19–25 Epril

Doktrin mo Ol Kavenan 41–44

“Loa blong Mi blong Lidim Jos blong Mi”

Bae yufala i no save toktok raon, olsem wan klas, long evri prinsipol ia we oli stap tijim olgeta insaed long Doktrin mo Ol Kavenan 41–44. Lukaotem insperesen taem yu stap help blong jusum olgeta prinsipol we bae oli go stret wetem klas blong yu.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Taem we oli bin pablisim olgeta revelesen insaed long seksen 42, Josef Smit i bin raetem se Ol Sent oli akseptem olgeta wetem glad (“Letter to Martin Harris,” Feb. 22, 1831, josephsmithpapers.org). Leftemap tingting blong ol memba blong klas blong serem eni samting aot long stadi blong olgetawan, o wetem famli, long wik ia, we oli bin akseptem wetem glad.

Stap Tijim Doktrin

Doktrin mo Ol Kavenan 41–42

Ol loa blong God oli rulum Jos blong Hem, mo oli rulum tu ol laef blong yumi.

• Insaed long Doktrin mo Ol Kavenan 41, Lod i bin helpem Ol Sent blong oli rere blong akseptem loa blong Hem, we bae Hem i talemaot jes sam dei afta (luk long seksen 42). ?Olsem wanem nao revelesen we i stap long seksen 41 i bin helpem Ol Sent blong akseptem loa blong God? Blong helpem ol memba blong klas blong ansarem kwestin ia, yu save invaetem olgeta blong ridim Doktrin mo Ol Kavenan 41:1–6 blong faenem ol prinsipol we oli save helpem yumi blong akseptem loa blong God. ?Olsem wanem nao yumi save yusum olgeta prinsipol ia taem yumi gat ol janis blong kasem instraksen we i kam long Lod?

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong serem klas long faef grup, mo serem ol ves insaed long seksen 42 long faef, mo wanwan grup bae i presentem wan impoten prinsipol blong gospel. Ol smol grup ia bae oli mekem i isi moa blong yufala i toktok raon long seksen ia olsem wan klas. Eksampol: yu save raetem ol refrens long bod mo invaetem wanwan memba blong klas blong jusum wan grup. Askem ol memba blong klas blong oli ridim ol ves ia, mo faenem wan samting we oli filim se i impoten blong yumi, long taem blong yumi tedei. Afta, oli save serem ol eksampol ia aot long laef blong olgeta we i soem olsem wanem yumi gat blesing taem yumi stap lidim ol laef blong yumi folem olgeta loa ia.

Doktrin mo Ol Kavenan 41:9–11

Lod i askem ol wokman blong Hem blong mekem sakrifaes.

• Edwod Patrij, fas bisop blong Jos ia we i kambak, i bin kasem oda blong lego wok blong hem mo “spendem ful taem blong hem” blong givim seves long koling blong hem. I nomata we, Lod i no stap askem hemia long yumi, ?wanem nao yumi faenem insaed long ol ves ia we yumi save yusum insaed long seves blong yumi long God? (Blong save moa abaot Edwod Patrij, luk long “A Bishop unto the Church,” Revelations in Context, 77–83.)

Doktrin mo Ol Kavenan 42:61, 65–68; 43:1–7

Revelesen i stap tekem pis, glad, mo laef we i no save finis i kam.

• Semmak olsem ol fas lida blong Jos, ol memba blong klas blong yu oli save gat ol kwestin we oli luk olsem ol “sikret” from se i nid blong mas gat Lod blong i lidim yumi long olgeta samting ia. Yu save leftemap tingting blong olgeta blong oli raetemdaon wan kwestin we oli gat o wan problem we oli gat, we oli nidim blong kasem revelesen blong olgetawan long hem. ?Wanem yumi faenem insaed long Doktrin mo Ol Kavenan 42:61, 65–68 we i save helpem yumi taem yumi stap lukaotem blong kasem revelesen?

• Blong helpem ol memba blong andastanem olsem wanem God i givim revelesen blong lidim Jos blong Hem, yu save invaetem olgeta blong ridim Doktrin mo Ol Kavenan 43:1–7. Mo tu, oli save wajem vidio ia, “Prophets and Revelation—Hearing His Voice” (ChurchofJesusChrist.org).

Doktrin mo Ol Kavenan 43:8–10

Yumi mit tugeta blong “tijim mo mekem wanwan long [yumi] i kam antap.”

• ?Hao nao bae yumi yusum Doktrin mo Ol Kavenan 43:8–10 blong tijim wan we i filim se i no nid blong kam long ol miting blong Jos? Lis ia we i stap long “Sam Moa Risos” i save help blong mekem toktok insaed long klas i lukluk nomo long ol tabu stamba tingting blong gat ol kworom blong prishud mo Rilif Sosaeti (lis ia i go tu wetem ol klas blong Ol Yang Woman). Ol memba blong klas oli save serem olsem wanem nao taem we oli tekpat insaed long ol kworom, Rilif Sosaeti, mo klas blong Jos, i bin blesem olgeta. ?Wanem nao ol ves 8–10 oli stap traem blong talem abaot wanem yumi sapos blong mekem blong rere mo tekpat long ol miting blong yumi?

  

  Blong mit long Jos i wan wei we yumi stap “tijim mo mekem wanwan long yumi i kam antap.”

Sam Moa Risos

From wanem nao oli oganaesem yumi long ol kworom mo ol Rilif Sosaeti.

Sista Julie B. Beck, foma Rilif Sosaeti Jeneral Presiden, i bin eksplenem from wanem God i bin oganaesem yumi long ol kworom blong prishud mo long ol Rilif Sosaeti.

1. “Blong oganaesem yumi anda long prishud mo folem paten blong prishud.”

2. “Blong mekem ol boe mo ol gel blong Papa long Heven oli lukluk nomo long wok blong fasin blong sevem man, mo blong oli wok strong long hem. Ol kworom mo ol Rilif Sosaeti, oli ol disaepol we oli oganaes, we oli gat responsabiliti ia blong help long wok ia blong Papa blong yumi blong mekem ol pikinini blong Hem oli kasem laef we i no save finis.”

3. “Blong helpem ol bisop blong oli lukaotem stoahaos blong Lod wetem waes. Insaed long stoahaos blong Lod i gat ‘taem, ol talen, lav mo sore, ol tul, mo ol rod blong faenens’ blong ol memba blong Jos [Hanbuk 2: Lukaotem mo Lidim Jos, 6.1.3, ChurchofJesusChrist.org]. Ol talen blong Ol Sent, oli mas yusum blong help blong kea long olgeta we oli pua mo olgeta we oli stap long nid, mo blong bildimap kingdom blong Lod.

4. “Blong givim wan ples blong difendem mo wan sef ples long ol pikinini blong Papa long Heven mo ol famli blong olgeta long ol lata-dei ia.”

5. ““Blong mekem yumi kam strong moa, mo blong sapotem yumi long ol famli rol blong yumi mo long ol responsabiliti blong yumi olsem ol boe mo ol gel blong God.” (“Why We Are Organized into Quorums and Relief Societies” [Brigham Young University devotional, Jan. 17, 2012], speeches.byu.edu.)

Stap Kam Antap long Fasin blong Yumi blong Stap Tij

Invaetem. “Plante taem yumi stap invaetem pipol blong mekem wan spesifik samting; be naoia, tingting blong invaetem olgeta we oli stap lan, blong oli tingting long wei blong olgetawan blong yusum wanem we oli bin lanem” (Teaching in the Savior’s Way, 35).