Vahe 46
Ko Siosefa Sāmita ‘i he Fale Fakapōpula ‘i Lipetií
(Mā‘asi 1839)
Na‘e nofo pōpula ‘i he fale fakapōpulá ‘a Siosefa Sāmita pea mo hono kaume‘a ‘i he ngaahi ‘aho lahi. Na‘e hiki kinautolu ‘o ‘ave ki ha fale fakapōpula ‘e taha. Na‘e tu‘u ‘eni ‘i Lipetī, ‘i Mīsuli.
Na‘e momoko pea ‘uli ‘a e fale fakapōpula ko ‘eni ‘i Lipetī. Na‘e faingata‘a‘ia lahi mo‘oni ‘a Siosefa pea mo hono ngaahi kaume‘á. Na‘e ‘i ai ‘a e taimi ‘e ni‘ihi na‘e ha‘i ‘aki kinautolu ha sēini. Pea na‘a nau mohe pē ‘i he falikí.
Na‘e ‘ikai ke sai ‘a e me‘akaí. Pea ‘i he taimi ‘e ni‘ihi na‘e fakakonahi ia ‘o nau fa‘a puke ai.
Na‘e mamahi ‘a Siosefa. He kuo fuoloa ‘a hono tuku pōpula kinautolu ‘i he fale fakapōpulá. Na‘e ‘ikai ke ‘ilo‘i ‘e Siosefa pē ‘e toe tukuange kinautolu mei ai. Pea na‘á ne hoha‘a koe‘uhi ko e Siasí.
Na‘e lotu ‘a Siosefa ki he Tamai Hēvaní. Na‘á ne fehu‘i kiate la pe ko e hā hono fuoloa ‘a ‘ene faingata‘a‘ia pea mo e Kāingalotú. Na‘á ne kole ki he Tamai Hēvaní ke tokoni‘i kinautolu. Na‘e kole ‘a Siosefa ki he Tamai Hēvani ke tautea ‘a honau ngaahi filí.
Na‘e tala ange ‘e Sīsū kia Siosefa ‘e ki‘i taimi nounou pē ‘a ‘ene faingata‘a‘iá. Na‘á Ne tala kia Siosefa ke loto-to‘a pea ‘e toki hanga ‘e he ‘Otua ‘o tāpuaki‘i ia. Na‘e pehē ‘e Sīsū ‘e vave pē ha fakataha ‘a Siosefa pea mo hono ngaahi kaume‘á. Na‘e ‘ofa ‘a e ngaahi kaume‘a ‘o Siosefá kiate ia, pea te nau fiefia ‘i ha‘anau mamata kiate la.
Na‘e ‘afio‘i ‘e Sīsū ‘a e me‘a ko ia na‘e fai ‘e he kakai kovi. Na‘á Ne tala ange kia Siosefa te Ne hanga ‘o tautea‘i kinautolu. ‘E ‘ikai ‘aupito ke ma‘u ‘e he kakai koví ni ‘a e puletapú. ‘E ‘ikai ma‘u ‘e he‘enau fānaú ‘a e puletapú. ‘E faingata‘a‘ia ‘a e kakai koví pea te nau mate.
Na‘e tala ‘e Sīsū kia Siosefa ‘a e ngaahi me‘a lelei lahi ‘e hoko ki he Kāingalotú. ‘E ‘ikai ha me‘a te ne ta‘ofi ‘a e ‘Otuá mei he ‘Ene tāpuaki‘i ‘akinautolú. ‘E hanga ‘e he Laumālie Mā‘oni‘oní ‘o tala kiate kinautolu ‘a e ngaahi me‘a lelei fekau‘aki pea mo e mālohi ‘o e ‘Otuá. Te nau ‘ilo ai ki hēvani pea mo māmani.
Na‘e pehē ‘e Sīsū ke ‘oua na‘a manavahē ‘a Siosefa, ‘i he pau ko ia ke ne faingata‘a‘iá. ‘Oku totonu ke ‘oua na‘a hoha‘a ‘a Siosefa ‘i he‘ene fehangahangai mo e ngaahi faingata‘á. Na‘e pehē ‘e Sīsū ‘oku hoko pē ‘a e ngaahi faingata‘á ko ha ngaahi me‘a ke lelei kiate kinautolu. ‘Oku hanga ‘e he ngaahi faingata‘á ‘o tokoni‘i kitautolu ke tau ako. Na‘e faingata‘a‘ia ‘a Sīsū ‘o lahi ange ‘i ha toe taha kehe.