Faama ‘a Māteni Hālisí, tā ʻe Al Rounds

22–28 Fēpueli

Tokāteline mo e Ngaahi Fuakava 18–19

“ʻOku Mahuʻinga Lahi ʻa e Ngaahi Laumālié”

Ko e Laumālie Māʻoniʻoní pē te ne lava ʻo liliu e loto ʻo ha taha. Naʻe akoʻi ʻe Palesiteni Henelī B. ʻAealingi ʻo pehē, “Kapau te ke akoʻi ʻa e ngaahi tefitoʻi moʻoni fakatokāteliné, ʻe hoko mai e Laumālie Māʻoniʻoní” (“Discussion with Elder Richard G. Scott and Elder Henry B. Eyring” [Church Educational System satellite training broadcast, Aug. 11, 2003]).

Lekooti Hoʻo Ngaahi Ongó

Fakaafeʻi e Feʻinasiʻakí

Ke ueʻi e kau mēmipa ʻo e kalasí ke vahevahe e ngaahi meʻa kuo nau aʻusia ʻi he folofolá, lau fakataha ʻa e Tokāteline mo e Ngaahi Fuakava 18:34–36. Kole ange leva ki he kau mēmipa ʻo e kalasí ke nau vahevahe ha veesi ne nau lau he uiké ni ne nau ʻiloʻi ai e leʻo ʻo e ʻOtuá.

Akoʻi ʻa e Tokāteliné

Tokāteline mo e Ngaahi Fuakava 18:10–16; 19:15–20, 39–41

ʻOku hōifua ʻa e ʻEikí ʻi he taimi ʻoku tau fakatomala aí.

• ʻOku tokolahi ha kakai ʻoku nau fakafehokotaki ʻa e fakatomalá mo ha ngaahi ongo ʻoku kovi. ʻE tokoni fēfē nai e folofola ʻa e ʻEikí ʻi he Tokāteline mo e Ngaahi Fuakava 18 mo e 19 ke ʻiloʻi ʻe he kau mēmipa ʻo e kalasí ko e fakatomalá ko e meʻa ʻoku fakafiefia? ʻE lava ke ke hiki ʻi he palakipoé ʻa e Ko e fakatomalá ʻoku pea kole ange ki he kau mēmipa ʻo e kalasí ke nau fokotuʻu atu ha ngaahi founga ke fakakakato ʻaki e sētesí ʻo fakatefito ʻi he meʻa kuo nau lau ʻi he vahe 18 mo e 19. (Fakakaukau ke toe vakaiʻi ʻa e Tokāteline mo e Ngaahi Fuakava 18:10–16; 19:15–20, 39–41 ʻi he kalasí.)

• ʻOku ʻuhinga ki he hā ke “kalanga ʻaki ʻa e fakatomalá”? (Tokatēline mo e Ngaahi Fuakava 18:14). Mahalo ʻe lava ke fakakaukau e kau mēmipa ʻo e kalasí ki he fehuʻí ni ʻi heʻenau lau ʻa e Tokāteline mo e Ngaahi Fuakava 18:10–16. Ko e hā ʻoku faʻa fili ai e kakaí ke ʻoua ʻe fakatomalá? Te tau lava fēfē ke ueʻi fakalaumālie ʻa e niʻihi ʻoku tau ʻofa aí ke nau haʻu ki he Fakamoʻuí pea maʻu e fakamolemolé? Poupouʻi ʻa e kau mēmipa ʻo e kalasí ke nau fekumi ki ha meʻa ʻi he Tokāteline mo e Ngaahi Fuakava 18:10–16 pe 19:15–20 ʻe lava ke tokoni.

Tokāteline mo e Ngaahi Fuakava 18:10–16

“ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá.”

• Te ke tokoni fēfē ke mahino ki he kau mēmipa ʻo e kalasí ʻa hotau mahuʻinga fakataautaha ʻi he ʻao ʻo e ʻOtuá? Mahalo te nau lava ʻo lau ʻa e Tokāteline mo e Ngaahi Fuakava 18:10–16 pea vahevahe ha ngaahi aʻusia naʻe mahino ai kiate kinautolu honau mahuʻinga ʻi he ʻao ʻo e ʻOtuá. ʻOku uesia fēfē ʻe he ngaahi veesi ko ʻení ʻa e anga ʻo ʻetau vakai kiate kitautolú? kakai kehé? Ko e hā e founga ʻoku fakahā mai ai ʻe he ʻOtuá ʻoku tau mahuʻinga lahi kiate Ia?

  

  Mahuʻinga ʻo ha Laumālie, tā ʻe Liz Lemon Swindle

Tokāteline mo e Ngaahi Fuakava 19:15–19

Naʻe faingataʻaʻia ʻa Sīsū Kalaisi maʻá e faʻahinga kotoa ʻo e tangatá.

• Te ke tokoni fēfē ke ongoʻi ʻe he kau mēmipa ʻo e kalasí ʻa e fakamoʻoni ʻa e Laumālie Māʻoniʻoní ʻi heʻenau fakalaulauloto ki he fakamatala tonu ʻa e Fakamoʻuí ki Heʻene mamahi ʻi he fakaleleí? (Tokāteline mo e Ngaahi Fuakava 19:15–19). Mahalo te ke lava ʻo fakaafeʻi ha taha ke hivaʻi ha himi ʻoku saiʻia taha ai fekauʻaki mo e Fakamoʻuí. Te ke lava foki ʻo fakaʻaliʻali ha fakatātā ʻo e Fakamoʻuí pea fakaafeʻi e kau mēmipa ʻo e kalasí ke lau ʻa e veesi 15–19; pea lava leva ke nau hiki ʻa ʻenau ngaahi fakakaukaú mo e ongó. (ʻE lava foki ke tokoni e lea ko ia ʻa ʻEletā D. Toti Kulisitofasoni ʻi he “Ngaahi Maʻuʻanga Tokoni Kehé” ke fakaloloto ange ʻa e houngaʻia ʻa e kau mēmipa ʻo e kalasí ʻi he mamahi ʻa e Fakamoʻuí.) ʻE lava ke tokoni hano hiki ha sētesi hangē ko ʻení ʻi he palakipoé ke fakalaulauloto ki ai e kau mēmipa ʻo e kalasí: ʻOku ou houngaʻia ʻi he Fakalelei ʻa Sīsú Kalaisí koeʻuhí ko e … Mahalo naʻa loto lelei ha niʻihi ʻo e kau mēmipa ʻo e kalasí ke vahevahe ʻa e meʻa ne nau tohí pea fai ʻenau fakamoʻoni kia Sīsū Kalaisí.

Tokāteline mo e Ngaahi Fuakava 19:16–26, 34–41

ʻOku faʻa fie maʻu ha feilaulau ki hono fakahoko e ngāue ʻa e ʻOtuá.

• ʻI he fehangahangai ʻa e kau mēmipa ʻo e kalasí mo ha ngaahi tūkunga kuo pau ke nau fai ai ha feilaulau maʻá e ongoongoleleí, mahalo ʻe ueʻi fakalaumālie kinautolu ke ako fekauʻaki mo e feilaulau ne fai ʻe Māteni Hālisi ke lava ʻo pulusi ʻa e Tohi ʻa Molomoná. Mahalo te ke lava ʻo fakaafeʻi ha taha ke haʻu ki he kalasí kuo mateuteu ke fakamatala fekauʻaki mo e fili ko ia ʻa Māteni Hālisi ke mōkesi ʻene fāmá ke totongi ʻaki hono pulusi e Tohi ʻa Molomoná (vakai, Kau Māʻoniʻoní, 1:76–78). Ko e hā ha ngaahi veesi mei he vahe 19 ne mei ala tokoni kiate ia ke fai ʻene filí? Te ke lava ʻo fakaafeʻi e kau mēmipa ʻo e kalasí ke vahevahe ʻa e founga kuo faitāpuekina ai kinautolu ʻe he Tohi ʻa Molomoná mo ʻenau houngaʻia koeʻuhí ko e feilaulau ʻa Māteni Hālisí pea ki he niʻihi kehe ne nau feilaulau kae lava ʻo pulusi e tohí.

• Mahalo ʻe lava ʻe ha taha ʻi he kalasí ʻo vahevahe ha feilaulau kuo nau fai maʻá e ʻEikí. ʻE ala tataki heni ʻa e kau mēmipa ʻo e kalasí ke fakakaukau ki heʻenau loto fiemālie ko ia ke feilaulaú. Poupouʻi kinautolu ke vahevahe ha meʻa pē ʻoku nau ʻilo mei he Tokāteline mo e Ngaahi Fuakava 19 ʻokú ne ueʻi fakalaumālie kinautolu ke nau fai ha ngaahi feilaulau ke fakahoko e finangalo ʻo e ʻOtuá (vakai, tautautefito ki he veesi 16–26, 34–41).

Ngaahi Maʻuʻanga Tokoni Lahi Ange

Ko e ola ʻo e ʻofa ʻa e ʻOtuá.

Naʻe lea ʻa ʻEletā D. Toti Kulisitofasoni fekauʻaki mo e Tokāteline mo e Ngaahi Fuakava 19:18, ʻo pehē: “Tau fakakaukauʻi muʻa e ola ʻo e ʻofa mahuʻinga ʻa e ʻOtuá. … Naʻe mahulu hake ʻEne mamahi ʻi Ketisemaní mo e kolosí, ʻi ha faʻahinga meʻa ne malava ʻe ha tangata fakaekakano ʻo fuesia. Ka neongo ia, tuʻunga Heʻene ʻofa ki Heʻene Tamaí mo kitautolú, naʻá Ne kātaki pea ko hono olá, ko ʻEne lava ke foaki mai ʻa e moʻui taʻe-faʻa-maté mo e moʻui taʻengatá fakatouʻosi” (“Nofomaʻu ʻi Heʻeku ʻOfá,” Ensign pe Liahona, Nōvema 2016, 50).

Ko Hono Fakatupulaki ʻEtau Founga Akoʻí

Fokotuʻu ha ʻātakai ʻokú ne fakaafeʻi e Laumālié. ʻOku lahi e ngaahi founga te ke lava ʻo fakaafeʻi mai ʻaki e Laumālié ki hoʻo kalasí. ʻE lava ʻe he fasi talitalí ʻo poupouʻi e loto ʻapasiá. ʻE lava ʻe hono fakahaaʻi ʻo e ʻofá mo e fakamoʻoní ʻo fakatupu ha ʻātakai ongo māfana mo fakalaumālie. (Vakai, Ko e Faiako ʻi he Founga ʻa e Fakamoʻuí, 15.)