11–17 Sānuali. Tokāteline mo e Ngaahi Fuakava 2; Siosefa Sāmita—Hisitōlia 1:27–65: ‘ʻE Liliu ʻa e Loto ʻo e Fānaú ki Heʻenau Ngaahi Tamaí,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“11–17 Sānualí. Tokāteline mo e Ngaahi Fuakava 2; Siosefa Sāmita—Hisitōlia 1:27–65,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
Naʻá Ne Ui Au ʻAki Hoku Hingoá, tā ʻe Michael Malm
11–17 Sānuali
Tokāteline mo e Ngaahi Fuakava 2; Siosefa Sāmita—Hisitōlia 1:27–65
“ʻE Liliu ʻa e Loto ʻo e Fānaú ki Heʻenau Ngaahi Tamaí”
Kimuʻa peá ke lau e ngaahi fakakaukau ʻi he fokotuʻutuʻu ko ʻení, ako ʻa e Tokāteline mo e Ngaahi Fuakava 2 mo e Siosefa Sāmita—Hisitōlia 1:27–65, pea lekooti hoʻo ngaahi ongo fakalaumālié.
Lekooti Hoʻo Ngaahi Ongó
Fakaafeʻi e Feʻinasiʻakí
Ke poupouʻi e kau mēmipa ʻo e kalasí ke nau vahevahe ha ngaahi fakakaukau mo ha ngaahi meʻa ne nau aʻusia ʻi heʻenau ako e ngaahi potufolofola ko ʻení, ʻe lava ke ke kole ange ke nau vahevahe ha veesi naʻá ne ʻai ke nau fakalaulauloto lahi ange ʻi he meʻa ʻoku nau angamaheni ki aí. Ko e hā e meʻa naʻa nau mahuʻingaʻia ai ‘i he veesi ko ʻení?
Akoʻi ʻa e Tokāteliné
Siosefa Sāmita—Hisitōlia 1:27–65
Naʻe ui ʻe he ʻOtuá ʻa Siosefa Sāmita ke fakahoko ʻEne ngāué.
-
ʻE ʻaonga nai ki hoʻo kalasí ʻa hono toe vakaiʻi ʻa e talanoa ʻi he Siosefa Sāmita—Hisitōlia 1:27–65? Te ke lava ʻo fakaafeʻi ha mēmipa ʻo e kalasí ke ne fakamatala fakanounouʻi ia, pe ko hono vahe tautau toko ua pe fakakulupu iiki e kalasí pea nau fefakamatalaʻiʻaki. Poupouʻi kinautolu ke fakakau ʻa e ngaahi fakaikiiki ki he lahi taha te nau lava manatuʻí. ʻOku fakamālohia fēfē ʻe he talanoá ni ʻetau fakamoʻoni ki he uiuiʻi fakalangi ʻo Siosefa Sāmitá? Ko e hā ha ngaahi lēsoni ʻoku tau ako mei he talanoá ni ʻo fekauʻaki mo e founga hono fakahoko ʻe he ʻOtuá ʻa ʻEne ngāué?
-
Fakakaukau ke fakaʻaliʻali ha ngaahi meʻa pe ngaahi fakatātā ʻoku fekauʻaki mo e ngāue ne uiuiʻi ʻa Siosefa Sāmita ke fakahokó, hangē ko Tohi ʻa Molomoná pe ko ha tā ʻo ha temipale. ʻE lava ke maʻu ʻe he kau mēmipa ʻo e kalasí ʻa e ngaahi veesi ʻi he Siosefa Sāmita—Hisitōlia 1:33–42 ʻoku akoʻi ai fekauʻaki mo e ngaahi tafaʻaki ko ʻeni ʻo e misiona ʻa e Palōfitá. Ko e hā e fekauʻaki ʻa e ngāue ʻa e ʻOtuá maʻa Siosefa Sāmitá mo e ngāue ʻa e ʻOtuá maʻatautolú? Ko e hā ʻoku akoʻi mai kiate kitautolu ʻe heʻetau kau palōfita moʻuí fekauʻaki mo e ngāue ko ʻení?
Tokāteline mo e Ngaahi Fuakava 2
Naʻe haʻu ʻa ʻIlaisiā ke liliu hotau lotó ki heʻetau ngaahi kuí.
-
ʻE ʻaonga nai ki hoʻo kalasí ha fealēleaʻaki pe ko hai ʻa ʻIlaisiā pea mo e mālohi ʻo e faisila naʻá ne fakafoki maí? ʻE lava ke lau ʻe he kau mēmipa ʻo e kalasí fekauʻaki mo ʻIlaisiā ʻi he Fakahinohino Ki he Ngaahi Folofolá pe fakamanatu ha talanoa mei heʻene moʻuí (vakai, 1 Ngaahi Tuʻi 17–18). Ko e hā ʻoku tānaki mai ʻe he fakamatalá ni ki heʻetau mahino ki he Tokāteline mo e Ngaahi Fuakava 2? Mahalo te mou talanoa foki ki he ʻuhinga ko ia ke silaʻi ha meʻa. Mahalo ʻe ala tokoni ha ngaahi meʻa, hangē ko ha kapa meʻakai, milemila faʻoʻanga meʻa ʻoku lava ʻo sipaʻi, pe ko ha sila ʻokú ne fakapapauʻi ha fakamatala fakapepa. ʻE tokoni fēfē ʻa e ngaahi meʻá ni ke mahino kiate kitautolu ʻa e ʻuhinga ko ia ke silaʻi e ngaahi fāmilí? ‘Oku tokoni fēfē ʻa e mālohi ko ʻení ke fakahoko ʻa e taumuʻa ʻo hono fakatupu ʻo e māmaní? (vakai, Tokāteline mo e Ngaahi Fuakava 138:47–48 pea mo e lea ko ia ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé”). Ke tokoni ke ʻilo ʻe he kau mēmipa ʻo e kalasí ʻa e founga ne fakahoko ʻaki e kikite ʻi he Tokāteline mo e Ngaahi Fuakava 2 ʻe lava ke mou aleaʻi ʻa e Tokāteline mo e Ngaahi Fuakava 110:13–16.
-
Mahalo naʻa tokoni e ako ki he “ngaahi talaʻofa naʻe fai ki he ngaahi tamaí” (Tokāteline mo e Ngaahi Fuakava 2:2) ke mahino ange kiate kinautolu ʻokú ke akoʻí ʻa e mālohi ʻo e lakanga fakataulaʻeiki naʻe fekauʻi ʻa ʻIlaisiā ke fakafoki maí. Ko hai ʻa e “ngaahi tamaí”? (vakai, Tokāteline mo e Ngaahi Fuakava 27:9–10). Ko e hā ʻa e ngaahi talaʻofa naʻe fai ʻe he ʻEikí kia ʻĒpalahame, ʻAisake mo Sēkopé? (vakai, Sēnesi 17:1–8; 22:16–18; 26:1–5, 24; 28:11–15; ʻĒpalahame 2:8–11). ʻOku ʻuhinga ki he hā ke “tō” ʻa e ngaahi talaʻofá ni ʻi hotau lotó? ʻE tokoniʻi fēfē kitautolu ʻe heʻetau fai ʻa e meʻá ni ke liliu ai hotau lotó ki heʻetau ngaahi kuí?
Temipale Palemaila Niu ʻIoké
-
Te ke lava ʻo fakaafeʻi ha niʻihi ʻo e kāingalotú ke tataki ha fealēleaʻaki fekauʻaki mo e tefitó ke ueʻi fakalaumālie e kau mēmipa ʻo e kalasí ke liliu honau lotó ki heʻenau ngaahi kuí. Fakakaukau ke fakakau e tokotaha fai faleʻi ʻa e uōtí ki he temipalé mo e hisitōlia fakafāmilí. Te ke lava ʻo kamata ʻaki hono lau e Tokāteline mo e Ngaahi Fuakava 2:2–3 pea fakaafeʻi ʻa e kau taki ʻo e fealēleaʻakí ke vahevahe ha ngaahi aʻusia ne liliu ai honau lotó ki heʻenau ngaahi kuí. Ko e hā kuo hoko ʻi heʻenau moʻuí ʻa ia naʻe tokoni ai ke nau fie ʻilo ki honau hisitōlia fakafāmilí? Ko e hā ha ngaahi fokotuʻu te nau lava ke fai ke tokoniʻi e kau mēmipa kehe ʻo e kalasí ke nau kau atu ki he hisitōlia fakafāmilí mo e ngāue fakatemipalé? ʻE lava foki ke tokoni ki he kau mēmipa ʻo e kalasí ʻa e lea ko ia ʻa Palesiteni Tāleni H. ʻOakesi ʻi he “Ngaahi Maʻuʻanga Tokoni Kehé” mo e ongo vitiō “The Promised Blessings of Family History” mo e “If We Put God First” (ChurchofJesusChrist.org). ʻE lava foki ke ke ʻave ki he kau mēmipa ʻo e kalasí ʻa e FamilySearch.org ke maʻu ai ha ngaahi fakakaukau.
Ngaahi Maʻuʻanga Tokoni Lahi Ange
Ko e taumuʻa ʻo e Fakatupú.
Naʻe akonaki ʻa Palesiteni Lāsolo M. Nalesoni ʻo pehē:
“Ko e moʻui taʻengatá, ʻa ia ʻoku malava tuʻunga ʻi he Fakaleleí, ʻa e taumuʻa fisifisimuʻa taha ʻo e Fakatupú. Ke toe fakalea ʻa e kupuʻi leá ki hono ʻuhinga ʻe tahá, kapau ne ʻikai silaʻi e ngaahi fāmilí ʻi he ngaahi temipale māʻoniʻoní, ʻe fakaʻauha ʻo ʻosiʻosingamālie ʻa e māmaní.
“Ko e ngaahi taumuʻa ʻo e Fakatupú, Hingá mo e Fakaleleí ʻoku nau huʻu-taha kotoa ki he ngaahi ngāue toputapu ʻoku fakahoko ʻi he ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ” (“The Atonement,” Ensign, Nōvema 1996, 35). Vakai foki, Mōsese 1:39.
ʻE lava e taha kotoa ʻo fai ha meʻa.
Naʻe akoʻi ʻe Palesiteni Tāleni H. ʻOakesi ʻo pehē: “ʻOku lahi e ngāue ke fakahoko ʻi he ngāue ko ia ke huhuʻi ʻo e kau pekiá. … ʻOku ʻikai ko ʻetau ngāué ke fakamālohiʻi e kakai kotoa ke fai e meʻa kotoa pē, ka ke poupouʻi ʻa e tokotaha kotoa ke nau fai ha meʻa” (“Family History: ‘In Wisdom and in Order,’” Ensign, June 1989, 6).
Ko Hono Fakatupulaki ʻEtau Founga Akoʻí
Fakakau atu e kau ako ne ʻikai ke nau ako e folofolá ʻi ʻapí. Fakapapauʻi ʻoku ongoʻi fiemālie kotoa e kau mēmipa ʻo e kalasí ke kau atu pea tokoni ki he fealēleaʻakí ʻo aʻu pē kiate kinautolu ne ʻikai ke nau laukonga ʻi ʻapí.