Vahe 48
Kau Faifekau ‘i he Ngaahi Fonua Kehé
(Sune 1837—‘Okatopa 1841)
Na‘e loto ‘a e ‘Eikí ke lava ke ako ‘a e kakai ‘i he ngaahi fonua kehé ki he ongoongoleleí. Ko ia na‘e tala ange ‘e he ‘Eikí kia Siosefa kuo pau ke ‘alu ha ni‘ihi ‘o e Kāingalotú ‘o ngāue fakafaifekau ‘i ‘Ingilaní. Na‘e fili leva ‘a Elder Hipa C. Kimipale (Kimipolo) pea mo ha kau tangata kehe ‘e toko tolu ke nau ‘alu. Ko ia na‘a nau folau ‘i ha vaka ki ‘Ingilani.
Na‘a nau fe‘iloaki pea mo ha tangata na‘á ne hoko ko ha taki ki he Siasi ‘e taha. Na‘e fakangofua ‘e he tangatá ni ‘a e kau faifekau ke nau malanga ‘i hono falelotú. Na‘e tokolahi ‘a e kakai na‘a nau tui ki he kau faifekaú. Ko ia na‘a nau loto ke nau papitaiso. Na‘e ‘ita heni ‘a e takí. Ko ia na‘á ne kole ki he kau faifekaú ke ‘oua na‘a nau toe malanga ‘i hono falelotú.
Na‘e ‘alu leva ‘a e kau faifekaú ‘o malanga ‘i he ngaahi ‘api ‘o e kakaí. Na‘e tokolahi ‘a e kakai na‘a nau kau ki he Siasi ‘o Sīsū Kalaisi ‘o e Kau Mā‘oni‘oni ‘i he Ngaahi ‘Aho Kimui Ní.
Na‘e toe folau foki mo ha kau tangata ‘i he konga kimuí ‘o ngāue fakafaifekau ‘i ‘Ingilani. Pea ko e ni‘ihi ‘iate kinautolu ko e kau ‘Apōsetolo. Na‘e talanoa ‘a Siosefa mo kinautolu kimu‘a pea nau toki ‘alu. Na‘á ne tala kiate kinautolu ‘a e ngaahi me‘a ko ia ke nau ako‘i ki he kakaí.
Na‘e tala ange ‘e Siosefa ki he kau ‘Apōsetolo ke nau talangofua pea tauhi ‘a e ngaahi fekau kotoa pē ‘a e ‘Otuá. Na‘á ne talanoa mo kinautolu ‘o kau ki he puletapú. Na‘á ne tala ange ko e Siasi mo‘oni pē ‘o Sīsū Kalaisí ‘oku ‘i ai ‘a e puletapú.
Ne mateuteu ‘a e kau tangatá ke nau ‘alu ‘o fakahoko ‘a e ngāue fakafaifekaú. Na‘e ‘ikai ha‘anau pa‘anga . Ko e tokolahi ‘iate kinautolu na‘a nau puke. Na‘e puke foki mo ha ni‘ihi honau ngaahi mali pea mo ‘enau fānaú. Ka na‘e ‘ilo‘i ‘e he kau tangatá ni ‘e tokoni‘i kinautolu ‘e he Tamai Hēvaní pea te Ne hanga ‘o tāpuaki’i ‘a honau ngaahi fāmili.
Na‘e ‘alu ‘a e kau faifekaú ki ‘Ingilani. Na‘a nau malanga ‘i he ngaahi kolo lahi. Na‘e lauiafe ‘a e kakai lelei na‘a nau tui ki he ongoongoleleí. Pea na‘a nau kau ki he Siasi ‘o Sīsū Kalaisí. Na‘e tāpuekina ‘a e kau faifekaú ‘e he Tamai Hēvaní. He na‘a nau foki lelei pē ki honau ngaahi ‘api hili ‘enau ngāue fakafaifekaú.
Na‘e hoko foki ‘a ‘Oasoni Haiti ko e taha ia ‘o e kau ‘Apōsetolo ‘e Toko Hongofulu-mā-uá. Na‘e tala ange ‘e Siosefa ‘oku ‘i ai ha ngāue makehe ke fai ‘e ‘Oasoni ma‘a e kakai Siú. Ko ia na‘e ‘alu ‘a ‘Oasoni ki he fonua ko Palesitainé. Pea ‘i he ‘aho 24 ‘o ‘Okatopa, ‘o e 1841, na‘á ne fakahoko ai ha lotu fakatapui ‘o e fonua ko Palesitainé.
Na‘á ne kole ki he Tamai Hēvaní, ke Ne hanga ‘o tāpuaki‘i ‘a e fonuá. Na‘á ne lotu ‘o kole ke ‘i ai ha vai ke lava ke tupu ai ‘a e ngoué. Na‘á ne lotu foki ke lava ‘a e fānau kotoa ‘a ‘Ēpalahamé ke toe foki kotoa ki Palesitaine ‘o nofo ai. Pea te nau lava ke langa ai honau ngaahi ‘api mo tō ‘enau ngaahi ngoué.
Kuo hanga ‘e he ‘Otuá ‘o tāpuekina ‘a e fonua ko Palesitainé. Kuo ui ia ‘i he taimi ni ko ‘Isileli. ‘I he ta‘u 1979, na‘e fai ai ‘e Palesiteni Spencer W. Kimball ha lotu fakatapui ‘o ha ngoue ‘i ‘Isileli. Pea ‘oku ui ia ko e Ngoue Fakamanatu ‘o ‘Oasoni Haití.