Misuri Reva

Kamp Faea long Misuri, i kam long Bryan Mark Taylor

31 Mei–6 Jun

Doktrin mo Ol Kavenan 60–62

“Evri Samting we I Laef I Stap long Han blong Mi”

Elda Ronald A. Rasband i talem: “Wanwan long yumi i mas mekem yumiwan i kam strong moa long spirit fastaem, mo afta, i mekem olgeta raon long yumi i kam strong moa. Tingting hevi long ol skripja, mo tingbaot ol tingting mo ol filing we yu gat taem yu ridim skripja” (“Nogud Yufala I Fogetem,” Ensign o https://www.churchofjesuschrist.org/study/general-conference/2016/10/lest-thou-forget?lang=bis, Okt 2016).

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Yu save givim insperesen blong i gat wan gudfala storian we i gat mining taem yu invaetem ol memba blong klas blong ansa long sam spesifik kwestin o aedia we i go wetem ol skripja we oli stap ridim long hom. Eksampol: yu save invaetem olgeta blong serem wan samting we oli bin lanem long wik ia abaot Papa long Heven o Jisas Kraes.

tijing pikja bokis

Stap Tijim Doktrin

Doktrin mo Ol Kavenan 60:2–3, 7, 13–14; 62:3, 9

Lod i glad taem yumi openem maot blong yumi blong serem gospel.

• Olsem ol memba blong Jos, yumi save se gospel we i kambak i wan rij samting we i blesem laef blong ol pikinini blong God. ?From wanem, samtaem, yumi tingting tu taem bifo yumi serem testemoni blong yumi wetem ol narawan? Tingting blong invaetem ol memba blong klas blong raetem wan lis, long bod, blong sam long ol risen from wanem maet yumi no stap openem maot blong yumi blong serem gospel. Afta, ol memba blong klas oli save ridim Doktrin mo Ol Kavenan 60:2–3, 7, 13–14; 62:3, 9, ,mo stap lukaotem ol toktok, o ol sentens we i givim insperesen long olgeta blong stap serem gospel. Oli save raetem wanem we oli faenem long bod. Maet ol memba blong klas oli save serem ol eksperiens blong ol taem we oli bin winim ol fraet blong olgeta, mo oli bin serem gospel wetem wan.

• Truaot long Doktrin mo Ol Kavenan 60–62, i gat olgeta tijing, we oli talem stret mo oli no talem stret, abaot fasin blong stap serem gospel. Blong helpem ol memba blong klas blong faenemaot ol tijing ia, yu save askem wanwan blong luklukbak long wan long ol seksen ia, mo serem eni samting we oli faenem we i stap tijim olgeta abaot fasin blong serem gospel. Maet bae i helpem storian long klas blong rid abaot ol eksampol misinari long ol nara ples, insaed long ol skripja (olsem, luk long Ol Wok 8:27–40; Alma 19:16–17) mo toktok raon long wanem yumi lanem aot long ol skripja ia. ?Wanem eksampol nao yumi save serem aot long laef blong yumiwan? ?I gat eni memba blong klas we i save serem olsem wanem oli kam blong faenem gospel, mo olsem wanem nao oli bin filim abaot ol pipol we oli bin tijim olgeta? Maet klas blong yu i lanem moa sapos yufala i rolplei mo soem ol wei we yumi save “openem maot blong yumi” mo serem gospel.

  ol misinari long bas

  God i wantem yumi blong serem gospel wetem ol narafala man.

Doktrin mo Ol Kavenan 60:2–4; 61:1–2, 20, 36–38; 62:1, 6

Ol skripja oli stap tijim yumi abaot Jisas Kraes.

• Invaetem ol memba blong klas blong raetem long bod, eni samting we oli bin lanem abaot Sevya long wik ia taem oli bin stadi long ol seksen 60–62, wetem ol ves we oli go wetem. O oli save luklukgud insaed long Doktrin mo Ol Kavenan 60:2–4; 61:1–2, 20, 36–38; 62:1, 6 blong faenem ol samting we Sevya i tijim. ?Wanem stori we i kamaot long ol skripja o long laef blong yumiwan we i soemaot ol rol mo fasin blong Sevya we yumi bin lanem abaot finis? (eksampol, Jon 8:1–11; Ita 2:14–15). Yu save invaetem memba blong oli serem ol testemoni blong olgeta abaot Jisas Kraes, o long praevet taem, oli tingtingbak se Hem i minim wanem long olgeta.

Doktrin mo Ol Kavenan 60:5; 61:22; 62:5–8

Lod i wantem yumi blong mekem samfala desisen “olsem we [yumi] luk se i gud.”

• Tingting blong invaetem ol memba blong klas blong sidaon tutu o long grup, mo ridim Doktrin mo Ol Kavenan 60:5; 61:22; 62:5–8 mo afta, serem wanem oli filim abaot mesej blong Lod we i kam long yumi. ?Wetaem nao oli bin filim se oli sapos blong yusum jajmen blong olgeta nomo blong mekem wan desisen? Tingting blong serem wan toktok we i kam long Presiden Dallin H. Oaks we i stap long “Sam Moa Risos” olsem pat blong storian blong yufala insaed long klas. ?Olsem wanem wan papa mo mama i save helpem ol pikinini blong tufala blong lan abaot impoten prinsipol ia?

sam moa risos pikja bokis

Sam Moa Risos

Stap mekem folem bes jajmen blong yumi.

Presiden Dallin H. Oaks i tijim:

“Blong wantem blong Lod i lidim yu i wan strong paoa long tingting, be i nid blong i mas kam wetem save ia se Papa blong yumi long Heven i livim yumi nao blong mekem plante desisen long ol joes blong yumi. Blong stap tekem desisen yumiwan, i wan long ol stamba blong groap we yumi sapos blong gotru long hem long laef long wol ia. Olgeta we oli traem blong seftem wok blong stap mekem desisen i go long Lod, mo i askem revelesen long evri joes, bae i no longtaem, bae hem i luk se bae i gat ol taem we bae oli prea blong Lod i soem rod, mo bae oli no gat ansa. Eksampol: hemia i save hapen long plante kaen situesen, we joes blong mekem i no impoten, o eni joes, bae i oraet nomo.

“Yumi mas stadi long olgeta samting ia insaed long maen blong yumi, mo yusum ol paoa blong gud tingting we Krieta i putum insaed long yumi. Afta, yumi mas prea blong Hem i soem rod mo mekem folem sapos yumi kasem wan ansa. Sapos yumi no kasem wan ansa, yumi mas mekem samting folem bes jajmen blong yumi” (“Our Strengths Can Become Our Downfall,” Ensign, Oct. 1994, 13–14).

Stap Kam Antap long Fasin blong Yumi blong Stap Tij

Yu mas save olgeta we oli stap gat hadtaem blong mekem samting. Olgeta hadtaem blong olgeta we yu stap tijim, bae i had blong luksave nating nomo. Be, wetem help blong Spirit mo ol lida blong yu, yu save kam blong save bes wei blong go mo toktok long wanwan long olgeta ia. (Luk long Teaching in the Savior’s Way, 8–9.)