yut aotsaed long tempol

26 Epril–2 Mei.

Doktrin mo Ol Kavenan 45

“Ol Promes … Bae Oli Kamtru”

Taem yu stap stadi long Doktrin mo Ol Kavenan 45, tingting abaot wanem ves, kwot blong ol lida blong Jos, eksperiens, kwestin mo ol nara risos we yu save yusum blong tijim doktrin. Taem yu stap tij, invaetem ol memba blong klas blong raetemdaon ol kwaet toktok blong Spirit we oli bin kasem mo blong oli mekem wan plan blong tekem aksen folem.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Ol memba blong klas oli save raetem long wan pis pepa namba blong ol ves we oli kamaot long Doktrin mo Ol Kavenan 45 we i bin givim insperesen long olgeta. Afta, yu save pikimap ol pepa ia, jusum samfala, mo invaetem ol memba blong klas we oli bin raetem olgeta, blong oli ridim ol ves blong olgeta long klas mo serem from wanem oli jusum olgeta. Leftemap tingting blong ol narawan blong oli serem ol niu tingting blong olgeta.

tijing pikja bokis

Stap Tijim Doktrin

Doktrin mo Ol Kavenan 45:1–5

Jisas Kraes i Loya blong yumi long fored blong Papa.

• ?I gat eniwan long klas blong yu we i save tokbaot wanem nao wan loya i stap mekem? ?Bae i help blong lukluk i go long mining blong toktok ia stretem long wan diksonari. Wetem andastaning ia, ol memba blong klas oli save sidaon tutu mo ridim Doktrin mo Ol Kavenan 45:3–5 tufala tugeta. Oli save serem wetem tufala eni toktok o sentens aot long ol ves ia we i save helpem olgeta blong andastanem rol blong Jisas Kraes olsem Loya blong yumi wetem Papa. (Luk tu long 2 Nifae 2:8–9; Mosaea 15:7–9; Moronae 7:27–28; Doktrin mo Ol Kavenan 29:5; 62:1.) Tingting blong askem ol memba blong klas blong oli save serem ol filing blong olgeta abaot Sevya we i stap olsem Loya blong olgeta.

Doktrin mo Ol Kavenan 45:11–75

Yumi no nid blong fraet from Seken Kaming.

• ?Olsem wanem nao yu save helpem ol memba blong klas blong oli luk ol klia woning mo ol promes blong hop insaed long seksen 45? Eksampol: yu save raetem ol heding ia long bod: Ol Profesi mo Ol Blesing we God i Promesem, mo ol memba blong klas oli save raetem, andanit long ol heding ia, ol tijing we oli faenem insaed long Doktrin mo Ol Kavenan 45:11–75. ?From wanem Lod i wantem yumi blong save abaot ol samting ia bifo taem? ?Wanem nao yumi save mekem naoia blong rere blong kasem ol blesing ia?

• Maet ol memba blong klas oli save serem advaes wetem wanwan long olgeta abaot wei blong lukluk samting long gud saed mo gat hop taem yumi stap fesem ol bigfala trabol we oli talem finis se bae i kam long taem blong yumi (olsem olgeta we oli tokbaot insaed long Doktrin mo Ol Kavenan 45:11–75). Blong helpem ol memba blong klas blong wet from Seken Kaming wetem fet, be i no fraet, yu save soem vidio ia : “Men’s Hearts Shall Fail Them” (ChurchofJesusChrist.org). ?Long wanem wei nao hat blong ol pipol i mekem olgeta oli go rong long taem blong yumi tedei? (luk long ves 26). ?Wanem kaonsel nao Presiden Nelson i stap givim long vidio ia blong helpem yumi blong fesem ol situesen blong fraet wetem pis?

Doktrin mo Ol Kavenan 45:31–32

“Stanap long ol tabu ples,” mo man i no muvumaot yu long hem.

• Maet ol memba blong klas oli glad blong serem ol niu tingting blong olgeta abaot hao oli stap traehad blong stap “stanap long ol tabu ples,” olsem we Lod i bin givim kaonsel long Doktrin mo Ol Kavenan 45:31–32. ?Olsem wanem nao yumi save krietem ol tabu ples insaed long laef blong yumi? Toktok we i stap long “Sam Moa Risos” mo vidio ia: ““Stand Ye in Holy Places—Bloom Where You’re Planted” (ChurchofJesusChrist.org) i save givim moa niu tingting long storian.

  ol ten yang gel

  Parabol blong Ol Ten Yangfala Gel, i kam long Dan Burr

sam moa risos pikja bokis

Sam Moa Risos

“Stanap long Ol Tabu Ples.”

Sista Ann M. Dibb, wan foma memba blong Yang Woman Jeneral Presidensi, i bin tijim se instraksen ia blong stanap long ol tabu ples mo no muvaot long hem “i eksplenem wei blong kasem proteksen, paoa, mo pis long ol taem we oli no kwaet.” Afta we hem i poenemaot se ol tabu ples ia, i minim tu ol tempol, ol japel, mo ol hom blong yumi, hem i talem se “wanwan i save faenem plante moa ples.” Hem i gohed i talem:

“Faswan, i gud blong lukluk long toktok ia, ples, olsem wan ples long envaeromen, o wan ples we i stap samples. Be, wan ples hem i save tu stap olsem ‘wan spesel situesen, posisen, o samting we i stap long maen’ [Merriam-Webster.com Dictionary, “place,” merriam-webster.com]. Hemia i minim se, ol tabu ples, oli save stap tu olsem ol sot taem long taem we i pas—ol sot taem, taem we Tabu Spirit i testifae long yumi; ol sot taem, taem we yumi filim lav blong Papa long Heven, o ol sot taem taem we yumi kasem wan ansa long prea blong yumi. Iven moa, mi biliv se eni taem we yu gat strong paoa long tingting blong stanap from samting we i raet, speseli long ol situesen we i no gat wan i glad blong mekem olsem, nao, yu stap krietem wan tabu ples” (“Your Holy Places,” Ensign o Liahona, May 2013, 115).

Stap Kam Antap long Fasin blong Yumi blong Stap Tij

Stap wan testemoni we i laef i stap. Taem yu stap laef folem doktrin we yu stap tijim, bae yu save talem witnes blong yuwan we i gat paoa, se hemia i tru. Tabu Spirit bae i konfemem testemoni blong yu long hat blong ol memba blong klas. Tingting long olgeta prinsipol ia we bae yu stap tijim long wik ia, mo long ol wik we oli stap kam. ?Olsem wanem nao bae yu laef folem olgeta moa fulwan? (Luk long Teaching in the Savior’s Way, 13–14.)