Indipendens Misuri rod

Indipendens, Misuri, i kam long Al Rounds

24–30 Mei

Doktrin mo Ol Kavenan 58–59

“Wok Wetem Strong Tingting long Wan Gud Wok”

Afta we yu ridim Doktrin mo Ol Kavenan 58–59, tingting long olgeta kwestin ia: ?Wanem insperesen yu filim blong serem wetem klas blong yu? ?Wanem nao yu hop we bae oli faenemaot? ?Olsem wanem bae yu helpem olgeta blong faenemaot olgeta samting ia?

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Blong pusum ol memba blong klas blong oli serem wanem we oli bin lanem long taem blong skripja stadi blong olgeta, yu save raetem olgeta kwestin ia long bod: ?Wanem nao yumi bin lanem? ?Olsem wanem nao bae yumi laef folem wanem yumi bin lanem? Ol memba blong klas oli save raetem andanit long fas kwestin, wan lis blong ol trutok we oli faenem insaed long Doktrin mo Ol Kavenan 58–59. Oli save spendem sam minit blong toktok raon long ol aedia blong stap laef folem ol trutok ia, mo raetem ol aedia blong olgeta andanit long nambatu kwestin.

tijing pikja bokis

Stap Tijim Doktrin

Doktrin mo Ol Kavenan 1–5, 26–33

Ol blesing oli kam folem taem blong God mo folem hamas yumi stap wok strong.

• Doktrin mo Ol Kavenan 58 i stap tijim ol trutok we oli save tekem pis i kam long ol taem blong tes. Maet ol memba blong klas oli faenem sam long ol trutok ia long taem we oli bin stap stadi long seksen ia; invaetem olgeta blong serem wanem we oli bin faenem. O, oli save luklukgud insaed long ol ves 1–5, 26–33 insaed long klas; oli save mekem hemia wanwan, o long ol grup; oli lukaotem wan samting we i save helpem wan narawan we i stap gotru long fasin blong agens, o i stap wet long wan blesing blong promes. Afta we oli serem wanem oli faenem, maet sam memba blong klas oli save serem ol eksperiens o ol nara skripja we i bin konfemem ol trutok ia insaed long ol ves ia.

• Olsem pat blong storian blong yufala raon long prinsipol ia, yu save soem vidio ia: “Hope Ya Know, We Had a Hard Time” (ChurchofJesusChrist.org) mo toktok raon long wanem yumi save mekem blong helpem olgeta we oli stap gotru long ol taem we oli had. Kwot ia we i kam long Sista Linda S. Reeves, we i stap long “Sam Moa Risos,” i save helpem storian blong yufala insaed long klas. ?Olsem wanem ol toktok blong Sista Reeves i tajem wei we yumi stap luk ol tes blong yumi?

Doktrin mo Ol Kavenan 58:26–29

Yumi save “mekem plante stret mo gud samting” oli hapen long “tingting blong yumiwan” nomo.

• ?Wanem nao ol memba blong klas oli lanem aot long stadi blong olgeta long Doktrin mo Ol Kavenan 58:26–29 long wik ia? Maet yu save serem klas i go long ol grup, mo invaetem ol memba blong klas blong toktok raon, insaed long grup blong olgeta, ol sentens insaed long ol ves ia, we oli faenem se oli gat mining. ?Olsem wanem nao ol ves ia oli givim insperesen long yumi blong “mekem plante stret mo gud wok oli kamtru”? (Ves 27). ?From wanem Lod i no wantem se oli “mas fosem [yumi] long evri samting?” (ves 26). ?Wanem nao ol ves ia oli stap talem long yumi abaot wanem Lod i wantem yumi blong kam olsem?

Doktrin mo Ol Kavenan 59:9–19

Sabat i dei ia blong Lod.

• Blong helpem ol memba blong klas blong lukluk insaed long wanem Lod i bin tijim ol fasfala Sent long Misuri abaot Sabat, yu save invaetem olgeta blong luklukgud insaed long Doktrin mo Ol Kavenan 59:9–19 mo mekem wan lis, long bod, blong wanem wanwan long ol ves ia oli stap tijim yumi abaot Sabat. Ol memba blong klas oli save serem tu olsem wanem testemoni blong olgeta abaot Sabat i bin gro taem oli bin stap kipim Sabat dei i tabu. Websaet ia, Sabbath.ChurchofJesusChrist.org i gat sam vidio we i save help blong statem wan storian insaed long klas.

• Insaed long Doktrin mo Ol Kavenan 59, Lod i tij abaot Sabat dei mo yusum ol toktok olsem “glad,” “hat mo fes we i hapi,” mo “glad hat” (ol ves 14–15). Ol memba blong klas oli save lukaotem ol toktok olsem long ol ves 9–19. Afta, ol memba blong klas oli save serem wanem oli stap mekem blong i gat glad taem long Sabat. ?Olsem wanem nao yumi save yusum ol ves ia blong tijim wanwan long yumi from wanem yumi stap ona long Sabat dei?

• Storian ia insaed long klas i wan janis blong ol memba blong klas oli serem ol aedia abaot wei we, olgeta mo famli blong olgeta, i stap yusum Sabat blong mekem hom blong olgeta i stap long senta blong lanem gospel. Invaetem olgeta blong serem olsem wanem ol hadwok blong olgeta i helpem olgeta blong “lukaot gud blong ol samting blong wol oli no spolem [olgeta]” (ves 9).

  bred mo kap blong sakramen

  Sakramen i wan impoten pat blong stap ona long Sabat dei.

sam moa risos pikja bokis

Sam Moa Risos

Ol hadtaem blong yumi oli save lidim yumi i go long Sevya.

Linda S. Reeves, foma memba blong Rilif Sosaeti jeneral presidensi i tijim:

“Lod i letem blong oli traem mo testem yumi, samtaem, i go kasem ful mak blong paoa blong yumi. Yumi bin luk laef blong olgeta we yumi lavem—mo mebi laef blong yumiwan bakegen––we i bon kasem graon, mo yumi bin stap askem yumiwan se, from wanem, wan Papa long Heven we i gat lav mo kea, bae i letem ol kaen samting olsem oli hapen. Be Hem i no stap livim yumi i stap long asis; Hem i stanap wetem ol han blong Hem oli open bigwan, i stap invaetem yumi wetem ful hat blong Hem blong yumi go long Hem. …

“ … Hem i wantem tumas blong helpem yumi, blong givim kamfot long yumi, mo blong mekem ol sobodi blong yumi i godaon taem yumi stap dipen long paoa blong Atonmen mo taem yumi stap ona long ol kavenan blong yumi. Ol tes mo ol hadtaem we yumi stap gotru long olgeta, maet bae oli ol stret samting ia we bae oli lidim yumi i go long Hem, mo oli lidim yumi blong hang strong long ol kavenan blong yumi blong yumi save gobak stap long ples blong Hem, mo kasem evri samting we Papa i gat” (“Claim the Blessings of Your Covenants,” Ensign o Liahona, Nov. 2013, 119–20).

Stap Kam Antap long Fasin blong Yumi blong Stap Tij

Meksua se yu stap tijim tru doktrin. “Gohed blong askem yuwan: ‘?Hao nao wanem we mi stap tijim, bae i helpem ol memba blong klas blong mi blong oli bildimap fet blong olgeta long Kraes, sakem sin, mekem mo kipim ol kavenan wetem God, mo kasem Tabu Spirit?’” (Teaching in the Savior’s Way, 20).