“25–31 Sānuali. Tokāteline mo e Ngaahi Fuakava 6–9: ‘Ko ʻEni ʻa e Laumālie ʻo e Fakahaá,’” Haʻu ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“25–31 Sānuali. Tokāteline mo e Ngaahi Fuakava 6–9,” Haʻu, ‘o Muimui ʻIate Au — Maʻá e Lautohi Faka-Sapaté: 2021
25–31 Sānuali
Tokāteline mo e Ngaahi Fuakava 6–9
“Ko ʻEni ʻa e Laumālie ʻo e Fakahaá”
ʻOku akoʻi ʻi heTokāteline mo e Ngaahi Fuakava 6–9 ha ngaahi tefitoʻi moʻoni mahuʻinga fekauʻaki mo e maʻu fakahaá. Fakaʻaongaʻi ʻa e ngaahi tefitoʻi moʻoni ko ʻení ʻi he fekumi ki ha fakahā ki he founga ki hono tokoniʻi e kau mēmipa ʻo e kalasí ke ako mei he ngaahi vahe ko ʻení.
Lekooti Hoʻo Ngaahi Ongó
Fakaafeʻi e Feʻinasiʻakí
Ke poupouʻi e kau mēmipa ʻo e kalasí ke nau vahevahe ʻenau ngaahi aʻusia ‘i hono ako ʻo e Tokāteline mo e Ngaahi Fuakava 6–9, te ke lava ʻo fakaafeʻi kinautolu ke nau aleaʻi ha ngaahi ongo fakalaumālie naʻa nau maʻu lolotonga ʻenau akó ʻo ka taau ke fai ia. Ko e hā ha ngaahi pōpoaki ʻa e ʻEikí maʻanautolu?
Akoʻi ʻa e Tokāteliné
Tokāteline mo e Ngaahi Fuakava 6; 8–9
ʻOku folofola mai ʻa e Tamai Hēvaní kiate au ʻo fakafou ʻi he “Laumālie ʻo e moʻoní.”
-
ʻOku lahi e ngaahi meʻa ke akoʻi mai ʻe he ʻEikí fekauʻaki mo e fakahā fakatāutahá ʻi he ngaahi vahe ko ʻení, pea mahalo he ʻikai te ke lava ʻo akoʻi kotoa ia ʻi ha kalasi pē ʻe taha. ʻE ala tokoni ke vahevahe ʻa e kalasí ki ha kulupu ‘e tolu, pea kole ki he kulupu takitaha ke nau fekumi ʻi he vahe 6, 8, pe 9, ʻo kumi ha tali ki he ngaahi fehuʻi hangē ko ʻení: ʻOku anga fēfē ʻa e fetuʻutaki mai ʻa e Laumālie Māʻoniʻoní kiate kitautolú? ʻE lava fēfē ke tau ʻiloʻi e fakahā fakatāutahá? Te tau lava fēfē ʻo teuteuʻi kitautolu ke tau maʻu fakahā? ʻE lava leva ʻe ha taha mei he ngaahi kulupú takitaha ʻo vahevahe mo e kalasí ʻa e meʻa naʻe ʻilo ʻe heʻenau kulupú. Te ke ala poupouʻi ʻa e kau mēmipa ‘o e kalasí ke nau vahevahe ʻenau ngaahi aʻusia ʻi hono fakatokangaʻi ‘o e fakahā fakatāutahá. Hangē ko ʻení, ʻoku ʻi ai nai ha meʻa ʻi he Tokāteline mo e Ngaahi Fuakava 6:22–24 ʻokú ne fakamanatu mai kiate kitautolu ʻa e ngaahi meʻa kuo tau aʻusiá?
-
Mahalo ʻe fakalotosiʻi ki ha niʻihi ʻi hoʻo kalasí ke talanoa fekauʻaki mo e fakahā fakatāutahá ʻa ia ne nau lotua ha tataki ka naʻe ʻikai ke nau ongoʻi naʻa nau maʻu ia. ʻE lava ke tokoni kiate kinautolu hono ʻiloʻi naʻe fefaʻuhi ʻa ‘Ōliva Kautele mo e ngaahi ongo tatau ʻi he ʻikai lava ko ia ke faingofua e liliú ʻo hangē ko ia ne fakakaukau ki aí. Mahalo te ke lava ʻo fakaafeʻi e kau mēmipa ʻo e kalasí ke fekumi ki he faleʻi ʻa e ʻEikí kia ʻŌliva ʻi he vahe 9. Ko e hā ha ngaahi pōpoaki ʻi he vahe ko ʻení te ne lava ʻo tokoniʻi ha taha ʻokú ne ongoʻi ʻoku ʻikai tali mai ʻe he ʻEikí ʻenau ngaahi lotú? ʻE ala tokoni foki mo e ngaahi lea ʻi he “Ngaahi Maʻuʻanga Tokoni Kehé”.
ʻĪmisiʻOliva Kautele‘Ōliva Kautele, tā ʻe Lewis A. Ramsey
Tokāteline mo e Ngaahi Fuakava 6–7
“Hangē ko e meʻa ʻokú mo holi ke mo maʻu meiate aú ʻe pehē ʻa hono fai kiate kimouá.”
-
ʻOku fokotuʻu mai ʻe he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakatokangaʻi ʻa e ngaahi taimi ʻoku fakaʻaongaʻi ai e ngaahi foʻi lea hangē ko e holi ʻi he vahe 6–7. Mahalo ʻe lava ʻe he kau mēmipa ʻo e kalasí ʻo vahevahe e meʻa ne nau ako mei he ngāue ko iá, pe ko hoʻomou fakahoko fakataha ʻi he kalasí ʻa e ʻekitivitií. Ko e hā ʻoku akoʻi mai ʻe heʻetau ngāue fakaʻahó fekauʻaki mo ʻetau ngaahi holí? ʻE founga fēfē ha tokoni mai ʻa e ʻEikí ke liliu ʻetau ngaahi holí?
Tokāteline mo e Ngaahi Fuakava 6:29–37
Kapau te tau tafoki ki he ʻEikí, te Ne lava ʻo tokoniʻi kitautolu ke ikunaʻi ʻa e loto veiveiuá mo e ilifiá.
-
Ko e hā ʻoku tau faʻa “manavahē ai … ke fai leleí”? (veesi 33). Mahalo ʻe lava ʻe he kau mēmipa ʻo e kalasí ʻo ʻoatu ha ngaahi ʻuhinga, fakataha mo e ngaahi fakakaukau mei he Tokāteline mo e Ngaahi Fuakava 6:29–37 ‘okú ne ʻoange kiate kinautolu ʻa e loto-toʻa ke fai leleí.
-
Te ke lava ʻo kole ki he kau mēmipa ʻo e kalasí ke nau hiki ʻi ha laʻipepa ha ngaahi meʻa ʻe ala ilifia ki ai e kakaí ke kamata ‘aki ha fealēleaʻaki fekauʻaki mo e founga ʻoku tokoniʻi ai kitautolu ʻe Kalaisi ke “ʻoua ʻe tālaʻa, ʻoua ʻe manavahē” (veesi 36). Naʻe ʻomi ʻe (ʻEletā Lainolo A. Lasipeni ha ngaahi sīpinga ʻi heʻene pōpoaki ki he “ ʻOua ʻe Puputuʻu” [Ensign pe Liahona, Nōvema 2018, 18].) Peá ke lau leʻolahi leva ha niʻihi ʻo e ngaahi laʻipepá pea aleaʻi ʻa e founga ʻoku lava ai ʻe he Fakamoʻuí mo e mālohi ʻo ʻEne fakaleleí ʻo tokoniʻi kitautolu ʻi he taimi ʻoku tau ilifia aí. ʻOku ʻi he Tokāteline mo e Ngaahi Fuakava 6:29–37 ha ngaahi fakakaukau (vakai foki, 1 Sione 4:18). ʻOku ʻuhinga ki he hā ke “sio pē [kia Kalaisi] ‘i he fakakaukau kotoa pē”? (veesi 36). ʻOku tokoniʻi fēfē kitautolu ʻe he tokanga taha ko ʻeni ki he Fakamoʻuí ʻi he taimi ʻoku tau fehangahangai ai mo e loto veiveiuá pe ilifiá?
Ngaahi Maʻuʻanga Tokoni Lahi Ange
Ko e mahino ki he founga ʻoku tali ʻaki ʻe he Tamai Hēvaní ʻa e ngaahi lotú.
“Ne u ako heʻeku moʻuí he ʻikai te u faʻa maʻu ha tali ki ha lotu koeʻuhí ʻoku ʻafioʻi ʻe he ʻEikí ʻoku teʻeki ai ke u mateuteu. ‘I he taimi ʻokú Ne tali mai aí, ʻoku faʻa ‘siʻi ʻi heni pea siʻi ʻi hena’ [2 Nīfai 28: 30] he ko e meʻa pē ia te u lava ke kātakiʻí pea mo ia kotoa ʻoku ou loto ke faí” (Robert D. Hales,”Ko e Tatali Ki he ʻEikí: Ke Fai Pē Ho Finangaló, “ Ensign pe Liahona, Nōvema 2011, 73).
“Ko e hā e meʻa te ke fai kapau naʻá ke ʻosi teuteu fakalelei, ʻosi lotu fakamātoato, tatali ʻi ha taimi feʻunga ki ha tali kae ʻikai pē ke ke ongoʻi ha tali? Mahalo ʻe fie maʻu ke ke fakamālō heʻene hokó, he ko ha fakamoʻoni ia ʻo ʻEne falalá. ʻI he taimi ʻokú ke moʻui taau ai pea fenāpasi hoʻo filí mo e ngaahi akonaki ʻa e Fakamoʻuí pea ʻoku fie maʻu ke ke fai leva hoʻo filí, fai ia ʻaki ʻa e loto-falala. … ʻI he taimi ʻokú ke moʻui angatonu mo ngāue ʻi he loto-falalá, he ʻikai tuku ʻe he ʻOtuá ke ke hoko atu ʻo mamaʻo taʻeʻoatu ha ongo ʻo e fakatokangá ʻo kapau kuó ke fai ʻa e fili halá” (Using the Supernal Gift of Prayer,”,” Ensign pe Liahona, Mē 2007, 10).
Ko Hono Fakatupulaki ʻEtau Founga Akoʻí
Fakahaaʻi e loto-falala ki he ngaahi meʻa ʻoku malava ʻe he tokotaha akó. ʻOku ʻi ai ha kakai ʻe niʻihi ʻi hoʻo kalasí ʻoku ʻikai ke nau maʻu ha loto-falala ki heʻenau malava ko ia ʻo ako e ongoongoleleí. Fakakaukauʻi ʻa e founga te ke lava ai ʻo fakapapauʻi ange kiate kinautolu ʻe akoʻi kinautolu ʻe he Laumālie Māʻoniʻoní ʻi heʻenau feinga ko ia ke ako ʻiate kinautolu peé. (Vakai, Ko e Faiako ‘i he Founga ‘a e Fakamoʻuí, 29.)