Vahe 10

Ko e ‘Uluaki Mana ‘i he Siasí

(‘Epeleli 1830)

Ko e fakataha hono hoko ‘o e Siasi ‘o Sīsū Kalaisí na‘e fai ia ‘i he ‘aho Sāpate, ‘aho 11 ‘o ‘Epeleli 1830. Pea na‘e ha‘u ‘a e kau mēmipa ‘o e Siasi ki he fakataha ko ‘eni. Pea na‘e ui ‘a e kau mēmipá ko e kāinga mā‘oni‘oni.

Na‘e toe ‘i ai foki mo e kakai kehe na‘a nau ha‘u ki he fakatahá. Pea na‘e ‘ikai ko ha kau mēmipa kinautolu ‘o e Siasí. Na‘e ako‘i kiate kinautolu ‘a e ongoongolelei ‘o Sīsū Kalaisí ‘e ‘Ōliva Kautele. Na‘e tui ha ni‘ihi ‘o e kakaí kia ‘Ōliva pea nau loto ke nau kau ki he Siasí. Pea na‘e papitaiso kinautolu hili ‘a e fakatahá.

Na‘e ‘ikai ke loto ‘a Sētane ke kau ‘a e kakaí ki he Siasí. Ko ia na‘e feinga ‘a Sētane ke ne fakaloto‘i ‘a e kakai leleí ke nau ‘ita. Pea ko e taha ‘o e kau tangata ko ‘ení ko e tangata na‘e hingoa ko Niueli Naiti. Na‘e ‘ikai ke mēmipa ‘a Niueli Naiti ia ‘i he Siasí. Pea na‘e ‘ikai ke loto ‘a Sētane ia ke papitaiso ‘a e tokotahá ni.

Na‘e kole ‘a Siosefa kia Niueli ke ne fai ‘a e lotu ‘i he fakatahá. Pea na‘e tala ange ‘e Niueli ‘e lotu.

Na‘e ‘ikai ke loto ‘a Sētane ia ke talangofua ‘a Niueli kia Siosefa. Ka na‘e ‘alu ‘a Niueli ki he fakatahá, ka na‘e ‘ikai ke lotu ia. Na‘á ne tala ange ‘oku ilifia ia ke ne fai ha lotu le‘o lahi.

Hili pē ‘ení na‘e ‘alu ‘a Niueli Naiti ki ha loto vao‘akau. He na‘á ne loto ke lotu tokotaha pē. Na‘e ikai ke loto ‘a Sētane ia ke lotu. Na‘e feinga ‘a Niueli ke lotu, ka na‘e ‘ikai ke lava ‘o lea. Pea na‘e hoko ‘o puke. Na‘e loto-mamahi pea toe ilifia foki. Pea na‘e foki ‘a Niueli ki ‘api.

Na‘e hoha‘a ‘a e uaifi ‘o Niuelí ki ai. Ko ia na‘á ne kole kia Siosefa Sāmita ke tokoni‘i mu‘a ‘a Niueli. Pea na‘e ngāue‘aki‘e Siosefa Sāmita ‘a hono mālohi ‘i he puletapú ke ne tāpuaki‘i ‘a Niueli. Na‘e toe ma‘u ‘e Niueli ha ongo lelei, ‘o ‘ikai ke toe puke. Na‘e ‘ikai ke toe manavahē, ka na‘e fiefia. Na‘e ‘ikai ke toe lava ‘e Sētane ke toe fai ha me‘a ki ai. Pea ‘i he taimi nounou pē mei ai, na‘e papitaiso ‘a Niueli Naiti.