Vahe 13
Siosefa mo ‘Ema
(Siulai 1830)
Na‘e nofo ‘a Siosefa pea mo ‘Ema Sāmita ‘i Penisilivēnia. Na‘e ‘i ai ha‘ana ki‘i faama si‘isi‘i pē. Na‘e fe‘ofa‘aki ‘a Siosefa pea mo ‘Ema. Na‘á a na ngāue mālohi ke na fetokoni‘aki.
Na‘e lahi ‘a e ngaahi faingata‘a na‘e fehangahangai mo Siosefa mo ‘Emá. Na‘á na masiva. Na‘á na fiema‘u ha fānau. Na‘e ‘i ai ha ki‘i pēpē tangata ‘a ‘Ema ka na‘e sil mate. Na‘e loto-mamahi ‘a ‘Ema. Ka ‘i he konga kimuí na‘e ‘i ai ‘a ‘ena fānau mo Siosefa.
Na‘e hoha‘a ‘a e loto ‘o Siosefá ki hono fāmilí. He na‘á ne loto ke ne hanga ‘o tauhi ‘akinautolu. Na‘á ne fiema‘u ha ngoue koe‘uhi ke ma‘u me‘atokoni mei ai ‘a hono fāmilí.
Na‘e toe hoha‘a pē foki ‘a e loto ‘o Siosefa ki he Siasí. He na‘e lahi ‘aupito ‘a e kovi na‘e fai ‘e he kakai koví ki he kāingalotú. Pea na‘e pau ai ke toitoi ha ni‘ihi ‘o e kau taki ‘o e Siasí mei he kakai koví. Na‘e loto ‘a Siosefa ke ne ngāue mālohi ke tokoni‘i ‘a e kāingalotú.
Pea na‘e ‘i ai ‘a e taimi ‘e ni‘ihi na‘e pau ai ke ‘alu ‘a Siosefa mei ‘api ke tokoni‘i ‘a e kāingalotú. Na‘e hoha‘a ‘a e loto ‘o Siosefa ‘i he‘ene tuku ‘a hono fāmilí ‘i ‘api. Na‘e mamahi foki mo ‘Ema ‘i he taimi na‘e mama‘o ai ‘a Siosefá. Na‘e hoha‘a ‘a hono lotó kiate ia.
Ko ia na‘e fehu‘i ‘e Siosefa kia Sīsū ko e hā te ne faí. Na‘e tala ange ‘e Sīsū ki he palōfita ko Siosefa Sāmitá ke ‘oua ‘e hoha‘a hono lotó ki hono ngaahi faingata‘a‘iá. Pea na‘e tala ange ‘e Sīsū ke ‘oua ‘e ilifia ki he kakai koví. Na‘e tala ange ‘e Sīsū te ne tokoni‘i ma‘u pē ‘a Siosefa.
Na‘e pehē ‘e Sīsū ‘oku totonu ke hanga ‘e Siosefa ‘o tō ha ngoue ma‘a hono fāmilí, pea ne toki ‘alu leva ‘o tokoni‘i ‘a e kāingalotú. Na‘e tala ange ‘e Sīsū kia Siosefa ke ‘oua ‘e hoha‘a hono lotó ki he me‘akaí, valá, pe pa‘angá. ‘E hanga ‘e he kāingalotú ‘o foaki kia Siosefa ‘a e me‘a ‘okú ne fiema‘ú.
Na‘e hanga ‘e Sīsū ‘o foaki mai ha fakahā kia Siosefa Sāmita kau kia ‘Ema. Na‘e tala ange ‘e Sīsū ko ‘Ema Sāmitá, ko ha fefine makehe. Kuó Ne fili ia ke ne fai ha ngāue mahu‘inga.
Na‘e tala ange ‘e Sīsū ‘oku totonu ke ‘ofa ‘a ‘Ema kia Siosefa ‘i he taimi ‘oku faingata‘a‘ia aí. Pea ‘oku totonu ke ne tokoni‘i ia ke ne fiefia kae ‘oua ‘e hoha‘a hono lotó kiate ia.
Na‘e tala ange ‘e Sīsū ‘oku totonu ke hanga ‘e ‘Ema ‘o ako‘i ‘a e kāingalotú. Te ne tokoni‘i kinautolu ke nau ako ki he ngaahi folofolá. Na‘á ne tala ange foki ‘e tokoni‘i ia ‘e he Laumālie Mā‘oni‘oní ke ne ‘ilo‘i ‘a e me‘a ke ne ako‘í.
Na‘e tala ange ‘e Sīsū kia ‘Ema ‘oku totonu ke ne fakamoleki hono taimi ke ako. Te ne lava ai ke ma‘u ha poto ke ne tohi ha ngaahi me‘a lahi.
Na‘e kole ‘e Sīsū kia ‘Ema ke ne hanga ‘o fili ha ngaahi hiva ke hiva‘i ‘e he kāingalotú. Pea ‘e pulusi ‘a e ngaahi hiva ko ‘ení ‘i ha tohi hiva.
‘Oku hōifua ma‘u pē ‘a e ‘Otuá ke fanongo ki Hono kāinga mā‘oni‘oní ‘oku nau hiva. He ko ‘enau ngaahi hivá ko e lotu ia kiate la. Pea ‘e tāpuekina ‘a e kakai angatonu ko ia ‘oku nau hiva ki he ‘Otuá.
Na‘e tala ‘e Sīsū kia ‘Ema ke ne loto-mā‘ulalo. Na‘á Ne tala ange ki ai ke ‘ofa ‘i hono husepānití. Pea na‘á Ne tala ange ki ai ke fiefia he ‘e lahi ‘a e ngaahi tāpuaki ‘e ma‘u ‘e Siosefá.
Na‘e tala ange ‘e Sīsū kia ‘Ema ke ‘oua ‘e hoha‘a hono lotó ki he māmani. ‘Oku totonu ke ne teuteu‘i ia ki ha māmani lelei ange ‘i hēvani. Pea ‘oku totonu ke ne fiefia pea talangofua ki he ngaahi fekau ‘a e ‘Otuó. Pea te ne ‘alu leva ki hēvani.
Na‘e pēhe ‘e Sīsū ko e ngaahi me‘a na‘á Ne tala ange kia ‘Ema Sāmitá ko e ngaahi me‘a ia ki he kakai fefiné kotoa.