Vahe 55

Ko e Fakautuutu Ange ‘a e Faingata‘á ki he Kāingalotú

(1843—1844)

Ko e tokolahi ‘o e kakai ofi ki Nāvuú na‘e ‘ikai ke nau kau ki he Siasi. Pea ko e tokolahi ‘iate kinautolu na‘e ‘ikai ke nau sai‘ia ‘i he Kāingalotú. Na‘e ‘ikai te nau loto ke hoko ‘a e Kāingalotu ko e kau taki ‘i he koló. Ko ia na‘a nau fakatupu kovi ki he kau mēmipa ‘o e Siasí.

Pea na‘e tānaki fakatahataha ‘a e kakaí ni ki ha kau fakatanga. ‘O nau kaiha‘asi ‘a e fanga manu ‘a e kāingalotu. Pea nau tutu honau ngaahi falé. Na‘a nau feinga ke ‘alu ‘a e Kāingalotu mei Nāvū. Na‘e ‘ikai ke lava ‘o ta‘ofi ‘e he kau polisi pea mo e kau sōtiá ‘a e kau fakatangá. Na‘e ‘ikai foki ke fie tokoni pea mo e kōvaná ia ki he Kāingalotú.

Na‘e ‘osi tala ange pe foki ‘e Siosefa Sāmita ki he Kāingalotú ‘i Nāvū ‘e hoko pe ‘a e faingata‘a kiate kinautolu. Ko e ngaahi me‘a ko ē na‘e lea‘aki ‘e Siosefa Sāmita kuo hoko ia ‘o mo‘oni. Na‘e ‘ilo‘i ‘e Siosefa kuo pau pē ke ‘alu ‘a e kāingalotu mei Nāvū. ‘Oku totonu ke nau ‘alu ki ha feitu‘u ‘e ‘ikai toe fakahoha‘asi ai kinautolu ‘e ha taha.

Ko ia na‘e fai ha fakataha ‘a Siosefa Sāmita pea mo e kau ‘Apōsetolo pea mo ha kau tangata kehe. Na‘á ne tala ange kiate kinautolu ke kumi ha feitu‘u ‘e lava ke ‘alu ‘a e Kāingalotú ‘o nofo ai.

Na‘e sio ‘a Siosefa Sāmita ki he mape ‘o e fonuá. Na‘e hā ‘i he mape ha feitu‘u ‘oku tu‘u ai ha ngaahi mo‘unga mā‘olunga pea mo ha ngaahi tele‘a fālahi. Na‘e nofo ai ‘a e kau ‘Initiá. Na‘e ‘ilo‘i ‘e Siosefa ko ha feitu‘u lelei ‘eni ki he Kāingalotú. ‘E ‘ikai ke toe ‘i ai ha kau fakatanga ke fakamamahi‘i kinautolu. Ko ia na‘e ‘amanaki ‘a Siosefa ‘e lava ‘a e Kāingalotu ke nau ‘alu ‘o nofo ai.

Na‘e toe ‘i ai foki mo ha kakai kehe ‘i Nāvū ne nau ‘osi hoko ko e kau mēmipa ‘o e Siasí. Ka na‘e ‘ikai ke nau toe tui kinautolu ki he ongoongoleleí. Na‘a nau fehi‘a kia Siosefa Sāmita. Na‘a nau loto ke nau hanga ‘o tamate‘i ia. Ko ia na‘a nau kamata ke pulusi ha nusipepa. ‘O nau paaki ai ha ngaahi fakamatala kovi fekau‘aki pea mo Siosefa Sāmita pea mo e Kāingalotu.

Na‘e ‘ita ‘a e kau taki ‘i Nāvū ‘i he nusipepa. Pea na‘e ‘alu ha ni‘ihi ‘iate kinautolu ki he fale ko ia na‘e paaki ai ‘a e nusipepa. Na‘a nau hanga ‘o tutu ‘a e nusipepa. Na‘a nau hanga foki ‘o tutu pea faka‘auha pea mo e mīsini paakí. Pea na‘e ‘ikai ke toe lava ke pulusi ha nusipepa.