Davis Kaonti, Misuri

14–20 Jun

Doktrin mo Ol Kavenan 64–66

“Lod I Askem blong Mas Gat Wan Hat Mo Wan Maen we I Wantem Mekem Samting”

Long taem blong stadi blong yu long wik ia, wetem prea, tingting long wijwan prinsipol nao, insaed long Doktrin mo Ol Kavenan 64–66 bae i mekem fet mo save blong ol memba blong klas blong yu i kam antap moa.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong leftemap tingting blong ol memba blong klas blong oli save serem eni samting we i gat mining long skripja stadi blong olgeta long wik ia, yu save askem olgeta blong oli tingting hevi long ol jalenj we yumi stap fesem tedei. Afta, invaetem olgeta blong serem wan ves long Doktrin mo Ol Kavenan 64–66 we oli filim se i save helpem blong fesem wan long olgeta jalenj ia.

Stap Tijim Doktrin

Doktrin mo Ol Kavenan 64:1–11

Yumi mas fogivim evriwan.

• Mebi ol memba blong klas bae oli lanem samting sapos oli tokbaot from wanem blong save fogivim ol narawan i had tumas—mo olsem wanem nao oli bin kam blong winim ol samting ia we i bin had. Oli save luklukgud insaed long Doktrin mo Ol Kavenan 64:1–11 blong faenem ol prinsipol mo ol trutok we oli bin givim insperesen long olgeta blong oli save fogiv moa. ?Wanem nao yu lanem abaot Sevya aot long ol ves ia? Blong help blong soem ol blesing blong fogivnes, yu save serem stori blong Morrell Bowen, we i kam long mesej blong Jeffrey R. Holland “Seves Ia blong Man I Stretem Hemwan” (Ensign o Liahona, Nov 2018, 77–79) o vidio ia: “Forgiveness: My Burden Was Made Light” (ChurchofJesusChrist.org). O, wan memba blong klas bae i glad blong serem wan stori blong hemwan abaot fasin blong fogivim man, o blong kasem fogivnes. ?Olsem wanem nao ol pipol insaed long stori ia oli bin kasem blesing tru long paoa blong fogivnes?

Doktrin mo Ol Kavenan 64:31–34

Lod i askem blong mas gat wan “hat mo wan maen we i wantem mekem samting.”

• Lod i no wantem yumi blong yumi “taed;” be, i nomol nomo blong ol pipol oli traem bes blong olgeta—mo ating i gat sam insaed long klas blong yu tu—we oli kam “taed blong mekem gud samting.” ?From wanem yumi save taed? ?Wanem kaonsel nao yumi faenem insaed long Doktrin mo Ol Kavenan 64:31–34 we i save helpem yumi taem yumi stap gat hadtaem wetem ol kaen filing olsem?

• Blong mekem storian blong yufala i kam rij, yu save soem ol pikja blong wan samting we i bigwan mo i bigwan tumas, we oli bin bildim ova long wan longfala taem, wetem “ol smol samting”—olsem wan kala glas pikja, o wan bilding we oli wokem long brikis. ?Wanem nao sam long ol eksampol blong “bigfala wok” ia we Lod i bin givim long yumi? ?Wanem smol samting nao yumi save mekem naoia blong putumdaon fandesen blong wok ia?

• Blong helpem ol memba blong klas blong tingting i go moa dip insaed long Doktrin mo Ol Kavenan 64, yu save raetem hat mo maen we i wantem antap long bod. Ol memba blong klas oli save raetem andanit long ol heding ia, wanem we oli filim se i minim, blong givim hat mo wan maen we i wantem, i go long Lod. Blong kasem mining blong ol toktok ia, lukluk long ol toktok blong Elda Donald L. Hallstrom insaed long “Sam Moa Risos.” Ol skripja olsem olgeta we oli kam afta ia, oli save givim sam niu tingting: Mosaea 7:33; Ita 4:15; Doktrin mo Ol Kavenan 43:34; Moses 7:18; Josef Smit—Histri 1:19.

Doktrin mo Ol Kavenan 65

Kingdom blong God long wol ia, i mekem wol ia i rere blong Sevya i kambak.

• Doktrin mo Ol Kavenan 65 i tokbaot klia, wetem insperesen, misin blong Jos blong Lod long ol las dei ia. Blong helpem ol memba blong klas blong luk pat blong olgeta insaed long misin ia, yu save invaetem olgeta blong luklukgud insaed long seksen 65 blong lukaotem ol ansa blong ol kwestin olsem: “?Wanem nao Lod i wantem kingdom blong Hem i mekem i kamtru long wol ia? ?Wanem nao Hem i wantem mi blong mekem blong save help? Mo tu, yu save wajem vidio ia: “Prepare Today for the Second Coming” (ChurchofJesusChrist.org) o lukluk i gobak long mesej blong Presiden Dallin H. Oaks we i stap long “Sam Moa Risos.” Ol memba blong klas oli save serem olsem wanem bae oli ansarem ol kwestin blong Presiden Oaks.

Sam Moa Risos

“Wan hat mo wan maen we i wantem mekem samting.”

Elda Donald L. Hallstrom

“Hat i simbol blong lav mo komitmen. Yumi mekem ol sakrifaes mo tekem ol hevi samting blong olgeta we yumi lavem; i no gat eni nara risen from wanem yumi mekem hemia. Sapos i no gat lav, bae komitmen blong yumi i no save strong. …

“Blong gat ‘wan hat we i wantem mekem samting’ i stap minim blong givim bes hadwok blong yumi, mo tingting ia we i nambawan evriwan, mo blong stap lukaotem waes tingting blong God. Hem i minim se, laeftaem stadi ia blong yumi we yumi mas givim tingting mo taem long hem, hem i sapos blong stadi blong ol samting we oli blong taem we i no save finis. Hem i minim se i mas gat wan rilesensip we i strong tumas bitwin fasin blong harem tok blong God mo fasin blong stap obei long tok ia” (“The Heart and a Willing Mind,” Ensign, June 2011, 31–32).

Stap Rere from Seken Kaming.

“?Olsem wanem sapos dei ia blong kaming blong Jisas Kraes, bae hem i tumoro? Sapos yumi stap save finis se bae Lod i kam tumoro—tru long wan eli ded blong yumi, o tru long dei ia blong Hem we yumi stap wet from—?bae yumi mekem wanem tedei? ?Wanem samting bae yumi konfes long hem? ?Wanem praktis bae yumi konfes? ?Wanem kaon bae yumi go stretem? ?Wanem fogivnes bae yumi givim? ?Wanem testemoni bae yumi talem?” (Dallin H. Oaks, “Preparation for the Second Coming,” Ensign o Liahona, May 2004, 9).

Stap Kam Antap long Fasin blong Yumi blong Stap Tij

Karem paoa blong yu long Sevya. “Taem yumi stap traem bes blong laef mo tij moa olsem Sevya, bae yumi no save ronwe long hem, be samtaem, bae yumi foldaon. Yu no slakem tingting blong yu; be, yu letem blong ol mistek mo ol wiknes blong yu oli mekem se yu yu tanem yu i go long Papa long Heven mo long Sevya” (Teaching in the Savior’s Way,14).