Kraes we oli katem pikja blong hem long ston

29 Maj–4 Epril

Ista

“Mi Mi Hem Ia we I Stap Laef, Mi Mi Hem we Oli Bin Kilim Hem I Ded”

I no gat wan samting we i moa impoten blong yumi andastanem bitim Atonmen blong Jisas Kraes. Tingting long ol pipol we bae oli kam long klas blong yu; ?wanem bae i helpem olgeta blong gat moa fet long Jisas Kraes?

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Taem ol memba blong klas blong yu oli bin stadi long Doktrin mo Ol Kavenan long yia ia, maet bae oli faenem sam skripja abaot Sevya we i gat mining long olgeta. Statem klas taem yu givim olgeta ol janis blong serem ol skripja ia. ?Olsem wanem stadi blong yumi long Doktrin mo Ol Kavenan i bin mekem fet blong yumi long Jisas Kraes i kam dip moa?

tijing pikja bokis

Stap Tijim Doktrin

Jisas Kraes i bin mekem wan “atonmen we i stret evriwan.”

• From Atonmen blong Jisas Kraes i wan stamba doktrin we i impoten tumas, tingting blong spendem inaf taem blong meksua se ol memba blong klas oli andastanem hemia. Blong mekem hemia, yu save raetem antap long bod, ol kwestin olsem: ?Wanem nao i Atonmen blong Jisas Kraes? ?Olsem wanem hem i jenisim evri dei laef blong mi? ?Olsem wanem i tajem laef blong mi we i no save finis? ?Olsem wanem mi stap kasem paoa ia blong Kraes we i pem praes insaed long laef blong mi? Givim sam minit long ol memba blong klas blong oli tingting hevi long olgeta kwestin ia mo blong oli lukaotem ol skripja we bae i helpem olgeta blong ansarem olgeta kwestin ia. Maet ol memba blong klas oli save raetem ol skripja refrens long bod, mo yufala i save toktok raon long sam long olgeta refrens ia, olsem wan klas. Hemia samfala eksampol: Luk 22:39–44; 1 Jon 1:7; 2 Nifae 2:6–9; Mosaea 3:5–13, 17–18; Alma 7:11–14; Moronae 10:32–33; Doktrin mo Ol Kavenan 19:16–19; 45:3–5.

• Maet bae i gat mining long ol memba blong klas blong oli wajem vidio ia: “The Savior Suffers in Gethsemane” (ChurchofJesusChrist.org) bifo oli ridim ol stret toktok blong Sevya abaot safaring blong Hem, we oli stap long Doktrin mo Ol Kavenan 19:16–19. ?Olsem wanem nao ol ves ia oli mekem yumi gat moa dip tangkyu long hat from sakrifaes blong Jisas Kraes? Ol nara vidio blong Ista we yu save serem, oli stap long lis long “Sam Moa Risos.”

  Jisas I Stap Prea

  Masta blong Prea, i kam long Yongsung Kim

Doktrin mo Ol Kavenan 76:11–14, 20–24; 110:1–10

Profet Josef Smit i testifae se Jisas Kraes i stap laef.

• Josef Smit i bin luk Sevya we i bin girap long ded, mo i talem wan witnes we i gat paoa, se Jisas Kraes i stap laef. Blong helpem ol memba blong klas blong stadi long testemoni blong Josef Smit, yu save serem olgeta long tu (2) grup, mo givim wok long wanwan grup blong ridim wan long tufala skripja ia: Doktrin mo Ol Kavenan 76:11–14, 20–24 o 110:1–10. Invaetem wanwan memba blong klas blong faenem wan toktok long ol ves ia we i tokbaot Sevya. Ol memba blong klas, wan afta wan, i save kam long bod blong raetem ol toktok we oli bin faenem, mo yufala i save yusum olgeta toktok ia blong gat wan toktok insaed long klas abaot ol fasin mo paoa blong Sevya. ?Olsem wanem nao testemoni blong Josef Smit i mekem fet blong yumi long hae fasin mo misin blong Jisas Kraes i kam strong moa?

• Sam long ol memba blong klas, maet oli joenem ol tijing insaed long Doktrin mo Ol Kavenan wetem ol toktok mo ol prinsipol insaed long hym ia: “Mi Save Ridima Hem I Laef” (STSP, pej 38; luk long aotlaen blong wik ia insaed long Kam Folem Mi—Blong Wanwan Man, Woman mo Famli). Maet samfala memba blong klas bae oli glad blong serem wanem we oli bin faenem. Yufala i save ridim, o singsing hym ia olsem wan klas, o lukaotem hao nao hem i joen wetem olgeta skripja ia: Doktrin mo Ol Kavenan 6:34; 45:3–5; 84:77; 98:18; 138:23. ?Long wanem wei nao yumi kam blong save se Ridima blong yumi i stap laef?

Doktrin mo Ol Kavenan 29:26–27; 42:45–46; 63:49; 88:14–17, 27–31; 93:33–34

From Jisas Kraes, bambae yumi laef bakegen long ded.

• Blong helpem ol memba blong klas blong toktok raon long wanem we Doktrin mo Ol Kavenan i stap tijim abaot laef bakegen long ded, yu save invaetem olgeta blong traem tingting long maen blong olgeta se wan fren o memba blong famli i askem se i minim wanem blong stap laef bakegen long ded. ?Olsem wanem nao yumi save helpem man o woman ia blong hem i andastanem wanem nao hem i laef bakegen long ded? Leftemap tingting blong ol memba blong klas blong luklukgud insaed long Doktrin mo Ol Kavenan 88:14–17, 27–31 mo faenem wan samting we i save help. Sam nara skripja refrens we oli save help, oli stap long Alma 11:40–45 mo Alma 40:21–23. ?Wanem nao bae yumi serem blong helpem fren mo famli memba blong yumi blong filim glad mo hop we i kam long doktrin ia blong laef bakegen long ded?

• ?Olsem wanem nao yu save helpem ol memba blong klas blong oli luklukgud mo longtaem long presen ia blong Sevya, we hem i laef bakegen long ded? Maet yu save raetem long bod From Jisas Kraes … mo invaetem ol memba blong klas blong luk insaed long ol ves ia blong faenem ol toktok we bae i komplitim sentens ia: Doktrin mo Ol Kavenan 29:26–27; 42:45–46; 63:49; 93:33–34. ?Olsem wanem ol trutok we oli stap insaed long ol ves ia oli jenisim wei we yumi stap lukluk long ded? ?Olsem wanem ol trutok ia oli mekem jenis insaed long evri dei laef blong yumi?

sam moa risos pikja bokis

Sam Moa Risos

Ol vidio blong Ista long ChurchofJesusChrist.org.

Stap Kam Antap long Fasin blong Yumi blong Stap Tij

Helpem ol memba blong klas blong oli luklukgud insaed long ol skripja. “Askem ol kwestin we i mekem se, olgeta ia we oli stap lan, oli go faenem ol ansa insaed long ol skripja. … Helpem olgeta blong luk se, iven we oli bin raetem olgeta skripja ia plante yia i pas finis, oli holem ol ansa blong Lod long ol kwestin mo ol problem we yumi evriwan i stap fesem (luk long Teaching in the Savior’s Way, 30).