Vahe 33
Ko e Fakahā Kau kia Sīsū Kalaisi
(Mē 1833)
Na‘e folofola ‘a Sīsū ki he palōfita ko Siosefa Sāmitá ‘i ha ‘aho ‘e taha. Na‘á Ne fakahā kia Siosefa Sāmita ‘o kau kiate la. Na‘e tala ange ‘e Sīsū ‘e lava ‘a e kakai ke sio ki hono fofongá pea nau ‘ilo‘i ia. Ka ‘oku totonu ke nau tomu’a to‘ofi ‘a ‘enau fai ‘a e ngaahi me’a ko ia ‘oku koví. ‘Oku totonu ke nau lotu pea nau talangofua ki he ngaahi fekau ‘a e ‘Otua. ‘E ‘i ai leva ha ‘aho te nau lava ai ke sio kia Sīsū.
Na‘e pehē ‘e Sīsū ko e maama la ‘o e māmaní. ‘Okú fakahā mai kiate kitautolu ‘e he maamá ‘a e hala ‘oku totonu ke tau ‘alu aí. Ko Sīsū ko e maama ia ‘o e māmaní, he ‘okú Ne fakahā mai kiate kitautolu ‘a e founga totonu ke tau mo‘ui aí.
Na‘e nofo fakataha ‘a Sīsū pea mo e Tamai Hēvani kimu‘a pea toki ngaohi ‘a e māmaní. Na‘e ngaohi ‘e Sīsū ‘a e māmaní. Na‘á Ne hanga ‘o ngaohi ‘a e me‘a kotoa pē ‘i he māmani.
Na‘e ‘ikai ke tatau ‘a Sīsū ia pea mo ‘Ene Tamai Hēvaní ‘i he ‘Ene tupu haké. Na‘e ‘ikai te ne ‘ilo ‘e ia ‘a e ngaahi me‘a kotoa pē na‘e ‘ilo‘i ‘e he ‘Ene Tamaí. Na‘e ‘ikai te Ne ma‘u ‘e ia ‘a e mālohi pea mo e nāunau kotoa pē na‘e ma‘u ‘e he ‘Ene Tamai. Na‘á Ne feinga mālohi ke ne hangē ko ‘ene Tamaí. Na‘á Ne hoko ‘o hangē ko e ‘Otua, ko e Tamai. Na‘e ma‘u ‘e Sīsū ‘a e mālohi pea mo e nāunau.
Na‘e pehē ‘e Sīsū ‘oku totonu ke tau talangofua ki he ngaahi fekau ‘a e ‘Otuá. Te tau ‘ilo‘i ai ‘a e mo‘oni. Te tau ‘ilo‘i ‘a e ngaahi me‘a kotoa pē. Pea te tau lava ke hoko ‘o hangē ko e ‘Otua, ko e Tamai. Te tau lava ke ma‘u ‘a mālohi pea mo e nāunaú.
Na‘e pehē ‘e Sīsū ‘oku ‘ikai loto ‘a Sētane ia ke hoko ‘a e kakai ‘o hangē ko e ‘Otuá. ‘Oku ‘ikai te ne loto ke nau ‘ilo ki he mo‘oní. Na‘e tala ange ‘e Sīsū kia Siosefa ke ne hanga ‘o ako‘i ‘a e mo‘oni ki hono fāmilí.
Na‘e pehē ‘e Sīsū ‘oku totonu ke hanga ‘e Sitenei Likitoni mo Feletiliki G. Uiliāmisi ‘o ako‘i ‘a hona fāmilí ke nau talangofua ki he ngaahi fekau ‘a e ‘Otuá. Pea ‘e ‘ikai leva ke hanga ‘e Sētane ‘o ta‘ofi ‘a hona fāmilí mei hono ‘ilo‘i ko ia ‘o e mo‘oní.