Vahe 44
Ko e Vahehongofulú
(Siulai 1838)
Na‘e ‘i Hihifo Mama‘o, Mīsuli ‘a e Kāingalotú. Na‘e tala ange ‘e he ‘Eiki kia Siosefa Sāmita ke vahehongofulu ‘a Hono kakaí. Na‘e lotu ‘a Siosefa ki he Tamaí. Na‘á ne fehu‘i pe ko e hā hono lahi ‘o e vahehongofulu ‘oku totonu ke totongi `e he kāingalotú. Na‘á ne ma‘u ha fakahā ke hanga ‘e he Kāingalotú ‘o totongi ‘a e vahehongofulu ‘e taha ‘o e me‘a kotoa pe ‘oku nau ma‘u ko ‘enau vahehongofulu.
Kapau te nau ma‘u ha sēniti ‘e hongofulu ‘oku totonu ke nau foaki ha sēniti ‘e taha ko e vahehongofulu. Kapau te nau ma‘u ha pa‘anga ‘e taha, ‘oku totonu ke nau foaki ha sēniti ‘e hongofulu ko ‘enau vahehongofulu.
‘E lava foki ‘a e Kāingalotú ke nau vahehongofulu ‘i ha ngaahi founga kehe. Na‘e totongi vahehongofulu ‘a e Kāingalotú ‘i he ngoue ko ia na‘a nau toó. He na‘a nau hanga ‘o totongi pea foaki ‘a e vahehongofulu ‘o e kēlení pea mo ‘enau mohukú. Na‘a nau totongi ‘enau vahehongofulu ‘o ‘enau fanga moá pea mo ‘enau fanga monumanu kehe. Na‘a nau totongi vahehongofulu ‘aki ‘a ‘enau hu‘akau pea mo ‘enau vesitapoló.
‘Oku ngāue‘aki ‘a e pa‘anga vahehongofulu ke tokoni‘i ‘a e kau mēmipá ‘i he Siasí. ‘Oku tokoni ‘a e vahehongofulu ke fakatau ha me‘akai pea mo e vala ki he kakai masivá.
‘Oku ngāue‘aki ‘a e pa‘anga vahehongofulú ke langa ‘a e ngaahi temipalé ke tokoni‘i ‘a e ngāue fakafaifekaú. ‘Oku ngāue‘aki foki ia ke tokoni‘i ‘a e kakaí ‘oku nau foaki ‘a honau taimi ke ngāue ma‘a e ‘Eikí.
‘Oku tau foaki ‘a ‘etau vahehongofulú ki he pīsopé. Pea ‘oku ‘ave ia ‘e he pīsopé ki he kau taki ‘o e Siasí. Ko kinautolu ‘oku nau fili ki he founga ke ngāue‘aki ki ai ‘a e vahehongofulú.
‘Oku hanga ‘e he Tamai Hēvaní ‘o foaki ha ngaahi tāpuaki mahu‘inga ki he Kāingalotu ‘oku nau totongi vahehongofulú. Ko e Kāingalotu ko ē ‘oku ‘ikai ke nau totongi ‘a e vahehongofulú ‘oku ‘ikai ke nau lava ke ma‘u ‘a e ngaahi tāpuaki kotoa ko ‘eni. ‘Oku pehē ‘e he Tohi Tapú koe Kāingalotu ‘oku ‘ikai ke nau totongi vahehongofulú ‘oku nau kaiha‘a meí he ‘Otuá.