Vahe 14
Ko e Palōfitá mo e Ngaahi Fakahā ma‘á e Siasí
(Sepitema 1830)
Na‘e hiki ‘a Siosefa mo ‘Ema ki Niu Ioake. Na‘e nofo ha tangata ko Hailame Peesi ‘i he feitu‘u ko ‘ení. Ko e mēmipa ia ‘o e Siasi. Na‘e ‘i ai ‘a ‘ene fo‘i maka. Na‘á ne pehē ‘oku tokoni ‘a ‘ene fo‘i maká kiate ia ke ne ma‘u ha ngaahi fakahā ma‘á e Siasi.
Na‘e tokolahi ‘a e kau mēmipa ‘i he Siasi na‘a nau tui kia Hailame Peesi. Na‘e tui ‘a ‘Ōliva Kautele kiate ia. Na‘e ‘i ai ha kakai na‘a nau fakakaukau ko e palōfita ‘a Hailame Peesi.
T&F 28: Talateú
Ko ia na‘e fehui ‘e ‘Ōliva kia Siosefa ‘o kau kia Hailame Peesi. Na‘e lotu ‘a Siosefa. Na‘e hanga ‘e Sīsū ‘o fai ha fakahā kia Siosefa ma‘a ‘Ōliva Kautele. Na‘á ne talaange ko e tangata pē taha te ne lava ke ma‘u ha ngaahi fakahā ma‘á e Siasí. Pea ko e tangata ko ‘ení, ko e Palōfita ia ko Siosefa Sāmitá.
Na‘e pehē ‘e Sīsū ‘e lava ‘e he kakaí ke nau ma‘u ha ngaahi fakahā ‘o kau kiate kinautolu pē. Ka ko e palōfitá pē te ne lava ke ma‘u ‘a e ngaahi fakahā kotoa ma‘á e Siasí. Na‘e tui ‘a ‘Ōliva kia Siosefa. Na‘á ne ‘ilo‘i ‘oku hala ‘a e ngaahi fakahā na‘e ma‘u ‘e Hailame Peesí.
Ko ia na‘e talaange ‘e Sīsū kia ‘Ōliva ke lea kia Hailame Peesi. Na‘e talaange ‘e ‘Ōliva kia Hailame Peesi ‘oku ‘ikai ko e ha‘u mei he ‘Otua ‘a e ngaahi fakahā na‘á ne ma‘ú. Na‘e ha‘u ‘a e ngaahi fakahā ia ko iá meia Sētane.
Na‘e talaange ‘e ‘Ōliva kia Hailame Peesi kuo hanga ‘e Sētane ‘o kākaa‘í ia. Na‘e tui ‘a Hailame kia ‘Ōliva. Pea na‘á ne fakatomala.
‘Oku tokotaha pē ‘a e tangata ‘okú ne ma‘u ‘a e ngaahi fakahā ma‘á e Siasí. Pea ko e tangata ko ‘ení, ko e palesiteni ia ‘o e Siasí. Ko e taki ia ‘o e Siasí. Ko e palōfita ia ‘a e ‘Otuá. Pea ‘oku totonu ke talangofua ‘a e kau mēmipa ‘o e Siasí ki he palōfitá.