kau tangata ʻoku ngāue ʻi he ngoué

Taimi Ututaʻú ʻi Falanisē, fai ʻe James Taylor Harwood

18–24 Sānuali

Tokāteline mo e Ngaahi Fuakava 3–5

“ʻE Kei ʻAlu Atu Pē ʻa ʻEku Ngāué”

ʻE tokoni hono tomuʻa ako ʻa e Tokāteline mo e Ngaahi Fuakava 3–5 pea ke toe vakaiʻi ʻa e ngaahi fokotuʻutuʻu ʻi he lēsoni ko ʻení, ke ke maʻu ha fakahinohino mei he Laumālie Māʻoniʻoní. ʻE tokoni ʻa e fokotuʻutuʻu ko ia ki he uiké ni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino kiate koe ʻa e hisitōlia ʻoku iku ai ki hono ʻomi e ngaahi fakahā ne lekooti ʻi he ngaahi vahe ko ʻení.

Lekooti Hoʻo Ngaahi Ongó

fakaʻilonga feʻinasiʻakí

Fakaafeʻi e Feʻinasiʻakí

ʻOange ki he kau mēmipa ʻo e kalasí ha ngaahi miniti ke toe vakaiʻi ʻa e ngaahi potufolofola naʻa nau lau ʻi ‘apí pea mo kumi ha potufolofola ʻoku nau pehē ʻoku ʻuhingamālié. Fakaafeʻi leva kinautolu ke nau vahevahe ʻa e meʻa ne nau ako mo ha taha kehe ʻi he kalasí.

fakaʻilonga akoʻí

Akoʻi ʻa e Tokāteliné

Tokāteline mo e Ngaahi Fuakava 3:1–15

ʻOku totonu ke tau falala ki he ʻOtuá kae ʻikai manavahē ki he tangatá.

• Hangē pē ko Siosefa Sāmitá, ʻoku tau aʻusia kotoa ha taimi ʻoku tau ongoʻi mafasia ʻi hono feingaʻi kitautolu ʻe he kakai kehé ke tau fai ha meʻa ʻoku tau ʻilo ʻoku halá. Ko e hā ha ngaahi moʻoni ʻoku tau ako mei he Tokāteline mo e Ngaahi Fuakava 3:1–15 ʻe lava ke tokoni ke tau kei tui faivelenga ai pē ki he ʻOtuá ʻi he ngaahi tūkunga peheé?

• Naʻe fie maʻu ke valokiʻi ʻa Siosefa Sāmita ʻi he lahi ange ʻene ilifia ki he tangatá ʻi he ʻOtuá, ka naʻá ne fie maʻu foki ʻa e poupoú. Fakaafeʻi ʻa e kau mēmipa ʻo e kalasí ke nau kumi ʻi he vahe 3 ki he founga ne valokiʻi mo poupouʻi ai ʻe he ʻEikí ʻa Siosefá. Hangē ko ʻení, ʻe lava ke nau hiki ʻi he palakipoé ha ngaahi kupuʻi lea mei he veesi 1–15 ʻa ia ʻoku ʻi ai e valoki ʻa e ʻEikí mo ha ngaahi kupuʻi lea kehe ʻoku ʻi ai ʻEne poupou ke fakatomala pea faivelengá. Ko e hā ʻoku akoʻi mai ʻe he aʻusia ʻa Siosefá ʻo kau ki he founga hono tokoniʻi kitautolu ʻe he Fakamoʻuí ke ikunaʻi ʻetau ngaahi fehalākí?

Tokāteline mo e Ngaahi Fuakava 4

ʻOku kole mai ʻe he ʻEikí ke tau tauhi kiate Ia ʻaki hotau lotó kotoa.

• Ko e ngaahi ʻulungaanga ko ia ʻokú ne fakamatalaʻi ʻa e kau tamaioʻeiki ʻa e ʻEikí ʻi he Tokāteline mo e Ngaahi Fuakava 4:5–6 ko e ngaahi ʻulungaanga foki ia ʻo Sīsū Kalaisí. Ke tokoniʻi e kau mēmipa ʻo e kalasí ke nau ako lahi ange, ʻe lava ke ke fakaafeʻi kinautolu ke fili ha taha ʻo e ngaahi ʻulungāngá pea kumi hono ʻuhingá pe ha toe ngaahi potufolofola kehe ʻoku tokoni ke toe mahino lelei ange ʻa e ʻulungāngá (vakai ki ha sīpinga mei he lea ʻa Sisitā ʻĪleini S. Tolotoni ʻi he “Ngaahi Maʻuʻanga Tokoni Kehé”). ʻE lava ke ke fakaafeʻi ha niʻihi ke vahevahe e meʻa ne nau ʻiló. ʻE lava foki ke nau vahevahe ʻa e ʻuhinga ʻoku fiemaʻu ai e ʻulungaanga ne nau filí ki he ngāue ʻi he puleʻanga ʻo e ʻOtuá. Te tau lava fēfē ʻo fakatupulaki lahi ange e ngaahi ʻulungaanga ko ʻení? (vakai, veesi 7).

• Naʻe fakataumuʻa ʻa e Tokāteline mo e Ngaahi Fuakava 4 kia Siosefa Sāmita ko e Lahí, he naʻá ne fie ʻilo ʻa e founga te ne lava ʻo tokoni ai ki he ngāue ʻa e ʻEikí. ʻE lava tokoni foki e vahe ko ʻení ki ha taha pē ʻo kitautolu ʻoku fie ngāue maʻá e ʻEikí. Ko ha founga ʻeni ke ako ʻaki e vahe ko ʻení: ʻe lava ke ngāue ʻa e kau mēmipa ʻo e kalasí ʻi ha fanga kiʻi kulupu iiki ke hiki ha fakamatala ʻa e ngāue ʻa e kau tamaioʻeki ʻa e ʻOtuá, ʻo fakaʻaongaʻi ʻa e vahe 4 ko ha fakahinohino. ʻOku kehekehe fēfē nai ʻa e ngaahi tuʻunga ko ʻení mei he ngaahi fakamatala ʻo e ngaahi ngāue kehé? Ko e hā ʻoku mahuʻinga ai e ngaahi ʻulungaanga ko ʻení ʻi hono fakahoko e ngāue ʻa e ʻOtuá? ʻE lava ke tokoni e lea ʻa ʻEletā Tēvita A. Petinā ʻi he “Ngaahi Maʻuʻanga Tokoni Kehé” ke mahino ki he kau mēmipa ʻo e kalasí ʻa hono mahuʻinga ko ia ke fakatupulaki e ngaahi ʻulungaanga ko ʻení.

Tokāteline mo e Ngaahi Fuakava 5

ʻOku hoko mai e fakamoʻoni ʻo e moʻoní kiate kinautolu ʻoku loto fakatōkilalo mo tuí.

• Kapau naʻe fakaʻaliʻali e ʻū lauʻi peleti koulá ke mamata ki ai ʻa māmani, te ne fakalotoa nai e tokotaha kotoa ʻoku moʻoni e Tohi ʻa Molomoná? Ko e hā hono ʻuhinga pe ko e hā ʻoku ʻikai pehē aí? (vakai ki he Tokāteline mo e Ngaahi Fuakava 5:7). Mahalo ʻe lava ke fekumi e kau mēmipa ʻo e kalasí ʻi he vahe 5 ki ha ngaahi fakakaukau ʻe ala tokoni ke nau tali ki ha taha ʻokú ne fiemaʻu ha fakamoʻoni ʻoku moʻoni ʻa e Tohi ʻa Molomoná. Ko e hā e meʻa ne akoʻi ʻe he ʻEikí kia Siosefa Sāmita mo Māteni Hālisi ʻe ala tokoni ke tau maʻu ai haʻatau fakamoʻoni ki he moʻoni ʻo e ongoongoleleí?

  Māteni Hālisi

  Māteni Halisi, tā ʻe Lewis A. Ramsey

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Lahi Ange

ʻOku ʻuhinga e angamaʻá ki he mālohi.

Naʻe ʻomi ʻe Sisitā ʻIleini S. Tolotoni ʻa e fakamatala ko ʻeni ʻo e angamaʻá (virtue): “Ko e Angamaʻá ko ha foʻi lea ʻoku ʻikai ke tau faʻa fanongo ki ai ʻi he [sōsaieti ʻo e] ngaahi ʻaho ní, ka ko e haʻu ia mei he foʻi lea faka-Latina ko e virtus ʻoku ʻuhinga ia ki he mālohinga. ʻOku maʻu ʻe he kakai fefine mo tangata angamaʻá ha langilangi mo ha mālohi ʻi honau lotó. ʻOku nau maʻu ha loto falala he ʻoku nau taau ke maʻu pea tataki kinautolu ʻe he Laumālie Māʻoniʻoní” (“A Return to Virtue, ” Ensign pe Liahona, Nōvema 2008, 79).

Ko e Hoko ko ha Faifekaú.

Naʻe pehē ʻe ʻEletā Tēvita A. Petinā: “ʻOku ʻikai fie maʻu ʻe he founga ke hoko ko e faifekaú ke tui ʻe he talavoú ha sote hina mo ha hēkesi [pe ke tui kofu e kau finemuí] he ʻaho kotoa pe muimui ki he ngaahi fakahinohino maʻá e kau faifekaú ki he taimi ke mohe mo ʻā hake aí. … Ka te ke lava ʻo fakatupulaki hoʻo loto holi ke ngāue maʻá e ʻOtuá [vakai, Tokāteline mo e Ngaahi Fuakava 4:3], pea te ke lava ʻo kamata ke fakakaukau ʻo hangē ko e kau faifekaú, ke laukonga mei he meʻa ʻoku laukonga mei ai e kau faifekaú, lotu hangē ko e lotu ʻa e kau faifekaú, pea ongoʻi e meʻa ʻoku ongoʻi ʻe he kau faifekaú. ʻE lava ke ke fakaʻehiʻehi mei he ngaahi ivi tākiekina ʻo e māmaní ʻa ia ʻokú ne fakatupu ʻa e mavahe ʻa e Laumālie Māʻoniʻoní, pea lava ke ke tupulaki ʻi he loto falalá ʻi hoʻo ʻiloʻi pea tali ki he ngaahi ueʻi fakalaumālié” (“Becoming a Missionary,” Ensign pe Liahona, Nōvema. 2005, 45–46).

Ko Hono Fakatupulaki ʻEtau Founga Akoʻí

Fai ha ngaahi fehuʻi ʻokú ne poupouʻi e fealēleaʻaki ʻoku ʻuhingamālié. ʻOku fakaafeʻi ʻe he ngaahi fehuʻi ʻoku lahi e tali ki aí ke tali e kau akó ʻo makatuʻunga ʻi heʻenau ngaahi fakakaukau fakatāutahá, ongó mo e ngaahi aʻusiá. Hangē ko ʻení, ʻe lava ke ke ʻeke, “ʻOkú ke ʻiloʻi fēfē ʻa e taimi ʻoku folofola atu ai ʻa e ʻOtuá kiate koé?” (Vakai, Ko e Faiako ʻi he Founga ʻa e Fakamoʻuí, 33.)