Vahe 47

Ko e Kole Tokoni ‘a Siosefa Sāmita ki he Palesitení

(Mā‘asi—Nōvema 1839)

Na‘e fai ‘e Siosefa Sāmita ha ngaahi tohi ki he Kāingalotú lolotonga ‘a ‘ene nofo ‘i he fale fakapōpula ‘i Lipetií. Na‘á ne tala kiate kinautolu ke nau tohi mai ‘o fakamatala ki he ngaahi me‘a kovi na‘e fai ‘e he kau fakatangá kiate kinautolú. ‘Oku totonu ke nau ‘ave ‘a e ngaahi me‘a ko ia kuo nau hikí ki he kau taki ‘o e pule‘angá.

T&F 123:1, 4, 6

Na‘e tala ange ‘e Siosefa ki he Kāingalotu ke nau hiki ‘a e ngaahi hingoa ‘o e kakai kovi ko ia na‘a nau fai kovi ange kiate kinautolú. ‘Oku totonu ke nau fakamatala ‘o kau ki he faka‘auha ko ia ‘o honau ngaahi ‘api pea mo ‘enau ngaahi faamá.

T&F 123:1-3

Na‘e ‘i ai ha ‘aho ‘e taha na‘e hanga ‘e he kau le‘ó ‘o ‘ave ‘a Siosefa pea mo hono ngaahi kaume‘a e toko fā ki ha fale fakapōpula ‘e taha. Na‘e hanga ‘e Siosefa pea mo hono ngaahi kaume‘á ‘o fakatau ha hoosi ‘e ua mei he kau le‘o ko ‘ení. Na‘a nau ‘oange ha vala ke totongi‘aki ha hoosi ‘e taha. Pea na‘a nau palōmesi ange te nau toki totongi ‘a e hoosi ‘e tahá ‘amui.

Na‘e ‘i ai ha pō ‘e taha na‘e konā ai ha toko fā ‘o e kau le‘ó pea nau mohe. Kae hanga ‘e ha toko taha ia ‘o e kau le‘ó ‘o tokoni‘i ‘a Siosefa mo hono ngaahi kaume‘á ke nau hola.

Na‘e fetongitongi ‘a Siosefa pea mo hono ngaahi kaume‘á ‘i he heka ‘i he fanga hoosí. Na‘a nau ‘alu ki Kuinisī, ‘i ‘Ilinoisi. Na‘e fe‘unga pea mo e ‘aho ‘e hongofulu pea nau toki a‘u ki ai.

Na‘e a‘u ‘a Siosefa Sāmita mo hono ngaahi kaume‘á ki honau ngaahi fāmilí. Na‘a nau fiefia ke nau toe fakataha.

Na‘e loto ‘a e Kāingalotú ke nau ma‘u ha feitu‘u ‘i ‘llinoisi ke nau langa ai ha kolo. Ko ia na‘a nau hanga ‘o fakatau mai ha kelekele ofi ki he vaitafe Misisipi. Na‘e ano pea pelepela ‘a e kelekele ko ‘ení. Na‘e hiki ‘a Siosefa pea mo e Kāingalotú ki ai. Na‘a nau ngāue mālohi ke feinga‘i ke mātu‘u ‘a e kelekele ko ‘ení. Na‘a nau langa ha nau ngaahi ‘api pea tō pea mo ‘enau ngaahi ngoué. Na‘a nau langa ha kolo faka‘ofo‘ofa. Na‘a nau fakahingoa ‘a e koló ko Nāvū. Ko hono ‘uhinga ‘o e Nāvū ko e feitu‘u faka‘ofo‘ofa.

Hili mei ai ha taimi nounou, na‘e ‘alu ‘a Siosefa Sāmita ke fe‘iloaki pea mo e Palesiteni ‘o ‘Ameliká. Na‘e fakamatala ‘e Siosefa ki he Palesítení ‘o kau ki he kau fakatangá ‘i Mīsulí. Na‘á ne fakamatala foki ki hono hanga ‘e he kakai kovi ko ‘eni ‘o tutu ‘a e ngaahi ‘api ‘o e Kāingalotu pea kaiha‘asi ‘a ‘enau fanga manú.

Na‘e tala ange ‘e Siosefa na‘e tokolahi ha Kāingalotu na‘a nau mate. Pea ‘ave ‘a e Kāingalotu ‘e ni‘ihi ‘o fakahū ‘i he fale fakapōpulá. Pea na‘e fakahā ‘e he Palesiteni ‘a e ngaahi me‘a ko ia na‘e hiki ‘e he Kāingalotú. Na‘e tala ange ‘e Siosefa ‘oku ‘ikai lava ‘a e kau taki ia ‘i Mīsuli ke tokoni‘i ‘a e Kāingalotú. Ko ia na‘á ne kole ki ha palesitení ke ne hanga mu‘a ‘o tokoni‘i ‘a e Kāingalotu ‘o tautea‘i ‘a honau ngaahi filí.

Na‘e tala ange ‘e he Palesiteni ‘okú ne ‘ilo‘i pē ‘a e faingata‘a‘ia ‘a e Kāingalotú. Ka ‘e ‘ikai ke ne lava ke fai ha me‘a ke tokoni‘i kinautolu. He kapau te ne tokoni‘i ‘a e Kāingalotú, ‘e ‘ita ‘a e kakai ia ‘o Mīsulí.

Na‘e loto-mamahi ‘a Siosefa koe‘uhi ko e ‘ikai ke tokoni ‘a e Palesitení ki he Kāingalotú. Ko e Tamai Hēvaní pē te Ne lava ke tokoni‘i kinautolu.