Tatau ʻo e tohinima ʻo e tatau moʻoni ʻo e Tohi ʻa Molomona.

1–7 Fēpueli

Tokāteline mo e Ngaahi Fuakava 10–11

“Koeʻuhí Ke Ke Lava ʻo ʻIkuna”

Ko e hā ha ngaahi ongo naʻá ke maʻu ʻi hoʻo lau ʻa e Tokāteline mo e Ngaahi Fuakava 10–11? Ko e hā ha ngaahi fakakaukau naʻá ke maʻu fekauʻaki mo e fie maʻu ʻa e kakai ʻokú ke akoʻí?

Lekooti Hoʻo Ngaahi Ongó

Fakaafeʻi e Feʻinasiʻakí

Ke ʻoange ha faingamālie ki he kau mēmipa ʻo e kalasí ke nau talanoa fekauʻaki mo e meʻa kuo nau ako ʻi heʻenau ako folofola fakataautaha mo fakafāmilí, ʻe lava ke ke hiki ʻi he palakipoé ʻa e Tokāteline mo e Ngaahi Fuakava 10 mo e Tokāteline mo e Ngaahi Fuakava 11. ʻE lava ke hiki ʻe ha kau mēmipa ʻe niʻihi ʻo e kalasí ʻi lalo ʻa e ʻuluʻi tohí pe veesi ne nau maʻu ai ha moʻoni mahuʻinga. Fili ha niʻihi ʻo e ngaahi vēsí pea fakaafeʻi e kau mēmipa ʻo e kalasí ke vahevahe ʻa e ngaahi moʻoni naʻa nau maʻu aí.

Akoʻi ʻa e Tokāteliné

Tokāteline mo e Ngaahi Fuakava 10:1–33

ʻOku feinga ʻa Sētane ke fakaʻauha ʻa e ngāue ʻa e ʻOtuá.

• ʻE lava ke tokoni ʻa e Tokāteline mo e Ngaahi Fuakava 10 ke ʻiloʻi pea fakaʻehiʻehi e kau mēmipa ʻo e kalasí mei he ngaahi feinga ʻa Sētane ke fakaʻauha ʻenau tuí. Ke ʻoange ha fakamatala fakahisitōlia ki he vahe ko ʻení, te ke lava ʻo fakaafeʻi ha mēmipa ʻo e kalasí ke ne vahevahe ʻa e fakamatala ki hono fakamoleki ko ia ʻe Māteni Hālisi ʻa e ʻū peesi ʻe 116 ʻo e Tohi ʻa Molomoná ne ʻosi liliú (vakai ki he fakamatala ʻi he ʻuluʻi vahe ki he Tokāteline mo e Ngaahi Fuakava 3 mo e Kau Māʻoniʻoní, 1:50 – 53). ʻE lava leva ke fekumi ʻa e kau mēmipa ʻo e kalasí ʻi he Tokāteline mo e Ngaahi Fuakava 10:1–33 ke ʻiloʻi ʻa e palani ʻa Sētane ki he ʻū peesi ne molé. Ko e hā ʻoku tau ʻilo mei he ngaahi veesi ko ʻení fekauʻaki mo e ngaahi founga ngāue ʻa Sētané mo e ʻuhinga ʻokú ne fai ai e ngaahi meʻá ni? (vakai foki, veesi 63). ʻOku founga fēfē ʻene fakahoko ʻene ngāué ʻi he founga tatau he ngaahi kuongá ni? ʻOku tokoni fēfē mai ʻa e ʻEikí ke tau ikunaʻi ʻa Sētane ʻi heʻetau moʻuí?

Tokāteline mo e Ngaahi Fuakava 10:34–52

ʻOku “lahi ange ʻa e poto [ʻo e ʻEikí] ʻi he olopoto ʻa e tēvoló.”

• ʻI he taimi ʻoku tau ongoʻi loto-foʻi ai ʻi heʻetau ngaahi angahalá, ʻe lava ke tau maʻu ha ʻamanaki lelei ʻi heʻetau ʻiloʻi e founga totongi ʻa e ʻEikí ki he angahala ne fai ʻe Siosefa Sāmita mo Māteni Hālisi ʻi heʻena talangataʻa ki he ʻEikí mo e mole ʻa e ʻū peesi ʻe 116 ʻo e liliu ko ia ʻo e Tohi ʻa Molomoná. Fakakaukau ki ha founga te ke lava ai ʻo tokoniʻi e kau mēmipa ʻo e kalasí ke maʻu ha ʻamanaki lelei ʻi he fakamatala ko ʻení. Hangē ko ʻení, ʻe lava ke ke fakaafeʻi kinautolu ke vahevahe ha meʻa naʻa nau ako fekauʻaki mo e ʻEikí mei he Tokāteline mo e Ngaahi Fuakava 10:34–52 (vakai foki, Tokāteline mo e Ngaahi Fuakava 3:1–3). ʻE lava ʻe he kau mēmipa ʻo e kalasí ʻo vahevahe ʻa e founga kuo nau vakai ai “ʻoku lahi ange ʻa e poto (ʻo e ʻEikí) ʻi he olopoto ʻa e tēvoló” (Tokāteline mo e Ngaahi Fuakava 10:43). ʻOku fakamālohia fēfē ʻe he ʻilo ko ʻení ʻa ʻetau tui kiate Iá?

  

  Ko hono Fakanounouʻi ʻe Molomona ʻa e ʻŪ Lauʻi Peletí, tā ʻe Tom Lovell

Tokāteline mo e Ngaahi Fuakava 11

Kapau te tau kole ki he ʻOtuá, te tau maʻu ia.

• ʻOku fakaafeʻi kitautolu ʻe he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke tau lau ʻa e Tokāteline mo e Ngaahi Fuakava 11 ʻo hangē kuo tohi ia maʻatautolú. Mahalo naʻa loto fiemālie e kau mēmipa ʻo e kalasí ke vahevahe ha meʻa mei he vahé ne mahuʻinga kiate kinautolu. Ko e hā e founga ʻoku nau palani ke fakaʻaongaʻi e meʻa kuo nau akó?

• Ko e founga ʻe taha ke poupouʻi e fealēleaʻaki kau ki he Tokāteline mo e Ngaahi Fuakava 11 ko hono fakaafeʻi e kau mēmipa ʻo e kalasí ke kumi ha tefitoʻi moʻoni ʻi he vahe ko ʻení pea hiki ha fehuʻi fekauʻaki mo ia. ʻE lava ke kau ha ngaahi fehuʻi hangē ko ʻení “ʻOku ʻuhinga ki he hā ke pikitai kia Kalaisi ʻaki ho lotó kotoa?” (veesi 19) pe “ʻE founga fēfē haʻatau maʻu e folofola ʻa e ʻOtuá?” (veesi 21). ʻE lava ke hiki ʻe he kau mēmipa ʻo e kalasí ʻa ʻenau ngaahi fehuʻí ʻi he konga ki ʻolunga ʻo ha laʻipepa pea paasi takai ʻenau ʻū laʻipepá ʻo tānaki atu ha ngaahi fakakaukau mo ha ngaahi tali ki heʻenau fehuʻi takitaha. (Mahalo ʻe tokoni ke ʻuluaki vahevahe ʻa e kalasí ki ha kulupu iiki.) ʻE lava leva ke vahevahe ʻe he kau mēmipa ʻo e kalasí ha niʻihi ʻo e ngaahi fakakaukau ne tohi ʻe he niʻihi kehé fekauʻaki mo ʻenau fehuʻí.

Tokāteline mo e Ngaahi Fuakava 11:8–26

ʻE ʻomi ʻe he ʻOtuá hono Laumālié ʻi heʻetau teuteuʻi kitautolu ʻi Heʻene foungá.

• ʻE lelei nai ki he kau mēmipa hoʻo kalasí ʻi hano talanoa fekauʻaki mo hono ʻiloʻi ʻo e fakahā fakatāutahá ʻo fakafou ʻi he Laumālié? Kapau ko ia, ʻe lava ke ke kamataʻi ha fealēleaʻaki ʻaki hano fakaafeʻi kinautolu ke nau fakakaukau ne kole ange ke nau hiki ha ngaahi moʻoni fekauʻaki mo e founga hono maʻu e fakahā fakatāutahá. Ko e hā te nau fakakau mei he Tokāteline mo e Ngaahi Fuakava 11:8–26? Hangē ko ʻení, ko e hā te nau tohi fekauʻaki mo e teuteu ko ia ke maʻu ha fakahinohino ki heʻetau moʻuí pea mo ha ngaahi tali ki heʻetau ngaahi fehuʻí? Ko e hā te nau fakamatala fekauʻaki mo e founga hono ʻilo e ngaahi talí ʻi he taimi ʻoku maʻu ai kinautolú? Fakaafeʻi e kau mēmipa ʻo e kalasí ke nau fakakaukauloto ki he founga te nau fakaʻaongaʻi ai e meʻa kuo nau akó ʻi heʻenau fekumi ki ha fakahā fakatāutahá.

  Te ke lava ʻo vahevahe ko ha konga ʻo e ʻekitivitī ko ʻení, ʻa e lea ko ʻeni ʻa Sisitā Suli B. Peki ko ha Palesiteni Lahi mālōlō ʻo e Fineʻofá: “Ko e moʻui taau ke lava ʻo maʻu, mo ngāue ʻi he fakahā fakatāutahá ko e pōtoʻi ngāue mahuʻinga taha ia ʻoku fie maʻu ʻi he moʻui ni” (“Pea Ki he Kaunangá Te u Huaʻi Hifo Hoku Laumālié ʻI he Ngaahi ʻAho Ko Iá, ” Ensign pe Liahona, Mē 2010, 11).

Ko Hono Fakatupulaki ʻEtau Founga Akoʻí

Fakakau ʻa kinautolu ʻoku faingataʻaʻiá. Ko e hā te ke lava ʻo fai ʻi he taimi ʻoku ngali puli ai ha fehokotaki ʻi ha mēmipa ʻo e kalasí mo e toenga ʻo e kalasí? Ko e taimi ʻe niʻihi ʻoku fie maʻu pē ʻe he tokotahá ni ke fakakau ia. Fakakaukau ke kole ki he tokotaha ko ʻení ke kau mai ki ha lēsoni ʻi he kahaʻú. Kapau he ʻikai ke ne tali hoʻo ngaahi feingá, hokohoko atu ke fakahaaʻi e ʻofa mo e tokangá. (Vakai, Ko e Faiako ʻi he Founga ‘a e Fakamo‘uí, 8–9.)