Vahe 31
Ko e Lea ‘o e Potó
(Fēpueli 1833)
Na‘e kamata ‘e Siosefa Sāmita ha ako‘anga ma‘á e kakai tangata ‘i he Siasí. Na‘e ui ia ko e ako‘anga ‘o e kau palōfitá.
Na‘e tu‘u ‘a e ‘apiakó ‘i ha loki ‘i he fale koloa ko ia ‘o Niueli Uitenī, ‘i Ketilani, ‘ōhaiō. Na‘e hanga ‘e Siosefa ‘o ako‘i ‘a e kakai tangatá ‘o kau ki he Siasi. Na‘á ne ako‘i kiate kinautolu ‘a e puletapú pea mo e ngaahi folofola ‘a e ‘Otuá.
Na’e tokolahi ‘a e kau tangata na‘a nau kei ifi paipa pē mo e sikā. Na‘e fonu ‘a e loki ‘i he ‘ahu ‘o e tapaká. Na‘e ‘i ai ha kau tangata ia na‘a nau fakateka ‘a e tapaká. Na‘e uli ‘aupito ‘a e faliki. Na‘e fiema‘u ke toe fakama‘a ‘a e lokí ‘i he hili ‘a e foki ‘a e kau tangata ki honau ngaahi ‘api.
Na’e pau ke fakama‘a ‘e ‘Ema ko e uaifi ‘o Siosefá ‘a e lokí ‘i he hili ‘a e fakataha kotoa pē. Na’e fifili leva ‘a Siosefa pē ‘oku totonu nai ke ifi tapaka pē fakateka ‘a e kau tangatá.
Na‘e lotu leva ‘a Siosefa ‘o fehu‘i ki he ‘Otuá pē ko e hā ‘a e me‘a ‘oku totonú. Na‘e foaki leva ‘e Sīsū ha fakahā kia Siosefa. Na‘e ui ia ko e Lea ‘o e Potó. Na‘e tala ange ‘e Sīsū ‘oku ‘i ai ‘a e kakai ‘oku nau fai ‘a e ngaahi me‘a kovi. ‘Oku nau loto ke fai ‘e he kakaí ‘a e ngaahi me‘a ko ē ‘oku ‘ikai ke sai ki honau ngaahi sinó. Na‘e fakahā ange ‘e Sīsū ki he Kāingalotu ‘i he Lea ‘o e Potó ‘a e me‘a ko ia ‘oku lelei ki honau sinó. Na‘á Ne tala ange foki kiate kinautolu mo e ngaahi me‘a ‘oku kovi ki honau sinó.
Na‘e tala ange ‘e Sisū ‘oku ‘ikai ke lelei ‘a e ‘olokaholó ki he tangatá. ‘Oku totonu ke ‘oua na‘a nau inu ‘a e ngaahi me‘a ko ē ‘oku ‘i ai ‘a e ‘olokaholó. ‘Oku totonu ke ngāue‘aki pē ‘a e ‘olokaholó ‘i tu‘a ‘i he sinó.
Na‘e tala ange ‘e Sīsū ‘oku totonu ke ‘oua na‘a faka‘aonga ‘i ‘e he kakaí ‘a e tapaká. ‘Oku totonu ke ‘oua na‘a nau ifi sikaleti, sikā, pe paipa. ‘Oku totonu ke ‘oua na‘a nau fakateka ‘a e tapaká. Na‘e pehē ‘e Sīsū, “ ‘Oku ‘ikai lelei ‘a e tapaká ki he sinó.pea ‘oku ‘ikai foki ke lelei ki he tangatá.”
Na‘e tala ange foki ‘e Sīsū ki he Kāingalotu ke ‘oua na‘a nau inu ‘a e ngaahi inu velá. Ko e til mo e kofí ko e inu velá ia. ‘Oku ‘ikai ke sai ia ki he sinó.
Na‘e tala ange ‘e Sīsū ‘oku lahi ‘a e ngaahi ‘akau pea mo e fanga manu lelei ke kai ‘e he kakai. ‘Oku totonu ke fakamālō ‘a e kakai ki he Tamai Hēvaní koe‘uhi ko e ngaahi me‘akai ‘oku lelei.
Na‘e tala ange ‘e Sīsū ‘oku totonu ke ‘oua ‘e kai ‘o fu‘u lahi ‘e he kakaí ‘a e kakano‘i manú. ‘Oku totonu ke nau kai ‘a e kakano‘i manú ‘i he taimi momokó pē. ‘Oku totonu ke nau kai ‘a e kakano‘i manú ‘i he taimi ‘oku ‘ikai ke lahi fe‘unga ai ‘a e ngaahi me‘akai kehé.
Na‘e tala ange ‘e he ‘Eiki ‘oku lelei ange ‘a e kēlení ki hotau ngaahi sinó. Ko e ni‘ihi ‘o e ngaahi kēleni ko ‘ení ko e uité, laisé, koané, mo e polisí. ‘Oku lelei ‘aupito ‘a e uité kiate kitautolu kotoa. ‘Oku toe lelei foki mo e ngaahi fua‘i‘akau pea mo e ngaahi vesitapolo kotoa pē ki he kakaí.
Na‘e tala ange ‘e Sīsū ‘oku totonu ke talangofua ‘a e Kāingalotú ki he Lea ‘o e Potó. ‘E hanga ‘e he ‘Otua ‘o tāpuekina kinautolu. Te nau malu ha sino mo‘ui lelei. Te nau ma‘u ha poto. Te nau lava ke ako ki he ngaahi me‘a lahi. ‘E tāpuekina kinautolu ‘o kapau te nau kai ‘a e ngaahi me‘akai ‘oku totonú.