ʻApi ʻo Pita Uitemaá, tā ʻe Al Rounds

1–7 Māʻasi

Tokāteline mo e Ngaahi Fuakava 20–22

“Kuo Hopo Hake ʻa e Siasi ʻo Kalaisí”

Hiki hoʻo ngaahi ongo fakalaumālie ʻi hoʻo ako ʻa e Tokāteline mo e Ngaahi Fuakava 20–22. ʻE ala tataki koe ʻe he niʻihi ʻo e ngaahi ongo ko ʻení ki ha ngaahi fakakaukau ʻe tokoni atu ʻi he taimi ʻokú ke faiako aí.

Lekooti Hoʻo Ngaahi Ongó

Fakaafeʻi e Feʻinasiʻakí

Lolotonga ʻenau ako ʻi ʻapí, mahalo ne maʻu ʻe he kau mēmipa ʻo e kalasí ha ngaahi fakakaukau fekauʻaki mo e ngaahi tāpuaki ʻo e ʻi māmani ʻa e Siasi moʻoní. Fakaafeʻi kinautolu ke vahevahe ha kupuʻi folofola mei he ngaahi vahe ko ʻení ʻoku fakahaaʻi ai e ʻuhinga ʻoku nau houngaʻia ai ʻi hono fakafoki mai ʻo e Siasí.

Akoʻi ʻa e Tokāteliné

Tokāteline mo e Ngaahi Fuakava 20–21

Kuo toe fakafoki mai ʻa e Siasi ʻo Sīsū Kalaisí.

• Mahalo ʻe ʻaonga ki he kau mēmipa ʻo e kalasí hano ako ʻo e ngaahi meʻa ʻoku faitatau ai e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea mo e Siasi ne fokotuʻu ʻe Kalaisi ʻi he kuonga muʻá. ʻE lava ke ke tā ʻi he palakipoé ha saati ʻoku ʻotu fā ʻo tohi ai ʻa e Tokāteliné, Ngaahi Ouaú, Mafai ʻo e Lakanga Fakataulaʻeikí, mo e Kau Palōfitá. ʻE lava ke ke ʻoange e ngaahi fakamoʻoni fakafolofola ko ʻeni fekauʻaki mo e Siasi ʻo Kalaisi ʻi he kuonga muʻá: Mātiu 16:15–19; Sione 7:16–17; ʻEfesō 2:19–22; 3 Nīfai 11:23–26; Molonai 4–5. ʻE lava ke ʻilo ʻe he kau mēmipa ʻo e kalasí ʻa e meʻa ʻoku akoʻi ʻe he potufolofola takitaha fekauʻaki mo e Siasi ʻo Kalaisí pea hiki e ngaahi fakamoʻoni fakafolofolá ʻi he ʻotu takitaha ʻi he palakipoé. (ʻE lava ke fakaʻaongaʻi ha niʻihi ʻo e ngaahi fakamoʻoni fakafolofolá ʻo lahi hake ʻi he ʻotu ʻe tahá.) ʻE lava ke nau fai e meʻa tatau ki he ngaahi fakamoʻoni fakafolofola ko ʻeni fekauʻaki mo e Siasi ʻo Kalaisi kuo fakafoki maí: Tokāteline mo e Ngaahi Fuakava 20:17–25, 60, 72–79; 21:1–2. Ko e hā ʻokú ke ako mei he fakafehoanaki ko ʻení ʻo kau ki hono Fakafoki mai ʻo e Siasi ʻo Kalaisí?

Tokāteline mo e Ngaahi Fuakava 20:37, 75–79; 22

ʻOku tokoni ʻa e ngaahi ouau toputapú ke tau hoko ʻo hangē ko e Fakamoʻuí.

• Tukuange ha taimi ke ako ai e kau mēmipa ʻo e kalasí ʻa e ngaahi fiemaʻu ko ia ki he papitaisó ʻa ia ʻoku fakamatalaʻi ʻi he Tokāteline mo e Ngaahi Fuakava 20:37, pea kole ange ke nau fakalaulauloto ki ha ngaahi fehuʻi hangē ko ʻení: ʻOku tokoni fēfē ʻa e ngaahi fiemaʻu ko ʻení ke tau mateuteu ke papitaiso ki he Siasi ʻo e ʻEikí? ʻOku ʻuhinga ki he hā ke toʻo kiate kitautolu ʻa e huafa ʻo Kalaisí? (vakai, Mōsaia 5:5–12). Ko e hā ʻokú ne tokoni atu ke “fakapapau [ho] lotó ke tauhi [kia Sīsū Kalaisi] ki he ngataʻangá”?

• Ko e hā ʻoku akoʻi mai ʻe he vahe 22 fekauʻaki mo e papitaisó? Kole ange ki he kau mēmipa ʻo e kalasí ke nau fakakaukauloto ʻoku ʻi ai honau kaungāmeʻa ne papitaiso ia ʻi ha Siasi kehe. Te nau lava ʻo lau ʻa e vahe ko ʻení ke maʻu ha faleʻi ke tokoni ke mahino ki hono kaungāmeʻá ʻa e ʻuhinga ʻoku fie maʻu ai ke papitaiso ki he Siasi ʻo e Fakamoʻuí kuo fakafoki maí. ʻE lava leva ke fakatātaaʻi ʻeni fakakalasi pe tauhoa.

• Lau fakataha ʻa e Tokāteline mo e Ngaahi Fuakava 20:75–79 pea fakaafeʻi e kau mēmipa ʻo e kalasí ke nau fakakaukau ki he ngaahi meʻa ʻoku akoʻi mai ʻe he ngaahi veesi ko ʻení fekauʻaki mo e Fakamoʻuí pea mo Hono mālohi ʻi heʻetau moʻuí. Ko e hā ha ngaahi lea pe kupuʻi lea ʻoku hā makehe ʻi he taimi ʻoku tau lau ai ʻa e ongo lotu tāpuakiʻi ʻo e sākalamēnití ʻi he founga ko ʻení? Ko e hā ʻoku mahuʻinga ai ke maʻu ʻa e sākalamēnití he uike kotoa pē?

  

  Ko e sākalamēnití ko ha ouau toputapu.

Tokāteline mo e Ngaahi Fuakava 20:38–60

ʻOku tāpuakiʻi ʻe he ngaahi ngāue ʻa e lakanga fakataulaʻeikí ʻa e kāingalotu ʻo e Siasí pea mo honau ngaahi fāmilí.

• ʻE lava ke tokoni ʻa e fakamatala ko ia ki he ngaahi fatongia ʻo e lakanga fakataulaʻeikí ʻi he Tokāteline mo e Ngaahi Fuakava 20:38–60 ke fakalahi e mahino ʻa e kau mēmipa hoʻo kalasí ʻo kau ki he ngaahi ngāue ʻa e lakanga fakataulaʻeikí. Te ke lava ʻo fakaafeʻi kinautolu ke fakakaukau ʻoku ʻamanaki ke fakanofo hanau kaungāmeʻa pe mēmipa honau fāmilí ne toki papitaiso ki ha tuʻunga ʻi he lakanga fakataulaʻeikí. Te nau fakaʻaongaʻi fēfē ʻa e ngaahi veesi ko ʻení ke tokoni ke mahino kiate ia ʻa hono ngaahi fatongiá? Ko e hā ha ngaahi sīpinga te nau vahevahe ke tokoni ke mahino kiate ia ʻa e founga ʻe tokoniʻi ai ia ʻe he ngaahi fatongia ko iá ke hoko ʻo hangē ange ko Sīsū Kalaisí? Mahalo te nau lava ke fakatātaaʻi e fepōtalanoaʻaki ko ʻení.

  Makehe mei aí, te nau fakaʻaongaʻi fēfē ʻa e ngaahi veesi ko ʻení ke tokoniʻi ha fefine ne toki papitaiso ke vakai ki he founga ʻe lava ke kau atu ai ʻi he ngāue ʻoku fakamatalaʻi atu hení? (ʻE ala tokoni ʻa e fakamatala ko ia ʻi he “Ngaahi Maʻuʻanga Tokoni Kehé”.)

Tokāteline mo e Ngaahi Fuakava 21:4–7

ʻOku tau monūʻia ʻi heʻetau maʻu ʻa e folofola ʻa e ʻEikí ʻo fakafou mai i Heʻene palōfitá.

• ʻOku ʻi he Tokāteline mo e Ngaahi Fuakava 21 ha ngaahi lea mālohi fekauʻaki mo e muimui ki he palōfita ʻa e ʻEikí. Ke tokoni ki he kau mēmipa ‘o e kalasí ke fakalaulauloto mo aleaʻi e ngaahi fakamatala ko ʻení, kole ange ke nau fekumi ‘i he veesi 4–7 ki ha kupuʻi lea te nau fiemaʻu ke mahino lelei ange pea ke hiki ʻa e kupuʻi leá ʻi he palakipoé. Fili ha niʻihi ʻo e ngaahi kupuʻi leá pea aleaʻi fakakalasi ʻa e meʻa ʻoku nau lava ke ʻuhinga ki aí. Ko e hā ʻoku akoʻi mai ʻe he ngaahi kupuʻi lea ko ʻení ʻo kau ki he muimui ki he palōfita ʻa e ʻEikí?

Ngaahi Maʻuʻanga Tokoni Lahi Ange

ʻOku tau ngāue kotoa mo e mālohi ʻo e lakanga fakataulaʻeikí.

“ʻOku fakanofo ʻa e kakai tangatá ki he ngaahi tuʻunga ʻo e lakanga fakataulaʻeikí, neongo ʻoku fakaafeʻi ʻa e kakai fefiné mo e tangatá fakatouʻosi ke nau aʻusia e mālohi mo e ngaahi tāpuaki ʻo e lakanga fakataulaʻeikí ʻi heʻenau moʻuí. …

“… ʻOku malanga mo lotu ʻa e [houʻeiki fafiné] ʻi he ngaahi haʻofanga lotú, pea fua e ngaahi fatongia fakatakimuʻa lahi mo ngāue tokoni, kau atu ki he ngaahi fakataha alēlea ʻo e lakanga fakataulaʻeikí ʻi he tuʻunga fakalotofonua mo fakalūkufuá, pea ngāue ko ha faifekau malanga ʻi he funga māmaní. ʻOku ngāue ʻaki ai ʻe he houʻeiki fafiné ʻi he ngaahi foungá ni mo ha ngaahi founga kehe ʻa e mafai ʻo e lakanga fakataulaʻeikí neongo ʻoku ʻikai fakanofo kinautolu ki ha tuʻunga ʻi he lakanga fakataulaʻeikí. …

“… ʻOku ngāue ʻa e houʻeiki fafiné mo tangatá ʻi he mālohi mo e mafai ʻo e lakanga fakataulaʻeikí ʻi heʻenau fua e ngaahi fatongia faka-siasí, ngaahi ouau fakatemipalé, ngaahi vā fetuʻutaki fakafāmilí, pea mo ngāue fakaetauhí. ʻOku mahuʻinga ki he ongoongolelei ʻo Sīsū Kalaisí e fengāueʻaki ʻa e houʻeiki fafiné mo e houʻeiki tangatá ʻi hono fakahoko e ngāue ʻa e ʻOtuá ʻo fakafou ʻi Hono mālohí” (Gospel Topics, “Joseph Smith’s Teachings about Priesthood, Temple, Women,” topics.ChurchofJesusChrist.org).

Ko Hono Fakatupulaki ʻEtau Founga Akoʻí

ʻOku tau ako fakataha. ʻI hoʻo hoko ko ha faiakó, ʻokú ke ako mo e toenga hoʻo kalasí. Fakahaaʻi hoʻo loto fiemālie ke ako meiate kinautolú ʻaki hoʻo fakafanongo ki heʻenau ngaahi fakakaukaú.