¶ 1 BEA nae behe kia Ehabi e Ilaija koe tagata Tisiba aia nae oe kakai o Kiliati, Oku moui a Jihova koe Otua o Isileli, aia oku ou tuu ni i hono ao, bea e ikai ha hahau be ha uha i he gaahi ta‘u ni, kae i he eku lea aaku.

2 Bea nae hoko mai ae folofola a Jihova kiate ia, o behe,

3 Alu koe i heni, bea ke foki atu ki he feituu hahake, bea fakafufu koe ki he  botu vaitafe o Kiliti aia oku haga atu ki Joatani.

4 Bea e hoko o behe, te ke inu ai mei he vaitafe; bea kuou fekau ki he faga leveni ke fafaga‘i koe i ai.

5 Koia, naa ne alu o ne fai o hage koe folofola a Jihova: he naa ne alu o nofo i he vee vaitafe ko Kiliti, aia oku haga atu ki Joatani.

6 Bea nae omi ae ma moe kanomate kiate ia e he faga leveni i he bogibogi, moe ma moe kanomate i he efiafi; bea naa ne inu mei he vaitafe.

7 Bea i he gataaga oe gaahi aho niihi, nae mamaha ae vaitafe, koeuhi koe ikai to ha uha i he fonua.

¶ 8 Bea nae hoko mai ae folofola a Jihova kiate ia, o behe,

9 Tuu hake, bea ke alu ki Salifati aia oku i Saitoni, bea ke nofo ai: vakai kuou fekau ki ha fefine i ai kuo bekia hono unoho ke ne tauhi koe.

10 Koia naa ne tuu hake ai o alu ki Salifati. Bea i he ene hoko mai ki he mataba oe kolo, vakai, nae i ai ae fefine baea nae fai ene okooko: bea naa ne uiage kiate ia, o ne behe, Oku ou kole kiate koe, ke ke omi ha momoi vai jii i ha ibu keu inu.

11 Bea i he ene alu atu ko hono omi, naa ne ui atu kiate ia, o behe, Oku ou kole kiate koe, omi kiate au ha momoi koga ma i ho nima.

12 Bea nae behe mai eia, Oku moui a Jihova ko ho Otua, ka oku ikai teu ma‘u ha foi ma, ka koe falukuga be taha oe mahoaa i ha buha, moe kihi‘i lolo jii i ha ibu: bea vakai, oku ou okooko ni ae vaa akau e ua, koeuhi keu alu o teuteu ia maaku mo eku tama, koeuhi ke ma kai ia, bea ma toki mate.

13 Bea nae behe e Ilaija kiate ia, Oua naa ke manavahe; alu o fai o hage ko hoo lea: ka ke tomua gaohi mei ai ha kihi‘i foi ma maaku, bea ke toki gaohi maau bea mo hoo tama.

14 He oku behe e Jihova koe Otua o Isileli, E ikai fakaaau ke oji ae mahoaa i he buha, bea e ikai maha ae lolo i he ibu, o a‘u ki he aho e foaki ai e Jihova ae uha ki he fonua.

15 Bea nae alu ia mo ne fai o tatau moe lea a Ilaija: bea koia, mo ia, bea mo hono kaugafale, naa nau kai i he gaahi aho lahi.

16 Bea nae ikai fakaaau ke oji ae mahoaa i he buha, bea nae ikai foki ke maha ae lolo i he ibu, o hage koe folofola a Jihova aia naa ne folofola aki ia Ilaija.

¶ 17 Bea i he ene hiliage ae gaahi mea ni, nae to ae mahaki ki he tama ae fefine, koe tauhi oe fale; bea nae malohi aubito a hono mahaki bea nae ikai kei hoko a ene mānava.

18 Bea nae behe eia kia Ilaija, Akoe, koe tagata oe Otua, koeha au kiate koe? kuo ke ha‘u ke fakamanatu‘i kiate au a eku kovi, bea ke tamate‘i a eku tama?

19 Bea naa ne behe atu kiate ia, Foaki mai ho tama kiate au. Bea naa ne too mai ia mei hono fatafata, o ne ave ia ki he fata i oluga, aia naa ne nofo ai, bea naa ne tuku hifo ia ki hono mohega oona.

20 Bea naa ne tagi kia Jihova, o behe, E Jihova ko hoku Otua, kuo ke omi foki ae kovi ki he fefine baea aia oku ou nofo ki ai, i hoo tamate‘i a ene tama?

21 Bea naa ne fakafoofoohifo ia ki he tamajii o liuga tolu, mo ne tagi kia Jihova, o behe, E Jihova ko hoku Otua, oku ou kole kiate koe tuku ke toe hoko mai ae laumalie oe tamajii ni kiate ia.

22 Bea nae ogo‘i e Jihova ae le‘o o Ilaija; bea nae toe hoko mai ae laumalie oe tamajii kiate ia, bea naa ne toe moui.

23 Bea nae too ae tamajii e Ilaija, bea ne o hifo ia mei he botu i oluga ki fale, bea ne atu ia ki he ene fa‘e: bea nae behe e Ilaija, Vakai, oku moui hoo tama.

24 Bea nae behe e he fefine kia Ilaija, Koeni koe mea ni oku ou ilo ai koe tagata koe oe Otua, bea koe folofola a Jihova aia oku i ho gutu, oku mooni ia.