongá ʻoku uiuiʻi ke ne tokoni ki he ʻEikí ke tataki Hono Siasí ʻi hotau kuongá.

• Kole ki he fānaú ke nau fakahoko ʻa e vaʻinga “muimui ʻi he takí”—ʻe lava ke tuʻu ha kiʻi tamasiʻi/taʻahine ʻe toko taha mei muʻa, pea ʻe lava ke faʻifaʻitaki ʻa e toengá ki he meʻa pē ʻokú ne faí. ʻE lava ke iku ʻeni ki ha fealeaʻaki fekauʻaki mo e ʻuhinga ʻoku tau muimui ai ki he palōfitá. Te ke lava ʻo fakaʻaliʻali ha tā ʻo Sīsū Kalaisi pea fakamamafaʻi ange ʻoku tau muimui ki he palōfitá he ʻokú ne muimui ki he Fakamoʻuí pea ʻokú ne lea ʻaki ʻa e ngaahi folofola ʻa e Fakamoʻuí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 27:1–2

ʻOku tokoniʻi au ʻe he sākalamēnití ke u manatu kia Sīsū Kalaisi.

ʻE tokoni fēfē ʻa e ako kau ki he ngaahi tefitoʻi moʻoni ʻi he Tokāteline mo e Ngaahi Fuakava 27:1–2 ki he fānau ʻokú ke akoʻí ke ʻuhingamālie ange ʻenau aʻusiá ʻi hono maʻu ʻo e sākalamēnití?

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau hiki ʻa e ngaahi meʻa ʻoku nau pehē ʻe finangalo ʻa e Fakamoʻuí ke nau ʻiloʻi fekauʻaki mo e sākalamēnití. ʻO ka fie maʻu, te nau lava ʻo lau ʻa e “Sākalamēnití” ʻi he Fakahinohino ki he Ngaahi Folofolá (scriptures.ChurchofJesusChrist.org). Tuku ke nau vahevahe ha konga ʻo e meʻa ne nau tohí, pea kole ange ke nau tānaki atu ia ki heʻenau lisí ʻi he hili ʻenau lau ʻa e Tokāteline mo e Ngaahi Fuakava 27:1–2. ʻE tokoni fēfē ʻa e ngaahi meʻa ʻi heʻenau lisí ki he anga ʻenau maʻu ʻa e sākalamēnití he Sāpate kotoa peé?

• Tokoni ki he fānaú ke nau fakakaukau ki hono ʻuhinga ʻo e maʻu ʻa e sākalamēnití ʻaki ʻa e “mata ʻoku hanga taha pē ki [hono] fakalāngilangiʻi [ʻo e ʻOtuá]” (veesi 2). Aleaʻi ʻa e ngaahi fehuʻi hangē ko ʻení: Ko e hā ha ngaahi fakatauele ʻoku tokanga ki ai hotau matá pe fakakaukaú ʻi he lolotonga ʻa e sākalamēnití? Ko e hā ʻe lava ke tau fai ke tukutaha ai ʻetau tokangá ki he Fakamoʻuí lolotonga ʻetau maʻu ʻa e sākalamēnití? ʻE tokoni fēfē ʻeni ke tau muimui ai kiate Ia he ʻaho kotoa pē?

Tokāteline mo e Ngaahi Fuakava 27:15–18

ʻOku tokoni ʻa e teunga tau ʻo e ʻOtuá ke u matuʻuaki ʻa e koví.

Kuo pau ke fehangahangai ʻa e fānau ʻokú ke akoʻí mo e ngaahi tākiekina kovi ʻi he kotoa ʻo ʻenau moʻuí. ʻOku finangalo ʻa e Tamai Hēvaní ke tokoniʻi kinautolu ke nau matuʻuaki ʻa e koví. Te ke fakalotoʻi fēfē kinautolu ke nau tui ʻa e teunga tau ʻo e ʻOtuá?

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau lau ʻa e Tokāteline mo e Ngaahi Fuakava 27:15–18 pea tā ʻa e konga ʻo e teunga taú ʻoku lave ki aí (ʻo ka fie maʻu, ʻe lava ke nau vakai ki he fakatātā ʻi he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Ko e hā ʻoku akoʻi mai ʻe he ngaahi lea ʻoku nau fakamatalaʻi ʻa e konga takitaha ʻo e teunga taú, fekauʻaki mo e meʻa ʻoku tau fie maʻu kae lava ke tau tauʻi ʻaki ʻa e kovi ʻokú ne ʻākilotoa kitautolú (hangē ko ʻení, māʻoniʻoní, tuí, fakamoʻuí, mo e alā meʻa peheé)?

• Fakaafeʻi ʻa e fānaú ke nau fakakaukau ki ha ngaahi meʻa ʻe lava ke nau fai ke matuʻuaki ʻaki ʻa e ngaahi ʻahiʻahi ʻiate kinautolú. Kole ange ke nau fakakakato ʻa e sētesí “ʻOku tau tui ʻa e teunga tau ʻo e ʻOtuá ʻi he ʻaho kotoa pē ʻaki …” ʻaki ʻenau fakakaukaú. Tokoniʻi kinautolu ke nau ʻiloʻi ʻa e founga ʻoku tokoni ai ʻenau feinga ke haʻu kia Kalaisí ke nau tui ʻa e teunga tau ʻo e ʻOtuá.

Tokāteline mo e Ngaahi Fuakava 28:1–7, 15

ʻOku tataki au ʻe he Tamai Hēvaní ʻo fakafou mai ʻi he Laumālie Māʻoniʻoní.

ʻE ala tokoni ʻa e Tokāteline mo e Ngaahi Fuakava 28:1–7, 15 ke mahino ki he fānau ʻokú ke akoʻí, ʻe malava ke tataki ʻe he Laumālie Māʻoniʻoní ʻa e tokotaha kotoa pē, ka ko e fakahā ki he Siasí ʻe pau maʻu pē ke fou mai ia ʻi he palōfitá.

Ngaahi ʻEkitivitī ʻe Ala Fakahokó

• Fakamatala ki he talanoa kau kia Hailame Pēsí ʻi heʻene tala naʻá ne maʻu ha ngaahi fakahā ki he Siasí (vakai, “Vahe 14: Ko e Palōfitá mo e Ngaahi Fakahā maʻá e Siasí,” Ngaahi Talanoa ʻo e Tokāteline mo e Ngaahi Fuakavá, 56–57). Te tau tali fēfē ʻa e ngaahi fakamatala ʻa Hailame Pēsí? Lau fakataha ʻa e Tokāteline mo e Ngaahi Fuakava 28:1–7, 15 ki ha ngaahi fakakaukau.

• Tokoni ki he fānaú ke nau fekumi ʻi he ngaahi potufolofola ko ʻení ke hiki ha lisi ʻo e ngaahi founga ʻe lava ke tataki ai kinautolu ʻe he Laumālie Māʻoniʻoní: Tokāteline mo e Ngaahi Fuakava 28:1, 4, 15; Sione 14:26; Molonai 8:26; 10:4–5. Tuku ke nau ngāue tauhoa ʻo ka ʻaonga. Ko e hā ʻoku matuʻaki mahuʻinga ai ʻa e meʻafoaki ʻo e Laumālie Mā‘oniʻoní? Vahevahe ki he founga kuo tataki ai koe ʻe he Laumālie Māʻoniʻoní.

Poupouʻi e Ako ʻi ʻApí

Fakaafeʻi ʻa e fānaú ke nau kole ki heʻenau mātuʻá pe ʻe lava ke nau akoʻi ha lēsoni efiafi fakafāmili ʻi ʻapi ki he meʻa kuo nau ako ʻi he kalasí.

Ko Hono Fakaleleiʻi ʻEtau Founga Akoʻí

Fakaʻaongaʻi e hivá. ʻE ala tokoni ʻa e ʻū hiva ʻa e Palaimelí mo e ngaahi himí ke mahino mo tukulotoʻi ai ʻe he fānau ʻo e toʻu kotoa pē ʻa e ngaahi moʻoni ʻo e ongoongoleleí ʻi ha founga fakangalongataʻa. ʻE lava foki ke ne ngaohi ke longomoʻui e kau mai ʻa e fānaú ʻi he akó.