Vahe 22
Ko e Kāingalotú ‘i Mīsuli
(Siulai-‘Aokosi 1831)
Na‘e ‘alu ‘a e palōfita ko Siosefa Sāmitá, Sitenei Likitoni, ‘Etuate Patilisi, pea mo ha ni‘ihi kehe, ki Mīsuli. Na‘a nau fiefia ke ‘alu ki ai. Na‘a nau loto ke nau langa ‘a e kolo ko Saioné. Na‘a nau loto ke fakahā ange ‘e he ‘Eikí ‘a e feitu‘u totonu ke nau anga aí.
Ko e konga ‘o ‘enau ‘alu ki Mīsulí, na‘a nau ‘alu ‘i ha vaka. ‘I he‘enau a‘u ko ia ki Mīsulí, na‘e loto ‘a Siosefa ke ne ‘alu lalo. Na‘á ne ‘ilo‘i oku toputapu ‘a e kelekele ‘o Mīsulí. Na‘e loto ke sio ki ai.
Ko ia na ‘e ‘alu lalo ‘a Siosefa pea mo hono ngaahi kaume‘á ‘i ha maile ‘e 300 ki he vahefonua Siakisoní. Na‘e ‘afu mo vela, ka na‘e ‘ikai ke nau tokanga ki ai. Na‘a nau loto ke nau ‘alu ki ai ke langa ‘a Saione.
Na‘e ‘alu ‘a e palōfitá mo hono ngaahi kaume‘á ki he vahefonua Siakisoní,‘i Mīsuli. Na‘e fakafe‘iloaki mai kiate kinautolu ‘a e kau faifekau mei Ketilaní.
Hili ha ngaahi ‘aho si‘i mei ai, na‘e ‘alu atu mo e Kāingalotu mei Niu ‘ioaké ki he vahefonua Siakisoní. Na‘e fiefia ‘a e toko taha kotoa pē ke nau a‘u ki ai.
Na‘e tala ange ‘e he palōfita ko Siosefa Sāmita pea mo Pīsope ‘Etuate Patilisi ki he kakaí ‘a e me‘a ke nau fai. ‘E fakatau ‘e ha ni‘ihi ha nau kelekele ‘i Mīsuli. ‘E kamata leva ‘e ‘Ōliva Kautele mo Uiliami W. Felipisi ha ngaahi ako. Pea te na hanga leva ‘o fa‘u ha ngaahi tohi ma‘á e fānau ke nau lau.
Na‘e loto ‘a Siosefa ke ne ‘ilo pe ko e fē ‘a e feitu‘u ke langa ai ‘a e kolo ko Saioné. Ko ia na‘a ne lotu ki he Tamai Hēvaní. Na‘e tali ‘a ‘ene lotú.
Na‘e tala ange ‘e he ‘Eikí ‘e langa ‘a Saione ofi ki he kolo ko ia ko Tau‘atāina, ‘i he vahefonua Siakisoní,‘i Mīsuli. Na‘e fakahā ange ‘e he ‘Eikí kia Siosefa ‘a e feitu‘u ‘e langa ai ‘a e temipalé. Na‘á Ne tala ange foki ‘e ‘ikai vave ‘a hono langa ‘o Saioné. Kuo pau ke tomu‘a fehangahangai ‘a e Kāingalotú pea mo ha ngaahi faingata‘a. Ka te nau lava ‘o langa ‘a Saione, ‘o kapau ‘e fe‘unga ‘a ‘enau tuí.
Na‘e tala ange ‘e he ‘Eiki kia Siosefa ‘oku totonu ke talangofua ‘a e Kāingalotú ki he lao ‘o Mīsulí. Pea ke nau talangofua foki ki he ngaahi fekau ‘a e ‘Otuá. ‘Oku totonu ke nau fai ‘a e ngaahi me‘a lelei lahi ‘o ‘oua ‘e toe fakakouna‘i Pea ke fakatomala ‘a e Kāingalotú mei he‘enau ngaahi angahalá. ‘Oku ‘ikai manatu‘i ‘e he ‘Eikí a e angahalá, ‘i he taimi ‘e fakatomala ai ‘a e kakaí.
Na‘e tala ange ‘e he ‘Eiki ‘oku totonu ke hanga ‘e Sitenei Likitoni ‘o fakatapui ‘a e kelekelé. Ko ia na‘e fehu‘i ‘e Sitenei Likitoni ki he Kāingalotú pe ‘oku nau fakamālō koe‘uhi ko e kelekelé. Na‘á ne fehu‘i ange pe te nau talangofua ki he ngaahi fekau kotoa ‘a e ‘Otuá. Na‘e tala ange ‘e he Kāingalotú, “‘lo.’’ Na‘e toki lotu leva ‘a Sitenei Likitoni ‘o ne fakatapui ‘a e kelekelé.
I he ‘aho pē hono hokó, na‘e fai ha fakataha ‘a Siosefa Sāmita, ‘Ōliva Kautele, Sitenei Likitoni, pea mo ha ni‘ihi ‘o hono ngaahi kaume‘á. Na‘a nau fakataha ‘i ha feitu‘u makehe ‘i Tau‘atāina. Na‘a nau lau ‘a e folofolá. Pea na‘a nau lotu. Na‘e hanga leva ‘e Siosefa Sāmita ‘o fakatapui ‘a e feitu‘u ko ‘eni ke langa ai ‘a e temipale.
Na‘e ‘alu kotoa ‘a e Kāingalotu ‘i Misuli ki he konifelenisí. Na‘a nau fonu ‘i he Laumālie Mā‘oni‘oní. Na‘e tala ange ‘e Siosefa ‘e hanga ‘e he ‘Otuá ‘o tāpuakii ‘a e Kāingalotú ‘o kapau te nau tauhi ‘a ‘enau ngaahi tala‘ofá.
Hili ha ngaahi ‘aho si‘i mei heni, na‘e hanga ‘e Sīsū ‘o foaki ha toe fakahā ‘e taha kia Siosefa. Na‘á Ne tala ange ki ai ko e ‘aho makehe ‘a e ‘aho Sāpaté. Ko e ‘aho Sāpaté, ko e ‘aho ia oku totonu ke tau fai ai ‘a e ngaahi me‘a ke ne tokoni‘i ke mahino kiate kinautolu ‘a Sīsū. ‘Oku totonu ke ‘oua na‘a tau ngāue ‘i he ‘aho Sāpaté. ‘Oku totonu ke tau ‘alu ki he lotú ke ma‘u ‘a e sākalamēnití. ‘Oku totonu ke tau fakatomala mei he‘etau ngaahi angahalá. ‘Oku totonu ke tau ‘a‘ahi ki he mahakí. ‘Oku totonu ke tau fakamālō koe‘uhi ko e ngaahi tāpuaki kotoa pē. ‘Oku totonu ke tau talangofua ma‘u pē ki he ngaahi fekau ‘a e ‘Otuá.
Ko e Kāingalotu ko ia te nau fai ‘a e ngaahi me‘á ni te nau ma‘u kotoa ‘a e ngaahi me‘a lelei ko ia te nau fiema‘ú. Te nau ma‘u ha me‘akai, vala, fale, ngoue. Te nau fiefia. Te nau ma‘u ‘a e melino ‘i he‘enau mo‘uí. Te nau ma‘u ‘a e mo‘ui ta‘engatá.