10–16 Mei

Doktrin mo Ol Kavenan 49–50

“Wanem we I Kam long God, I Laet”

Blong save “prijim toktok blong trutok blong mi folem Spirit blong Givhan” (Doktrin mo Ol Kavenan 50:17), lukaotem insperesen we i kam long heven taem yu stap tingting hevi long Doktrin mo Ol Kavenan 49–50. Afta, yu mas gat wan open tingting long daereksen we God i stap givim long yu taem yu stap tij.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Antap long fasin blong serem ol niu tingting we oli bin kasem taem oli bin stadi long ol skripja, ol memba blong klas oli save lanem samting taem oli storian long wei we ol niu tingting ia oli bin kam long olgeta. Yu save invaetem ol memba blong klas blong oli serem ol nara niu tingting abaot wan ves insaed long Doktrin mo Ol Kavenan 49–50 mo toktok raon long wanem i bin lidim olgeta blong gat ol niu tingting ia.

Stap Tijim Doktrin

Doktrin mo Ol Kavenan 49; 50:1–36

Ol trutok blong gospel oli save helpem mi blong luksave ol giaman tijing.

• Seksen 49 i kam blong talem se hemia i tru doktrin we i kam stretem wanem ol nara pipol oli bin stap tijim (luk long aotlaen blong wik ia insaed long Kam Folem Mi—Blong Wanwan Man, Woman mo Famli blong gat sam histri bakgraon). Blong helpem ol memba blong klas blong luklukgud insaed long seksen ia, yu save serem ol memba blong klas i go long grup, mo givim long wanwan grup, wan long ol doktrin topik we seksen ia i kavremap (olsem we i stap long lis long seksen heding blong seksen 49). Ol grup oli save toktok raon long olgeta kwestin ia: ?Wanem trutok nao Lod i stap tijim abaot topik ia insaed long seksen 49? ?Wanem nao ol pipol oli stap biliv long hem long saed blong topik ia tedei? ?Wanem moa trutok nao Lod i bin tij abaot tru long ol profet blong lata-dei? Givim wan janis long ol memba blong klas blong serem ol fasin blong talem tangkyu from ol trutok we Lod i talemaot long taem blong yumi tedei.

• Olsem ol elda long Ketlan, we oli “no andastanem we ol defren spirit oli stap soemaot samting olbaot long wol” (Doktrin mo Ol Kavenan 50, seksen heding) samtaem yumi stap askem yumiwan sapos samting ia we yumi stap filim o luk, i kam long Spirit o i kam long wan nara paoa. ?Wanem nao bae yumi save lanem aot long Doktrin mo Ol Kavenan 50:1–36 blong helpem yumi blong luksave paoa blong Spirit? Yu save letem wanwan memba blong klas blong jusum wan set blong ol ves blong stadi, mo afta, askem ol memba blong klas ia blong oli serem wanem oli faenem.

Doktrin mo Ol Kavenan 49:15–17

Mared bitwin man mo woman hem i wan mas long plan ia blong God.

• From se mared i stamba long plan blong Papa long Heven, Setan i wantem tumas blong mekem man i konfius long saed blong plan ia. Klas blong yu i save lanem moa sapos oli mekem wan lis, antap long bod, blong ol trutok we Lod i bin soemaot abaot mared. Eksampol: ?Wanem trutok abaot mared yumi lanem aot long Doktrin mo Ol Kavenan 49:15–17? Ol nara skripja we oli save help, i gat Jenesis 2:20–24; 1 Korin 11:11; o ol narawan we oli stap long“Mared, Maredem” insaed long Gaed long Ol Skripja (olskripja.ChurchofJesusChrist.org). Ol memba blong klas oli save faenem ol trutok tu insaed long “Famli: Wan Ofisol Toktok I Go long Wol.” Folem wanem yumi stap lanem aot long ol risos ia, ?from wanem mared bitwin wan man mo wan woman, i wan mas long plan blong God? (luk long “Sam Moa Risos”)

  

  Mared bitwin wan man mo wan woman, God nao i odenem.

Doktrin mo Ol Kavenan 50:13–22

Ol tija mo olgeta we oli stap lan, tugeta oli kam antap tru long Spirit.

• Instraksen blong Lod long saed blong stap prijim mo stap kasem trutok, maet i stap olsem wan gudfala janis blong toktok raon long rol ia we tija mo memba blong klas oli serem blong stap pusum fasin blong stap lanem gospel. Tingting blong askem ol memba blong klas blong oli sidaon tutu blong luklukbak long Doktrin mo Ol Kavenan 50:13-22 mo toktok raon long ol rol blong Spirit, ol tija mo olgeta we oli stap lan. Sam long olgeta oli save serem, wetem klas, wanem nao oli bin lanem. ?Wanem sam “nara wei” we, samtaem, yumi stap traem blong tijim o lanem gospel? (ves 17). ?Olsem wanem bae yumi save kam gud moa blong save kasem gospel tru long Spirit? ?Wanem nao yumi kasem insperesen blong mekem insaed long ol hom blong yumi, mo long jos, blong kam gud moa blong tijim mo lanem gospel?

Sam Moa Risos

Mared i wan mas insaed long plan blong Papa long Heven.

Elda David A. Bednar i bin eksplenem from wanem mared i wan mas insaed long plan we God i gat blong fasin blong sevem man.

“Tru long wan tabu plan, tingting i stap blong ol man mo ol woman oli progres i go blong oli kam stret evriwan mo oli kasem wan ful glori. From ol defren fasin mo paoa blong olgeta, man mo woman, wanwan long tufala i tekem i kam insaed long wan mared rilesensip, wan rilesensip wetem ol lukluk mo ol eksperiens we i spesel long tufala, mo i no narawan. Man mo woman, tufala i tekem ol defren samting i kam, be tufala i ikwol long wanem tufala i karem i kam, mo tufala i tekem wan yuniti we i no save hapen long wan nara wei. Man i kam komplitim mo mekem woman i kam stret evriwan, mo woman i komplitim mo mekem man i kam stret evriwan, hemia taem tufala i stap lanem samting aot long tufala bakegen, mo tufala i stap mekem wanwan long tufala i strong moa mo blesem wanwan long tufala bakegen. …

“Wan hom wetem wan hasban mo waef we oli gat lav mo oli tru long tufala, i stret ples we i hae evriwan we tufala i save lukaotem ol pikinini wetem lav mo stret mo gud fasin; mo tu, i stret ples we tufala i save lukluk long ol nid long saed blong spirit mo long saed blong laef ia, blong ol pikinini. Semmak olsem we ol spesel fasin blong tugeta, ol man mo ol woman oli kontribiut blong mekem wan mared rilesensip i fulwan, bae ol semfala fasin ia, oli impoten tumas blong lukaotem, fidim, mo tijim ol pikinini” (“Marriage Is Essential to His Eternal Plan,” Ensign, June 2006, 83–84).

Stap Kam Antap long Fasin blong Yumi blong Stap Tij

Lidim ol toktok wetem insperesen. Evriwan i gat wan samting blong talem blong givhan long storian insaed long klas, be samtaem, i no evriwan i gat janis blong toktok. Taem yu stap folem toktok blong Spirit, lukaotem ol wei blong mekem se i gat moa pipol insaed long klas we bae oli serem ol tingting mo ol filing blong olgeta.