Vahe 1
Ko Siosefa Sāmita mo Hono Fāmilí
(1805–1820)
Na‘e fā‘ele‘i ‘a Siosefa Sāmita ‘i he ‘aho 23 ‘o Tīsema 1805. Na‘e nofo ‘a hono fāmilí ‘i he vahefonua Veamōnití. ‘Oku tu‘u ‘a Veamōniti ‘i ‘Amelika. Na‘e fakatauhingoa ‘a Siosefa Sāmita ki he‘ene tamai, he na‘e toe ui pē ko Siosefa. Ko e hingoa ‘o ‘ene fa‘eé ko Lusí.
Na‘e ‘i ai ‘a e fanga tokoua ‘e toko ono ‘o Siosefa, pea mo e fanga tuofāfine ‘e toko tolu. Na‘e ‘i ai hano ki‘i tehina na‘e mate ‘i he‘ene kei pēpeé.
Ko e kakai lelei ‘a e tamai mo e fa‘ē ‘a Siosefá. He na‘á na ‘ofa ‘i he‘ena fānaú. Pea na‘á na ngāue mālohi ke tauhi ‘a ‘ena fānaú.
‘I he taimi na‘e kei tamasi‘i ai ‘a Siosefá, na‘e ‘i ai ha mahaki kovi na‘e hoko ki hono va‘é. Na‘e feinga ‘a e kau tōketaá ke faito‘o ke mo‘ui, ka na‘e ‘ikai ke nau lava.
Ko e ta‘okete ‘o Siosefa ‘a Hailame Sāmita. Na‘á ne ‘ofa ‘ia Siosefa. Na‘e ongo‘í ‘e Hailame ‘a e mamahi ko ia ‘a e va‘e ‘o Siosefá. Ko ia na‘á ne tangutu pē ‘i he ve‘e mohenga ‘o Siosefá. Na‘á ne feinga ke tokoni ke ma‘u ‘e Siosefa ha fiemālie.
Na‘e loto ‘a e kau tōketaá ia ke tu‘usi ‘a e va‘e ‘o Siosefá. Ka na‘e ‘ikai ke loto ki ai ‘a ‘ene fa‘eé. Ko ia ne nau loto ke tu‘usi pē ha konga ‘o e huí. Na‘e ‘ilo‘i ‘e Siosefa ‘e mamahi lahi ‘a hono va‘é ‘i he taimi ‘e tu‘usi ai ‘e he kau tōketaá ha konga ‘o e fo‘i hui. Ka na‘á ne ma‘u ha tui. Na‘á ne ‘ilo‘i ‘e tokoni‘i ia ‘e he Tamai Hēvaní.
Na‘e fekau ‘e he kau tōketaá ‘a Siosefa ke ne hanga ‘o inu ha uaine koe‘uhi ke ‘oua na‘a fu‘u mamahi ‘a hono va‘é. Na‘e ‘ikai ke fie inu ‘e Siosefa ia ‘a e uainé. Na‘e kole ‘e Siosefa ‘a ‘ene fa‘eé ke ne ‘alu ki tu‘a. He na‘e ‘ikai te ne loto ke sio ‘a ‘ene fa‘eé ki he tu‘usi ‘e he kau tōketā ‘a e konga ‘o e hui ko ia ‘i hono va‘é.
Na‘e kole ‘e Siosefa ‘a ‘ene Tamai ke ne pukepuke ia. Na‘e kamata leva ke hanga ‘e he kau tōketaá ‘o tafa ‘a e va‘e ‘o Siosefá. ‘O nau hanga ‘o to‘o ‘a e konga ko ia ‘o e huí na‘e koví. Na‘e fu‘u mamahi ‘aupito ‘a e me‘á ni kia Siosefa, ka na‘á ne loto-to‘a. Hili ha ngaahi ‘aho lahi ne sai hono va‘é.
‘I he tupu hake ‘a Siosefa ‘o motu‘a angé, ne hiki ‘a e fāmili ki he vahefonua Niu ‘loaké. Na‘a nau nofo ‘i ha fale ‘akau ‘i ha faama ofi ki Palemaila.
Na‘e masiva ‘a e fāmili ‘o Siosefa Sāmitá pea na‘e pau pē ke nau ngāue lahi mo mālohi ke totongi ‘a honau faamá. Na‘e tokoni ‘a e tamaiki tangatá ki he‘enau tamaí ‘i hono tō ‘o e ngoué. Na‘a nau tokanga‘i ‘a e fanga manú. Pea tokoni ‘a e tamaiki fefiné ki he‘enau fa‘eé.
Ko e tamasi‘i angalelei ‘a Siosefa. Na‘á ne fiefia. Na‘á ne manako ke kata mo va‘inga.