Vahe 60
Ko e Hoko Atu ‘a e Fononga ‘a e Kau Paioniá
(Mā‘asi 1846 — Sune 1846)
‘l he konga kimu‘a ‘o e fa‘ahita‘u matalá na‘e kamata ke hoko atu ‘a e fononga ‘a e Kāingalotú. Na‘e kei momoko pē. Na‘e ‘i ai ha ni‘ihi ‘o e kakaí na‘a nau si‘i puke pea nau mate.
Na‘e kovi ‘aupito ‘a e ngaahi halá. Na‘e pau pē ke māmālie ‘a e fononga ‘a e kakaí. Na‘e tokalelei ‘a e funga fonuá pea mo e ngaahi mo‘unga iiki pē. Na‘e musie loloa ‘aupito ‘a e funga ‘o e fonuá. ‘Oku ui ‘a e fa‘ahinga feitu‘u ko ‘eni ko he toafa musie. Na‘e nofo ‘a e kau ‘Initiá ‘i he ngaahi toafa tokalelei ko ‘ení. Na‘e ‘ikai ha ngaahi kolo pē ngaahi faama ‘i he feitu‘u ni.
Na‘e fekau‘i atu ‘e Pilikihami ‘Iongi ha kau tangata ke nau kumi ha ngaahi feitu‘u lelei ke nofo ai ‘a e kakaí. Ko ia na‘a nau tā ‘akau pea nau ngaohi ha ngaahi fale meí he ‘akau. Na‘a nau langa ha ngaahi hala fakakavakava ki he ngaahi vaitafé. Na‘a nau feinga ke faingofua ‘a e fononga ‘a e kakaí. Na‘e ui ‘a e Kāingalotu ko ia na‘a nau fononga ki he Hihifó ko e kau Paionia.
Na‘e a‘u atu ‘a e kau Paionia ki ha vaitafe fālahi. Na‘e ui ‘a e feitu‘u na‘a nau mālōlō aí ko Kauniseli Palafi. Ne a‘u mai mo ha kāingalotú kehe ‘o nau fakataha. Na‘a nau langa honau ngaahi kemi ofi mai pē. Na‘e nofo heni ‘a e kau paioniá ‘o a‘u ki he fa‘ahita‘u māfaná.