“5 Epril–11 Epril. Doktrin mo Ol Kavenan 30–36: ‘Mi Singaotem Yu blong Prijim Gospel blong Mi,’” Kam Folem Mi—Blong Sandei Skul: Doktrin mo Ol Kavenan 2021 (2020)
“5 Epril–11 Epril. Doktrin mo Ol Kavenan 30–36,” Kam Folem Mi—Blong Sandei Skul: 2021
5 Epril–11 Epril
Doktrin mo Ol Kavenan 30–36
“Mi Singaotem Yu blong Prijim Gospel blong Mi”
Taem yu stap rid long Doktrin mo Ol Kavenan 30–36, ?wanem mesej nao yu filim se i stret blong olgeta we yu stap tijim olgeta? ?Wanem nao bae i givim insperesen long olgeta blong serem gospel wetem ol narafala man?
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Maet ol memba blong klas oli save serem wan samting we oli bin ridim insaed long Doktrin mo Ol Kavenan 30–36 we i givim insperesen long olgeta blong oli serem gospel.
Stap Tijim Doktrin
Oli singaotem yumi blong prijim gospel blong Jisas Kraes.
-
Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong luklukgud insaed long Doktrin mo Ol Kavenan 30–36 blong faenem wanem we Lod i stap askem long ol misinari blong Hem, mo wanem Hem i stap promesem olgeta. Ol memba blong klas oli save serem wanem oli faenem. (Eksampol, luk long Doktrin mo Ol Kavenan 30:8; 31:3–5; 32:1, 5; 35:24.) Maet yu save invaetem olgeta blong raetem wan leta i go long wan we i stap long misin, o wan we i stap rere blong go long wan misin, mo blong hem i yusum sam long ol instraksen mo promes blong Lod.
-
?Yu yu stap tijim ol yut we oli stap rere blong givim seves olsem ol misinari? Sapos yes, yu save invaetem wanwan memba blong klas blong luklukgud insaed long wan pat blong Doktrin mo Ol Kavenan 30–36 mo faenem wan samting we i givim insperesen long olgeta blong oli givim seves. Yu save poenemaot se ol misinari we oli tokbaot olgeta long ol seksen ia, oli bin niu mo oli no gat eksperiens insaed long Jos. ?Wanem nao i mekem olgeta oli kwalifae blong serem gospel? Maet bae yu wantem blong soem wan long ol vidio we i stap long “Sam Moa Risos.” ?Wanem nao ol vidio ia oli stap talem abaot risen from wanem yumi sapos blong givim seves olsem ol misinari, mo olsem wanem yumi save rere from?
-
I no evriwan i gat janis ia blong givim seves long wan fultaem misin, be yumi evriwan i save invaetem ol narawan blong kam long Kraes mo lisin long mesej blong Restoresen. Ol memba blong klas oli save mekem wan lis blong ol defren wei we “oli save openem maot blong olgeta” (Doktrin mo Ol Kavenan 33:8–10). ?Wanem nao sam janis we yumi gat, we i kam olsem nomo, blong save serem ol bilif blong yumi wetem ol narawan? ?Wanem kaonsel nao we i stap long Doktrin mo Ol Kavenan 30–36 we i blong yusum blong serem gospel long ol wei ia? Tingting blong askem samfala memba blong klas, we oli bin gat ol gudfala eksperiens blong stap serem gospel, blong oli kam blong serem ol aedia blong olgeta mo blong ansarem ol kwestin we klas i gat.
-
Lod i bin promesem Esra Teya mo Nortrop Swit se, sapos tufala i openem maot blong tufala blong serem gospel, bae tufala “i kam olsem Nifae blong bifo” (Doktrin mo Ol Kavenan 33:8). ?Wanem fasin nao Nifae i bin gat, we i go wetem fasin blong stap serem gospel? (eksampol, luk long 1 Nifae 3:7; 4:6; 10:17; 17:15; 2 Nifae 1:27–28). ?Olsem wanem nao, ol fasin ia, oli helpem yumi long ol traehad blong yumi blong serem gospel?
PikjaOl misinari oli stap tijLod i stap askem yumi blong prijim gospel long taem blong yumi tedei, i semmak nomo olsem long ol fas dei blong Jos.
Doktrin mo Ol Kavenan 32–33; 35
Lod i stap mekem yumi rere from wok ia we Hem i wantem yumi blong mekem.
-
?Olsem wanem nao Lod i stap helpem yumi blong mekem wok blong Hem? Blong toktok raon long laef blong ol pipol we oli stap tokbaot olgeta insaed long Doktrin mo Ol Kavenan 32–33, 35 i wan gud ples blong stat wetem blong tingting hevi long ol eksperiens ia. Wan tingting, i blong yu serem, wetem klas, stori blong visen blong Esra Teya we i stap long “Sam Moa Risos,” mo afta invaetem ol memba blong klas blong oli ridim Doktrin mo Ol Kavenan 33:1–13, we i pat blong wan revelesen i go long Esra Teya. ?Olsem wanem nao Lod i bin stap mekem Esra i rere blong wok ia we Lod i wantem hem blong mekem? (luk long Doktrin mo Ol Kavenan 33:2). Yu save askem wan memba blong klas blong serem sam infomesen bakgraon abaot rilesensip bitwin Parli P. Prat mo Sidni Rigdon (luk long “Voices of the Restoration: Early Convert Testimonies” insaed long Kam Folem Mi—Blong Wanwan Man, Woman mo Famli). ?Olsem wanem rilesensip ia i blesem Jos? ?Wanem pruf nao yumi luk, we i soem se han blong Lod i bin stap insaed long laef blong olgeta man ia? Maet ol memba blong klas oli save serem ol eksperiens we i bin helpem olgeta blong luk se, long wan semmak wei, Lod i savegud long olgeta.
Sam Moa Risos
Visen blong Esra Teya.
Esra Teya i bin raetem se, samtaem bifo hem i kasem baptaes, hem i bin gat wan visen, mo insaed long visen ia, “wan man i bin kam, mo i tekem wan rol blong pepa i kam, i givim long mi; mo tu, i givim wan pupu mo i talem se bae mi plei long hem. Mi talem long hem se mi neva plei pupu long laef blong mi. Hem i talem se: yu save plei long hem; yu traem. … Hem i mekem wan naesfala saon, we mi neva harem bifo (“Revelation, October 1830–B, Revelation Book 1,” historical introduction, josephsmithpapers.org). Afta, taem we Josef Smit i bin kasem wan revelesen blong Esra Teya mo Nortrop Swit, we naoia oli rekodem olsem Doktrin mo Ol Kavenan 33, Esra i tekem se hemia i revelesen ia we i olsem rol pepa insaed long visen blong hem.
Stap Kam Antap long Fasin blong Yumi blong Stap Tij
Leftemap tingting blong gat wan ples we i gat respek long hem. “Helpem ol memba blong klas blong oli andastanem se wanwan long olgeta i tekpat long spirit insaed long klas. Leftemap tingting blong olgeta blong helpem yu blong stanemap wan ples we man i filim fri blong serem tingting, blong man i filim lav mo respek, blong evriwan i fri mo i filim sef blong serem ol eksperiens, blong askem ol kwestin mo serem ol testemoni” (Teaching in the Savior’s Way, 15).