¶ 1 BEA i he fanogo e he tu‘i fefine o Siba ki he ogoogo o Solomone koe mea i he huafa o Jihova, naa ne ha‘u ke ahiahi aki ia ae gaahi fehui ilogataa.

2 Bea nae ha‘u ia ki Jelusalema moe fuu fonoga toko lahi, moe faga kameli nae fetuku ae gaahi mea namu kakala, moe koula lahi aubito, moe gaahi maka mahuiga: bea i he ene hoko mai kia Solomone, naa ne talanoa moia ki he mea kotoabe nae i hono loto.

3 Bea nae tali e Solomone a ene gaahi fehui kotoabe: nae ikai fufu mei he tu‘i ha mea e taha, ke ne taefakamatala ia kiate ia.

4 Bea hili ae mamata e he tu‘i fefine o Siba ki he boto kotoabe a Solomone, bea moe fale aia naa ne laga,

5 Moe meakai i hono keinagaaga, moe aga oe nofo a ene kau tamaioeiki, moe toutou a ene kau tauhi, mo ho nau kofu, mo kinautolu nae tauhi a ene mea inu, bea moe hala aia naa ne alu hake ai ki he fale o Jihova; nae vaivai ai a hono loto iate ia.

6 Bea nae behe eia ki he tu‘i, Ta koe lea mooni ia aia naaku fanogo ki ai i hoku fonua ooku ki hoo gaahi gaue bea mo hoo boto.

7 Ka nae ikai teu tui ki he talanoa, kae oua keu ha‘u, bea mamata ki ai a hoku mata: bea vakai, nae ikai tala mai a hono vahe ua oe mea: kuo lahi hake a hoo boto bea mo hoo monuia i he ogoogo naaku fanogo ki ai.

8 Oku monuia a hoo kau tagata, oku monuia a hoo kau tamaioeiki ni, oku tutuu mau ai be i ho ao, o  nau fanogo ki hoo boto.

9 Fakafetai kia Jihova ko ho Otua, aia kuo lolofie lelei iate koe, ke fakanofo koe ki he nofoa fakatu‘i i Isileli: koeuhi nae ofa taegata a Jihova ki Isileli, koia kuo ne fakanofo ai koe koe tu‘i, ke fai ae fakamāu moe fai totonu.

10 Bea naa ne foaki ki he tu‘i ae taleneti koula e teau ma uofulu, moe gaahi mea namu kakala fuu lahi aubito, bea moe gaahi maka mahuiga: nae ikai toe omi ha gaahi mea namu kakala ke lahi behe fau o tatau moia nae foaki kia Solomone e he tu‘i fefine o Siba.

11 Bea koe folau o Helami, aia nae fetuku mai ae koula mei Ofeli, nae omi ai foki mei Ofeli ae gaahi akau koe alimuku o lahi aubito, moe gaahi maka mahuiga.

12 Bea nae gaohi aki ae akau koe alimuku e he tu‘i ae gaahi bou ma ae fale o Jihova, bea ma ae fale oe tu‘i, koe gaahi haabe foki moe mea hiva ma ae kau faji hiva; talu mei ai o a‘u ki he aho ni, kuo ikai omi be mamata ki ai, ha gaahi akau alimuku ke hage koia.

¶ 13 Bea nae foaki e Solomone ki he tu‘i fefine o Siba a ene holi kotoabe, ae mea fulibe naa ne kole ki ai, moia kotoabe nae foaki e Solomone ko ene foaki ataatā fakatu‘i. Bea naa ne liliu atu o toe foki ki hono fonua oona, aia mo ene kau tauhi.

¶ 14 Bea koeni ko hono mamafa oe koula nae omi kia Solomone i he ta‘u be taha koe taleneti e onogeau moe onogofulu ma ono oe koula,

15 Ka oku lau kehe aia naa ne ma‘u mai he kau fakatau, bea i he fai fakatau moe kau fakatau mea namu kakala, bea mei he gaahi tu‘i kotoabe o Alebea, bea moe houeiki bule oe fonua.

¶ 16 Bea nae gaohi e Solomone ae ba koula e uageau nae tuki: koe  sikeli e onogeau oe koula nae i he ba be taha.

17 Bea naa ne gaohi ae gaahi ba iki e tolugeau aki ae koula nae tuki; koe mano e tolu oe koula nae i he ba be taha: bea nae tuku ia e he tu‘i ki he fale i he vao akau o Lebanoni.

¶ 18 Nae gaohi foki e he tu‘i ha fuu nofoa fakatu‘i aki ae lei, bea naa ne fonofono ia aki ae koula lelei lahi.

19 Nae i he nofoa fakatu‘i ae lakaaga e ono, bea nae fuobotoboto ae botu ki oluga i mui: bea nae ai ae aiga nima i hono kaokao fakatouoji oe botu hekaaga, bea nae tuu ae laione e ua o ofi ki he aiaga nima.

20 Bea nae tuu i hono botu e taha ae laione e hogofulu ma ua, bea i he botu kehe e taha i he lakaaga e ono; nae ikai gaohi hano tatau i ha buleaga kehe.

¶ 21 Bea nae  gaohi aki ae koula ae gaahi ibu inu ae tu‘i ko Solomone, bea koe gaahi ibu oe fale i he vao akau o Lebanoni, nae oe koula mooniia; nae ikai ha siliva i ai: nae ikai mahuiga ia i he gaahi aho o Solomone.

22 He nae alu ae folau ae tu‘i i tahi koe gaahi vaka Tasisi, fakataha moe folau o Helami: nae ha‘u tuo taha i he ta‘u e tolu ae folau mei Tasisi, ke omi ae koula, moe siliva, moe lei, moe faga geli, bea moe faga bikoka.

23 Koia nae fugani hake ai ae tu‘i ko Solomone i he gaahi tu‘i kotoabe o mamani, i he koloaia moe boto.

¶ 24 Bea nae kumi kia Solomone ae kakai kotoabe o mamani, ke fanogo ki he ene boto, aia nae ai ki hono loto e he Otua.

25 Bea nae omi e he tagata taki taha kotoabe a ene meaofa, koe gaahi mea siliva, moe gaahi mea koula, moe gaahi kofu, moe gaahi mahafutau, moe gaahi mea namu kakala, moe faga hose, moe faga miuli, koe vahega mea i he gaahi ta‘u tukufakaholo.

26 Bea nae tanaki fakataha e Solomone ae gaahi jaliote moe kau heka hose: bea naa ne ma‘u ae jaliote e taha afe moe fageau, moe kau heka hose e taha mano moe ua afe, aia naa ne fakanofo ki he gaahi kolo ma ae gaahi jaliote, bea ki he tu‘i i Jelusalema.

27 Bea nae gaohi ae siliva e he tu‘i ke hage ia koe gaahi maka i Jelusalema, bea ne gaohi ae gaahi sita ke tatau hono lahi oona moe gaahi akau sukamino oku tuu i he telea.

28 Bea nae omi kia Solomone ae faga hose mei Ijibite, aia nae tanaki: bea nae ma‘u aia nae tanaki e he kau fakatau ae tu‘i i he totogi.

29 Bea nae alu atu mo o hake ha jaliote mei Ijibite ko hono totogi koe  koga siliva e onogeau; bea koe totogi ki ha hose e taha koe teau ma nimagofulu: bea nae behe e nau taufetuku foki ia ki he gaahi tu‘i kotoabe oe kakai Heti bea moe gaahi tu‘i o Silia.