8–14 Fēpueli

Tokāteline mo e Ngaahi Fuakava 12–13; Siosefa Sāmita—Hisitōlia 1:66–75

“Kiate Kimoua ʻa Hoku Ongo Kaungā-Tamaioʻeiki”

Hangē ko ia ko hono fakamaama ʻe he Laumālie Māʻoniʻoní ʻa e ʻatamai ʻo Siosefa Sāmita mo ʻŌliva Kautele fekauʻaki mo e folofolá, ʻe lava ke Ne ueʻi fakalaumālie koe ʻi hoʻo ako ʻi he faʻa lotu ʻa e Tokāteline mo e Ngaahi Fuakava 12–13 mo e Siosefa Sāmita—Hisitōlia 1:66–75.

Lekooti Hoʻo Ngaahi Ongó

Fakaafeʻi e Feʻinasiʻakí

Ko e founga ʻe taha ke poupouʻi ai e fevahevaheʻakí ko hoʻo ʻeke ki he kau mēmipa ʻo e kalasí pe ko e hā e founga ʻoku nau ako ʻaki e folofolá. Ko e hā ne nau fai ke maʻu ha ngaahi fakakaukau ʻi he folofolá he uiké ni?

Akoʻi ʻa e Tokāteliné

Tokāteline mo e Ngaahi Fuakava 13

Naʻe fakafoki mai e Lakanga Taulaʻeiki Faka-ʻĒloné ʻe Sione Papitaiso.

• Ko e founga ʻe taha ke aleaʻi e ngaahi moʻoni ʻi he Tokāteline mo e Ngaahi Fuakava 13 ko hono talanoaʻi ʻe he kau mēmipa ʻo e kalasí ʻa e founga ʻe lava ai e vahe ko ʻení ʻo tokoni ke mahino lelei ange ʻa e Lakanga Taulaʻeiki Faka-ʻĒloné ki he toʻu tupú. Ko e hā ʻoku akoʻi mai ʻe he vahe 13 fekauʻaki mo e Lakanga Taulaʻeiki Faka-ʻĒloné ʻoku totonu ke mahino ki he kau talavoú mo e kau finemuí? Ke ʻoange ha faingamālie ke kau mai e tokotaha kotoa, ʻe lava ke ke kole ki he kau mēmipa ʻo e kalasí ke nau tautau toko ua ʻo aleaʻi ʻa e fehuʻí ni pea vahevahe e meʻa ne nau feakoʻakí.

• ʻOku fokotuʻu atu ʻe he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha ngaahi maʻuʻanga tokoni ʻe ala tokoni ke fakamatalaʻi e niʻihi ʻo e ngaahi kupuʻi lea ʻi he Tokāteline mo e Ngaahi Fuakava 13. ʻE lava ke ke kole ange ki he kau mēmipa ʻo e kalasí ke vahevahe ʻa e meʻa kuo nau ako mei he ngaahi maʻuʻanga tokoni ko ʻení. Ke kamata ha fealēleaʻaki fekauʻaki mo e ngaahi kī ʻoku fakamatala ki ai ʻa e vahe ko ʻení, ʻe lava ke ke fakaʻaliʻali ha ngaahi kī pea fakaafeʻi e kau mēmipa ʻo e kalasí ke nau talanoa ki he ngaahi meʻa ʻoku fakaʻatā ʻe he ngaahi kií ke tau faí. ʻE lava foki ke tokoni e fakamatala ʻa Sisitā Lute mo ʻEletā Teili G. Lenilani ʻi he “Ngaahi Maʻuʻanga Tokoni Kehé”. Ko e hā e ngaahi tāpuaki ʻoku tau lava ke maʻu koeʻuhí ko e ngaahi kī ʻo e Lakanga Taulaʻeiki Faka-ʻĒloné? Naʻe mei kehe fēfē nai ʻetau moʻuí ka ne taʻeʻoua e ngaahi tāpuaki ko ʻení?

• Ko e konga ʻo e ngaahi lelei ʻo e ongoongolelei kuo fakafoki maí ko ʻene fakakau kitautolu ʻi he ngāue tatau mo e kakai tangata mo fefine ʻi he folofolá: ʻi hono langa e puleʻanga ʻo e ʻOtuá ʻi he māmaní. ʻOku tau hangē leva ai ko ha “kaungā-tamaioʻeiki” mo kinautolu. ʻOku ʻuhinga ki he hā ke hoko ko ha kaungā-tamaioʻeiki ʻi he ngāue ʻa e ʻEikí? ʻE lava ke tokoni ʻa e Mātiu 3:13–17; Luke 1:13–17; 3:2–20 ke mahino lelei ange ki he kau mēmipa ʻo e kalasí ʻa e ngāue ne fakahoko ʻe Sione Papitaisó.

  

  Ko hono papitaiso ʻe Siosefa Sāmita ʻa ʻŌliva Kautelé, tā ‘e Del Parson

Siosefa Sāmita—Hisitōlia 1:66–75

ʻOku fakaʻatā kitautolu ʻe he ngaahi ouaú ke tau lava ʻo maʻu e mālohi ʻo e ʻOtuá.

• Ke ‘oange ki he kau mēmipa ʻo e kalasí ha faingamālie ke nau fefakamoʻoniʻaki fekauʻaki mo e ngaahi tāpuaki ʻoku maʻu mei hono maʻu ʻo e ngaahi ouau ʻo e lakanga fakataulaʻeikí, ʻe lava ke ke fakaafeʻi kinautolu ke toe vakaiʻi ʻa e Siosefa Sāmita—Hisitōlia 1:66–75, kau ai ʻa e fakamatala ki he veesi 71, ʻo kumi ʻa e ngaahi tāpuaki ne maʻu ʻe Siosefa mo ʻŌliva hili ʻena papitaiso pea fakanofo ki he lakanga fakataulaʻeikí. ʻOku ʻomi fēfē ʻe he ngaahi ouaú ha mālohi fakalaumālie? ʻE lava ʻe he kau mēmipa ʻo e kalasí ʻo vahevahe e ngaahi meʻa kuo nau aʻusia ʻi heʻenau ongoʻi e mālohi ʻo e ʻOtuá ʻa ia ʻoku maʻu mei hono maʻu ʻo e ngaahi ouau ʻo e lakanga fakataulaʻeikí ʻo hangē ko e papitaisó, sākalamēnití, pe ngaahi ouau ʻo e temipalé. Mahalo te ke toe fie huluʻi e vitiō “Blessings of the Priesthood” (ChurchofJesusChrist.org) ko e konga ia ʻo e fealēleaʻakí.

• ʻE lava ke ʻaonga ki he kau mēmipa ʻo e kalasí hano faʻu ha saati ʻoku ʻasi ai e ngaahi tāpuaki ʻoku maʻu mei he ngaahi ouau ʻo e lakanga fakataulaʻeikí. Hangē ko ʻení, ʻe lava ke ke hiki ʻi he palakipoé ʻa e ongo ʻuluʻi tohi ko e Ngaahi Ouaú mo e Ngaahi Tāpuakí. ʻE lava ke fekumi e kau mēmipa ʻo e kalasí ʻi he ngaahi potufolofola ʻo hangē ko ia ʻoku hā atú ke fakafonu ʻaki e sātí: Sione 14:26; Ngāue 2:38; Tokāteline mo e Ngaahi Fuakava 84:19–22; 131:1–4; Siosefa Sāmita—Hisitōlia 1:73–74. ʻE lava foki ke nau fakakau ha ngaahi tāpuaki kehe kuo nau maʻu koeʻuhí ko e ngaahi ouau ko ʻení. ʻE lava ke nau vahevahe ha aʻusia ne ʻomi ai ʻe he ngaahi ouau kuo nau maʻú ʻa e mālohi ʻo e Fakamoʻuí ki heʻenau moʻuí.

Ngaahi Maʻuʻanga Tokoni Lahi Ange

Ko e hā ʻa e ngaahi kī ʻo e lakanga fakataulaʻeikí?

Naʻe fai ʻe ʻEletā Teili G. Lenilani mo hono uaifi ko Luté ha fakamatala fekauʻaki mo e ngaahi kī ʻo e lakanga fakataulaʻeikí.

“ʻOku fakaʻaongaʻi ʻa e ngaahi kī ʻo e lakanga fakataulaʻeikí ʻi ha founga kehekehe ʻe ua. ʻOku ʻuhinga ʻa e ʻuluakí ki ha totonu pe faingamālie ʻoku foaki kiate kinautolu kotoa ʻoku nau maʻu ʻa e Lakanga Taulaʻeiki Faka-ʻĒloné pe Faka-Melekisētekí. Hangē ko ʻení, ʻoku maʻu ʻe he kau maʻu Lakanga Taulaʻeiki Faka-ʻĒloné ʻa e ngaahi kī ʻo e tauhi mai ʻa e kau ʻāngeló pea mo e ngaahi kī ʻo e teuteuʻanga ‘o e ongoongolelei ki he fakatomalá mo e papitaiso ʻi he fakauku ki hono fakamolemoleʻi ʻo e ngaahi angahalá (vakai Tokāteline mo e Ngaahi Fuakava 13:1; 84:26–27). ʻOku maʻu ʻe he kau maʻu Lakanga Taukaʻeiki Faka-Melekisētekí ʻa e ngaahi kī ʻo e ngaahi meʻa lilo ʻo e puleʻangá, ʻa e kī ʻo e ʻIlo ʻa e ʻOtuá, mo e ngaahi kī ʻo e ngaahi tāpuaki fakalaumālie kotoa ʻo e Siasí (vakai, Tokāteline mo e Ngaahi Fuakava 84:19; 107:18). …

“ʻOku ʻuhinga ʻa e founga hono ua ʻoku fakaʻaongaʻi ki ai ʻa e ngaahi kī ʻo e lakanga fakataulaʻeikí ki he tuʻunga fakatakimuʻá. ʻOku maʻu ʻe he kau taki Lakanga Fakataulaʻeikí ha toe ngaahi kī kehe, ʻa e totonu ke puleʻi ha vaʻa ʻo ha houalotu ʻo e Siasí pe ha kōlomu. ʻI he ʻuhinga ko ʻení, ko e lakanga fakataulaʻeikí ko e mafai mo e mālohi ia ke fakahinohino, tataki pea mo pule ʻi he Siasí” (The Melchizedek Priesthood: Understanding the Doctrine, Living the Principles [2018], 26).

Ko Hono Fakatupulaki ʻEtau Founga Akoʻí

Toutou fai maʻu pē hoʻo fakamoʻoní. “ʻE lava ke hanga ʻe hoʻo fakamoʻoni faingofua mo fakamātoato ki he moʻoni fakalaumālié, ʻo tākiekina mālohi e niʻihi ʻokú ke akoʻí. … ʻOku ʻikai fie maʻu ia ke mālie pe lōloa”(Ko e Faiako ʻi he Founga ʻa e Fakamoʻuí. 11). Fakakaukau ke vahevahe hoʻo fakamoʻoni fakafoʻituitui ki he Lakanga Taulaʻeiki Faka-ʻĒloné ʻi hoʻo aleaʻi ko ia ʻa e Tokāteline mo e Ngaahi Fuakava13.