revelation manuscript book in display case

21–27 Jun

Doktrin mo Ol Kavenan 67–70

“Praes blong Olgeta I Moa Bigwan Bitim Ol Rij Samting blong Ful Wol Ia”

Blong stap rere blong tij, i minim blong mekem moa bitim blong stap tingting nomo long wanem bae yu talem mo mekem olsem tija. Hem i minim tu se yu tingting long wanem olgeta we oli stap lan oli save mekem blong tijim olgeta wanwan bakegen. ?Olsem wanem nao bae yu invaetem ol memba blong klas blong serem ol eksperiens o niu tingting we oli bin kasem taem oli bin stap ridim olgeta skripja ia?

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Antap long bod, yu save raetem Long wik ia, Lod i bin tijim mi se … mo invaetem ol memba blong klas blong finisim sentens ia wetem wan samting we oli bin lanem.

tijing pikja bokis

Stap Tijim Doktrin

Doktrin mo Ol Kavenan 67:1–9

Ol revelesen we Josef Smit i bin kasem oli tru mo oli kam long God.

• Blong andastanem histri bakgraon blong Doktrin mo Ol Kavenan 67 bae i save help blong toktok raon long seksen ia. Maet wan memba blong klas i save talem sot ol situesen we i bin stap long tetaem ia we i mekem se revelesen ia i kam (luk long Doktrin mo Ol Kavenan 67, seksen heding; Saints, 1:140–43). Sapos yumi bin stap long miting ia we oli bin tokbaot wok blong pablisim ol revelesen ia, ?wanem risen nao bae yumi givim blong save sapotem tingting ia? ?Wanem nao bae yumi talem long ol pipol we oli bin stap wari long tetaem ia abaot ol samting we oli no bin stret gud long lanwis we Josef Smit i bin yusum? ?Wanem nao seksen 67 i stap tijim yumi abaot ol profet mo revelesen? Ol memba blong klas oli save serem olsem wanem oli bin kam blong save olgetawan se ol revelesen ia oli tru.

Doktrin mo Ol Kavenan 68:1–6

Ol insperesen toktok blong ol wokman blong Lod, oli ol toktok blong Lod.

• Blong helpem ol memba blong klas blong toktok raon long Doktrin mo Ol Kavenan 68:1–6, yu save invaetem olgeta blong sidaon long ol smol grup, mo ridim ol ves ia mo serem long wanwan long olgeta ol trutok we oli lanem abaot ol tijing blong ol wokman blong Lod. Invaetem ol grup ia blong serem, wetem wanwan long olgeta, olsem wanem oli save se ol prinsipol we oli tijim insaed long ves 4 oli tru. Ol memba blong klas oli save serem ol eksperiens blong olgeta abaot wan taem we oli bin toktok, o oli bin tij “olsem we Tabu Spirit i lidim olgeta” (ves 3) mo olsem wanem Lod i bin stap wetem olgeta mo i bin stanap long saed blong olgeta (luk long ves 6).

• Sapos yu wantem toktok raon long wei we ol ves ia oli go wetem ol tijing blong ol wokman blong Lod insaed long jeneral konfrens, bae toktok blong Elda Jeffrey R. Holland we i stap long “Sam Moa Risos,” bae i save help. Ol memba blong klas oli save serem ol mesej blong las jeneral konfrens we i bin mekem fet blong olgeta i kam strong moa long doktrin we i stap long ol ves ia.

Doktrin mo Ol Kavenan 68:25–31

Papa mo mama, tufala i gat fas wok ia blong tijim ol pikinini blong tufala.

• ?I gat olgeta papa mo mama insaed long klas blong yu—o ol fiuja papa mo mama? Mebi oli save kasem wan samting sapos oli tokbaot kaonsel we Lod i bin givim long ol papa mo mama insaed long seksen 68. Eksampol. Maet sam papa mo mama insaed long klas oli save jusum wan prinsipol aot long ol ves 25–28 mo tokbaot olsem wanem oli stap traem blong tijim ol samting ia long ol pikinini blong olgeta, (ol ves 29–31 i gat sam impoten prinsipol tu i stap insaed long olgeta). O ol memba blong klas oli save tokbaot olsem wanem papa mo mama blong olgeta oli bin tijim ol prinsipol blong gospel long olgeta.

  ?From wanem hom i bes ples blong ol pikinini oli lanem gospel? ?Bae yufala i talem wanem long wan papa o mama we i filim se hem i no naf blong tijim olgeta samting ia long pikinini blong hem, o i filim se diuti ia i bigwan tumas?

  famli we i stap stadi

  God i bin givim responsabiliti long papa mo mama blong oli tijim ol pikinini blong tufala.

Doktrin mo Ol Kavenan 70:1–4

Yumi mas ansa from ol revelesen we Lod i bin givim long yumi.

• Lod i bin givim, long samfala brata, wok ia blong lukaotgud long ol revelesen ia, mo tekem olgeta i go long Misuri, mo lukluk ova long wok blong pablisim olgeta. ?Long wanem wei nao yumi stap luk yumi olsem ol man o woman we i gat wok ia blong lukaot gud long ol revelesen? ?Wanem nara tijing aot long seksen ia, abaot wok we yumi gat blong lukaotem, we i blong yumi?

sam moa risos pikja bokis

Sam Moa Risos

God i stap toktok long yumi tedei.

Elda Jeffrey R. Holland i bin serem olsem wanem prinsipol we oli tijim insaed long Doktrin mo Ol Kavenan 68:4 i go wetem Jeneral Konfrens: “Mi askem yufala blong tingtingbak, long ol dei we oli stap kam, i no long ol mesej ia nomo we yufala i bin harem, be tu, blong yufala i tingtingbak long bigfala samting ia, we i jeneral konfrens—wanem we yumi, olsem ol Lata-dei Sent, yumi biliv se ol konfrens ia oli wanem stret, mo wanem nao yumi stap invaetem wol ia blong harem mo stap lukluk long hem. Mifala i stap testifae, long evri nesen, famli, lanwis mo pipol, se God i stap laef, be tu, se Hem i stap toktok, se blong taem mo dei blong yumi, kaonsel we yumi bin harem, hem i, anda long daereksen blong Tabu Spirit, ‘tingting blong Lod, … i maen blong Lod, … i toktok blong Lod, … i voes blong Lod, mo paoa blong God we i go kasem fasin blong sevem man’ [Doktrin mo Ol Kavenan 68:4]” (“An Ensign to the Nations,” Ensign o Liahona, May 2011, 111).

Stap Kam Antap long Fasin blong Yumi blong Stap Tij

Helpem olgeta we oli stap lanem samting blong leftemap wanwan long olgeta bakegen. “Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong serem mo blong leftemap wanwan long olgeta bakegen” (Teaching in the Savior’s Way,5).