Ol Sent Oli Muv I Go long Ketlan, i kam long Sam Lawlor

12–18 Epril

Doktrin mo Ol Kavenan 37–40

“Sapos Yufala I No Stap Wan, Yufala I No blong Mi”

Bifo yu plan long wanem bae yu mekem insaed long klas, prea mo stadi long Doktrin mo Ol Kavenan 37–40. Bae yu save kasem help long saed blong spirit moa taem we yu stap rere blong tij, sapos, faswan, yu yu gat wan eksperiens we i gat mining wetem olgeta skripja ia.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Tingting blong raetem antap long bod:, Taem mi bin stap ridim Doktrin mo Ol Kavenan 37–40, mi bin filim se Lod i bin stap talem hemia long mi: . Ol memba blong klas oli save serem olsem wanem bae olgeta oli komplitim sentens ia. Leftemap tingting blong olgeta blong serem ol ves aot long riding blong olgeta, hemia olsem pat blong ansa blong olgeta.

Stap Tijim Doktrin

Doktrin mo Ol Kavenan 37–38

God i karem yumi kam tugeta blong blesem yumi.

• Samtaem, hem i moa isi blong lanem samting aot long ol revelesen insaed long Doktrin mo Ol Kavenan taem yumi putum yumi long ples blong ol pipol ia we ol revelesen ia oli stap go long olgeta. Blong helpem ol memba blong klas blong mekem hemia wetem ol seksen 37–38, yu save invaetem olgeta blong tingting long maen blong olgeta se oli stap laef long Feyet, Niu Yok, long yia 1831. Wan memba blong klas i save priten se hem i Josef Smit mo hem i ridim seksen 37 i go long olgeta. ?Wanem nao filing blong yumi long komanmen ia? Maet ol memba blong klas oli save tingting long maen blong olgeta se oli gat wan fren we i no wantem go tugeta long Ohaeo; oli save lukluk insaed long seksen 38 blong faenem ol prinsipol we i save leftemap tingting blong fren blong olgeta blong stap fetful long oda ia blong kam tugeta long wan ples. (Sapos i nid, yu save daerektem olgeta i go stret long ol ves 1–4, 11–12, 17–22, mo 27–33.) Maet bae ol memba blong klas oli glad blong serem olsem wanem nao ol semmak prinsipol oli bin helpem olgeta taem we oli bin nidim blong obei long wan komanmen se oli luk se i had.

• Ol Lata-dei Sent oli nomo gat oda blong kam tugeta long fasin blong muvaot long wan ples i go long nara ples, be yumi kam tugeta insaed long ol famli, ol wod, mo ol stek. Blong toktok raon long wei we kam tugeta ia i stap blesem yumi tedei, yu save serem klas long tu (2) grup. Askem wan grup blong luklukgud insaed long Doktrin mo Ol Kavenan 38:31–33 mo lukaotem ol blesing we i kam taem oli kam tugeta olsem ol famli, mo askem nara grup blong lukaotem insaed long sem skripja, ol blesing we oli kam taem ol wod mo ol stek oli stap kam tugeta. Afta, oli save serem ol tingting blong olgeta wetem klas. ?Olsem wanem nao yumi gat blesing taem yumi kam tugeta olsem wan Sandei Skul klas?

Doktrin mo Ol Kavenan 38:24–27

Ol pipol blong God oli mas stap wan.

• Ol Sent we oli kam tugeta long Ohaeo oli kamaot long ol defren situesen blong laef, be Lod i bin givim komanmen long olgeta blong oli mas winim ol samting we oli tingting defren long ol, mo oli mas “stap wan” (ves 27). ?From wanem, samtaem, yumi no save luk ol nara pipol olsem ol pipol we oli ikwol long yumi? Leftemap tingting blong ol memba blong klas blong oli tingting hevi long wei we oli stap tritim ol narawan taem oli stap ridim Doktrin mo Ol Kavenan 38:24–27. ? I minim wanem blong tekem ol brata mo sista blong yumi semmak olsem yumi lukluk long yumiwan bakegen? ?From wanem hem i no posibol blong rili stap olsem ol pipol blong God sapos yumi no yunaet?

• Sapos yufala i ridim Doktrin mo Ol Kavenan 38:24–27, i save lidim yufala blong toktok raon abaot yuniti long ol rilesensip blong yumi—olsem ol memba blong wod, olsem ol famli mo ol narawan moa. Ol vidio ia : “A Friend to All” o “Love in Our Hearts” long ChurchofJesusChrist.org oli save help. Eksampol: maet ol memba blong klas oli save ol toktok o ol tingting blong olgeta we i kamaot long vidio, we i helpem olgeta blong andastanem gud moa olgeta prinsipol insaed long ol ves 24–27. Oli save tingting hevi tu, mo serem, ol tingting abaot wan kwestin olsem: “?Wanem nao mi save mekem blong helpem wod blong yumi i filim se oli stap wan, o oli wok wan moa?”

Doktrin mo Ol Kavenan 38:39; 39–40

Papa i wantem blong givim long yumi ol rij samting we oli blong taem we i no save finis.

• Sapos yu mekem wan jat bae i save helpem ol memba blong klas blong toktok raon long Doktrin mo Ol Kavenan 38:39. Long wan kolom, ol memba blong klas oli save raetem lis blong “ol rij samting blong wol ia,” o ol samting we oli tekem se oli gat praes o valiu long wol ia, be oli no save stap long nekis laef. Long nara kolom, oli save raetem lis blong “ol rij samting blong taem we i no save finis,” o ol samting we God i tekem se i hae, mo oli save stap blong oltaem. ?Wanem eksperiens nao i bin tijim yumi se ol rij samting blong taem we i no save finis oli moa impoten bitim ol rij samting blong wol ia?

• James Covel, olsem plante long yumi, i bin gat ol stret mo gud samting we hem i bin wantem. Be, hem i no bin stap folem daereksen blong God, mo hemia i stap olsem wan impoten woning long evriwan long yumi. Blong helpem ol memba blong klas blong lan aot long eksperiens blong Covel, yu save invaetem sam long ol memba blong klas blong luklukgud insaed long seksen 39 blong faenem ol samting we Lod i bin askem Covel blong mekem. Ol narawan oli save lukaotem olgeta blesing we Lod i promesem Covel sapos hem i bin stap obei. Oli save lukluk insaed long seksen 40 blong faenem from wanem James Covel i no bin kasem olgeta blesing ia. ?Olsem wanem eksperiens blong hem i blong yumi tu tedei? ?Wanem “fasin blong kea long ol samting blong wol” nao samtaem i holemtaet yumi blong kasem toktok blong God “wetem gladhat”? (Doktrin mo Ol Kavenan 40:2).

Stap Kam Antap long Fasin blong Yumi blong Stap Tij

No traem blong tijim evri samting. “I gat fulap samting blong toktok raon long hem long wanwan lesen, be i no nid blong kavremap evri samting long wan klas ia nomo blong save tajem hat blong wan—plante taem, wan o tu ki poen nomo oli naf” (Teaching in the Savior’s Way, 7). Tabu Spirit, ol tingting blong ol memba blong klas, mo ol aedia insaed long aotlaen ia, oli save helpem yu blong save weaples nao blong toktok raon fulap long hem.