Vaoʻakau Tapú, tā ʻe Greg K. Olsen

4–10 Sānualí

Siosefa Sāmita—Hisitōlia 1:1–26

“Naʻá ku Mamata ki ha Pou Maama”

Manatuʻi ko hoʻo teuteu mahuʻinga tahá ko hono ako ʻa e ngaahi folofolá pea moʻuʻiʻaki e ngaahi meʻa ʻokú ke akó. ʻE lava ke tokoni atu e Laumālié ke ke ʻilo ʻa e meʻa ke ke tokanga taha ki ai ʻi he kalasí.

Lekooti Hoʻo Ngaahi Ongó

Fakaafeʻi e Feʻinasiʻakí

Ko e hā ha ngaahi fakakaukau ne maʻu ʻe he kau mēmipa ʻo e kalasí ʻi heʻenau ako ʻa e Siosefa Sāmita—Hisitōlia 1:1–26 he uike ní? Mahalo te ke lava ʻo fakaʻaliʻali ha fakatātā ʻo Siosefa Sāmita pe ko e ʻUluaki Mata Meʻa-Hā-Maí pea fakaafeʻi e kalasí ke hiki ʻi he palakipoé ha ngaahi fakakaukau mei he meʻa ne nau akó, fakataha mo e ngaahi veesi ne nau maʻu mei aí. Te nau lava foki ʻo vahevahe e founga ne tupulaki ai ʻenau fakamoʻoni kia Siosefa Sāmita mo hono misioná ʻi heʻenau ako fekauʻaki mo ia ʻi he uike ní.

Akoʻi ʻa e Tokāteliné

Siosefa Sāmita—Hisitōlia 1:5–18

Kapau te tau kole ʻi he tui, ʻe tali mai ia ʻe he ʻOtuá kiate kitautolu.

• Mahalo ʻe lava ha kau mēmipa ʻo e kalasí ʻo maʻu e ongo tatau ne maʻu ʻe Siosefa ʻi heʻene holi ke fekumi ki he moʻoní ʻi ha māmani ʻoku akoʻi ai ha ngaahi fakakaukau ʻoku fepakipaki. ʻOku faitatau fēfē ʻa e puputuʻu ʻi hotau kuongá mo ia ne fehangahangai mo iá? Ke tokoni ke ʻilo ʻe he kau mēmipa ʻo e kalasí ʻa e founga ʻe lava ke tau maʻu ai e tali ki heʻetau ngaahi fehuʻí, te ke lava ʻo fakaafeʻi kinautolu ke hiki ʻi he palakipoé ha ngaahi founga kehekehe ʻo e fekumi ʻa e kakaí ki he moʻoní. Pea lava leva ke nau toe vakaiʻi ʻa e Siosefa Sāmita—Hisitōlia 1:5–18 mo tānaki ki he lisí ʻa e meʻa ne fai ʻe Siosefa Sāmita ke maʻu e tali ki heʻene ngaahi fehuʻí.

• ʻE lava ke vahevahe ʻe he kau mēmipa ʻo e kalasí ʻa e founga ne nau muimui ai ki he sīpinga ʻa Siosefa Sāmitá ʻi heʻenau fekumi ki he moʻoní mo e founga ne tali mai ʻaki ʻe he ʻOtuá . ʻOku fokotuʻu mai ʻe he lea ko ia ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé” ha ngaahi founga te tau lava ai ʻo fekumi ki he moʻoní mei he ʻOtuá.

  

  ʻOku malava ke tau fetuʻutaki mo e ʻOtuá ʻi he lotu.

Siosefa Sāmita—Hisitōlia 1:15–20

Naʻe mamata ʻa Siosefa Sāmita ki he ʻOtua ko e Tamaí mo Hono ʻAlo ko Sīsū Kalaisí.

• ʻOku fakahā mai ʻe he ʻUluaki Mata Meʻa-Hā-Maí ha ngaahi moʻoni fekauʻaki mo e ʻOtuá ʻa ia ne fepaki mo e meʻa ne tui ki ai e tokolahi ʻi he kuonga ʻo Siosefá. ʻE lava ke lau ʻe he kau mēmipa ʻo e kalasí ʻa e Siosefa Sāmita—Hisitōlia 1:15–20 pea ʻilo ha meʻa ʻoku nau ako fekauʻaki mo e ʻOtuá. Ko e hā ʻoku mahuʻinga ai ke ʻiloʻi e ngaahi moʻoni ko ʻeni fekauʻaki mo e ʻOtuá?

• Kapau ʻe ʻaʻahi mai ʻa Siosefa Sāmita he ʻahó ni ki heʻetau kalasí, ko e hā te tau fehuʻi ange fekauʻaki mo e meʻa naʻá ne aʻusiá? ʻE lava ʻoange ki he kau mēmipa ʻo e kalasí ha ngaahi fakakaukau makehe fekauʻaki mo e ʻUluaki Mata Meʻa-Hā-Mai ʻa Siosefa Sāmitá (vakai foki “Ngaahi Maʻuʻanga Tokoni Kehé”) ʻi he vitiō “Ask of God: Joseph Smith’s First Vision” (ChurchofJesusChrist.org). Mahalo te nau fakalaulauloto ki he founga te nau fakakakato ai ha sētesi hangē ko ʻení: “Koeʻuhi ne hoko ʻa e ʻUluaki Mata Meʻa-Hā-Maí, ʻoku ou ʻiloʻi ʻoku …” Ko e hā ha ngaahi tāpuaki kuo tau maʻu koeʻuhi ko e ʻUluaki Mata Meʻa-Hā-Maí?

• ʻE lava ke lau pe hivaʻi ʻe he kau mēmipa ʻo e kalasí ʻa e “Ko e Fua Lotu ʻa Siosefá” (Ngaahi Himí, fika 14) ke tānaki atu ki he laumālie hoʻomou fealeaʻakí. Ko e hā ʻoku tokoni mai e himí ke mahino pea ongo kiate kitautolu fekauʻaki mo e ʻUluaki Mata Meʻa-Hā-Maí? Mahalo ʻe lava ʻe ha niʻihi ʻo e kau mēmipa e kalasí ʻo vahevahe e founga kuo nau ʻilo ʻiate kinautolu pē ne mamata tonu ʻa Siosefa ki he ʻOtua ko e Tamaí pea mo Sīsū Kalaisi ʻi he Vaoʻakau Tapú. Pe te ke lava ʻo fakaafeʻi ʻa e kau faifekau taimi kakató (pe ha taha toki ʻosi ngāue fakafaifekau) ke nau ʻaʻahi mai ki he kalasí pea talanoa ki he founga kuo tākiekina ai ʻe he ʻUluaki Mata Meʻa-Hā-Maí ʻa e moʻui ʻa e kakai ʻoku nau akoʻí.

Siosefa Sāmita—Hisitōlia 1:21–26

ʻE lava ke tau tuʻu maʻu ʻi he meʻa ʻoku tau ʻiló, neongo ʻe fakafisingaʻi kitautolu ʻe ha niʻihi.

• ʻE lava ʻe he kau mēmipa ʻo e kalasí ʻo ʻiloʻi ʻa e niʻihi ʻo e ngaahi meʻa ne aʻusia ʻe Siosefa Sāmita ʻi he kamata ko ia ke ne fakamatala ki he kakai kehé fekauʻaki mo ʻene mata meʻa-hā-maí (vakai, Siosefa Sāmita—Hisitōlia 1:21–26). Mahalo te nau lava ʻo vahevahe ha ngaahi potufolofola ʻokú ne ueʻi fakalaumālie kinautolu ʻi he taimi ʻoku fakafepakiʻi ai e ngaahi meʻa ʻoku nau tui ki aí.

• Kapau ʻokú ke ʻilo ha kāingalotu ʻo e uōtí kuo nau aʻusia ha fakafepaki koeʻuhí ko ʻenau kau ki he Siasí, fakakaukau ke kole ange ke nau teuteu ke haʻu ki he kalasí ʻo vahevahe e founga ʻenau tuʻu maʻu ʻi he tui mālohí. Ko e hā ʻoku tau ako mei he sīpinga ʻa Siosefa Sāmita ‘i he Siosefa Sāmita—Hisitōlia 1:21–26?

Ngaahi Maʻuʻanga Tokoni Lahi Ange

Muimui he Sīpinga ʻa Siosefá.

Naʻe akonaki ʻa Palesiteni Lāsolo M. Nalesoni ʻo pehē:

“Naʻe fokotuʻu ʻe he Palōfita ko Siosefa Sāmitá ha sīpinga maʻatautolu ke muimui ki ai ʻi hono tali ko ia ʻetau ngaahi fehuʻí. ʻI hono tataki ia ki he talaʻofa ʻa Sēmisi kapau te tau masiva ʻi he potó te tau lava ʻo kole ki he ʻOtuá [vakai, Sēmisi 1:5] naʻe ʻoatu fakahangatonu ʻe he kiʻi talavou ko Siosefá ʻa ʻene fehuʻí ki he Tamai Hēvaní. Naʻá ne fekumi ki ha fakahā fakataautaha, pea naʻe kamataʻi ʻe heʻene fekumí ʻa e kuonga fakakosipeli ko ʻení.

“Ko e hā ʻe ʻomi ʻe hoʻo fekumí maʻau ʻi he founga tatau? Ko e hā e poto ʻokú ke masiva aí? Ko e hā ʻokú ke ongoʻi ko ha meʻa mahuʻinga ʻoku fie maʻu ke ke ʻilo pe mahino kiate koé? Muimui ki he tā sīpinga ʻa e Palōfita ko Siosefa Sāmitá. Kumi ha feituʻu longonoa te ke lava ʻo toutou ʻalu ki ai. Fakavaivaiʻi koe ʻi he ʻao ʻo e ʻOtuá. Fakahā hake ho lotó ki hoʻo Tamai Hēvaní. Tafoki kiate Ia ke maʻu ha ngaahi tali mo ha fakafiemālie” (“Fakahā maʻá e Siasí, Fakahā ki Heʻetau Moʻuí, ” Ensign pe Liahona, Mē 2018, 95).

ʻUluaki Mata Meʻa-Hā-Mai ʻa Siosefa Sāmitá.

Ke lau ha fakamatala ʻo e ʻUluaki Mata Meʻa-Hā-Maí ʻa ia ʻoku maʻu ai e ngaahi fakamatala ʻa Siosefa Sāmitá, vakai ki he Kau Māʻoniʻoní, 1:14–16.

Ko Hono Fakatupulaki ʻEtau Founga Akoʻí

Fekumi ki ha ueʻi fakalaumālie pē ʻaʻau. ʻOua te ke vakai ki he ngaahi lēsoni ko ʻení, ko ha ngaahi fakahinohino kuo pau ke ke muimui ki ai ʻi hoʻo akoʻí. Kae fakaʻaongaʻi kinautolu ke fakatupu ha ngaahi fakakaukau pea fakatupulaki e ueʻi fakalaumālié ʻi hoʻo fakakaukauloto ki he tokāteline ʻi he folofolá mo e ngaahi fie maʻu ʻa e kakai ʻokú ke akoʻí.